Прп. Неофиту Затворнику Кипрскому часть службы

Сентября 28 дня обретение и перенесение честных мощей, 
января 24 дня преставление, 
апреля 12 дня чудо святаго Неофита.

Преподобнаго отца нашего НЕОФИТА, Затворника Кипрскаго

На «Господи, воззвах», глас 8.
Подобен: О, преславнаго чудесе!

Преподóбне óтче Неофúте,/ крест Госпóдень на рáмо взем,/ рáзумом богонóсным/ Христу послéдуя,/ постáми, блажéнне, и лишéньми,/ плóти мудрование успúл есú,/ благодáтию же упрáвлен,/ в затвóре, всемýдре, и уединéнии,// всем учúтель спасéния содéлался еси.

Отче богонóсе Неофúте,/ яко световúдная звездá,/ от Лефкары возшéд/ и дýши осветú/ кúприóтов, всеблажéнне,/ обновлéнному бо житию поучáяся,/ óбраз явú жúзни в Дýсе,/ сего рáди искушéний избáви/úже на тя уповáющих/ и твою пáмять всекрáсную// почитáющих вéрно.

О, преслáвнаго чудесе!/ Подвижник Христов Неофúт честный/ в пещéру вселúся на трúдесять лет,/ никакожé довольно хлеба вкусúв,/ во плóти сый, победи врагá безплóтнаго,/ о, чистоты,/ еяже рáди речения слыша ангелькая.// Тем того восхваляем, радуяся.



Слава, глас тойже.

Преподóбне óтче,/ Христý вослéд úдя,/ глас Архáнгелов услышав,/ в пещéру вселúся,/ молúтвою и пощéнием/ в сей аки безплóтен претерпевáя,/ вышних тáинств сподóбися зрéния/ и исцелéний благодáть притяжáл еси./ Убо яко имéяй дерзновéние/ ко Хрúсту Богу,/ о нас Того моли,\ спастúся душáм нáшим.

Тропарь, глас 1:
 
Левкарúйских жúтелей похвалó/ и киприóтов возношéние,/ обúтели уединéнныя устроúтелю,/ Богонóсе Неофúте отче наш,/ постóм, бдéнием, молúтвою/ и еже в затвóре претерпевáнием/ Божéственную благодáть приúм,/ éюже ныне верных обогащáет/ рáка мощéй твоих./ Слава тою Ущéдрившему ны,/ слава Прослáвльшему тя,// слава Действующему тобою всем исцеления.

Ин, глас тойже:

Земли кúпрския затворник/ и чудотвóрец явился еси,/ Богоносе отче Неофúте,/ постом, бдением, молитвою/ Небесная дарования приим,/ исцеляеши недужныя/ и души верою приходящих ти./ Слава Давшему тебе крепость,/ слава Венчашему тя,// слава Действующему тобою всем исцеления.

Кондак, глас 3:

Земнáя и тленная наслаждéния/ презрéвый яве,/ преблажéнне отче Неофúте,/ пустыни Кипрския/ явился еси ангел непорóчен,/ молитвою, постом и покаянием/ Небесныя обители достиг,/ и с лики преподобных веселишися,/ темже чтуще память твою,/ вопиéм ти прилéжно:/ от бед избави нас,// отче преподóбне.

Тропарь "Земли Кипрский затворник" и кондак опубликованы: "Жития Кипрских святых/ Сборник. Сост. Л. А. Чуткова. — М., 2017. — 962 [4]. — ИС 11-110-1009. C. 48 —49.