Пред иконою Богородицы Вифлеемской

 

Тропарь пред иконою Божия Матери Вифлеемския, глас 1-й.

Подобен: Пустынный житель:

Паче естества Рóждшая Владыку твари,/ вся в Тебé, Богорóдице, преестéственно содéлася./ Тем и святая Твоя икóна, в Вифлеéме сýщая,/ Предстательница явися и вéрным точит дарования./ Слава Рождшемуся из Тебе,/ слава Давшему Ти чудес благодать,// слава в Вифлеéме из Тебé Произшéдшему.

Величание

Ты, Вифлеéма Покровительнице дивная,/ лобызáющия икону Твою честную,/ на всякий день покрывай от всякия напасти// и Царствие даруй прелюбимое.

pdf   word

Прп. Вихиану Кипрскому канон молебный

Преподобному Вихиáну Кúпрскому

Канон молебный

word

Тропарь, глас 4-й

Подобен: Вознесыйся на Крест:

Не умолчúм никогда, богонóсе,/ велúчествия твоя глагóлати, недостóйнии,/ Вихиáне, преподобных удобрéние,/ всех прибéжище,/ немощных здравие,/ печáльных избавлéние и утешéние,/ сего ради вопиéм вси вéрнии:/ тя почитáющия// прúсно, блажéнне, хранú. 

Канон, глас 8-й
Песнь 1

Ирмос: Воду прошед:

Мнóгими недýгуя пóмыслы/ к тебе припáдаю, богонóсе Вихиáне,/ преподобных верхóвниче,/ не прéзри окаяннаго твоего молúтвенника мольбы[1].

Преподобне отче  Вихиáне, моли Бога о нас.

Святых отóк священный/ срáдуется сущим в Вышних наслéдником Небéсным,/ егóже ты стяжáл еси дрéвле в жилúще,/ богохранúмый Кипр славный.

Молéние приимú наше, богочéстне,/ отцев навéршие честнóе,/ и испóлни всем по прошéнием/ теплéйшим, мудре, заступлéнием твоим.

Богородичен: Аще по беззакóнием Сын Твой соблюдáти úмать люди,/ потребúтся всяка плоть человéча, Всенепорóчная,/ но обáче ходáтайством Твоим вси жúвы есмы.

Песнь 3

Ирмос: Небеснаго круга:

Витúйствующий язык, Вихиáне слáвне,/ нижé стяжах, всеблаженне, к воспоминанию о тебе,/ обáче от сердца моего/ твоя чудесы, отче, величаю, вопия:/ радуйся, всехвáльне.

Якоже на зде[2], блажéнне, птúца,/ в Вышних вселéние обретáя,/ житиé препровождáше,/ ко Всецарю молéбно возсылáя, отче, прошéния/ приступáющих ти.

Ныне прибегаем вéрою,/ молúтвенно вопиюще:/ покрый молитвами твоими вся благохвáлящия тя,/ и многим людем даруй исцелéния,/ врач бо рабом твоим сый, слáвящим тя.

Богородичен: Приснодéво Отроковице,/ Ты верных еси Утверждение,/ Ты ненадéжных Едино еси Избавлéние,/ веры Утверждение/ и спасения úстинное непрелóжное/ Упование, Всепéтая.