вторник, 12 июля 2016 г.

Прп. Паисию Святогорцу служба

     
В 2017 добавлены: хвалитны, стиховны

                                          Вечер

На Господи, воззвах стихиры, глас 1.

Подобен: Всехвальнии мученицы:


Храм себé творяй свéтел/ Духа Святаго,/ и благоухание сый Христу, Паисие/ ко твоей каливе приходящих/ возрадовал еси,/ всех освятив, преподобне,/ твоего благословения просящих,// яко да преидут многоволненную жития пучину.

Мудраго Арсения добродéтели подобниче,/ во отечествии твоем просиявшаго,/ и многих старцев, подвижников Афонских,/ св
éтлей любвú поревновати хотя,/ лéствицу совершенства во Христé/ ты постиже всечéстне/ и яко новая звезда,// ныне возсиял еси.

Паисие, благодать богатную/ с небесé приял еси,/ во éже помощи всем страждущим/ и в нуждах сущим,/ тем во обстояниих посещаше болящия,/ и сим скорое исцелéние Божиею благодатию дарова,/ ко Господу являя дерзновéние,// егоже стяжал еси.


Слава, глас 6:

Постническою преукрáшен свéтлостию/ Церковь всю в последняя озарил еси,/ Паисие, Святогорче духонóсный:/ разумно бо во Афоне пожив,/ безстрáстия и мудрости правило/ показался еси истиннейшее,/ и верных учéньми своими озарил еси,/ превыше бо плоти быв,/ благодать обрел еси/ молитися непрестанно/ о чтущих тя любовию// и воспевающих всечестную память твою. 



На стиховне
стихиры, глас 5. Подобен: Радуйся, постников:
Рáдуйся, любвé горение/ свещеносяй труды преподобными/ в последних единонравных/ ликóм Афонским,/ подвижников светúло и прáвило:/ Христу бо моляся,/ немощствующаго на ся подъял еси недуги/ и язю его многоболéзненную/ даже до смерти пронесé,/ Паúсие святе,/ аки достояние многоценное,/ рáдуяся, яко ближнему ослáбу дадé/ и подъя на ся горесть его,// якоже и грехи наша Господь.

Стих: Честна пред Господем/ смерть преподобных Его.

Рáдуйся, Фарáсы óтрасле,/ горы Афона доброрáсленное прозябéние,/ Синáя крúне/ и Стомиóна цвéте многомáстен и благоухáнен,/ Паúсие преподобне,/ настáвниче непрелéстнейший ко спасению/ благочестивых множества,/ ты похвала обители Богослова бысть,/ сия бо, якоже крепость хранит неподвúжимая/ советов твоих собрание и гроб твой,/ егóже, тя Господь хотя прослáвити,// ныне купель исцелений яви.

Стих: Блажен муж, бояйся Господ,/ в заповедех Его восхощет зело.

Рáдуйся, многочáдныя мáтере/ плóде небесный,/ Паисие преподобне,/ сам себе истощáяй усердно/ пóдвиги и молитвою,/ да Божиею благодатию напитáеши мир,/ жаждущий веры уразумéти всякую истину,/ и ко стезé спасения да упрáвиши/ притекáющих к совéтом премýдрым твоим:/ сéяй бо любве Божественныя сéмена,/ клас пожал еси богáтный жизни нестарéемыя;/ сея сподоби всех, тя воспевáющих// и взыскующих у Господа предстáтельства твоего.

Слава, глас 8:

Учительства и рассуждения талант приял еси,/ яко воздаяние постническим трудом,/ от Христа Бога, Паúсие превеликий:/ ты бо предзрéти грядущая сподóбися/ и напоúти нúвы душéвныя благочестúвых/ питиéм небесным богомудрых глагóл твоих;/ тáко возсияв, áки нововозжжéнный светильник Цéркве,/ к Солнцу ýмному взыде./ Того моли сподóбити и нас// вышния свéтлости.


И ныне, глас тойже:
Владычице, приими молитвы раб Твоих/ и избáви нас// от всякия нужды и печали.


Тропарь, глас 3. 
Подобен: Божественныя веры:
Якоже Ангел явúся мúрови/ во времена послéдняя,/ христоподражательне Паúсие преподóбне,/ подвúжнически бо во Афóне пожúв,/ яко пресвéтлое сóлнце возсиял есú/ и озарúл есú/ вéрных полноту благодатию,// глагóлы предúвными и чудесы.


Ин, глас 1:
Подобен: Пустынный житель:
Фарасы óтрасль и Афона украшéние,/ и éже от вéка преподобным подражателя и равночéстнаго,/ Паисия восхвалим, вéрнии,/ сосуд, даров преиспóлненный,/ яко хранящаго от всех обстояний/ вéрою вопиющия:/ слава Давшему тебе крепость,/ слава Венчавшему тя,// слава Дéйствующему тобою всем исцелéния.


Канон, глас 8,
егоже краестрóчие:
Старче Паúсие, хранú любящия тя. Иоиль.
Песнь 1
Ирмос: Вóду прошед, яко сýшу,/ и егúпетскаго зла избежав,/ израильтянин вопияше:// Избавителю и Богу нашему поим.

Нúва явúся дúвная горы Афонския, изращáющая слáдкия плоды, Паúсие богоносе, подвизáющимся новый дáре вышний.

Научúл еси, отче, чáда твоя помыслы от лукáвствия и врéда хранúти, во умé же непрестáнно обдержáти благая Христова разумения.



Тóками слéз Господа моляше, отче Паúсие, о всех нуждáющихся и приносящих в кéллии твоей разлúчная прошения.

Богородичен: Нóвый Паúсий, Марúе, божественное явление Твое преестéственныма очúма узрé во Афóне úстинно в лéта послéдняя, Приснодéво.

Песнь 3
Ирмос: Небéснаго круга/ Верхотвóрче, Господи,/ и Цéркве Зиждúтеля/ Ты менé утверди в любвú Твоей,/ желáний краю, вéрных Утверждéние,// едúне Человеколюбче.

Непрестáнными молитвами ко Владыце всех,/ умоляеши, Паисие отче,/ избáвитися от злых призывающим тя,/ и чающим свобождения// обышедших печалей.

Сúлу яже свыше стяжав, преблаженне,/ душáм усопших помогáеши мольбáми,/ ты бо наказал еси вéрным/ о тех молúтися/ яко нýжду имýщих// пáче живых, Паúсие.

Изумевáет ум земнорóдных,/ кáко приял есú яве, блажéнне,/ в кéллии твоей/ многочтимую великомученицу Евфúмию дивную,// святе Паúсие, отцéв похвалó.

Богородичен: Исцелéний Тя Крин/и Целúтельницу лýчшую, недýгом телéсным,/ Мати, вéмы,/ прибегáющии всú,/ сегó ради вéрою просим/ Твоея, Богоневéстная,// божéственныя помощи.

Седален, глас 4:
Подобен: Скоро предвари:

Святая душа твоя, Паисие, молитвы дéтельница сотворися непрестáнными и божéственными прошеньми: ты бо многа лета подвизаяйся в клети своей, отче, явúся аки столп светел молитвы ко Христу, всех Зиждúтелю и Вседержителю.

Слава, и ныне: Богородичен.
Глас и подобен тойже:
Дево неискусомýжная,/ христиан Уповáние,/ правослáвных Похвалá и Удобрéние,/ Ангелов Блистáние/ содéлася Твоúм Рождеством./ Тем великое стяжала еси, Владычице, дерзновéние,/ у Престóла Сына Твоего// выну заступáющи чтущия Тя.

Песнь 4
Ирмос: Услышах, Господи,/ смотрения Твоего тáинство,/ разумéх дела Твоя// и прослáвих Твоé Божество.

Спасéния тя содéйственника приходящих сóнмы исповéдаху поучений твоих ради, преподóбне Паúсие.

Лýчший врач показался есú молúтвою, двема отрокóма немощствýющима, святе, паче родителя врачá, досточéстне.

Дивно, Паúсие, мнóгажды на молúтве твоей свет Христов испущаше и воспевáше пéсни от сéрдца и пéния.

Богородичен: Просвещение, Богоневесто, помрачéнней души моей дáруй, Ты бо, рождши Господа, мирови и человéком незаходúмый Свет явися.

Песнь 5
Ирмос: Вскýю мя отрúнул еси/ от лицá Твоего, Свете Незаходúмый,/ и покрыла мя есть чуждáя тьмá, окаяннаго;/ но обратú мя и к свéту заповедей Твоих// путú моя напрáви, молюся.

Воздел еси, святче, ко Господу руце твои о юных, впадших в злая и твоего вспоможения сúльнаго чáющих.

Разрешáеши путы невоздержáния всех к тебе притекающих мольбáми твоúми ко Владыце, Паúсие мудре.

Свыше пóмощию многи юныя, преподóбнейше, ко стезé Христове наставляеши, и сих жития являеши к лýчшему пременение.

Богородичен: Стена нерушúмая и Основание неподвижимое и Покров, Богородице, верным в Рождестве Твоем позналася есú, Всенепорóчная.

Песнь 6
Ирмос: Молитву пролию ко Господу,/ и Тому возвещý печáли моя,/ яко зол душа моя исполнися/ и живот мой áду приближися,/ и молюся яко Иóна:// от тли, Боже, возведú мя.

Тело твое честное, Паисие,/ во ограде обители Суротú/ якоже сокровище воúстину/ лежит, богомудре,/ и вéрным подает даровáния,/ исцелéния болезней душéвных// и телéсных ран врачевáние.

Являшеся многажды, богоносе, в дальних,/ ты бо целитель мудрый познáся/ стрáждущим недугом рáковым, Паисие,/ беснýющимся врач,// труждáющимся скорое утверждение.

Поколебася врагá гордыня/ святою твоею силою, всеблажéнне,/ ты бо, яко живый/ от гроба прииде/ и отрока одержúма избави от работы лукавому// и от того злобы, Паúсие.

Богородичен: Не стяжах дарования слез,/ во еже оплакати грехов моих множество,/ и умиления, Мати, лишен/ и от сердца стенания искренняго,/ тем мольбами Твоими ко Христу// пагубное невоздержание мое истреби.



Кондак, глас 8:Подобен: Взбранной:


Святыя Горы подвижника прославленнаго и Цéркве светило новосиянное/ всем сердцем в пéснех да восхвалим,/ путеводя бо вéрных к лучшему жительству,/ тех дарований потоков исполни,// сего ради взывают: радуйся, отче Паисие.

Песнь 7
Ирмос: От Иудеи дошедше, отроцы,/ в Вавилоне иногда/ верою Троическою пламень пещный попраша, поюще://отцев Боже, благословен еси.

Послушник Господень, поста дéлатель и молитвы рачитель, настáвник юным, недужным и труждающимся врач преусердный в послéдняя времена, Паúсие, явúлся еси.

Мудро и праведно во Афоне и инех поживé мéстех, богоносе, и приял еси богатно благодáть прозрения, наставляя верныя на спасения стези.

Просвещаеши твоими словесы юныя, Паисие,/ падшия и сочтавшияся велиару,/ изъясняя тем деяния Спáсова, всехвальне,// и возвещая волю Господню.

Богородичен: Узрети Твоúми мольбáми/ Образ Сына Твоего/ всех чтущих Тя сподóби, Отроковúце,/ и покланяющихся любовию/ святей иконе Твоей:// Ты бо еси нам божéственное Предстáтельство.

Песнь 8
Ирмос: Царя Небеснаго,/ Егоже поют вóи Ангельстии,// хвалúте и превозносúте во вся веки.

Пáжить показася даров духовных и исцелений недугов многоразличных гроб божественный твой иже в Суротú, богомудре.

Всем сердцем на всякая лета память твою восхваляем и чтим, богоносе, и просим вси, Паисие, от тебе благодати.

Лукавнейший змий, отче, вползает, желая окаянную мою душу обвити, но помощию твоею сильною дерзаю и уповаю.

Богородичен: Спасение явúлася есú, Пресвятая Дево, человеком, яко рождшая бессеменно Слово Отца, Христа Жизнодавца.

Песнь 9
Ирмос: Востинну Богородицу/ Тя исповедуем,/ спасеннии Тобою, Дево Чистая,// с безплотными лики Тя величающе.

Узрéвше благодать твою и цельбы, ихже всякий день источаеши, достослáвне, добродетельное жительство твое воспеваем, отче Паисие.

Яко поток дарований благих естества превыше, в Суротú гроб твой, Паисие, явися, страждущим душею и телом подая исцеления.

Всерадостно в Кóнице и на Афоне, в Суротú, отче Паúсие, и в Церкви всей чтим божéственную память твою.

Богородичен: Сыну Твоему припáдаю, Мати Богородице, и покланяюся, и в песнех восхваляю лика Твоего добрóту, Присноблаженная.



На хвалитех стихиры на 6, глас 8.
Подобен: Что вы наречем:


Что тя нареку, Паисие?/ Смирения ли скрижаль?/ Монахом ли воли Божия возвестúтеля?/ Бдения ли сосуд свéтел и чист,/ воду мудрости всем прозрачнейшую обильно выну точáщ/ людем неразумным,/ жаждущим словес твоих сладких улучúти?/ Темже взываем ти:// радуйся, Афона удобрéние.

Что тя возглаголю, Паисие?/ Воздержания ли мироположницу?/ Алк
áнием ли насыщение?/ Безстрастия ли Божественный столп?/ Непрестанныя ли молитвы богонóснаго рачúтеля?/ Добродéтелей ли всяческих жилище?/ Сего ради выну якоже человека равноангельна почитая,/ вопию ти, богохвальне// моли спастися душам нашим.

Что тя возыменую, Па
úсие?/ Афóна ли гусль благоглагóливую?/ Богослова ли обители сокрóвище/ и лиру Господню собрания úноческаго?/ Цевнúцу ли Божéственнаго разума сладкозвучную/ и áрфу жития лучшаго доброструнную?/ И аки во Христе кончúною свéточ новосиянен,// моли спастúся душам нашим.

Что тя возглашу, Паисие?/ Панагуды ли к
éллии выспренняго обитáтеля?/ Горы ли святыя славу?/ Хранения ли пяти умных дверей стража бóдреннаго/ и сосуд Утéшителя златом преиспещрéнный?/ Ты бо, провидев будущая,/ к нестареемей жизни управил еси// верою к тебе притекáющия.

Силою Утешителя, Паисие,/ показался еси по конч
úне чудес совершúтель/ и нескудное воúстину врачевáние вéрным:/ суща бо на одре боляща посетú,/ от беды и смерти спасé его/ тéплыми твоими молúтвами// ко Господу, Спасу твари.

Всех чтущих память твою предстатель Божествен еси,/ богоносе подвижниче,/ и не улуч
úвших зрéти твое житие преподобное, отче,/ пребываеши заступник и избавитель,/ и целитель богодухновéнный:/ мнози бо ты уврачевáл еси/ вмáле по успéнии, Паисие,// содéйствием Духа.

Слава, глас 5:

П
реподобне отче,/ к вышним изд
éтска устремлéн/ равноангельным жúтельством,/ пóдвигом же неустáнным течéние твое навершú:/ сподобися убо быти дом златокован Святаго Духа,/ покрывая благодатию/ право верующих собрания;/ и ныне, Паисие всемудре, Христу сорáдуяся,/ ниспослú нам всечестныя молитвы/ и спаси мольбáми твоúми// к тебе притекáющия.

И ныне, глас тойже:

Б
лажим Тя, Богородице Дево,/ и сл
áвим Тя вернии по долгу,/ Град неколебúмый, Стену необоримую,/ твердую Предстáтельницу// и Прибéжище душ наших.




Источник и и литература


Перевод стихир выполнен по службе, составленной греческим песнописцем господином Харлампием Бусья.
Перевод тропарей, кондака и канона  выполнен с официальной греческой службы, составленной митрополитом Эдесским Иоилем.

14 комментариев:

  1. Добрый день! Благодарю за публикацию чудесной Службы!
    По-братски подсказываю на опечатку во втором тропаре. "верою попиющие…"

    ОтветитьУдалить
  2. Спаси вас Господи за огромный труд. Вы не начинали еще переводить молебный канон преподобному Паисию Святогорцу? Было бы очень отрадно.

    ОтветитьУдалить
    Ответы
    1. Благодарю за отзыв.
      И в планах нет даже. Отчасти потому, что есть просьбы о других переводах.
      А еще сами службы и каноны молебные прп. Паисию, хотя их аж четыре, не кажутся особенно удачными.
      Так что пока нет.
      Но скорее всего, к дню памяти в июле эту службу постараюсь пополнить.

      Удалить
    2. Вы знаете, я нашла уже переведенный канон молебный прп. Паисию. Он в конце службы, которую можно скачать вот здесь: http://www.ierodiakonjustin.info/index.php?option=com_remository&Itemid=107&func=startdown&id=639

      Удалить
    3. Спаси Господи за ссылку. Искренняя благодарность. К сожалению молебный канон прп.Паисию не тот . В нужном мне каноне тропарь первой песни канона начинается со слов: " Ελέους του θείου ο μιμητής, Παίσειε πάτερ, ως βλέπεις διηνεκως..."

      Удалить
    4. Да, с интересной мысли начинается канон. Буду иметь в виду Ваше желание, но, к сожалению, ничего обещать не могу. Сейчас много работы с текстами, а для переводов времени остается мало.

      Удалить
  3. Этот комментарий был удален автором.

    ОтветитьУдалить
  4. Молебный канон прп. Паисию Святогорцу ( на греческом ), о котором я говорила. Нашла чудным образом после водосвятного молебна этому святому. Дивен Бог во святых Своих, Бог Израилев! Преподобне отче Паисие, моли Бога о нас! Слава Богу во веки веков. Аминь!!! https://yadi.sk/i/sgXmOUgy3DCbZA

    ОтветитьУдалить
  5. https://yadi.sk/i/w0-gD7Rh3JmnLr Молебный канон преподобному Паисию Святогорцу на греческом. Издательство: Суроти.Фессалоники.Монастырь Апостола и Евангелиста Иоанна Богослова. 2015 г. ( Оригинал. Сканированная версия )

    ОтветитьУдалить
  6. https://yadi.sk/i/7xk04cMO3JmnLs Еще хочу поделиться сканированной версией ( качество - увы! ) книжицы, которую раздает на Беседах в Оптиной пустыни отец Наместник. Книжица эта - Заповеди.Тексты Священного Писания. 2017 г. Она не продается, просто раздают во славу Божию. Издание постоянно обновляется.

    ОтветитьУдалить