Сщмч. Филумену Святогробцу служба

Работа над переводом завершена. Полная версия с малой вечерней — ниже и в файлах:  

pdf   word    

Переведено с греческого текста, составленного господином Харлампием Бусья, утвержденного 18 октября 2001 Патриархом Иерусалимским Иринеем Ι, опубликованного на Кипре по благословению митрополита Морфского Неофита, по изданию: ΑΚΟΛΟΥΘΙΑ ΤΟΥ ΑΓΙΟΥ ΝΕΟΥ ΙΕΡΟΜΑΡΤΥΡΟΣ ΦΙΛΟΥΜΕΝΟΥ ΤΟΥ ΚΥΠΡΙΟΥ, Νοέμβριος 2010, Κύπρος. ISBN 9963-8784-0-7.

Месяца ноября двадцать девятаго дня празднуем память
святаго священномученника

ФИЛУМЕНА СВЯТОГРОБЦА

НА МАЛЕЙ ВЕЧЕРНИ

На «Господи, воззвах», глас 4.
Подобен: Яко добля:

Орýнды прозябéние,/ отóка Кúпрскаго удобрение/ и Цéркве Сиóнския новоутверждéнная огрáдо,/ Филумéне премудре,/ воспевающе тя, светло взываем:/ изрядный священнострадáльче,/ не престáй, Христа умоляя,/ избáви твоими молúтвами// льстúваго злóбы.

Яко сокровище всечестнóе,/ нетлéнное тéло твое, Филумене,/ в Сион принесóша/ благодáтию Божия Духа/ и положúша в Сихéме,/ прославленное во ограде Иáковля студенцá,/ яко да выну семý покланяющеся благоговéйно,/ благодать почерпáем,// от них искипáющую.

Безчéстных тéслица/ немилосéрдно тя умертвú/ в последняя лета, честный Филумене,/ у клáдязя святаго,/ идеже самаряныню срéте Христос,/  Богочеловек и Господь,/ Иже прият святую душу твою/ в Чертоги Небéсныя радости// и Божéственнаго блаженства.

Священников правило/ и мучеников похвала/ днесь да поется святыми пéсньми/ Филумен богонóсный,/ огнь многосвéтлый Христовы любвé,/ благоговения и благодати сиянии/ и добродетели страстотéрпческия лучáми/ озаряяй в подсóлнечней// православных собрания.

Слава, глас 2:

Мучéния вкусúвшаго чашу/ у Иáковля живонóснаго студенцá,/ Филумéна, новаго священнострадáльца,/ вéрнии, да восхвáлим:/ сей бо, возжадáвый издéтска/ любвé и прáвды Господни,/ яко елéнь, потечé/ ко истóчником спасения,/ Ставровунúйстей горе и Мéстом Святым,/ и ныне Христý, Источнику животá,/ свеселяся непрестáнно,/ молит Его освятúти// любовию право прáвящих слово Истины.

И ныне, глас тойже:

Все упование мое на Тя возлагаю,/ Мати Божия,// сохрани мя под кровом Твоим.

На стиховне, глас 2.
Подобен: Доме Евфрафов:

Кровьмú свящéнными/ рúзу твою очервленúв,/ у клáдязя, мýчениче, Иáковля,/ возшел еси// к Едему, Филумéне.

Стих: Праведник яко фúникс процветéт,/ яко кедр, иже в Ливáне, умножится.

Цвéтице младóе Орýнды,/ благоуханием твоих дóблестей/ окропил еси/ Христову Церковь,// богокрáсный Филумéне.

Стих: Насаждéни в дому Господни,/ во двóрех Бога нашего процветут.

Радуйся, страдальцев/ и иерéев слáво,/ честных священномученик древних/ подобноревнúтельный// Филумéне треблажéнне.

Слава, глас и подобен тойже:

Силу изобильно прияв,/ Троице Святая,/ по благодати Твоей/ прослáви Твою державу// страдáнием Филумéн.

И ныне, глас и подобен тойже:

Чадо возлюбленное/ Сына Твоего, Богородице,/ Филумéн божественный,/ Его ради, любóвию// в Сихéме пострадал есть.

 

НА ВЕЛИЦЕЙ ВЕЧЕРНИ

На «Господи, воззвах», глас 1.
Подобен: Небесных чинов:

Пéсненно сошéдшеся, да торжествýим,/ совершáюще пáмять/ Филумéна божéственнаго,/ в нáша бо временá/ деянием очищéн,/ пóдвигом страдáльчества просия,/ от Бога достойно прияв// победы венец нетлéнный.

Паче солнца возсиявшаго Филумéна/ во Орýнде Кúпрстей/ и озарúвшаго мир/светом благочéстия, и добродéтели,/ и дóблестным подвигом страдáльчества,/ вси благоговéйно да воспоúм// яко нóваго священномýченика Христова. 

Яко всеплóдие, страдáльче,/ и заклáние божéственное/ Христý Жизнодáвцу Иисýсу принесéн,/Филумéне треблажéнне,/ от Тогó и сподóбися слáвы,/ яже пáче умá,/ в Небéсных скúниях,//  священномучениче краснéйший.

Остáвив кров свой,/ горы крéстныя Ставровунúйския[1]/ с брáтом вкупе достúже,/ в нейже бе искушéн/ послушáния яко скрижаль, Филумене,/ и яко твердыня/ богоугоднаго нрава,// благочестия и чистоты.

Госпóдня стада áгнче новозаклáнный,/ чýдно Цéркве укреплéние и нерушúмо,/ отче Филумéне треблажéнне,/ и новоздáнное утверждéние благочéстия,/ тя благоговейно да почтим,// православных собрания.

У честнáго студенцá[2] Самаряныни,/ яростию убиéнный,/и кровопролúтно изсечéнный,/ в лéта послéдняя,/ мýчениче и свидéтелю Христóв,/ богонóсе Филумéне,/ ликóм непобеждéнных/ и доброорýжных страдáлец// сопричéлся еси.

Слава, глас 6:

Пóстничеством предуготóвився/ и сподóбився свящéнства,/ егóже Господь Своими Ангелы утвердú,/ равноáнгельно пожил еси/ в Мéстех Святых, богопрохóдных,/ Филумéне всеблажéнне,/ пáче бо себе самáго,/ и всех знáемых, и мимотекýщих/ Владыку любя,/ светлость внутрь души приял еси благодáти/ и свет содéлался еси всем/ добродéтели и дóблести твоея явлéнием:/ и ныне Царствия Небéснаго пóчести прияв,/ свящéнником преподóбным/ и мучеником свеселúшися/ и Гóсподеви мóлишися/ éже помúловатися душáм,// чтýщим в пéснех страдáния твоя.

И ныне, глас тойже. Богородичен Догматик: Кто Тебе не ублажит:

Притчей Соломоновых чтение:

Аз премýдрость вселúх совéт, и рáзум и смысл áз при­­звáх. Стрáх Госпóдень ненавúдит непрáвды, досаждéния же и гордыни, и путú лукáвых: воз­ненавúдех же áз развращéн­ныя путú злых. Мóй совéт и утверждéние, мóй рáзум, моя же крéпость. Мнóю цáрие цáр­ст­вуют, и сúльнии пúшут прáвду: мнóю вельмóжи величáют­ся, и властúтилие мнóю держáт зéмлю. Áз любящия мя люблю, úщущии же менé обрящут благодáть. Богáт­ст­во и слáва моя éсть, и стяжáние мнóгих и прáвда. Лýчше éсть плодúти менé, пáче злáта и кáмения дрáга: мо­ú же плоды лýчше сребрá избрáн­на. В путéх прáвды хождý и посредé стéзь оправдáния живý, да разделю любящым мя имéние, и сокрóвища úх испóлню благúх. Áще воз­вещý вáм бывáющая на всяк дéнь, помянý, яже от­ вéка, исчестú.

Премудрости Соломоновы чтение:

Прáведных дýши в руце Бóжией, и не при­­кóснет­ся их мýка. Непщевáни быша во óчiю безýмных умрéти, и вменúся озлоблéние исхóд úх, и éже от­ нáс шé­ст­вiе сокрушéнiе: онú же сýть въ мúре. Úбо пред лицéм человеческим áще и мýку приúмут, уповáние úхъ безсмéртия испóлнено: и вмáле накáзани быв­ше, велúкими благодéтел­ст­вовани бýдут, яко Бóг искусú úх и обрéте úх достóйны себе: яко злáто в горнúл искусú úх, и яко всеплóдие жéртвен­ное прият я. И во врéмя посещéния úх воз­сияют, и яко úскры по стéблию потекýтъ: сýдят языком и обладáют людьмú, и воцарúт­ся въ нúх Госпóдь во вéки. Надéющиися Нáнь уразумéют úстину, и вéрнии въ любвú пребýдут емý, яко благодáть и мúлость в преподóбных егó и посещéние во избрáн­ных егó.

Премудрости Сирáховы чтение:

Чáдо, въ крóтости делá твоя препровождáй, и человéком приятным воз­люблен бýдеши. Елúко велúк есú, толúко смиряйся, и предъ Гóсподем обрящеши благодáть. Мнóзи сýть высóцы и слáвни: но крóтким от­крывáют­ся тáйны, яко вéлия сúла Госпóдня, и смирéн­ными слáвит­ся. Вышших себé не ищú и крéпльших себé не испытýй. Яже тú повелéн­на, сия разумевáй: нéсть бо тú потрéба тáйных. Во избытцехъ дéл тво­úх не любо­пыт­ст­вуй: вящшая бо рáзума человéческаго покáзана тú сýть: мнóги бо прельстú мнéние úх, и мнéние лукáвно погубú мысль úх. И любяй бéд­ст­во впадéт в нé: сéрдце жéстоко озлóбит­ся на послéдок: сéрдце жéстоко отяготúт­ся болéзньми, и грéшник при­­ложúтъ грехú на грехú. В наведéнiи величáваго нéсть изцелéнiя: сáд бо лукáв­ст­вия вкоренúся в нéм. Сéрдце разумúваго уразумéетъ прúтчу, и ýхо слышателя вожделéние премýдраго.

 

На литии самогласны
Глас 1-й

Веселúся о Господе, празднолюбцев сóнме,/ зря предúвно прославляемаго/ в Божéственных Скúниях Филумéна,/ нóваго священнострадáльца:/ друг бо блúжний Госпóдень наречéся/ и добродетели спýтник и совсéльник,/ мýченичес-кую кончúну срéте/ и сугýбых сподóбися венцéв,/ сего ради ныне дéмоны сúлен отгоняти/ и неисцéльныя болéзни врачевáти/ его призывáющих// и чтущих в песнех память его.

Глас 2-й

Одéявся крéпостию Небéсною/ и дерзновéнием Ангельским,/ прещéния и свирéпствие злоначáльника/ небрег, Филумéне, мýчениче крепкодýшный:/ заклáн убо/ междý студенцéм Иáковлим и Жéртвенником,/ якоже дрéвле Захáрия,/ себé заколéние священное/ Христу принéсл еси,/ и ныне, древа животнаго наслаждаяся/ во граде Христа Всецаря,/ немолчно предстáтельствуеши о исцелéнии мúра// и спасении душ наших.

Глас 3-й

Нетлéния Владыка/ мýченическое тело твое/целéб показа воúстинну/ потóк приснострýйный/и дéмонов губúтеля скорéйшаго:/ тем вси тя почитáюще, Филумéне,/ и всеблагоговéйно в Сихéме мóщи твоя лобызáюще,/ молéний ко Владыце твоих прóсим// к жúтельству лýчшему. 

Глас 4-й

Мýченическими болéзньми/ дрéвним мýчеником поревновáв, Филумéне,/ рáвных тем венцéв приобщúлся еси,/ дóбре свершúв свое пóприще / в послéдняя лéта,/ жéстоко бо усéчен/ в час молитвы вечéрния,/ яко победонóсец возшéл еси/ пострадáвшаго Христа срéтити/ в Вышних Дóмех:/ и ныне, священномýченик спребывáя сóнму/ и блаженныя радости наслаждáяся,/ всякаго злоумышлéния врáжия избáви// прáзднующих пáмять твою.

Слава, глас 6:

В

о иерéех новаго страстотéрпца/ и в мýченицех святейшаго побéдника,/ Филумéна, новопожéнный Цéркве крин,/ вéрнии, достослáвно да ублажúм:/ сей бо издéтска/ Божественныя любве исполнен сый,/ сéчивом[3] беззакóнных/ дóблественне потщáся/ борéние скончáти/ и кровьми своими обагрúти/ ризы свящéнныя;/ и ныне к Вышнему Жертвеннику текúй/ яко иерей/ и мученик красéн и чéстен,/ всем православным просит у Господа/ оставлéния грехов// и жизни вéчныя.

На стиховне, глас 5.
Подобен: Радуйся:

Рáдуйся, священномýчениче Христов,/ Ангелом согражданúне и совсéльниче,/ Орýнды, вéси Кипрския, цвéте,/ облагоухáяй ны/ вонями доблестных борений твоих;/ предобрый аромáте безмолвия,/ остáви отéческий кров/во óтроческия годы, святе,/ с честным единокрóвником твоим,/ и ублажая вся священно безмóлвствующия,/ в Ставровунúйскую обитель богопокровенную вселúся,/в нейже послушанию и трезвéнию,//научéн бе, мудре Филумéне.

Стих: Праведник яко финикс процветет,/ яко кедр, иже в Ливане, умножится.

Рáдуйся, паче всех возлюбúвый/ Жизнодáвца и Богочеловéка Христа,/ Филумéне, иереев богобоязненных сияние/ и мученик новых божественное светúло:/ яко бо агнец непорóчный/и Бóжие заколéние,/ у студенцá Иáковля всесвятáго/ претерпéвый усечения язву,/ в последняя лета,/ радостно приéмля  страсть/ в подражание Распятому беззакоными руками/ Христу Всецарю,/ Егоже моли// спастúся благохвáлящим тя.

Стих: Насаждени в дому Господни,/ во дворех Бога нашего процветут.

 Рáдуйся, благочéстия плáменю,/Церкве новый оплóте,/Православия свéтлая похвалó,/пóстниче, священномýченик удобрéние,/ Филумéне святе;/ темже, память твою почитáюще светонóсную,/ и нетлéнное тело твое/лобызáюще в Сихéме, взывáем:/ овчá новозвáнное Христа,/ Того умоли в час стрáшный Суда/тя поющих с тобою предстáти// и мирови даровáтися вéлией милости.

Слава, глас 8:

Б

оголюбúвое жúтельство твое/ страдальческими напечатлев болéзньми,/ священномýчениче Филумене всечéстне,/ благоугодúв всем человéком и Владыце всех,/ побéднаго венца/ от Того сподóбися на Небесú,/ тем  яко дерзновение имéяй/ к Милостивому Господу,// не престáй моляся о чтýщих тя.

В

Тропарь, глас 5-й:
Подобен: Собезначальное Слово:

севышняго друга úскреннейшаго,/ при студенцé Иáковле ныне умерщвлéннаго/ окровавлéнными супостáт рукáми,/ Филумена, вернии, да восхвáлим,/ светло вопиюще:/ Христу не престай, священномучениче, моляся,// наших страстей отгнáти омрачéние.

Ин, глас 1-й:
Подобен: Пустынный житель:

Орýнды чадо,/ отóка Кúпрскаго óтрасль/ и священномученика нóваго/ Иáковля божéственнаго студенцá,/ Филумéна да почтим, вéрнии,/ яко защúтителя веры нáшея/ и непобедúмаго орýжника Христовы úстины,/ любовию вопиюще:/ слава прослáвльшему тя Христу,/ слава к безсмертию Упрáвльшему тя,// слава нам настáвника к Небéсным тя Показавшему.

НА УТРЕНИ

По шестопсалмии тропарь, писан на велицей вечерни.

По первом стихослóвии седáлен, глас 1.
Подобен: Гроб Твой, Спасе:

Яко иерей Божéствен/ и страстотéрпец свéтел,/ Филумене мудре,/ испúвый мучéния ныне чашу,/ усердно Всецаря моли/ даровати спасения воду,/ текýщую к Животу Нестарéемому,// нам, почитающим тя.

Слава, тойже.  И ныне: Богородичен:

Живоносный Истóчниче, Пресвятая Дево,/ Воду Живóтную источúвшая миру,/ единаго Богочеловека, Иисуса,/ даждь рабом Твоим испúти/ нетленнейших и славы непрестающия Божественных вóд,// от человеколюбнаго сердца Твоего источáемых.

По втором стихословии седален, глас 4.
Подобен: Скоро предвари:

От лет юностных/ любвé Божéственныя огнь/ от прамáтере твоея благочестúвыя богатно восприял еси, Филумéне,/ пóслежде от беззакóнных в Сихеме свящéнном/ мýченический венец/ радостию восприúм, всеблажéнне:/ тем и молитвами твоими// спасай почитáющия тя.

Слава, тойже.  И ныне: Богородичен:

Тéпле молим Тя,/ Дево Мáти Чистая,/ непрестанно моли/ от Тебе произшéдшаго Милостиваго Господа,/ страсти лютыя укротити, ны борющия,/ и вся чувствия оградúти// вéрою выну величáющих мнóжество чудес Твоих.

По полиелеи седален, глас 3.
Подобен: Красоте девства:

В блáгости возсиял еси жития твоего/ яко звезда пресветлая, честный Филумéне,/ мученически о Христове славе поборáл еси,/ ныне, священнострадáльче, убиéнный,/ якоже заколéние междý студенцем Иáковлим/и подножием Божия храма, отче,// длáньми убийц пресквéрными.

Слава: тойже.  И ныне: Богородичен:

Умерщвлéнную мою душу озари/ свéтом благодати Божéственнаго Рождествá Твоего,/ Чистая Дево Марие,/ Надеждо ненадéянных,/ и мрак расточú многих прегрешений моих,/ яко да обрящу милость в час Суда,/ и любовию немолчно вопию Ти:// радуйся, Обрáдованная.

По 50-м псалме стихра, глас 6:

Яко кадило благовóнное,/ и дар Христу святый/ принесóшася честных твоих кровéй тóки,/ священномýчениче нóвый, Филумéне,/ нестарéющаго убо наслéдия причáстник быв,/ то стяжáв, приéмлеши обожéние// и Господу мóлишися о душах наших.

Канон, глас 4,
егоже краегранесие: Филумена, священномученника новаго пою. Х.М.

Песнь 1

Ирмос: Отверзу уста моя,/ и наполнятся Духа,/ и слово отрыгну Царице Матери,/ и явлюся светло торжествуя,// и воспою, радуяся, Тоя чудеса.

Яко свящéннейшее заколéние,/ у студенцá Иáковля/ пожéршагося, вéрнии,/ божéственными пéсньми/ Филумéна мýченика воспоúм,/ úже нóвая явúся// веры слава и похвала.

Направил есú стопы твоя,/ священномýчениче Филумéне,/ ко обители Ставровунúйстей Честнáго Крестá/ вкупе с братом твоим,/ от благочáдныя веси,/ Орýнда именýемей,// и уединéннаго жúтельства образ соделался еси.

Чистéйшее светило/ и ярчáйшее, Филумéне,/ семéйства многочáднаго питóмче,/ от юности ты верою утверждéн бе// и возсиял есú всем благочестием своим.   

Богородичен: Настáви, Владычице,/ к пáжитем радостным благодáти,/ всех, воспевáющих светло Твоя чудеса/ и божéственнаго Филумéна// заколéние величáющих слáвное.

Песнь 3

Ирмос: Твоя песнословцы, Богородице,/ живый и независтный Источниче,/ лик себе совокýпльшия духовно утверди,/ в божественней Твоей славе// венцев славы сподоби.

От юных лет/ вперúв Христóви сердце твое,/ тем и послéдовал еси,/ Филумéне преподóбнейше,// рáдостне Украсúвшему тя нетлéния венцéм.

Мýчеников ликóм/ причтéн быв, Филумéне,/ и мýченическаго доброслáвия сподóбився,/ весéлие и рáдование наслéдовал еси,// úхже и нас сподоби.

Всечестное прозябение Кипрское,/ рачéнием ко Господу/ от младéнства напитáнный,/ отéческий кров остáви, Филумéне,/ и скóро во свящéннейшую/ обитель Ставровунúйскую// вселúлся еси.

Богородичен: Ума моего темнúцы озарú/ и очесá душéвная/ рабá Твоего просветú,/ очернéнная страстьмú,/ Мати Божия,/ Яже Светодáвца Гóспода,// Едúнаго Богочеловека рóждши.

Седален, глас 3.
Подобен: Божественныя веры:

Яко всесвящéнный áгнец/ пожéрлся еси в Самарии, у Иáковля студенцá,/ егоже воды Богочеловек испú/ от рук почéрпшей Самаряныни,/ священномучение Филумéне всечестне,/ и обагрúл еси одежду священную// кровей своих Божественными тóки.

Слава, той же. И ныне, Богородичен, глас и подобен тойже:

Якоже Чúстая, Дево Мати,/ и Нескверная Богородительница,/ нечистых мя страстей свободи,/ Сына Твоего на всякий день прославляюща Пренепорóчнаго/ и величающа Тя, Нескверная, мира Владычице,// молитвами Твоими очистúтельными ко Всецарю.

Песнь 4

Ирмос: Седяй в славе на престоле Божествá,/ во облаце легце,/ прииде Иисус Пребожественный,/ нетленною дланию и спасé зовущия:// слава, Христе, силе Твоей.

Весь божéствен/ и богоприятен явúся, святе,/ ныне в Сиóне/ Мéстом Святым послужúвый/ и длáньми убийц/ святейшую кровь твою// в Самарúи излúв, Филумéне.

Закон Божественный/ возвещáя невéрным,/ святе Филумéне,/ и посредé волкóв/ богоприятно, отче, подвизáяйся,/ не возмогл есú избежáти челюстéй их,// жáждущих растерзати тя.

Во иерéех/ украсúтель слáвен еси,/ Филумене святе,/ студенцá Божественнаго,/ у негóже Фотúну Самаряныню/ срéте иногдá Мессия Христос,// дáрующий нам воду жизноподáтельную.

Богородичен: От утрóбы Твоея, Богородице,/ пáче слова и пáче ума/ Христос произыде,/ мирови дáруяй бытиé/ и спасáяй от бед и печалей/ выну Твоя чудеса// величáющия.

 

Песнь 5

Ирмос: Ужасошася всяческая/ о божественней славе Твоей:/ Ты бо, Неискусобрачная Дево,/ имела есú во утробе над всеми Бога,/ и родила есú безлетнаго Сына,/ всем воспевающим Тя// мир подавающая.

Кáплями честных кровéй твоих/ ныне запечатлéл есú/ клáдезь свящéнный Самаряныни,/ у него же беззакóнных руками/ бе убиéн,/ яко непорóчно овчá, Филумéне,// новых подвúжников вéры хвалó.

Избáвителя úскреннейший любúмче,/ Тогó паче всех любяй/ и Того рáди любвé/во огрáде студенцá Иáковля/ жéстоко умерщвлéнный,/ молú, Филумéне, Господа// о поющих тя.  

Мýчеников зарé новосиянных,/ веры свидéтелей,/ Филумéне слáвне,/ тяжкоýмия мрак/ на тя враждýющих разсéявый,/ светом Небеснаго Царствия блистáющим// в Вышних насладúся Крóвех.

Богородичен: Просим себе, Владычице,/ молитв непрестáнных/ к Жизнодателю Твоему Сыну,/ úже в смéртней/ темнотлéнней сéни спящии,/ яко да радости неумолкáемыя// причáстницы в Небéсных будем.

Песнь 6

Ирмос: Божéственное сие и всечестнóе/ совершающе празднество,/ богомудрии, Богоматере,/ приидúте руками восплéщим,// от Нея рождшагося Бога славим.

Укрепляемь, Филумене,/ сúлою Господа,/ вéрным подающаго/ токи живóтныя,/ врагов вéры, грозящих ти,/ крепкодушне отче,// не устрашúлся еси.

Тело твое многострадáльное/ и по успéнии/ мягко и удобоподвúжно/ Господь соблюдé,/яко да во одеяния служебная/ облачат отцы его,// о Филумéне.

Тебе поем, священномýчениче Филумéне,/ в горé Афóнстей/ брáту[4] своему явúвшемуся/ и мучéние  свящéнное своé// тому áбие повéдавшему.

Богородичен: Сквернáвую, Богородúтельнице,/ и нечистоты исполненную/ рабов Твоих волю/ омый иссопом дерзновения// к Сыну Единородному Твоему и Господу.

Кондак, глас 8.
Под.: Взбранной Воеводе:

С

вященномýчеников новосиянную звездý,/ у студенца возшéдшую Самаряныни/ и облистáвшую Цéрковь Христову/ целомýдрием и страдáнием,/ ныне воспоим,/  яко áгнца, за веру заклáннаго,/ любóвию вопиюще:// рáдуйся, блажéнне Филумéне.

Икос

Ангел, хрáбрствовав в страдальческих болéзнех, Филумене всеблаженне, показался еси, сего ради ныне ангельския радости и веселия Небеснаго, святе, сподóбився, молúся Христу о вопиющих ти: радуйся, Кипра благоуханный цвете; радуйся, Господень истинный любúмче; радуйся, óтрасле Орýнды богодухновéнная; радуйся, плоде Сиона сладчайший; радуйся, человече Небесный, Ангелом óбщниче; радуйся, Ангеле, единонрáвный мучеником иерею; радуйся, у кладезя Иáковля пострадáвый; радуйся, ароматный нектар добродетелей сбирáяй; радуйся, Христово прослáвивый имя; радуйся, врáжие попрáвый величáние; радуйся, светило новозáрное страстонóсцев; радуйся, звездó свящéнников ныне пострáдавших. Радуйся, блажéнне Филумене.  

Песнь 7

Ирмос: Не послужиша твари, богомудрии,/ паче Создавшаго,/ но огненное прещение мужески поправше,/ радовахуся поюще:// препетый отцев Господь и Бог благословен еси.

От всякаго мя злоумышлéния врáжия,/ Филумéне, избáви,/ якоже спасé/ преемника в месте делания твоего,/ скоро тому предвозвестив/ еже на него убийц нашествие// безстýдное и слабодýшное.

Ныне тело твое,/ егóже Господь сохранú нетлéнно,/ слáвне Филумéне,/ в Сихéме яко источник ся являет исцелéний/ с верою сему приникáющим/ и ко Христу// твоих предстáтельств требующим.

Благосострадáтельне Филумене,/ вся отсéченная многострадальнаго телесé твоего/ во Австрáлии, святе,/ лютый недуг каркúна[5] отгнá,/ всем благодать показуяй,/ юже обрел есú// на пáжити веры.

Богородичен: Пречúстый Владыка/ мир от падения дрéвле избáвивый,/ от пречúстых кровéй Твоих,/ Мати Божия, воплотúся./ Сего ради, Владычице,/ яко Начáток спасéния нашего// Тя воспевáем.

Песнь 8

Ирмос: Отроки благочестивыя в пещи,/ рождество Богородичо спасло есть:/ тогда убо образуемое,/ ныне же действуемое,/ вселенную всю воздвизает пети Тебе:/ Господа пойте, дела,// и превозносите Его во вся веки.

Новый Христов священномýчениче,/ сéчивом урáнен сый,/ добродетельне Филумене,/ обагрил есú рýбище нúщенское твое/ кровéй твоих тóки,/ вскрай обитая селений веры Господни честных,// в Земли, юже стопами Своими обыде Бог.    

Мученик и ратобóрец победонóсен явúся/ Христа Вседержителя,/ о Филумене дúвне,/ яко превозшедый доблесть всяческую/ в последняя лета;/ нетленное тело твое/ священие и источник/ Той показа, отче,// присноточáщ чудесы.

Сéчиво тя урéза/ непорóчно, Филумéне крепкодýшне,/ убиéние жéстоко совершáя,/ и главу твою сокрушú всечестнýю,/ священнострадáльче благорóдный:/ сего ради,/ чтýще память твою святую,/ благообрáзно взыскýем// éже пред Господем заступлéний твоих.

Богородичен: Избáви напáстей, Богорóдице,/ бед, обстояний/ и скорбей гóрестных/ просящих выну, Владычице,/ яже от Тебе помощи/ и сподóби достúгнути нам/ славы неумолкаемыя/ и на Небесех// нескончáемыя радости.

Песнь 9

Ирмос: Всяк земнородный/ да взыграется Духом просвещаемь,/ да торжествует же безплотных Умов естество,/ почитающее священное торжество Богоматере,/ и да вопиет:/ радуйся, Всеблаженная,// Богородице Чистая Приснодево.

Благослáвне Филумéне,/ священномýчениче честный,/ вéры же и Сиона/ новозáрный свéщниче,/ в лúце вси/ твоея кончúны память прáзднующе, вопием:/ с Небесé покрый/ и спасú от всякия нýжды// к тебе притекáющия.

Яко áгнец Божий пожрéн быв,/ Филумене богообрáзне,/ и к Небесному стаду вознесéн/ и к присносýщней радости и веселию,/ да Началопастырю сликовствуеши/ и Ангельским чинóм// во веки светло свеселúшися.

Радуйся, дóблественниче Господень, Филумéне,/ терпелúвне и всечéстне,/ вопиюще, молимся:/ от сéтей миродéржца ум наш свободú,/ и песнь сию приимú,/ юже сплетаéм ти,// хвáляще мученическое твое светлое свидéтельство.

Богородичен: Мáти Божия,/ ум наш возвыси ко мнóжайшей любвú/ от суеты дóльних страстей и скорбей,/ Яже Вышняго Рождеством/ древле падшее Адáмово естествó/ любвé ради неизречéнныя и вéлией милости// возвысившая.

Светилен.
Подобен: Жены услышите:

Священномýчениче слáвне, úже в послéдняя временá у студенцá Иáковля пострадáвый и славы причащáяйся ныне Зиждúтелевы, треблажéнне Филумéне, о нас моли, совершáющих верою присночестнýю память твою.

На «Хвалитех», глас 4.
Подобен: Званный свыше:

Слáвне Филумéне,/ Орунды кúпрския/ óтрасле цветонóсная и преблаговóнная,/ со Елпúдием, близнецом своим,/ хотя Единому Господу угодúти и Богу,/ слáсти вся мудро небрегл еси,/ якоже Кущник пéрвее Иоанн,/ егоже во образ// житию своему приял еси,// Цéркве крúне новоусéченный.

Един у студенцá Иáковля/ вечерни, Филумене хвалéния/ принося Всецарю/ благоговейно в жертву,/ безстýдно сéчивом урáнен бе/ и церкóвное облачéние/ обагрúл еси токи кровéй твоих,// вечерни же прокúмен прочестú// возшéл еси в Небéсныя Дóмы.  

Напрáвил еси, Филумене, пéрвее/ к горе Креста/ стопы твоя издéтска,/ пóслежде отшéл еси/ ко брáтству Божественнаго/ и Всесвятаго Гроба,/ хотя благоговейно послужúти/ святыням свящéнным/ во времена последняя,// отче богодухновéнне,// и шéствовати вослéд Иисуса Всецаря.

Мóщи божéственныя твоя,/ священномýчениче Филумéне,/ нетлéнны содéлав Господь,/ нетлéнную слáву твою всем явú,/юже свыше приял еси;/ сего ради благоговейно тя чтит/ Церковь Христова/ и память твою приснопéтую/ величает, вопиющи:// моли Господа даровáтися верным// вéлией милости.

Слава, глас 5.

Благочéстием издéтска возгорéвся,/ Филумене священномýчениче, сам себе всяческим тщанием/ Господу возложил еси,/ и всего человеческаго отрекся,/ лествицу добродетелей постúже/ и мученически сподобился еси жизнь скончáти:/ тéмже óбщник содéлався славы Господни,/ о нас выну моли,// совершающих всечестнýю память твою.

 

НА ЛИТУРГИИ

Блаженны, песни 3-я и 6-я. Апостол иже на память святаго Елевферия,  Тим. втораго, 1, 8 — 18. Евангелие от Иоанна, гл. 15:17 — гл. 16:2. Причастен: В память вечную:

---

[1] Кипрская обитель Ставровуни (гора Креста), где священномученик вместе со своим братом-близнецом полагал начало монашества.

[2] Колодца.

[3] Топором.

[4] Сразу после мученической кончины сщмч. Филумен известил о ней своего брата-близнеца о. Елпидия, подвизавшегося в то время на Афоне.

[5] Раковой опухоли.

О мученичестве святого 

Перевод выполняется по изданию: "Служба святому новомученику Филумену Кипрскому". Издание обители святого Николая. Орунда, Кипр, 2010 год.
Автор — кир Харлампий Бусья.