вторник, 12 июля 2016 г.

Прп. Паисию Святогорцу служба

     
Редакция 2019 года.

                             Месяца иулия двенадцатаго дня
преподобнаго и богоноснаго отца нашего 
ПАИСИЯ СВЯТОГОРЦА 

Вечер 
На Господи, воззвах стихиры, глас 1.
Подобен: В
сехвальнии мученицы: 

Утверждáяся в послушáнии, хранéнии чувств/ и молúтве от юности,/ плоти стрáсти дóлу влекýщия/ низрúнул еси/ и к высоте неизглагóланней возшéл еси/ безстрáстия и трезвéния, мудре Паисие:/ тем вси яже ко обожéнию // твоя неусыпáемыя почитáем пóдвиги.

Храм себé творяй светел/ Духа Святаго/ и благоухание сый Христу, Паисие/ к келлии твоей приходящих/ возрадовал еси,/ всех освятив, преподобне,/ твоего благословения просящих,//яко да преидýт многовóлненную жития пучину.

Мудраго Арсения добродéтели подóбниче,/ во отéчествии твоем просиявшаго,/ и многих старцев, подвижников Афонских,/ свéтлей любвú поревновáти хотя,/ лéствицу совершéнства во Христе/ ты постúже, всечéстне,/ и яко новая звезда//ныне возсиял еси.

Верных лúкове от Карéи/ благоговéйно прихождáху/ к кéллии твоей на всякий час, Паúсие,/ яко да болезней брéмя отженýт/ твоим боголюбúвым преподóбием/ и дерзновéние приúмут/ врáжию сокрушúти силу// твоими божественными молитвами ко Господу.

Обúтель Богослóва честнáя,/ яже иногда насладúвшаяся/ мудрых твоих увещáний,/ играет и радуется,/ ныне в нéдрех яко сокровище Божественное имýщи/ гроб твой, преблажéнне Паисие,/ верным точáщ неоскýдныя рéки целéний всегда// к сему притекающим.

Паисие, благодать богáтную/ с Небесé приял еси,/ во éже помощú всем страждущим/ и в нýждах сýщим,/ тем во обстояниих посещáше болящия/ и сим скорое исцеление Бóжиею благодатию даровá,/ ко Господу являя дерзновение,// егоже стяжáл еси.

Слава, глас 6: 

Постническою преукрáшен свéтлостию/ Церковь всю в последняя озарил еси,/ Паúсие, Святогорче Духонóсный:/ разумно бо во Афоне пожив,/ безстрáстия и мудрости правило úстиннейшее/ показался еси/ и верных учéньми своими озарил еси,/ превыше бо плоти быв,/ благодать обрел еси/ молúтися непрестанно/ о чтущих тя любовию// и воспевающих всечестнýю память твою.

На стиховне стихиры, глас 5.
П
одобен: Радуйся, постников: 

Рáдуйся, любвé горение/ свещеносяй труды преподобными/ в последних единонрáвных / ликóм Афонским,/ подвижников светúло и прáвило:/ Христу бо моляся,/ немощствýющаго на ся подъял еси недуги/ и язю его многоболéзненную/ даже до смерти пронесé,/ Паúсие святе,/ аки достояние многоцéнное,/ рáдуяся, яко ближнему ослáбу дадé/ и подъя на ся горесть его,// якоже и грехи наша Господь.

Стих: Честна пред Господем/ смерть преподобных Его.

Рáдуйся, Фарáсы óтрасле,/ горы Афона доброрáсленное прозябéние,/ Синáя крúне/ и Стомиóна цвéте/ многомáстен и благоухáнен,/ Паúсие преподобне,/ настáвниче непрелéстнейший ко спасению/ благочестивых множества,/ ты похвала обители Богослова бысть,/ сия бо, якоже крепость хранит неподвúжимая/ советов твоих собрание и гроб твой,/ егóже, тя Господь хотя прослáвити,// ныне купель исцелений явú.

Стих: Блажен муж, бояйся Господа,/ в заповедех Его восхощет зело.

Рáдуйся, многочáдныя мáтере/ плóде небесный,/ Паисие преподобне,/ сам себе истощáяй усердно/ пóдвиги и молитвою,/ да Божиею благодатию напитáеши мир,/ жаждущий веры уразумéти всякую истину,/ и ко стезé спасения да упрáвиши/ притекáющих к совéтом премýдрым твоим:/ сéяй бо любве Божественныя сéмена,/ клас пожал еси богáтный/ жизни нестарéемыя;/ сея сподоби/ всех, тя воспевающих// и взыскующих у Господа предстáтельства твоего.

Слава, глас 8: 

Учительства и разсуждения/ талант приял еси,/ яко воздаяние постническим трудóм,/ от Христа Бога,/ Паúсие превеликий:/ ты бо предзрéти грядущая сподóбися/ и напоúти нúвы душéвныя благочестúвых/ питиéм небесным/ богомудрых глагóлов твоих;/ тáко возсияв,/ áки нововозжжéнный светильник Цéркве,/ к Солнцу ýмному взыде./ Того моли сподóбити и нас// Вышния светлости.



Тропарь, глас 1. 
Подобен: Пустынный житель: 

Фарáсы отрасль и Афона украшение,/ и еже от века преподобным подражателя и равночестнаго,/ Паисия восхвалим, вернии,/ сосуд, даров преисполненный,/ яко хранящаго от всех обстояний/ верою вопиющия:/ слава Давшему тебе крепость,/ слава Венчавшему тя,// слава Действующему тобою всем исцеления.

Ин тропарь, глас 3. 
Подобен: Божественныя веры: 

Якоже Ангел явúся мúрови/ во времена послéдняя,/ Христоподражáтельне Паúсие преподобне,/ подвижнически бо во Афоне пожив,/ яко пресветлое солнце возсиял еси/ и озарил еси/ верных полноту благодáтию,// глаголы предивными и чудесы.

На утрени 

по шестопсалмии тропарь, писан на велицей вечерни 



По первом стихословии седален, глас 1: 

Подобен: Гроб Твой, Спасе: 

Богодухновéнными смыслы испóлнив сéрдце и блистáнии безстрáстия просияв, подсолнечную добродéтельми озарúл еси и подвúгл еси вéрныя любóвию взывáти ти: радуйся, жилúще многоразлúчных даровáний, Паисие преподóбне.

По втором стихословии седален, глас 4:
Подобен: Скоро предвари: 

Фарáсы удобрение, Святыя Горы светúло/ и славу изрядную Богослóва обители,/ верно да восхвалим, взывáюще:/ не престáй выну молúтися даровáти верным мир и здравие,// иже любовию совершают память твою, Паисие.

Слава: тойже. И ныне: Богородичен: 

Всенепорочная Владычице, Яже по Рождестве, аки и прежде Рождества чúста пребывшая, страстей мою душу очисти и покаяния слéзы окаянству моему дáруй, яко да воспою освящéнным сердцем и очищéнныма устнáма вéлию Твою ко мне милость.

По полиелеи седален, глас 3:
Подобен: Красоте девства: 

Божия благодати жилище, верных ко обожéнию возставлéние и постников, Христу новоявлéнно благоугодúвшим, изображéние, цветы сладкопéний да увязéм, помыслов яко всечестный благúх сосуд, взывающе: светлый Афона знаменонóсче, радуйся, Паисие богомýдре.

Слава: тойже. И ныне: Богородичен: 

Омраченную мою душу озарú светом благодати божéственнаго Рождества Твоего, Чистая Дево Марие, Надéждо отчаянных, и тьму отженú безмерных прегрешений моих, яко да обрящу милость в день оный Суда и любóвию немолчно да вопию Ти: радуйся, Благодатная.

Первый антифон 4 гласа и прокимен: 
Честна пред Господем смерть преподобных Его. Стих: Блажен муж, бояйся Господа: 
Евангелие преподобнаго. 

По 50-м псалме стихира, глас 6: 

Вещéственных всех отметáяся издéтска,/ подвига терпелúвнаго ради/ к высоте восшéд безстрáстия,/ Паúсие преблажéнне,/ услыши ны, молящияся ти,/ вперú ум к тебе притекáющих/ ко еже возлюбúти лýчшая,/ яко да и мы вéчный живот улучúм,/ чтýщии память твою,// отцев Афонских крúне новонасаждéнный.



Канон, глас 8, 

егоже краестрóчие:

Старче Паúсие, хранú любящия тя. Иоиль. 


Песнь 1 
Ирмос: Вóду прошед, яко сýшу,/ и егúпетскаго зла избежав,/ израильтянин вопияше:// Избавителю и Богу нашему поим.

Нúва дúвная горы Афонския изращáющая слáдкия плоды ты явúся, Паúсие богонóсе, подвизáющимся новый дáре вышний.

Научúл еси, отче, чáда твоя помыслы от лукáвствия и врéда хранúти, во умé же непрестáнно обдержáти благая Христова разумéния.

Тóками слéз Господа моляше, отче Паúсие, о всех нуждáющихся и приносящих в кéллии твоей разлúчная прошения.

Богородичен: Нóвый Паúсий, Марúе, úстинно узрé божественное явление Твое преестéственныма очúма во Афóне, в лéта послéдняя, Приснодéво.

Ин, глас 4, 

егоже краестрóчие:

Добродетели новосиянную звезду, Паисия сладкопою. Х. 


Песнь 1 
Ирмос: Отвéрзу уста моя/ и наполнятся Духа,/ и слово отрыгну Царице Матери,/ и явлюся, светло торжествýя,// и воспою, радуяся, Тоя чудеса.

В наша времена, Паисие, в горе Афонстей возсиял еси зарями святаго жительства и словесы мудрыми, úмиже мрак печали расточил еси всех, к тебе притекающих.

Цвéтник всеблаговóнный душа твоя показáся, мудрости израстúвши, послушания и молитвы шúпцы прелéпотныя, веселящия вся, любовию к тебе угонзáющия, отче Паисие.

Потребил еси вся советы лукáваго, Паисие преблажéнне, добрыми пóмыслы, яже ношáше, яко хорýгвь любвé неизглагóланныя ко всем, в сéрдцы твоем.

Божéственную, яко глагóлаше, справедливость, Паисие, соблюдая в житиú своем, крóтких явúся правило и умиряеши вéрныя тúхостно: тем и сподобился еси Вышния светлости.

Богородичен: Едúна Неискусомýжная и Пренепорóчная Владычице, от скверн мя очúсти и заблуждéний многих, и сподóби честнóму Паисию подóбитися нравом, яко да спасéн буду.

Песнь 3 

Ирмос: Небéснаго круга/ Верхотвóрче, Господи,/ и Цéркве Зиждúтеля/ Ты менé утверди в любвú Твоей,/ желáний краю, вéрных Утверждéние,// едúне Человеколюбче.

Непрестáнными молитвами ко Владыце всех,/ умоляеши, Паисие отче,/ избáвитися от злых призывáющим тя/ и чáющим свобождéния// обышéдших печалей.

Сúлу яже свыше стяжáв, преблаженне,/ душáм усопших помогáеши мольбáми,/ ты бо наказал еси вéрным/ о тех молúтися/ яко нýжду имýщих// пáче живых, Паúсие.

Изумевáет ум земнорóдных,/ кáко приял есú яве, блажéнне,/ в кéллии твоей/ многочтúмую великомýченицу Евфúмию дивную,// святе Паúсие, отцéв похвалó.

Богородичен: Исцелéний Тя Крин/и Целúтельницу лýчшую недýгом телéсным,/ Мати, вéмы,/ прибегáющии всú,/ сегó ради вéрою просим/ Твоея, Богоневéстная,// божéственныя пóмощи.

Ин 

Ирмос: Твоя песнословцы, Богородице,/ Живый и Независтный Истóчниче,/ лик себе совокупльшия, духовно утвердú,/ в Божественней Твоей славе// венцéв славы сподоби.

Трубя любвé песнь, ты вóлю свою отсекáше, другáго вóлю творúти ищá, яко глагóлаше Павел превéлий, о Духонóсче Паисие.

Новосвéтлое огнезнáмение Фарас, ты Арсения стяжал еси наставника к Свету вековéчному, от него же Божественное Крещение восприял еси, Паисие, добродéтели жилúще.

На Горе Святéй мед мудрости от постник обирáше, якоже пчелá неутомúмая, тем нектáр точáше от чистых устéн твоих неустáнно, отче Паисие.

Богородичен: Пóхоти плóти моея долувлекýщия, Всенепорóчная, укротú скоро, и души моея óчи горé восперú к нетлéнным, Вышним, Владычице, яко да прúсно ублажáю Тя.

Седален, глас 4:
Подобен: Скоро предвари: 

Святая душа твоя, Паисие, молитвы дéтельница сотворúся непрестáнными и божéственными прошéньми: ты бо мнóга лéта подвизáяйся в клéти своей, отче, явúся áки столп свéтел молитвы ко Христу, всех Зиждúтелю и Вседержúтелю.

Слава, и ныне: Богородичен.

Глас и подобен тойже: 
Дево Неискусомýжная,/ христиан Уповáние,/ правослáвных Похвалá и Удобрéние,/ Ангелов Блистáние/ содéлася Твоúм Рождеством./ Тем великое стяжáла еси, Владычице, дерзновéние,/ у Престóла Сына Твоего,// выну заступáющи чтýщия Тя.

Песнь 4 

Ирмос: Услышах, Господи,/ смотрения Твоего тáинство,/ разумéх дела Твоя// и прослáвих Твоé Божество.

Спасéния тя содéйственника исповéдаху приходящих сóнмы, поучéний твоих ради, преподóбне Паúсие.

Лýчший врач показался есú молúтвою, двéма отрокóма немощствýющима, святе, паче родúтеля врачá, досточéстне.

Дивно, Паúсие, мнóгажды на молúтве твоей свет Христов испущáше и воспевáше пéсни от сéрдца и пéния.

Богородичен: Просвещéние, Богоневесто, помрачéнней души моей дáруй, Ты бо, рóждши Господа, мúрови и человéком Незаходúмый Свет явúся.

Ин 

Ирмос: Ужасóшася всяческая/ о Божéственней славе Твоей,/ Ты бо, Неискусобрачная Дево,/ имела еси во утробе над всеми Бога/ и родила еси Безлéтнаго Сына,/ всем воспевáющим Тя// мир подавáюща.

Нося любовию неисчéтною Спасов, Паисие, Крест на рáму твоéю, путь яко равноáнгелен прéйде жития на землú и упокóися в безстрáстия и трезвения дóмех.

Яко сеновный пустынный финикс, блаженне Паисие, Синайскую гору преукрасú, и яко сладкоуханный крин умáсти гору Афонскую ароматы честнаго любомýдрия твоего.

Троицы показался еси яснéйшее зерцáло, смиренномýдрия одухновéнное столпописáние, преподóбне, и сýщих на Афоне отцéв Небесная слава: сего ради вси тя воспеваем, Паисие.

Богородичен: Всяческая Содержай дланию един Господь и Спас мира от всенепорочных ложесн Твоих плоть перстную восприят и вознесé на Небо род человеческий.

Песнь 5 

Ирмос: Вскýю мя отрúнул еси/ от лицá Твоего, Свете Незаходúмый,/ и покрыла мя есть чуждáя тьмá, окаяннаго;/ но обратú мя и к свéту заповедей Твоих// путú моя напрáви, молюся.

Воздéл еси, святче, ко Господу рýце твои о юных, впáдших в злáя и твоего поможéния сúльнаго чáющих.

Разрешáеши пýты невоздержáния всех к тебе притекáющих мольбáми твоúми ко Владыце, Паúсие мýдре.

Свыше пóмощию мнóги юныя, преподóбнейше, ко стезé Христóве наставляеши, и сих жития являеши к лýчшему пременéние.

Богородичен: Стена Нерушúмая, и Основание Неподвижимое, и Покров, Богородице, верным в Рождестве Твоем познáлася есú, Всенепорóчная.

Ин 

Ирмос: Ужасóшася всяческая/ о Божéственней славе Твоей,/ Ты бо, Неискусобрачная Дево,/ имела еси во утробе над всеми Бога/ и родила еси Безлéтнаго Сына,/ всем воспевáющим Тя// мир подавáюща.

Умертвúв мудровáние плóти всенóщными стоянии, слезáми, молúтвами и смирéнием, храм содéлался еси Утéшителя свéтел, вéрныя освящáя со тщáнием приходящия ти, преподóбне, треблажéнне Паисие.

Взыде на лéствицу добродéтелей, предúвне Паисие, вóлю свою отсекáя, послушание творя старца совéтом, áкибы в пещú железо ковачý, яко да благопотрéбен соделáешися.

Премýдрости Царя златосияннаго узрéл еси, ныне сый любвé мирополóжница: тем вси земнорóдных сóнмы притекáху и учéнием внимáху божéственным твоим на всякий день, Паисие.

Богородичен: Вéлие таинство Рождество Твое уяснúша всех прорóков лúкове, Дéво: Тя бо Свéщник, горы приосенéнныя Чáщу, Кивóт и Стáмну поименовáша златýю, Жезл, Купинý неопáльную, Скрижаль и божественную Трапéзу.

Песнь 6 

Ирмос: Молитву пролию ко Господу,/ и Тому возвещý печáли моя,/ яко зол душа моя исполнися/ и живот мой áду приближися,/ и молюся яко Иóна:// от тли, Боже, возведú мя.

Тело твое честнóе, Паисие,/ во огрáде обители Суротú/ якоже сокрóвище воúстинну/ лежит, богомýдре,/ и вéрным подаéт даровáния,/ исцелéния болезней душéвных// и телéсных ран врачевáние.

Являшеся мнóгажды, богонóсе, в дáльних,/ ты бо целúтель мýдрый познáся/ стрáждущим недýгом рáковым, Паисие,/ беснýющимся врач,// труждáющимся скорое утверждéние.

Поколебася врагá гордыня/ святою твоéю сúлою, всеблажéнне,/ ты бо, яко живый/ от гроба приúде/ и óтрока одержúма избáви от рабóты лукавому //и от того злобы, Паúсие.

Богородичен: Не стяжáх даровáния слез,/ во éже оплáкати грехóв моих множество,/ и умилéния, Мáти, лишéн/ и от сердца стенáния úскренняго,/ тем мольбáми Твоими ко Христу// пáгубное невоздержáние мое истребú.

Ин 

Ирмос: Божественное сие и всечестное/ совершающе прáзднество,/ богомудрии, Богоматере,/ приидите, руками восплещим,// от Нея рождшагося Бога славим.

Мимоходящих всех превыше показáлся еси в послéдняя, Паúсие, себе помышляя в человéцех áки послéдняго, тем и непреходящия радости сподобился еси.

Путú уясняше ко Господу, яко руководúтель нелéстнейший, ликóм, Паисие, инокýющих и множеству бéдне плáвающих в житéйских буреволнéниих.

Болящия спéшно врачевáше, спешáщия к божéственней твоей благодáти, и иныя спасáше от бед, Паисие, твоúми ко Спасу нашему прошéнии.

Богородичен: Предстáтельство еси неусыпáемое призывающим Тя, Владычице, и Утешéние в бýрех печáлей люте бéдствующим, Богородúтельнице.

Кондак, глас 8. 
Подобен: Взбранной: 

Святыя Горы подвúжника прослáвленнаго/ и Цéркве светúло новосиянное/всем сердцем в песнех да восхвалим,/ путеводя бо верных/ к лýчшему жительству,/ тех даровáний потоков испóлни,/ сегó ради взывают:// радуйся, отче Паúсие.

Песнь 7 

Ирмос: От Иудеи дошедше, отроцы,/ в Вавилоне иногда/ верою Троическою пламень пещный попраша, поюще://отцев Боже, благословен еси.

Послушник Господень, постá дéлатель и молитвы рачúтель, настáвник юным, недýжным и труждáющимся врач преусéрдный в послéдняя времена, Паúсие, явúлся еси.

Мудро и праведно во Афоне и инех поживé мéстех, богонóсе, и приял еси богáтно благодáть прозрения, наставляя вéрныя на спасения стезú.

Просвещáеши твоими словесы юныя, Паúсие,/ пáдшия и сочтáвшияся велиáру,/ изъясняя тем деяния Спáсова, всехвáльне,// и возвещáя волю Господню.

Богородичен: Узрéти Твоúми мольбáми/ Образ Сына Твоего/ всех чтýщих Тя сподóби, Отроковúце,/ и покланяющихся любовию/ святéй иконе Твоей:// Ты бо еси нам божéственное Предстáтельство.

Ин 

Ирмос: Не послужиша твари Богомудрии/ пáче Создáвшаго,/ но, огненное прещение мýжески попрáвше,/ радовахуся, поюще:// препéтый отцев Господь и Бог, благословен еси.

Протúвится гóрдым Господь и благодать подаéт смирéнным всем человеком, глагóлаше ты, Паисие пóстниче, якоже и Иáков Божественный речéт, смирения скрижáль.

Свящéннейше, яко поúстине от Зиждúтеля разлучают стропóтнии помыслы, вéдя, Паисие, Сему приближáшеся в житии твоем благúми, блажéнне, помыслы и богоугóдными.

Столп явился еси мудрости Божия необорúмый, Паисие, новый и светозáрный образ разсуждéния: тéмже упокоевáше притекáющия всеблагоговéйно к кéллии твоей, взыскýющия молитвы твоея.

Богородичен: Крепчáйшее на супостáта, Богородúтельнице Дево, орýжие мы в брáнех взéмлем, ходáтайство Твое ко Всечестнóму Сыну Твоему и Богочеловéку, Егóже зачалá еси неизречéнно.

Песнь 8 

Ирмос: Царя Небеснаго,/ Егоже поют вóи Ангельстии,// хвалúте и превозносúте во вся веки.

Пáжить показáся даров духовных и исцелений недугов многоразлúчных гроб божественный твой úже в Суротú, богомýдре.

Всем сердцем на всякая лéта память твою восхваляем и чтим, богонóсе, и просим вси, Паисие, от тебе благодати.

Лукáвнейший змий, отче, вползает, желая окаянную мою душу обвúти, но пóмощию твоею сильною дерзáю и уповаю.

Богородичен: Спасéние явúлася есú, Пресвятая Дево, человеком, яко рóждшая безсéменно Слово Отца, Христа Жизнодáвца.

Ин 

Ирмос: Отроки благочестивыя в пещú/ Рождество Богорóдичо спасло есть;/ тогда убо образуемое,/ ныне же действуемое,/ вселенную всю воздвизает пети Тебе:/ Господа пойте, дела,// и превозносите во вся веки.

Дом моления непрестáннаго узрéвся, сподóбился еси очúма своúма Господа Бога зрéти, Пресвятýю Владычицу, твоего божéственнаго Ангела, Лукиллиáна мýжественнаго и Евфúмию, Паисие, блаженную.

Вéлий, Паисие, ныне явúся учитель и наискорéйший врач, лечбы учений целя немощствýющия, преподобне, безчúсленная сердцá, яже к тебе притекáху в Горе Афонстей и яже к Зиждителю мольбы твоея взыскáху.

Богородичен: Сладкоглáсную показáла нам еси птúчицу, Всенепорóчная Богомáти, в вертогрáде Твоем, Паисия мýдраго, егóже божéственныя глагóлы в наших носяще сердцáх, Владычице, яко богатство священное, Тя воспеваем радостию в безконéчныя веки.

Песнь 9 

Ирмос: Востинну Богородицу/ Тя исповедуем,/ спасеннии Тобою, Дево Чистая,// с безплотными лики Тя величающе.

Узрéвше благодать твою и цельбы, ихже всякий день источáеши, достослáвне, добродéтельное жúтельство твое воспеваем, отче Паисие.

Яко потóк даровáний благúх естествá превыше, в Суротú гроб твой, Паисие, явúся, стрáждущим душéю и телом подая исцеления.

Всерáдостно в Кóнице и на Афоне, в Суротú, отче Паúсие, и в Церкви всей чтим божéственную память твою.

Богородичен: Сыну Твоему припáдаю, Мáти Богородице, и покланяюся, и в пéснех восхваляю лúка Твоего добрóту, Присноблажéнная.

Ин 

Ирмос: Всяк земнородный/ да взыграется, Духом просвещаемь,/ да торжествует же Безплотных умов естество,/ почитающее священное торжество Богоматере,/ и да вопиет:/ радуйся, Всеблаженная Богородице,// Чистая Приснодево.

Возсиял еси яко светило днесь, весь сонм озарúл еси чернорúзцев, Паисие, твоих подвиг лучезáрными облистáнии, и верных чúны притекáющих ти; тем вси, якоже златозáрнейшую тя почитáем звездý новосиянную.

Отче святый, непорóчно жúтельство твое на землú совершúл еси, и светúльник душéвный неугасúм пóдвигом крáйним соблюл еси; сего ради вéсело востечé к Небéсному Граду, идéже трудóв приéм воздаяние, рáдуешися, о Паисие.

Яко Живоначáльнаго Дýха оргáн, честный Паисие, любóвию слáвим тя, Святоимéнныя Горы похвалó, и гроб лобызáюще чудотóчный, в Богослóва обители, преподобне, молитв твоих ко Творцу просим.

Богородичен: Разум Ти чист промышлéния о всех человéцех даровáся, якоже Богомáтери Святéйшей и Студенцý благодáти. Сего ради к предстáтельства Твоего покрóву спешáще, на всякое время вéрнии приимáем реки даровáний приснотóчных Твоих.

Светилен, глас 4:
Подобен: Скоро предвари: 

Зарями пóдвига ныне просиявшаго в Горе Святéй и Божия благодáти плáменем вéрныя озарúвшаго почтúм Паисия, взывáюще: разсéй мрак прегрешений нас, память твою совершáющих.

Слава и ныне, глас и подобен тойже: 

Святыя Горы Хранúтельнице и Упрáвительнице Неусыпная, Богородúтельнице Дево, Паúсия предстáтельствы, цвéта пáжити Твоея миротóчныя, спасú от бед всяческих величáющих любовию Тя во веки веков.



На хвалитех стихиры на 6, глас 8.
Подобен: Что вы наречем: 

Что тя нарекý, Паисие?/ Смирения ли скрижáль?/ Монахом ли вóли Божия возвестúтеля?/ Бдения ли сосуд свéтел и чист,/ воду мудрости всем прозрáчнейшую/ обильно выну точáщ/ людем неразумным,/ жаждущим словес твоих сладких улучúти?/ Темже взываем ти:// радуйся, Афона удобрéние.

Что тя возглаголю, Паисие?/ Воздержания ли мирополóжницу?/ Алкáнием ли насыщéние?/ Безстрáстия ли Божественный столп?/ Непрестáнныя ли молитвы богонóснаго рачúтеля?/ Добродéтелей ли всяческих жилище?/ Сего ради выну/ якоже человека равноангельна почитая,/ вопию ти, богохвальне:// моли спастúся душáм нашим.

Что тя возыменýю, Паúсие?/ Афóна ли гусль благоглагóливую?/ Богослóва ли обители сокрóвище/ и лúру Господню собрáния úноческаго?/ Цевнúцу ли Божéственнаго разума сладкозвýчную/ и áрфу жития лучшаго добрострýнную?// И аки во Христе кончúною/ свéточ новосиянен,// моли спастúся душам нашим.

Что тя возглашý, Паисие?/ Панагýды ли кéллии выспренняго обитáтеля?/ Горы ли святыя славу?/ Хранения ли пяти умных дверей/ стража бóдреннаго/ и сосуд Утéшителя,/ злáтом преиспещрéнный?/ Ты бо, провúдев бýдущая,/ к нестарéемей жизни упрáвил еси// верою к тебе притекáющия.

Силою Утéшителя, Паисие,/ показался еси по кончúне/ чудес совершúтель/ и нескудное воúстинну/ врачевáние вéрным:/ сýща бо на одрé боляща посетú,/ от беды и смерти спасé его/ тéплыми твоими молúтвами// ко Господу, Спасу твáри.

Всех чтущих память твою/ предстатель божествен еси,/ богонóсе подвижниче,/ и не улучúвших зрéти/ твое житие преподобное, отче,/ пребывáеши застýпник, и избáвитель,/ и целитель богодухновéнный:/ мнóзи бо ты уврачевáл еси/ вмáле по успéнии, Паисие,// содéйствием Духа.

Слава, глас 5: 

Преподобне отче,/ к Вышним издéтска устремлéн/ равноáнгельным жúтельством,/ пóдвигом же неустáнным/ течéние твое навершú:/ сподóбися ýбо быти/ дом златоковáн Святаго Духа,/ покрывая благодáтию/ прáво вéрующих собрáния;/ и ныне, Паисие всемýдре,/ Христу сорáдуяся,/ ниспослú нам всечестныя молитвы/ и спаси мольбáми твоúми// к тебе притекáющия.

И ныне, глас тойже: 

Блажим Тя, Богородице Дево,/ и слáвим Тя вернии по долгу,/ Град Неколебúмый,/ Стену Необоримую,/ твердую Предстáтельницу// и Прибéжище душ наших.







Источник и и литература


Перевод стихир, седальнов и второго канона выполнен по службе, составленной греческим песнописцем господином Харлампием Бусья.
Перевод тропарей, кондака и первого канона  выполнен с официальной греческой службы, составленной митрополитом Эдесским Иоилем.

15 комментариев:

  1. Добрый день! Благодарю за публикацию чудесной Службы!
    По-братски подсказываю на опечатку во втором тропаре. "верою попиющие…"

    ОтветитьУдалить
  2. Спаси вас Господи за огромный труд. Вы не начинали еще переводить молебный канон преподобному Паисию Святогорцу? Было бы очень отрадно.

    ОтветитьУдалить
    Ответы
    1. Благодарю за отзыв.
      И в планах нет даже. Отчасти потому, что есть просьбы о других переводах.
      А еще сами службы и каноны молебные прп. Паисию, хотя их аж четыре, не кажутся особенно удачными.
      Так что пока нет.
      Но скорее всего, к дню памяти в июле эту службу постараюсь пополнить.

      Удалить
    2. Вы знаете, я нашла уже переведенный канон молебный прп. Паисию. Он в конце службы, которую можно скачать вот здесь: http://www.ierodiakonjustin.info/index.php?option=com_remository&Itemid=107&func=startdown&id=639

      Удалить
    3. Спаси Господи за ссылку. Искренняя благодарность. К сожалению молебный канон прп.Паисию не тот . В нужном мне каноне тропарь первой песни канона начинается со слов: " Ελέους του θείου ο μιμητής, Παίσειε πάτερ, ως βλέπεις διηνεκως..."

      Удалить
    4. Да, с интересной мысли начинается канон. Буду иметь в виду Ваше желание, но, к сожалению, ничего обещать не могу. Сейчас много работы с текстами, а для переводов времени остается мало.

      Удалить
  3. Этот комментарий был удален автором.

    ОтветитьУдалить
  4. Молебный канон прп. Паисию Святогорцу ( на греческом ), о котором я говорила. Нашла чудным образом после водосвятного молебна этому святому. Дивен Бог во святых Своих, Бог Израилев! Преподобне отче Паисие, моли Бога о нас! Слава Богу во веки веков. Аминь!!! https://yadi.sk/i/sgXmOUgy3DCbZA

    ОтветитьУдалить
  5. https://yadi.sk/i/w0-gD7Rh3JmnLr Молебный канон преподобному Паисию Святогорцу на греческом. Издательство: Суроти.Фессалоники.Монастырь Апостола и Евангелиста Иоанна Богослова. 2015 г. ( Оригинал. Сканированная версия )

    ОтветитьУдалить
    Ответы
    1. Молебный канон преп. Паисию, изданный в 2015 году в Суроти, был переведён на церковнославянский язык в Угрешской семинарии, опубликован в 6-м выпуске их богословского ежегодника. Файл PDF выложен здесь: http://www.nupds.ru/images/book/sbornik6.pdf , перевод канона на стр. 211 - 224.

      Удалить
  6. https://yadi.sk/i/7xk04cMO3JmnLs Еще хочу поделиться сканированной версией ( качество - увы! ) книжицы, которую раздает на Беседах в Оптиной пустыни отец Наместник. Книжица эта - Заповеди.Тексты Священного Писания. 2017 г. Она не продается, просто раздают во славу Божию. Издание постоянно обновляется.

    ОтветитьУдалить