вторник, 1 октября 2013 г.

Канон молебный
всем кипрским святым

творение монаха Герасима


Канон опубликован: "Жития Кипрских святых/ Сборник. Сост. Л. А. Чуткова. — М., 2017. — 962 [4]. — ИС 11-110-1009. C. 921 — 934.

Благословúвшу иерéю, нáчнем псалом 142:
Гóсподи, услыши молúтву мою, внушú молéние мое во úстине Твоей, услыши мя в прáвде Твоей. И не внúди в суд с рабóм Твоим, яко не оправдúтся пред Тобою всяк живый. Яко погнá враг дýшу мою, смирúл есть в землю живот мой; посадúл мя есть в тéмных, яко мéртвыя века. И уны во мне дух мой, во мне смятéся сердце мое. Помянýх дни дрéвния; поучихся во всех дéлех Твоих, в творéниих рукý Твоею поучáхся. Воздéх к Тебе рýце мои, душа моя яко земля безводная Тебе. Скóро услыши мя, Господи, исчезé дух мой; не отвратú лица Твоегó от менé, и уподóблюся низходящим в ров. Слышану сотворú мне заýтра милость Твою, яко на Тя уповах; скажú мне, Господи, путь, воньже пойдý, яко к Тебе взях дýшу мою. Изми мя от враг моих, Господи, к Тебе прибегох. Научи мя творúти вóлю Твою, яко Ты еси Бог мой; Дух Твой Благúй настáвит мя на зéмлю праву. Имене Твоего ради, Господи, живúши мя; прáвдою Твоéю изведéши от печáли дýшу мою. И мúлостию Твоéю потребиши враги моя, и погубúши вся стужáющия душú моéй: яко аз раб Твой есмь.

Таже, во глас 4: Бог Госпóдь, четырежды.
Тропáрь, глас 4.
Под.: Вознесыйся на Крест:
К богонóсным кúпрским святым,/ богоизбрáнному и святóму ликостоянию/ припадéм, вопиюще из глубины души:/ страстотéрпцы мýченицы/ и святúтелие мýдрии,/ пóстницы и преподóбнии,/ Кúпрскаго отóка предстáтелие,/ всякия беды избáвите ны,// вéрою к вам притекáющия.
Слава: тойже. И ныне: Богородичен:
Не умолчúм никогдá, Богородице,/ сúлы Твоя глагóлати, недостóйнии,/ áще бо Ты не бы предстояла молящи,/ кто бы нас избáвил от толúких бед?/ Кто же бы сохранúл доныне свобóдны?/ Не отстýпим Владычице от Тебе,// Твоя бо рабы спасáеши прúсно от всяких лютых.

И псалом 50:
Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя; яко беззаконие мое аз знаю, и грех мой предо мною есть выну. Тебе единому согреших и лукавое пред Тобою сотворих; яко да оправдишися во словесех Твоих, и победиши внегда судити Ти. Се бо, в беззакониих зачат есмь, и во гресех роди мя мати моя. Се бо, истину возлюбил еси; безвестная и тайная премудрости Твоея явил ми еси. Окропиши мя иссопом, и очищуся; омыеши мя, и паче снега убелюся. Слуху моему даси радость и веселие; возрадуются кости смиренныя. Отврати лице Твое от грех моих и вся беззакония мои очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего и Духа Твоего Святаго не отыми от мене. Воздаждь ми радость спасения Твоего и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего; возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен; сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая; тогда возложат на олтарь Твой тельцы.
Канон, глас 8,
Егóже краегранéсие: Святúи кúпрстии, сохраняйте мя. Герасимово.
 
Песнь 1 
Ирмос: Вóду прошéд, яко сушу,/ и егúпетскаго зла избежáв,/ израильтянин вопияше:// Избáвителю и Богу нáшему поúм.

Вси святúи кúпрстии, молúте Бога о нас.

Кúпрских святых Божéственный лúче,/ Христа Спáса молúте о нас/ прегрешéний даровáти разрешéние// и напáстей многоразлúчных избавлéние.

Вси святúи кúпрстии, молúте Бога о нас.

Тишинý просúте подáти нам/ Христа Спаса,/ и мир нерушúмь,/ святых о препрослáвленная ликостояния,// отóка кúпрскаго предстáтелие и хранúтелие!

Слава Отцу и Сыну и Святому Духу:

Цельбы точáще обúльны,/ Апостоли Божéственнии,/ с мученики терпеливодýшными,/ наша уврачýйте недýги,// совокýпно и здрáвие исходáтайствуйте.

И ныне, и присно, и во веки веков. Аминь.

Всесвéтлое Бóжие селéние,/ Всепéтая Отроковúце,/ Всеблагословéнная Марие,/ ума моего тьму разорú// светозáрным заступлéнием Твоим молюся.

Песнь 3
Ирмос: Небеснаго круга/ Верхотворче, Господи,/ и Цéркве Зиждúтелю,/ Ты мене утверди в любви Твоей,/ желáний крáю, вéрных утверждéние,//Едине Человеколюбче.

Вси святúи кúпрстии, молúте Бога о нас.

Святителие Богонóснии,/ и подвúжницы преподобнии,/ вси застýпницы Кипра и ходáтаи,/ выну молящеся, просúте/ пóмысла чúста// приходящим всегда к вам, блажéннии.

Вси святúи кúпрстии, молúте Бога о нас.

Яко прибéжище божéственное/ и свящéнное утверждéние/ кийждо от вас познáся,/ всякаго кúпрскаго грáда святúи./ Тем киприóтов собóри/ вами красýются,// Христа прославляюще.

Слава Отцу и Сыну и Святому Духу:

О всех молúте/ Всемогýщаго Господа,/ лúче всепéтый кúпрских святых,/ да избáвимся житéйских напáстей/ иже вéрою многочáстне// к вам притекáющии.

И ныне, и присно, и во веки веков. Аминь.

Мúрови Утешéние/ яко воúстину явúлася еси,/ всех Создателя рóждши,/ Отроковúце Всенепорóчная./ Сего ради всякия печáли/ душетлéнныя мя избáви,// яко Предстáтельница моя.

Спаси, кипрских святых Божественный лúче,/ всякаго врéда и лютых обстояний,// притекáющих к божéственному вашему заступлéнию.
 

Прúзри благосéрдием, Всепéтая Богородице,/ на моé лютое телесé озлоблéние// и исцели души моея болéзнь.


Седален, глас 2. Подобен: Молéние тéплое:
Предстáтелие тéплии нам познáстеся,/ святых ликостояния,/ на Кúпре просиявшая,/ сего ради вéрне вознóсим глас:/ от всякия нýжды и печáли/ безбéдны соблюдúте ны// к Человеколюбцу вашими молúтвами.

Песнь 4
Ирмос: Услышах, Господи,/ смотрения Твоего тáинство,/ разумех дела Твоя// и прослáвих Твое Божество.

Вси святúи кúпрстии, молúте Бога о нас.

Струú нам страстьмú иссушéнным,/ яже в Кúпре святых соборе,/ дожделияний Божия благодати просúте,// и прегрешéний отпущéния.

Вси святúи кúпрстии, молúте Бога о нас.

Лúче блажéнный святых постник,/ похвалéния отóка Кúпрскаго,/ дýши нáша избáвите// искушéния лютаго.

Слава Отцу и Сыну и Святому Духу:

Гóрдаго змúя сокрушúте,/ на ны востающаго,/ святúтелие всеблажéннии,// Кúпра пáстырие и учúтелие.

И ныне, и присно, и во веки веков. Аминь.

Просвещéние божественное дáруй ми,/ отгонящее тьму помышлéния моего,/ яко да сотворюся, Всенепорóчная,// безстрáстия свет пресиянный.

Песнь 5
Ирмос: Просветú нас повелении Твоими, Господи,/ и мышцею Твоею высокою// Твой мир подаждь нам, Человеколюбче.

Вси святúи кúпрстии, молúте Бога о нас.

Избáвите ны, Кúпра святúи вси,/ иерáрси, страстотéрпцы и пóстницы,// многообразных искушéний и напáстей.

Вси святúи кúпрстии, молúте Бога о нас.

Стáдо честнóе,/ богослóвное собрáние,/ градодéржцы отóка сего и хранúтелие,// Церковь Кипрскую укрепúте.

Слава Отцу и Сыну и Святому Духу:

Вóду тáйну жáждущим нам источúте,/ éже ко Господу мольбáми вáшими,// Кúпрстии помóщницы и застýпницы.

И ныне, и присно, и во веки веков. Аминь.

Избáви мя, Чистая,/ прилóгов чуждáго,/ и укажú ми стезю,/ еже есть неколéблемая// покаяния непрестáннаго чистота.

Песнь 6
Ирмос: Молитву пролию ко Господу/ и Тому возвещý печáли моя,/ яко зол душа моя исполнися/ и живот мой аду приблúжися,/ и молюся, яко Иóна: // от тли, Боже возведú мя.

Вси святúи кúпрстии, молúте Бога о нас.

Ваш отóк, окроплéнны й/ священными вашими пóты,/ богонóснии отцы,/ притекáет к вам молúтвою,/ из глубины вопиюще всегдá:/ вы есте моя радость и предстáтельство// и неусыпное попечéние.

Вси святúи кúпрстии, молúте Бога о нас.

Плóти моея болéзни гóрькия/ и душéвнаго уныния тяготу/ к Богу вашими мольбáми/ скоро разорúте, блажéннии,/ и удовлúте мя/ благонрáвием истинно// и душú очищéнием.

Слава Отцу и Сыну и Святому Духу:

Святых святéйший соборе,/ кúпрская преблистáтельная светúла,/ Светодáвца и всех Владыку/ непрестáнно молúте,/ яко да избавляемся прúсно// помрачéния стрáстнаго и печáли.


И ныне, и присно, и во веки веков. Аминь.


Неизречéнно и непрелóжно Рóждшая/ всех Содéтеля и Спáса,/ от истлéния возводяща благостынею, Дево,/ простéртаго Адáма,/ и менé из глубины возведú/ неисчéтных прегрешéний// и спасú мя.


Ектения и кондак, глас 2:

Предстáтельству вашему/ всú киприóты и питóмцы церкóвнии/ со благоговéнием притекáюще, святúи,/ избавляемся всякия тесноты/ и чáяния бед и печáлей// вас благомысленне почитáющии.


Прокимен: Дивен Бог во святых Своих, Бог Израилев.

Стих: Святым, иже суть на земли Его удиви Господь:

Евангелие от Матфея: Рече Господь Своим учеником: вся Мне предана суть Отцем Моим: и никтóже знáет Сына, токмо Отец: ни Отца кто знáет, тóкмо Сын, и емýже áще вóлит Сын открыти. Приидúте ко Мне вси труждáющиися и обременéннии, и Аз упокóю вы. Возмúте úго Моé на себé, и научúтеся от Менé, яко кроток есмь и смирéн сéрдцем: и обрящете покóй душáм вáшим. Иго бо Моé блáго, и брéмя Моé легкó есть.


Стихира, глас 6:

Собóре многочúслен кúпрских святых,/ мýченицы и преподобнии,/ иерáрси святúи и богомýдрии,/ во мнóзех рвах земных/ в рáзная временá/ во отóце сем жúтельствовавшии,/ всех избáвите/ пáгубы всякия и озлоблéния,/ вáшими предстáтельствы,/ мнóжицею Христá моляще,/ яко да мúлостив будет прегрешéнием/ и искушéний избáвит// вас призывáющих.


Песнь 7

Ирмос: От Иудеи дошéдше, отроцы/ в Вавилóне иногдá/ верою Троическою пламень пещный попраша, поюще:// отцев Боже, благословен еси.

Вси святúи кúпрстии, молúте Бога о нас.

От страстей нечúстых/ и разорúтельных зол/ нас избáвите,/ и согрешéний,/ святúи кúпрстии,/ вéрою зовýщих:// отцев наших Боже, благословéн еси.

Вси святúи кúпрстии, молúте Бога о нас.

Чернорúзцы богонóснии,/ доброслáвнии святúтелие,/ и божéственнии мýченицы наши кúпрстии,/ нам предстáтельствуйте выну,/ яко да вéрою воззовем:// отцев наших Боже, благословен еси.

Слава Отцу и Сыну и Святому Духу:

Иже заповéдании Господни/ и стрáхом Божиим себе упрáвисте,/ лúче богонóсный, Кúпра ходáтаи,/ сего ради верою да возопиúм:// отцев наших Боже, благословен еси.

И ныне, и присно, и во веки веков. Аминь.

Прорастúвши, Отроковúце, неорáнно,/ яко клас жизни, Господа,/ покаяния хлебом насыти/ глáдную дýшу мою,/ вопиющую Ти:// радуйся, Дево Чистая, Преблагословéнная.


Песнь 8

Ирмос: Царя Небеснаго,/ Егоже поют вóи Ангельстии,// хвалúте и превозносúте во вся веки.

Вси святúи кúпрстии, молúте Бога о нас.

Кúпрский отóк стяжá вы,/ застýпников и избáвителей,/ тем и притекáет любовию/ к вам, богонóснии,// и бед свобождáется.

Вси святúи кúпрстии, молúте Бога о нас.

Дáрует крéпость/ душéвную и телéсную,/ предстáтельство вáше притекáющим,/ святúи отцы,// блистáния кúпрская.

Слава Отцу и Сыну и Святому Духу:

Святúи всú многоразлúчнии кúпрстии,/ непорóчным житиéм украшéннии,/ всем нам испросúте// Божия благодáти.

И ныне, и присно, и во веки веков. Аминь.

Спаси мя, Отроковúце,/ обладáния прéлестию/ и стрáстную дýшу мою отлучú/ пóмыслов сквéрных// и всякаго греха.

Песнь 9
Ирмос: Воситину Богородицу,/ Тя исповедуем,/ спасéннии Тобою, Дево Чистая,// с Безплотными лики Тя величающе.

Вси святúи кúпрстии, молúте Бога о нас.

Твéрдость нам испросúте,/ святúи кúпрстии,/ протúву страстéй и напáстей лютых// приходящим любóвию вáшей благодáти.

Вси святúи кúпрстии, молúте Бога о нас.

Мýченик и архиерéй лúче,/ освятúвшии Кипр весь,// освящéния испросúте нам и мúлости.

Слава Отцу и Сыну и Святому Духу:

Преподóбных Божéстенный собóре,/ кúпрская слáво,/ бесслáвия страстéй изведúте// неотстýпным сéрдцем вам притекáющих.

И ныне, и присно, и во веки веков. Аминь.
 
Возвéдши ум мой от землéныя рéвности/ свéта невещéственнаго/ тóй, Отроковúце, испóлни,// да воспою и прослáвлю велúчия Твоя.




По «Достойно» величания:


Божéственныя святúтели, и преподóбныя, и мýченики, в рáзная временá непорóчным житиéм и чудес даровáньми на Кипре свящéнне просиявшия, песньми да почтим.


Рáдуйтеся, Кипра помóщницы, иерáрси и апóстоли святúи, крепкодýшнии страстотéрпцы и преподóбнии отцы, знáемии и безвéстнии, наши ходáтаи.


Иные молитвословия Кипрским святым:


Перевод выполнен в 2013 году по изданию: Образы святости Кипрской. Левкосия, 1998 г.

Примечания:
Празднование собору Кипрских святых — в неделю, ближайшую к 1 октября (по новому стилю — на Кипре и в Греции, по старому стилю — в России). Киприоты обычно выбирают первое октябрьское Воскресенье, русским логично выбрать первое Воскресенье после Покрова.

Канон составлен монахом Герасимом из Афонского скита Малой Анны.

Если в России популярнейший жанр — акафисты, то в Греции и на Кипре — молебные каноны. При этом тропари и кондаки святым к этим канонам прилагаются особые, вовсе не те, какие поются на вечерне, утрени и Литургии. Это — лишь к сведению.

Комментариев нет:

Отправить комментарий