Преподобному Гавриилу Иверскому, Самтаврийскому (Ургебадзе) служба

pdf   word

Служба преподобному и Богоносному отцу нашему, ГАВРИИЛУ ИВЕРСКОМУ,
Самтаврийскому

Вечер

На Господи, воззвах стихиры, глас 1.
Подобен: О дивное чудо:

О дивное чудо!/ Мúра себе удалúвый/днесь в концех земли прославляется/и просветитель отéчеству своему бывает:/ веселися, Ивéрие,/ Богородичен удéле,/ возопием, вернии,/ Гавриúла Богомýдраго имýще ходатая:// преподобне отче, радуйся,/ моли благоутробнаго Господа/ Церкви даровáти мир// и вéлию милость.

Твоя хвалят добродетели/ правослáвнии людие,/ Богонóсе Гаврииле,/ смирéние и милосéрдие,/ и любвé Божéственныя блистáние,/ и терпéния столп неколéблен./ Тем, припáдающе ко образу твоему, просим:/ предстáтельствуй, святче, за ны,// моли Христа Бога,/ да избавит от бед//и остáвит беззакония наша.

Радосте сподвúжников,/ Православия утверждéние,/ избрáнный служúтелю Святыя Троицы,/ Ангелов дрýже,/ от земных в Небéсный Вертоград возшéдый,/ и тáмо, яко цвет, вкоренúвыйся,// ныне Садодéлателя благáго умоли/ окропити рóсою благодати и ны,// углéбшия в соблáзнах и бéдствиих.

Ины, глас 4.

Подобен: Яко добля:

Яко Евангелия истинный послýшатель,/ Гаврииле преподобне,/ и заповедей Христовых усердный дéлатель,/ своих воль хотения оставив,/ крепко на страсти ополчúлся еси/ и прият от Бога разсуждéния венец./ Егоже моли/ победы на сопротúвнаго даровати// вéрою совершающим память твою.

Дáры Утéшителя/ бýими притворéнии/ в сéрдцы своем потаúвый,/ и на камени вéры утверждéн,/ вся безбожных шатáния попрáл еси,/ Спаса Христа проповéдуя имя./ Сего ради Ангелов лúкове/ и православных собрáния// ныне тя хвалят любóвию, рáдующеся.

Светел лицéм,/ рáдуяся о Дýсе Святе,/ милостию к себе привлекáше/ ближних и дальних,/ овому воумлéнии, овому обличéнии,/ вся всем содéлався, отче премúрне,/ темже и ныне к тебе притекáющия/ и на заступление твое уповáющия// поможéнием не остáви, святе.  

Слава, глас 6:

Взéмше свирéли мысленныя,/ взыгрáем прáзднственная,/ благословúм Христа, Бога нáшего,/ явúвшаго таковáго печáльника/ отéчеству своему,/ людем удéла избрáннаго,/в пáстырех дúвнаго./ Тому хвалéбная да вознесем:/ты еси úноком рáдование/ и велúчие Картлú,/ и чудес истóчник,// и великий нам помощник и заступник.  

Вход. Прокимен дне. И чтения три.

Пророчества Исаии чтение. Тaко глаголет Господь: вси языцы собрашася вкупе:

Премyдрости Соломони чтeние: Прaведных дyши в руце Божией:

Премyдрости Соломони чтeние. Прaведницы во веки живут:

На стиховне стихиры, глас 5.

Подобен: Радуйся, живоносный Кресте:

Радуйся, сокрóвищнице богоугоднаго нрава,/ ризою смирения покровéнная,/ в нейже яспис и топáзий сияют,/ кротость и долготерпéние твоя,/ и адамáнт веры прáвыя,/ бúсер бдéния и трезвéния,/ и маргарит молитвы непрестáнныя/ в злáте любве и мúлости./ Вся сия ныне Богу явúвшу,/ воспевают чáдца церкóвная, взывáюще:/не престай, угóдниче Христов, моляся// еже спастúся душам нашим.

            Стих: Честна пред Господем// смерть преподобных Его.

Радуйся, яко голубь чистый,/ девством и целомудрием убелéнный,/ блáгостию богоподобною воскрилéнный,/ досточéстне отче Гаврииле,/ ты бо, плотския страсти умертвив,/ разум в послушание Христово пленил еси;/ темже, венец хвалений/ любовию сплетающе,/ немолчно воспеваем ти:/ радуйся, радосте наша,// молися о чтущих тя.

Стих: Блажен муж, бояйся Господа// в заповедех Его восхощет зело.

Радуйся, убóгим и сирым утешéние,/ нищим и болящим пóмоще,/ скóрбным отрáдо,/ сущим в бедах прибéжище,/ о грéшных благое ходáтайство;/ сего ради  Всемúлостивому/ возлюблен соделавыйся/ и дерзновением обогатився к Нему,/ ныне непрестанно моли/ нас от пучины страстей// к Пристани Вышней упрáвити, отче.

Слава, глас 8:

Днесь Церковь Иверская,/ Пресвятыя Богородицы сад,/ вопиет, зовущи:/ приидите, вернии, возвеселимся/ в памяти богокрáснаго Гавриила,/дóблестьми мя удобрúвшаго/ и сиянием души озарúвшаго,/ со равноапóстольною Ниною ликовствýюще/ и богомудрым Иоанном со ученики/ и преподобных сонмом,/ и мученик богоприятным собранием,/ и благоверных воинством,/ диадúмою похвал/ да увязем его, взывающе:/ молим тя, чистейший отче:/ испроси душам нашим мир// и велию милость.

Таже, Ныне отпущаеши.

По благословéнии хлебов тропарь, глас 4:

Якоже Владыка Христос/ сокры Божество Свое,/ в человечество Его облекúй,/ и тем неизглагóланную славу Свою невидиму сотвори,/ такожде и ты юродства образом/ покрыл еси славу твою/ и знáмением исповéдничества просиял еси,/ и пастырь душ явился еси,/ отче преподобне Гаврииле,/ моли Христа Бога// помúловати души наша. ­

Ин, глас 8:

Божественный гром, труба духовная,/ любвé велегласное проповедание,/ мученик подражателю/ и в напастех скорый помощниче,/ рода úверскаго похвалó,/ преподобне отче Гаврииле,/ исповедниче и юрóде,// моли Христа Бога помиловати души наша.

На утрени

На Бог Господь, тропарь святаго, дважды.­

По 1-м стихословии седален, глас 5:
Под: Собезначальное Слово:

Знамением крестным и молитвою вражия искушения победив,/ постом и воздержанием Господеви благоугодил еси:/ темже чудес приял еси дар, всем исцеления подавая,/ верою притекающим к раце мощей твоих,/ Гаврииле преподобне;/ моли Христа Бога грехов оставление даровати/ чтущим любовию святую память твою.  

Слава, и ныне, Богородичен:

Ужáсно чудо зачатия,/ и несказáнен образ Рождества в Тебе познáся, Приснодево Чистая,/ ужасает мой ум и удивляет помысл,/ слава Твоя, Богородице, во всех прострéся ко спасению душ наших.­

По 2-м стихословии седален, глас 4:

Под: Скоро предвари:

Праздности и веселий присно уклоняяся,/ честный отче наш Гаврииле,/ выну мечем молитвы вооружáшеся на невидимыя враги,/ и на ложе твердом во вретище почивая,/ присно трудясь, день оный Суда помышляше,/ страхом Божиим ограждая душу/ и Творца всего сущаго непрестанно величая.

Слава, и ныне, Богородичен:

Обновила еси, Чистая, Божественным Рождеством Твоим/ истлевшее во страстех земнородных мертвенное существо/ и воздвигла еси вся от смерти к жизни нетления./ Темже Тя по долгу блажим вси, Дево препрославленная,/ якоже прорекла еси.

По полиелеи седален, глас 7:

Господь наш Иисус Христос/ благослови тя на делá вéлия,/ человéчим умом неудобопостúжная,/ и милостию Своею тя обогатú/ в веце сем малем и скоротéчнем,/ по преставлении же/ даром ущéдри тя/ дерзновенно ходáтайствовати о душах грешных./ Приими и ныне/ малое сие моление наше,/ любовию ти приносимое,/ и теплым предстательством твоим/ умоли Всещéдраго/ грехов и беззаконий/ нас избавити,// Гаврииле преподобне.­

Таже степенна, 1-й антифон 4-го гласа.­

Прокимен, глас тойже: Честна пред Господем смерть преподобных Его.­

Стих: Что воздам Господеви о всех, яже воздаде ми?­

­Евангелие от Матфея, зачало 43 (Мф 11:27-30).­

По 50-м псалме стихира, глас 6:

Днесь, вернии, духовно торжествующе/ в нарóчитем прáзднице преподобнаго отца,/ и благочестно радующеся,/ тому тепле возопиим:/ радуйся, святый исповедниче/ и Христа ради юродиве,/ богодухновенне отче наш Гаврииле,/ радуйся, небесный человече/ и земный Ангеле:/ радуйся, многих на путь спасения настáвивый:/ радуйся, верным похвало,/ Иверския и Русския земли утверждение:// молися о душах наших.­

Богородице параклис, со ирмосом на 6, и святому на 8.­

Канон, глас 6

Песнь 1

Ирмос: Яко по суху пешешествовав Израиль/ по бездне стопами,/ гонителя фараона/ видя потопляема,// Богу победную песнь поим, вопияше.­

Рачéнием воспламенéн к вере чистей, и от дел любве усовершúвый ю, святый стáрче Гавриúле, настáви ны на путь благодéлания.­

Яко сосуд Святáго Духа Господь тя нам низпослá, ныне же благоухáния твоих молитв яко фимиам добрый выну к Нему восходят.­

Земли Иверския светило Щедрый тя показá, многомудре; благодатию же от Него воспрятою осиявáеши паству твою, и мрак злокóзненнаго расточаеши, и тмы недуг отгоняеши.­

Занé дадéся ти, святче, свыше дерзновéние ходатайствовати о грешных, ныне моли свободити души наша горькия работы греху.

Ин, глас тойже:

Невечéрним светом блистáеши, отче наш преблажéнне, Божия крепости испóлнь, темже моления наша приими и мир даруй верою притекáющим ко святому образу твоему.­

Не отрúни ны, всехвáльне отче, со умилением к подóбию зрáка твоего припáдающия, и теплое моление тебе возсылáющия, и усрамúвшияся беззакóний своих, обáче помилуй и укрепи, и Сокрушающаго брани умоли победу нам даровáти на демонския полки.­

Богородичен: Всеблагая Владычице, Яже Преблагáго Бога плотию рóждши, озлóбленное страстьмú сердце мое очисти, да верою и любовию величаю Тя.­

Песнь 3

Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.

От младéнства образ смиренномудрия быв, удалéн безпечалия дéтищнаго, в возрасте юности твоея возжелел еси Богу житием иноческим послужити, отметая плóтская вся попечéния.

Восхотéв погубити тя, льстивный зверь в лéта отроческая во откровении тя боряше, ты же не устрашися свирепства его и во Христе возмогл еси немощна сотворити его. Тем и нас избави напастей лукаваго.

Дому отчу приметáяся, в нем соделался еси нищ и чужд, Распеншемуся за ны приседя и Того любовию укрепляемь, и крест взем, Сему послужил еси.

Егда страна Иверская богоборчества исполнися, тогда ты, урáнен рачéнием гóрним, начá неустанно храм Божий воздвизáти, егоже трикраты гонителие разрушаху, обаче ты, отче, помощию вышнею паки устрояше и паче преукрашáше его.

Ин:

Свят, спасúтелен, чéстен образ твой, отче всехвáльне, в вере стоянию и служению Началопастырю в чаянии милости Его научаяй; тем, яко добр пастырь, овчáта твоя, напастей бед огради и тем безпорочен путь укажи, да в Небесную Ограду вселятся.

Заступи ны, преподобне, от прельщений мiра сего, и подаждь роду Иверскому силу супостат одолети, Церковь же мирну и непоколéблему соблюди.

Богородичен: Услыша Ева праматерь: в печалех родúши чада. Ты же, Чистая Дево, услышавши: Господь с Тобою, радуйся, радованным гласом печаль праматере потребила еси.­

Седален, глас 1:

Святыя мощи твоя яко источник чудес неисчерпаемый народу Божию познáшася, и кладязь целúтелен душевных и телесных недуг, и знáмение оставления многих согрешений наших, тáже сокровище благодати Духа Святаго. Течем убо с весéлием во обитель Самтавро, идеже ты, исповедниче и Христа ради юродиве Гаврииле, почивáеши, и всяк к тебе с верою приходяй и помазание елеем от лампады твоея прияв, акибы от тебе самáго благословение приéмлет и здравие души и тела обретает. Темже немолчно зовем ти: моли Милостиваго Бога грехов оставление даровати чтущим любовию святую память твою.

Слава и ныне, глас тойже:

Предстательнице верных, Богородúтельнице,/ скорбящих Радосте и плачущих великое Утешение,/ от чрева Твоего, Дево, всесвятаго преестественно Рождшагося непрестанно моли с Гавриилом преблаженным / в час испытания избавити нас лютаго осуждения.

Песнь 4

Ирмос: Христос моя сила,/ Бог и Господь, честная Церковь/ Боголепно поет взывающи,// от смысла чиста о Господе празднующи.

Велия беззакония и гонения богоборцы храмам и верным учиняху, и мнози жития úноческаго отрицахуся, ты же тесны врата и узкий путь избрав, неуклонно веру правую исповедаше.­

Нечестию безбожия умнóжившуся, богоразумне,  ты веледушно претерпеваше изсякáние любвé, поношения смиренно приемля, в возрасте юнем мужемудрие показýя.

Пострижения монашескаго сподобився и имя святаго Гавриила Афонскаго восприят, тому подвиги подражал еси, с ним же вкупе и утéшителие рода Иверскаго ныне показýетеся.

Священства сан восприим, веру прáвую проповéдаше, род же свой, в пучúну язычества погружаемый, окормляя, в заповедех Божественнаго Евангелия наставляше.­

Ин:

Благий рабе и верный, делателю винограда Христова, бодренно претерпевый тяготу дне и умноживый талант свой, со юроды вчинился еси и от Всещедраго сподобился еси радости и блаженства неизреченных.

Старче богоглагóливе, ты словесы божественными  нечéстие властителей богоборных обличáше, и тем Православия рог возвысил еси, и Церковь Иверскую возвеличил еси.

Богородичен: Ты еси, Пречистая Богородице, Прибежище нам и Утверждение, моли Сына Твоего и Бога нашего подати нам спасение и грехов оставление.

Песнь 5

Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.

Поругания от безбожных претерпевая, в Вифанию Иверскую, Бетания нарицáемую, притекл еси, идéже чудотворцы Георгий и Иоанн подвизахуся. Тии к доброслужению тя наставиша, ты же, в познании укреплен, благословение и разумение таин Божиих улучил еси.

Всем сердцем нас ради Распятаго возлюбив, поклонения твари паче Творца и поношения имени Божия не терпя, на богоборцы не обинуяся дерзнул еси и образ идольский и богоненавистнический пожéгл еси.

Стал еси пред идолослужители, доблемýдро глаголя: не подобает трýпию величание таковое, но Единому Христу точию, воскресшу из мертвых. Сего ради истязáху тело твое, и в темницу тя заключúша.

Ни мучителей суровствó, ни гонения, ни страх смертный  разлучити тя любве Божия не возмогоша, но уязвен весь и оструплéн, яко злато в горниле очистил еси душу свою во испытаниих тяжких.

Ин:

Осиял еси всю Иверию, преблаженне отче, бýими притворéньми зло обличая, многия к Солнцу Правды обращая, потребляя дела тьмы началозлобника врага.­

Просвещает вся притекающия к тебе, яко светило, празнственная память твоя, богоугодне, в ней же Спаса моли, милостию да призрит на род наш и оградит от тяжких бед и обстояний.

Богородичен: Бога, Егоже родила еси, Пречистая Марие, моли, рабом Твоим подати прегрешений оставление.

Песнь 6

Ирмос: Житейское море/ воздвизаемое зря напастей бурею,/ к тихому пристанищу Твоему притек, вопию Ти:/ возведи от тли живот мой,// Многомилостиве.

­Иже яряся, тя погубити желáху, тщи и нéмощни обретóшася, яко Камень и Утверждение верным тя смерти избáви, безбожных же поругáния твоего крепкодýшия поколебáти не возмогóша.

Тщанием Патриарха свобождение паче чáяния улучив, воздавая хваления Благоутрóбному, паки в Сиони ты обратися. Обаче и тамо оттóргну тя враг служения Божия, кóзньми нечестивых князей мирских; темже нищ и бездóмок бе лета многа, при гробех привитая, зной и лютыя стýдени претерпевáя, благословенне отче.­

Беззакония не терпя и к ближним любовию пламенея, обличаше в безбожии иверский род свой, да не взыдет нань гнев Господень. Моли Христа Бога, отче милостиве, о спасении нас грешных, и о еже избавити ны вражиих напастей и междоусобныя брани.­

Ин:

Хвалы и песньми да возвеличим пастыря, чудотворении Церковь удобрúвшаго, иверийцем звезду путеводную, любовию ко Вседержителю страну свою озарившую.

Припадéм кротостию ко преподобному Гавриилу, Иверии наставнику, верою и любовию его славяще и моляще испросити нам покаяние и исправление.

Богородичен: Ныне к Тебе прибегаю, Пречистая, спаси мя молитвами Твоими и соблюди: елика бо хощеши, можеши, яко Мати Всемогущаго.­

Кондак, глас 4:

Непостúжна есть милость/ Егоже благодатию/ создание обожéно зрим вси,/ ты же, блаженне отче,/ воистинну образ и подобие Творца явился еси,/ темже славим тя,/ хвалы достойна суща,/ яко бяше на земли/ правды глас и голубь чистоты,/ в чуднем смирении жительствовав,/ лирою мудрости/ и органом  любве звяцáше,/ ныне же на Небеси/ предстательствуеши о  спасении нашем,// ходатаю благодати Божия.

Икос:

Милостию нас ради Распятаго от младых ногтей возлюбив и Тому всеусердно последовав, первее в дому твоем странен соделася, пóслежде миру буй сотворися, да Христа приобрящеши, алча, жаждá и скитаяся, горькая поношений премля, имя же сладчайшее Иисусово выну в сердцы имея. Ныне хвалим тя по достоянию, словеса твоя поминающе и дивящеся житию ангельскому твоему. Темже и нас в покаянии и угождении Вышнему, отче, настави и умоли о спасении нашем,// ходатаю благодати Божия.

Песнь 7

Ирмос: Росодательну убо пещь содела Ангел/ преподобным отроком,/ халдеи же опаляющее/ веление Божие мучителя увеща вопити:// благословен еси, Боже отец наших.­

Кротостную твою премудрость и алкание Всецарю послужити Патриарх Ефрем зря, паки ко алтарю тя призывает, и, Таин Христовых приобщив, во святую обитель Самтавро посылáет, идеже ты, Новаго Иерусалима жителю, в кущице птичей у купины святыя Нины, Просветительницы всея Иверии, вселился еси, и со благоговением приношению Жертвы бескровныя и проповеди Царствия паки ся предал еси.­

Прешéдшу ти в столп Мириана царя, той кресты и иконы, в пéрсти обрéтенными, усéрдно благоукрашáше, чернорúзиц чудотворéнии вразумляя, козни враг невидимых обличáя, к непрестанней молитве путеводя. ­

Крест юродства и старчества Христа ради на рамо взем, мудрейший отче, яко буй и безумен мiру вменися, поругания от священник и мирских приимая. Ныне же сокровище Церкве Иверския познавáешися, славящих тя благодатию во спасение исполняющее.

Ин.

Во граде Тифлисстем, яко в пустыни, Гавриил досточестный, люди своя обличая и путеводя, взем меч духовный, иже есть глагол Божий, злочестивыя посечé, и крепость их сокрушú силою Славнаго по вселенней.

Паче чудес твоих без числа изумляют ум исповедание твое и любы яже к Богу и ближнему, преподобне, яко безбожию умножáющуся, ты в богомыслии и богоразумии преспевáше, дом ся желанен Пресвятей Троице сотворив, отче.

Богородичен: Богородице Дево, рождшая Слово паче слова, Зиждителя Своего, Того моли со святым Гавриилом, помиловати души наша. ­

Песнь 8

Ирмос: Из пламене преподобным росу источил еси/ и праведнаго жертву водою попалил еси:/ вся бо твориши, Христе, токмо еже хотети,// Тя превозносим во вся веки.­

­Давидски сердцем сокрушенным и смиренным взываше: аз есмь червь, а не человек, поношение человеков и уничижение людей. Ныне же прежде смирением покровенныя добродетели и святость твоя всем несумненны зрятся.­

Выну в скорбех, блаженне, в памяти непрестанней Страшнаго онаго дня воздаяния, слезами весь омывашеся, плачем радостотворным древним отцем подражая. ­

О чудотворче и старче наш богодухновенный, мудростию и ведением от Святаго Духа обогащенный, ты приял еси дар грядущая зрети и талант благостыни и милости. ­

Тайная яко вьяве зряше, честный отче, и истину о будущем возвещаше. Ныне же помози нам укрепити  мудростию сердца, во еже трезвитися и пути úстиннаго не отступúти.­

Ин:

Благохвалений венцем да увязем богоглаголиваго Гавриила, вретищем буйства благодати свет потаившаго, печальника всем и помощника, скорбящим скорое утешение.­

Паче солнца возсия, богогласе слово твое, егда веру Тройческую возвещаше, имже тучи греховныя расточишася, радость светлую нам подающе. Мы же, дела твоя поминающе, преподобне, в напастех и скорбех просим помощи твоея.­

Богородичен: Спасения Ходатаица нам явилася еси, Богородице, рождшая Спаса и Владыку всех: темже молим Тя, спасения сподоби всех песнословящих Тя верно во вся веки.­

Песнь 9

Ирмос: Бога/ человеком невозможно видети,/ на Негоже не смеют чини ангельстии взирати:/ Тобою же, Всечистая, явися человеком/ Слово воплощенно:/ Егоже величающе,// с небесными вои Тя ублажаем.­

В недýзе злéм, угодниче Иисусов, твердо претерпеваше болéния лютая, в Дусе же час кончины предзря и пред иконою святителя Николая Чудотворца о благословении народа и отечества своего помолúвся, в мире юдоль земную оставил еси.­

Богу Всесильному душу вперил еси, собору святых вчинился еси; темже мощи твоя в рогозине, якоже древних отцев, в Самтаврийстей обители погребаются, и абие река исцелений, источник чудес неисчерпаемых содеваются.

Благочестивии и маловернии, ленивии и усерднии возжелевают сосуду с твоею кровию прикоснутися, милости у тебе, отче, требующе; всех же мольбы приимая, щедро радостию озаряеши.

Видевше мнози священнослужителие исцеления от гроба твоего, ныне вкупе с паствою величают тя яко святаго великаго, новаго чудотворца, и выну память твою почитают.­

Ин:

Восхвалим днесь православных Иверии путевожда, добродетелей столпа, преподобнаго и Христа ради юродиваго Гавриила, на негоже воздвиженныя козни вражия Царюющий низложи, Имеяй велию милость.­

Приидите, восторжествуим в памяти богокраснаго Гавриила, теплаго молитвенника, нерадивых и в напастех сущих заступника, вопиюще: того молитвами, Боже, помилуй нас!­

Богородичен: Единаго от Святыя Троицы, Слова и Сына родила еси, Дево Пречистая, Егоже с преподобными и праведными моли о рабех Твоих, верою просящих грехов прощения.­

Светилен, глас 2:

Светильника земли Иверстей тя Трисолнечный Царь показа, пресиянный отче, от Него же и благодать восприял еси еже врага попаляти, верных же богоразумием озаряти.­

Слава, и ныне:

По Бозе упование имуще на Тя, Пречистая Богородице, молим Ти ся: Рождшагося из Тебе умоли даровати мир вселенней и велию милость.

На хвалитех стихиры, глас 8:

Днесь Церковь Иверская/ память твою празднует,/ Богоносе Гаврииле чудотворче,/ и восхваляет добродетели твоя,/ со Ангелы Божественный тайнозрителю,/ разумеяй сокровéнная и неизречéнная,/ благости пучино,/ отче инокýющих и радование,/ наставниче в неверии заблуждших./ Старче наш благий,/ испроси нам доблести свыше// и на супостата одоления.

Цвéты хвалéний пéсненных/ от недостойных устéн вознесéнных ти,/ милостиво приимú, преподобне,/ и Избавителя усéрдно моли,/ в кнúзех живóтных нам написатися/ и по кончине светлый лик твой/ сподóбитися зрети,/ в Стрáшный же оный Час/ одеснýю Владыки стáти/ и в Царствии Вéчнем, Нетлéннем/ вкупе с тобою и всеми святыми/ радостию немóлчно воспевати:// Троице Святая, слава Тебе!

Слава, глас тойже:

Якоже иногдá Креститель Христов Иоанн,/ добрый делателю нивы Господни,/ ты проповедаше покаяние,/ и яко пророк Давид/ рýце всенóщно в молитве воздевáше,/ темже в милосердие и терпение облечéн,/ Спасу нашему угодúл еси/ и кýпно со всеми святыми/ радость непрестающую улучúл еси,/ ныне же, в Кровех Небесных им сликовствýя,/преподобне старче Гаврииле,/ не престáй моляся о нас,// совершáющих всекрáсную память твою.

И ныне, глас тойже:­

Владычице, приимú молитвы раб Твоих/ и избави нас// от всякия нýжды и печáли.

 ­

Текст выложенной здесь службы преподобному Гавриилу (Ургебадзе) большей частью — свободное переложение на церковно-славянский язык службы Тинатин Мчедлишвили 2017-го года.

Некоторые недостающие части составлены специально.

Тропарь и кондак — архимандрита Кириона (Ониани)­, но они отредактированы (внесена грамматическая и стилистическая правка).