Сщмч. Ираклидию Кипрскому акафист

АКАФИСТ

святому священномученику Ираклúдию, епископу Тамассúйскому, Кúпрскому

Кондак 1

Возбрáннаго крепкостоятеля/ и Апóстолом равночестнаго адамáнта,/ весь Кипр обышéдшаго/ и научившаго Христову Евангелию богомудро,/ яко любящаго отца да воспоúм/ Тамассúйския же обители предстáтеля,/ и да воззовéм к нему:// радуйся, отче священномýчениче Ираклúдие.

Икос 1

Áнгельскаго твоего жития, вся дивесы пети тщýся, тем и слово ми, преподобне, даждь, яко да от души песньми достойно тя возмогу почтúти, божественнаго застýпника моего, глаголя:

Радуйся, упование вéрных святое,

Радуйся, теплое ко Христу моление;

Радуйся, печальных отрáдо сладчайшая,

Радуйся, душ сокрушéнных божественное врачевание;

Радуйся, всем призывающим тя истинное прибежище,

Радуйся, всех предваряющая в напастех помоще;

Радуйся, в нýждах отечески согревáяй,

Радуйся, немощи любовию покрывáяй;

Радуйся, страстных язв исцелителю,

Радуйся, ко свету обóжения влекúй;

Радуйся, дýши ко Христу управляяй,

Радуйся, от прелести вражия изводяй.

Радуйся, отче// священномучениче Ираклúдие.

Кондак 2

Видя Жизнодавец, яко ты возжадá познати едину истину, святе, Варнаву и Павла áбие, ко Евангелию путевождú посылает ти, с нúма же тя, Ираклúдие чтуще, благочестно зовем: Аллилуия.

Икос 2

Разумети хотящим честным Апостолом путú к горе Снежней, сим сошествовал еси ты, стезю указуя. И божественными быв уловлéн глаголы сих, вспять не ý возвратúся. Тем и мы тебе вопием таковая:

Радуйся, житейская брáшна возненавúдевый,

Радуйся, житие во Христе возлюбúвый,

Радуйся, Апостольскими ученьми возвеселéнный,

Радуйся, к совершенству тéми упрáвленный,

Радуйся, о воплощении Слова Благовестие радостно восприявый,

Радуйся, высотó, к небесным тáинственно превознесéнная,

Радуйся, идольское злочестие отрясый,

Радуйся, иго Христово почтúвый,

Радуйся, к вершине путь указáти потщáвыйся,

Радуйся, закону богодухновéнному себе подклонивый,

Радуйся, Павла рéвности подражавый,

Радуйся, Варнавы кротости поревновавый.

Радуйся, отче// священномучениче Ираклúдие.

Кондак 3

Силою свыше облекúйся, возжадал еси Крещения Божественнаго, богомýдре; грядый в Солéю, в потóце крещéн бе, радуяся, во имя Отца, и Сына, и Духа Святаго, и весь обновлен, возопú:

Аллилуия.

Икос 3

В пещере пребывая Тамáсстей, во граде с таúнникома Варнавою и Павлом и в пóдвизе всяце, яко светило, преподобне, блещáше, лучи пущáя и согревáя любовию теплою ти вопиющия:

Радуйся, свещниче разумения заренóсный,

Радуйся, плáменю, дýши грéяй,

Радуйся, пóдвигом, яко солнце, сиявый,

Радуйся, облистание Божия Духа приявый,

Радуйся, яко Христу, ничесóже имýщему, во след úде,

Радуйся, яко веселяся поживé аки нищ,

Радуйся, яко в пещере Тамáсстей вселился еси,

Радуйся, яко человекоубийце врагу посмеялся еси,

Радуйся, слезами душу омывый,

Радуйся, мольбами ум препитавый,

Радуйся, предвкусúвый радования небеснаго,

Радуйся, тли свобождéнный земныя.

Радуйся, отче// священномучениче Ираклúдие.

Кондак 4

Рéвностию Евангельскою в сердце воспламенéнный, с божественными Апостолы Христовыми вкупе, блистательным и богодухновенным гласом, Ираклидие отче, мудро всех Безначáльней и Пресвятéй научáше пети Троице:

Аллилуия.

Икос 4

Слышан и вúден бысть, óтче, яко нравы богоугодныя сохраняяй, тем и Христа самовидцы возложением на тя рук во епископа Тамасийскаго града тя совершúша, верных же сонм радостию вéлиею тебе возопи:

Радуйся, пастырю Тамассúйский и стрáже,

Радуйся, двере словесных овец,

Радуйся, Спасовых ученик подобноревнúтелю,

Радуйся, благодатию тем равночéстне,

Радуйся, Богонаречéнный иерáрше Христов,

Радуйся, аки камение драгоценное почтенный Апостолы же и люди,

Радуйся, словом и деянием возблиставый,

Радуйся, прелесть разсéявый врáжию,

Радуйся, во образ Христа себе совершúвый,

Радуйся, народа вождю богодухновéнный,

Радуйся, в нéмже Избáвителя познавáем,

Радуйся, úмже ко Господу очи возводим.

Радуйся, отче// священномучениче Ираклúдие.

Кондак 5

Боготéчно безбожия море во острове Кипрстем, якоже конь[1] Божия Духа, отче, преплы Христа лодиею, и глаголов твоих трубóю ко стезе спасения премудро люди настáвил еси, зовущия:

Аллилуия.

Икос 5

Видевше тя стопы богодвúжныма пешешествующа, богомудре, яко всякую область отчизны твоея напечатлé, проповедуя тéпле Христово божественное и священное имя, тáко нарóди, увéровавше, Ираклúдие, ти вопияху:

Радуйся, предéлы отечествия освятивый,

Радуйся, западному краю острова светонóсче,

Радуйся, усладивый безбожия горькое море,

Радуйся, разоривый идольское высокомерие,

Радуйся, проповéдавый священное Евáнгелие Христово,

Радуйся, закону духовному научúвый языки,

Радуйся, яко изыде во всю землю отóка вещание твоé,

Радуйся, яко обышéл еси Кипр, благовéстием его орошая,

Радуйся, Спасово уяснивый пришествие,

Радуйся, вражие низвергúй возношение,

Радуйся, рыбы словéсныя уловивый,

Радуйся, богóм языческим посмеявыйся.

Радуйся, отче// священномучениче Ираклúдие.

Кондак 6

Рог на демоны возвысил еси преслáвно: слово Господне. Духóв нечистых, блаженне, связав, свобождаше вся держúмыя тéми люте; сúи же людие, уцеломýдрени бывше, Христу Избавителю вопияху:

Аллилуия.

Икос 6

Возсиявшу живоносному Воскресения свету в души твоей, отче, слезотóчных молитв теплотóю возстáвил еси умершия, Ираклúдие преподобне и богоносе. Тúи же радостию вопияху:

Радуйся, смерти уз избавляяй,

Радуйся, заклепы ея сокрушаяй,

Радуйся, света Христова исполненный,

Радуйся, от ада многия свободивый,

Радуйся, блистание небесное, всю землю осияваяй,

Радуйся, верным славу Воскресения указуяй,

Радуйся, по себе приведый Божию благодать незавúстно,

Радуйся, прилежно добродетели совершивый,

Радуйся, скúние, Духа Святаго исполненная,

Радуйся, клéте благодати одушевлéнная,

Радуйся, дýши от мертвых возставляяй,

Радуйся, множество дúвных показуяй.

Радуйся, отче// священномучениче Ираклúдие.

Кондак 7

Мнáсону единодушно, Ираклúдие отче, соводворúся в пóдвизе крайнем, вкýпе же уязвляюща себе постом разýмно, мудрование плоти порабóтиста, яко лýчшему, духу, Христа совоспевáюща:

Аллилуия.

Икос 7

Мáнием всяким душевное око твое бысть пригвождéно Христу всежелáнно, и кóждо твое, отче, дыхание тáинственно дародаяше Божие благоухáние верою к тебе притекающим и тепле вопиющим ти таковая:

Радуйся, душу ко Христу упрáвивый,

Радуйся, ум на Нем утвердúвый,

Радуйся, плáменне прилепúвыйся Жениху твоему,

Радуйся, Сего положив Источник крепости своея,

Радуйся, красотó, прекраснаго возлюбивый Христа,

Радуйся, глубинó, Имже Духа узрéвый,

Радуйся, сердце свое Божий престол сотворúвый,

Радуйся, вся внýтренняя к Нему управивый,

Радуйся, дождю, души наша орошаяй,

Радуйся, лучу, ум наш просвещáющая,

Радуйся, дохновение благодати всем раздаяй,

Радуйся, прохлáдо в житейстей бури.

Радуйся, отче// священномучениче Ираклúдие.

Кондак 8

Странное к разумению сотворил еси чудо, мертвей сестре твоей возгласив, яже во гробе лежáщи, гласом ти отвещá áки бы жúва сýщи. Темже и прежде невéровавший сие диво узрев, возопú:

Аллилуия.  

Икос 8

Очи отвéрзый слепóму прикосновением, о божественный Ираклидие отче, зéницы ты того душéвнеи открыл еси, во еже зрети Христа, единаго Бога. Сего ради к тебе взывáше, стенáя и вопия таковая:

Радуйся, воочéние слепым сотворивыйся,

Радуйся, зарú умныя преисполненный,

Радуйся, вéжди прикосновением отверзаяй,

Радуйся, вéдати невидимая творяй,

Радуйся, свете, к невечернему свету Христову путеводяй,

Радуйся, тьму лукáваго молитвою отгоняяй,

Радуйся, яко просвещáеши очи сердечная,

Радуйся, яко помрачáеши безумие вражие,

Радуйся, являяй вéдение богодухновéнное,

Радуйся, испущáяй блистание веры,

Радуйся, Христовым сиянием очищаяй,

Радуйся, велиара молитвою попаляяй.

Радуйся, отче// священномучениче Ираклúдие.

Кондак 9

Всякую степéнь добродетелей ты богосиянно прóшел еси непорочным сердцем, прияв яко скрижаль смирение, егóже указá Христос святúтельства хотящим стезéю тещú, взывáющим:

Аллилуия.

Икос 9

Глаголы твоя божественныя утешения рóсу стяжахом, богоугодне отче; Господу молящеся бо, речé, нижé погибнем когдá. Темже, тебе, Ираклидие, чада твоя тéпле взываем:

Радуйся, истóчниче животворных советов,

Радуйся, потóче божественных словес,

Радуйся, утешéния рóсо неоскýдная,

Радуйся, совершенства горó превосходнейшая,

Радуйся, стремнино боготéчная реки вразумлений,

Радуйся, водó сладчайшая дерзновенных учений,

Радуйся, яко безстрáстия воду тóчиши,

Радуйся, яко к ревности спасительней вдушевляеши,

Радуйся, возгласе, укрепляяй труждáющияся,

Радуйся, клúче, возставляяй пáдающия,

Радуйся, из негоже себе почерпаем веру,

Радуйся, úмже преходим печали.

Радуйся, отче// священномучениче Ираклúдие.

Кондак 10

Уста отрыгáющаго хулы тяжкия, треблаженне мудре, суровым велением твоим, ускорив, áбие затворил еси.  Плачущаго же пóзде исцелú, милость явив вопиющему:

Аллилуия.

Икос 10

Образ Креста Честнаго, якоже Моисей, жезлóм начертав в водах, отче, и моляся теплотою душú, потока неудéржное стремление укротú и множество ко Крещению воумил еси, вопиющих сице:

Радуйся, рéчную быстринý устáвивый,

Радуйся, воду в сушу претворивый,

Радуйся, якоже Моисей, показавый дúвная,

Радуйся, жезлóм струú отсекаяй,

Радуйся, мнóзи ко Крещению управивый чудно,

Радуйся, к познанию Божественных путь указавый разумно,

Радуйся, яко притяжал еси чудес благодать,

Радуйся, яко обратил еси в бегство всякую лесть,

Радуйся, одождúвый лияния исцелений,

Радуйся, раздаятелю дарований духовных,

Радуйся, к Богу многия привлекий,

Радуйся, души по Нем усовершивый.

Радуйся, отче// священномучениче Ираклúдие.

Кондак 11

Высоту святости постигúй в конец, наединé сый, мученически к небесéм призвáн быв, и хотящу ти отытú от земли, вéрнейшаго ученика твоего Мнáсона остáвил еси яко учителя, руки возлóжь на него, вопиющаго:

Аллилуия.  

Икос 11

Несуще тело твое с печалию об истинно горестнем разлучении ученицы твои, Ираклидие отче, благочестно в пещере твоей в Тамассе мощи святыя твоя положúша, стенáюще жáлостне и вопиюще:

Радуйся, к Сиону вышнему угонзáяй,

Радуйся, в страну нетленную восходяй,

Радуйся, заповедей хранению ны научивый,

Радуйся, нам остáвивый к подражанию образ,

Радуйся, течение святейшее совершив непреклонно,

Радуйся, высоте совершенства приблизився твéрдо,

Радуйся, ныне со Ангелы божественную песнь воспеваяй,

Радуйся, ныне Апостолом равнопрестольне соседяй,

Радуйся, споручниче наш пред Богом,

Радуйся, наше спасительное моление,

Радуйся, истиннаго животá причащаяйся,

Радуйся и не забуди чада твоя.

Радуйся, отче// священномучениче Ираклúдие.

Кондак 12

Веселящися обитель твоя, Ираклúдие святе, песни ти, поющи, приносит: небесным бо сокровищем, божéственнейшими и честными мощмú твоими богатящися, взывает ти умилением многим сиé:

Аллилуия.

Икос 12

Поем ти, богомýдре Ираклúдие отче, песнь благодарственную любовию: обитель твою, ýбо могýщую мнóгащи завоевáну быти, отнюд не оставил еси, отче, врагóм когдá. В последних же ныне хранúши тéпле ти вопиющия:

Радуйся, обители Тамассúйския слáво,

Радуйся, жизни единонрáвныя укрепление,

Радуйся, подвизающихся крéпосте и сúло,

Радуйся, зде водворяющихся твердыне,

Радуйся, яко покров и основание святыя обители твоея еси,

Радуйся, яко тоя отец любвеобúльный еси,

Радуйся, яко чада твоя неусыпно хранúши,

Радйся, яко о них неустанно предстáтельствуеши,

Радуйся, напастей избавителю бóдреннейший,

Радуйся, врагов отгнáтелю скорейший,

Радуйся, заступление мое превысокое,

Радуйся, радование мое сладчайшее.

Радуйся, отче// священномучениче Ираклúдие.

Кондак 13

О богоносе отче, кипрскаго отока слáво, обители же Тамассийския заступление, ныне убогая приими приношения, во гласех псаломских поющих ти, и благодати сподоби, тебе ради немолчно взывати сие:

Аллилуия.

Молитва

О пречестнáя и священная главó и благодати Духа Святаго исполненная, Спáсово со Отцем обитáлище, великий архиерéю, теплый наш заступниче, священномýчениче Ираклúдие! Предстоя у Престола всех Царя и наслаждаяся света Единосущныя Троицы, херувимски со Ангелы возглашая песнь трисвятую, великое же и неизслéдованное дерзновение имея ко Всемилостивому Владыце, моли спастися паствы Христовы людем, благостояние святых Церквей утверди, архиереи благолепием святительства укрáси, монашествующия к подвигóм добраго течения укрепи, Кипрский оток и вся грады и страны добре сохрани, и веру святую непорочну соблюсти умоли, мир весь предстательством твоим умири, от глада и пагубы избави ны, и от нападения иноплеменных сохрани, старыя утеши, юныя настави, безумныя умудри, вдовицы помилуй, сироты заступи, младенцы возрасти, немощствующия исцели, и везде тепле призывающия тя и с верою притекающия к тебе и усердно припадающия и молящияся тебе от всяких напастей и бед ходатайством твоим свободи.

Моли о нас Всещедраго и Человеколюбиваго Христа Бога нашего, да и в день Страшнаго Пришествия Его от шýияго стояния избавит нас, и радости святых причастники сотворит со всеми святыми во веки веков.

Аминь.

Тропарь, глас 3.  

Творение Хризостома Перваго, архиепископа.

Подобен: Скоро предвари.

Велика обрете тя Тамассийский град/ проповедателя и пастыреначальника,/ Церкве Христовы учителя,/ идольскую бо лесть низложив/ истины свет проповедал еси языком./ Темже, святе священноначáльниче Ираклидие,/ Христу Богу молися// дароватися на велией милости.

Кондак, глас 2.

Подобен: Предстательство христиан:

Ираклúдие, обители твоея сокрóвищнице,/ и Кипра всего воеводо,/ приими чад смиренных молебный глас/ и даждь молитв совершение,/ к ближним удобопреклонный слух,/ ко Христу благоугождение,/ совести чистоту,/ поставляя пред Господем их,/ яко престол честный// и молитвы вселение.

---

[1] Ав. 3:15.

Перевод благословлен митрополитом Тамассоским и Орнийским Исаией 23 июля 2017 года.

Акафист составлен братией исихастирия Честнаго Предтечи в Междуречье (Тимиу Продрому Месопотаму), близ Лимассола Кипрскаго, в 2009 году.

Перевод выполнен по греческому изданию: «Молебный канон и «Радуйся» ко святому отцу нашему Ираклидию». Священная обитель святого Ираклидия, Левкосия, Кипр, 2011 г. В оригинале припев: «Радуйся, отче Ираклидие»; все «радуйся» — в столбик, без отбивки по группам.

Молитва помещена общая святителю, по изданию: «Молитвы Господу Богу, Пресвятей Богородице и святым угодникам Божиим, чтомыя на молебнех и иных последованиих». Петроград, 1915 г. Листы 76 об − 77.  В нее добавлено имя святителя, «царствующий град» заменен на «кипрский оток» и убрано поминовение царствующего дома.

Святой священномученик Ираклидий Кипрский:  тропарь, кондак, краткие сведения 

Изображение над акафистом — фреска соборного храма обители святого Ираклидия, датируемая 1759 г.  Слева на ней — отец святого Ираклидия, который посылает сына своего указать дорогу святым Апостолом Павлу и Варнаве.