вторник, 17 октября 2017 г.

Святому праведному Лазарю, другу Христову, служба


PDF

ОКТЯБРЯ 17
Воспоминание перенесения мощей
святаго и праведнаго друга Христова
ЛАЗАРЯ, епископа Киттúйскаго
На велицей вечерни
На Господи, воззвах, стихиры, глас 2.
Подобен: Киими похвальными венцы:
Кúими благохвáльными песньми/ воспоúм богонóснаго,/ от востока возсиявшаго/ и тварь всю освятúвшаго/ множеством чудес и знáмений,/ друга Владычня,/ блажéннаго Лáзаря,/ Марфы и Марии срóдника,/ Вифáнии чáдо,/ Кипра славу,/ Византии хранúтеля,/ нашего помощника, и предстáтеля,// и Божéственнаго защитника?
Кúими благоуханными цвéты/ умáстим Христова друга,/ на Небесéх пребывáюща,/ ко иже на земли взирáюща,/ память его совершáющия,/ таúнника Истины и Учителя:/ кáко сегó и умéрша оживú/ живота и смерти Господь,/ Иисус Бог наш,/ всем даруяй Божéственную благодать// и велию милость?
Слово не возмóжет смéртное/ воспети величия твоя,/ úмиже от Христа обогатился еси,/ яко благодарный друг и истинный,/ Лазарю, самовúдче Спáсов:/ в тебе бо проповедь познáся,/от века проповéдуемая,/ óбщаго воскресéния,/ éже сотворит во скончании вéка Творец,/ Христос Бог наш,// имéяй велию милость.
Ины, глас 4.
Подобен: Яко добля в мученицех:
Святе священствовал еси/ и преподобно упасл еси,/ отче священнейший, стадо твое,/ яко бо пастырь богоданный, Апостол другúй,/ яко священноначальник мудрый,/ Богу угодил еси,/ ныне и прежде,/ сего ради и чудесы вéлиими и многими прославился еси,// Богоблаженне Лазарю.
Славы тя Господь умéрша воскресú,/ и Его Апостоли/ тя Киттúскаго пáстыря и председáтеля постáвиша,/ Чистая же и Непорóчная/ омофóром священным/ твой украшáет сан,/ и над градáми цáрствующий град/ принимáет многоцéнное тéло твое,// якоже и Стефáна блаженнаго.
Божиею благодатию/ всечестныя мощи твоя/ в днéшний день от гроба пренесé/ с благоговением и почтением/ в цáрский град благочестúвый царь,/ священнейший Лáзарю,/ и положи во храме святéм,/ в честь твою создáннем и память,// в нейже тя величаем.


Слава, глас 6:
Днесь созывает нас/ равноапóстольный и ближний друг Христов/ на трапéзу духовную и веселие./ Приидите убо, празднолюбцы,/ таковáго пира приобщúвшеся,/ и сегó памяти/ úстиннии суще соучáстницы,/ псалмы и пéнии/ и пéсньми духовными ю почтим,/ вопиюще к нему и глагóлюще:/ иерáрше Христов,/ всеслáвне Лáзарю,/ днесь Божественных мощей твоих ради/ к праздничному нас дню приводяй,/ нас сподоби радости с тобою на Небесéх,/ к Богу дерзновéнием твоим,// óтче священнейший.
И ныне, глас тойже. Богородичен Догматик: Кто Тебе не ублажит:
Вход. Свете Тихий. Прокимен дне. И чтения:
Притчей чтение:
Память праведнаго с похвалами, и благословение Господне на главе его. Блажен человек, иже обрете премудрость, и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней и лета живота в деснице ея, в шуйце же ея богатство и слава. От уст ея исходит правда, закон же и милость на языце носит. Послушайте убо мене, о чада, честная бо реку, и блажен человек, иже пути моя сохранит. Исходи бо мои – исходи живота, и уготовляется хотение от Господа. Сего ради молю вас и предлагаю мой глас сыновом человеческим: яко аз, премудрость, устроих совет, и разум и смысл аз призвах. Мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо, незлобивии, коварство, ненаказаннии же, прилагайте сердца. Послушайте мене и паки, честная бо реку, и отверзу от устен правая, яко истине поучится гортань мой, мерзки же предо мною устны лживыя. С правдою вси глаголы уст моих, ничтоже в них стропотно, ниже развращенно. Вся права суть разумевающим и проста обретающим разум. Научу бо вас истине, да будет о Господе надежда ваша, и исполнитеся Духа.
Притчей чтение:
Уста праведнаго каплют премудрость, язык же неправеднаго погибнет. Устне мужей праведных каплют благодати, уста же нечестивых развращаются. Мерила льстивая мерзость пред Господем, вес же праведный приятен Ему. Идеже аще внидет досаждение, тамо и безчестие, уста же смиренных поучаются премудрости. Совершение правых наставит их и поползновение отрицающихся упасет их. Не пользуют имения в день ярости, правда же избавит от смерти. Умер праведный, остави раскаяние, наручна же бывает и посмеятельна нечестивых пагуба. Правда непорочнаго исправляет пути, в нечестие же падает неправда. Правда мужей правых избавит их, безсоветием же пленяются беззаконнии. Скончавшуся мужу праведну, не погибнет надежда, похвала же нечестивых погибнет. Праведник от лова убегнет, вместо же его предается нечестивый. Во устех нечестивых сеть гражданом, чувство же праведных благоспешное. Во благих праведных исправится град, и в погибели нечестивых радование. Во благословении правых возвысится град, усты же нечестивых раскопается. Ругается гражданом лишенный разума, муж же мудрый безмолвие водит.
Премудрости Соломони чтение:
Праведник, аще постигнет скончатися, в покои будет. Старость бо честна, не многолетна, ниже в числе лет исчитается. Седина же есть мудрость человеком, и возраст старости – житие нескверное. Благоугоден Богу быв, возлюблен бысть, и живый посреде грешник преставлен бысть. Восхищен бысть, да не злоба изменит разума его, или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале, исполни лета долга, угодна бо бе Господу душа его, сего ради потщася от среды лукавствия. Людие же видевше и не разумевше, ниже положше в помышлении таковое, яко благодать и милость в преподобных Его и посещение во избранных Его.
На литии стихиры, глас 1
Яко звезду светлую,/ от востока возсиявшаго/ и тварь всю светом озарúвшаго,/ Христова друга,/ божéственнаго Лазаря,/ пéсньми прослáвим:/ сей бо, егóже Господь/ друга Своего наречé,/ сей, емýже Богородица Мария/ облачение церковное содéла,/ иже всеми любим/ и во всех дивен,/ иже молит за ны/ своего Владыку и Бога,// во еже спастúся душам нашим.
Глас 2
Прежде честнáго страдания Твоего, Господи,/ и славнаго Воскресения Твоего,/ Лазаря прáведнаго и непорóчнаго/  нарекл еси друга пред ученики/ и болезнь и смерть его явил еси/ во еже всем возвестúти/ общее человек воскресение./ Сей Тя прослáви на земли,/ сый хранитель/ Божественных заповедей Твоих,/ и прослáвлен от Тебе изрядно,/ яко Сам о нем благоволúл еси;/ егóже молúтвами,// Владыко, помилуй нас.
Глас 3
Кáко не удивлюся/ равноáнгельному жúтельству твоему/ божéственне Лазарю?/ Илú кáко не прослáвлю/ сей твой светлый день,/ вóньже, яко от чертога,/ возсия божественное тело твое от гроба/ и ко граду царствующему отыде/ по благому совету Вышняго?/ Славный же во царéх Лев,/ песньми воскрешение твое почтúвый,/ и сие пренесéние мощей твоих/ богодухновéнно устрóи,/ úхже ради познáся всем// вéлие к Богу дерзновение твое.
Глас 4
Святúтелей Божественное сокрóвище,/ Лазарю богомудре, преподобне,/ ты в равноáнгельнем жительстве/ себé показал еси,/ тем и Церкве предстáтель содéлася,/ словесное стадо Христово упасáя/ в преподобии и правде всяческой,/ во удел бо/ кипрский оток прияв,/ люди его апостольски упрáвил еси,/ отонýду и прешéл еси/ к Другу, Егóже возлюбúл еси,/ Емýже, ныне предстоя на Небесéх,/ за ны молúся,// верою тя, слáвне, почитающия.
Слава, глас 5:
Цéркве светило/ и фарисéйския прелести разорителю,/ преподобне Лазарю, явився,/ друг неложный Христов показался еси:/ ты бо, яко пáстырь истинный,/ зной дневной подъял еси,/ и нощный хлад претерпел еси,/ и ныне на Небесéх/ динáрий целый за вся приял еси,/ Престóлу предстоя велúчия/ со Апостолы, яко равноапостолен,/ и со святители, яко святéйший,/ и, свыше взирая, благословляеши ны,// память твою прославляющия в песнех.
И ныне, глас тойже:
Блажúм Тя, Богородице Дево,/ и славим Тя, вернии, по долгу,/ Град непоколебúмый,/ Стену необорúмую,/ крéпкое Предстáтельство// и Прибежище душ наших.

На стиховне стихиры пренесению, глас 5.
Подобен: Радуйся:
Радуйся, во Апóстолех Христовых/ яко равноапóстольный,/ и дрýже блúжний/ Самáго Бога всех,/ и иерáрше честный,/ Лáзарю Богомудре, многочудéсне;/ ты бо лета мнóга/ священнодéйствовал еси превосхóдне,/ áнгельски же пожив,/ достúгл еси к Небесным праведных Селением,/идéже пребывают святых дýси,/ и Áнгелов чúнове,/ с нимиже не престай, молим ти ся,/ выну предстáтельствовати// о празднующих Божéственную пáмять твою.
Стих: Честна пред Господем// смерть преподобных Его.
Рáдуется благочестúвых множество/ о пáмяти, Лазарю, слáвней твоей,/ в ней бо Кипр весь,/ и Вифáния ликовствýет,/ и Константина великий град,/ в нéмже многоцéнное сокрóвище,/ сохраняется тело твое,/ тáже воздвúжеся велий храм твой,/ идéже чудеса яко вода источаются;/ сия тебе сотворú, блаженне,/ совéтом вышним,/ царь благочестúвейший, мудрый Лев;/ сего ради почитáющим тя/ подáждь молитвами твоими// велию милость.
Стих: Священницы Твои облекутся в правду// и преподобнии Твои возрадуются.
Вúдено бысть световúдное/ и приятное, треблажéнне,/ настоящее твоего тела явление,/ и вчинúся достóйно/ памяти чтúмыя от богонóсцев,/ и запечáтано,/ сего ради, празднолюбцы сýще,/ твой торжествýем праздник/ и славим Богочеловéка,/ тя преславно прослáвльшаго,/ в храм твой входяще,/ идéже и лобызáюще/ божéственный образ твой,/ сей почитаем любóвию/ вместо божéственнаго твоего гроба,/ и вопиéм верно: // не престай молúтися о рабéх твоих.


Слава, глас 8:
Приидите, вси вернии,/ во псалмéх и пéснех/ Богу хвалу воздадúм,/ Иже прежде всемирнаго Воскресения/ сиé óбщее Воскресение предувéри/ и четвероднéвно предумéршаго/ прáведнаго Лазаря воскресú,/ тáже и дрýга наречé/ Марфы и Марии молéний ради,/ сродниц его и верных Господеви;/ сего память слáвяще,/ мощей его днесь пренесéние прáзднующе,/ из глубины сердéчныя/ воззовéм, глагóлюще:/ Господи, служúтеля Твоего/ из гроба возстáвивый,/ и нас возстави, умерщвлéнныя грехом,// и спаси души наша.

Тропарь пренесению мощей, глас 4:
Яко велико сокровище/ и богатство некрадóмо/ к нам приúде из Кипра, Лазарю,/ Промыслом всех Бога,/ повелением царя благочестива,/ подая чтущим тя исцеление даром,/ избавляя от бед/ и от всякаго врéда,/ вéрою взывáющих ти:/ спаси всех молитвами твоими,// Лáзарю, отче наш.
Ин, глас 1. Под.: Камени запечатану:
Мощей твоих божéственных, Лазарю,/ в Царственный град пренесение,/ éже волею Господнею/ самодержец мудрый совершú,/ чтýще, празднуем верно/ и вопием ти,/ сúце вельмú Богом прослáвленному:/ слава Христу, прослáвльшему тя,/ слава Действующему тобою чудесы,// слава общее воскресение тобою Явúвшему.
И ныне, Богородичен, глас тойже:
Гавриилу вещавшу Тебе, Дево, радуйся,/ со гласом воплощашеся всех Владыка,/ в Тебе, святем Кивóте,/ якоже рече праведный Давид;/ явилася еси ширшая Небес,/ поносивши Зиждителя Твоего./ Слава Всельшемуся в Тя,/ слава Прошедшему из Тебе,/ слава Свободившему нас Рождеством Твоим.
На утрени
По первом стихословии седален
Глас 1, Подобен: Гроб Твой, Спасе:
Ихже познá Бог,/ тыя зовет ко хвале Его,/ ко всыновлению небесному./ Той и тя, Лазарю, познав, к сыновству призва,/ ко святительству Господню,/ умерша же тя животворит четвероднéвнаго.// О, чудо преславно!
Слава, глас и подобен тойже:
Христовы таúнники,/ самовúдцы Слова/ пастыря тя поставиша/ кипрских словесных овец;/ ты же зде пребыл еси/ до конца, непреклонен./ Темже явил еси/ чудодéйственное тело твое,/ отходящее в Цáрственный град,// божественнейший Лазарю.
И ныне, глас и подобен тойже:
Марие, честнóе Владыки Приятелище,/ воскреси ны, пáдшия/ в пропасть лютаго отчаяния,/ и прегрешений, и скорбей,/ Ты бо еси грешным Спасение/ и крепкое Предстáтельство,// и спасаеши рабы Твоя.
По втором стихословии седальны
Глас 3. Под.: Божественныя веры:
Божéственный услышал еси глас Господень,/ призывáющ тя/ от адовых безсóлнечных недр, богомýдре./ Того ради/ óвии убо яко убийцы негодовáху,/ óвии же рáдовахуся,/ яко Христовы ученицы, Лазарю,/ вышнее чудо зряще,// и прославляху Бога, и воспевáху тя.

Слава, глас тойже. Подобен: Красоте девства:
Блúжний Творцу твоему/ делом ся показáл еси,/ пожúв добродéтельне,/ егда люди кúпрския/ пáствоваше лéта многа,/ тринадесятый Апостол явúвся,/ божéственне Лáзаре,/ вышния славы испóлнен./ Тем в дерзновении пребывáя,// моли о хвáлящих тя.
И ныне, глас тойже. Самоподобен:
Красоте дéвства Твоего/ и пресвéтлой чистоте Твоей,/ Гавриил удивився,/ вопияше Ти, Богородице:/ кую Ти похвалу принесу достойную?/ Что же возыменую Тя?/ Недоумевáю и ужасáюся./ Темже, яко повелен бых, вопию Ти:// радуйся, Благодатная.
По полиелеи седален, глас 4.
Подобен: Удивися, Иосиф:
Удивляет всяк ум/ éже о тебе преуготóвися/ от Самáго Искупúтеля,/ Лáзарю воистину светлый:/ кáко словом упразднú/ все владычество áда лютаго/ Единый Господь,/ и естества законы разрушú:/ идéже бо хощет Бог,/ побеждается естества чин,/ якоже пúсано есть./ Темже срáдуется тварь вся,// чудо разумéющи купно.
Слава, глас и подобен тойже:
Священствовав добре,/ яко от Бога чудесы прослáвленный,/ почил еси свято,/ в надежде истинней;/ лета многа потаенное в земли/ тело твое божественное/ Мудрый Лев явлéнно сотворú/ повелением преблагим/ и во храме положи нарóчитем/ царицы градóв,/ и прослáвися// Иже во святых прославляемый Господь.
И ныне, самоподобен:
Удивися Иосиф, еже паче естества зря и внимаше мыслию, иже на руно дождь, в безсеменном зачатии Твоем, Богородице, купину, огнем неопалимую, жезл Ааронов прозябший, и, свидетельствуя, обручник Твой и хранитель священником взываше: Дева раждает и по Рождестве пáки Дева пребывает.

Прокимен, глас 4:
Священницы Твои облекутся в правду/ и преподобнии Твои возрадуются.
Стих: Уста моя возглаголют Премудрость и поучение сердца моего разум.
Всякое дыхание:
Евангелие от Иоанна (гл. 12: 1-2, 9-11, 17-18.)
По 50-м псалме стихира, гл. 6:
Преподобне отче,/ священноначáльниче Христов/ и дрýже искренний,/ самовúдче равноáнгельный/ и равноапостольный слáвне Лазарю:/ нас, почитающих воскрешéние твое/ и пóслежде преставление,/ и тела твоего божéственнаго явлéние,/ от всяких напастей и зол свободи,/ и еже одесную Спаса сподоби звания,// к Тому великими мольбáми твоими.

Канон святому, глас 4, о первом житии,
по алфавиту, Богородичных кромé.
                                                        Песнь 1
Ирмос: Отвéрзу уста моя/ и наполнятся Духа,/ и слово отрыгну Царице Матери,/ и явлюся, светло торжествýя,// и воспою, радуяся, Тоя чудеса.
Отверзу уста моя воспéти твое, Лазарю, божественное жительство. Ныне прошу тя: еже ти принести подобает не преставай подавáти ми, рабу твоему, святыми твоими, блаженне, молитвами.
Авраáма и инéх прáотцев твоих, во след шествовав, Лáзарю, яко божéствен, предузнал еси Бога воплóщшагося, и Сегó сподобился еси зрéти, Богочеловека.
Земнáго не стяжал еси мудрования протúву Создáтеля, якоже прóклятии иудéи, блаженне; но Сего познал еси, и Сему поклонился еси, и Друга Сего обрел еси: о, достоинства твоего!
Богородичен: Рáдость Тебе принесé Гавриил клятвы прамáтере в место, с Небесé целование, Ты бо Благословение нам родилá еси и всем источила еси радость вечную.
Ин, глас 8, о втором житии и пренесéнии честных мощей, краегранéсие по алфавиту обрáтно, Богородичных кромé.
Ирмос: Колесницегонúтеля фараóня погрузú/ чудотворяй иногда/ Моисéйский жезл, крестообрáзно поразив/ и разделив море,/ Израиля же беглеца. Пешеходца спасé,// песнь Богови воспевающа.
Яко священноначáльник и боговúдец, Лáзарю, яко равноапóстолен, úмаши молúтися о чтущих тя. Сего ради мое, желающаго ныне почтúти святых мощей твоих явление, слово упрáви, молюся.
Души праведных Богови предстоят, и свидетельствуют о них на земли сýщия мощи, яже творят всекрáсная чудеса, якоже богослáвное тело свящéннаго Лазаря, егóже божественною пáмятию днесь да усладúмся.
Рáдостию сорáдуются Кипр днесь и царский град, Богонóсе: первый убо о гробе твоем, другий же мощей твоих Божественною славою обогатився, и сию поминáюще, обоú радуются Творцу, веселящеся.
Богородичен: Неудéржными на ны смерть стремлéньми ятся, но, Твоему Рождеству приблúжившися, погúбе, и, приразúвшися, упразднúся, Богородице Дево, Жизнь бо воúстинну присносýщную воплотúвшуюся родила еси.
Песнь 3
О первом житии:
Ирмос: Твоя песнословцы, Богородице,/ Живый и Независтный Истóчниче,/ лик себе совокупльшия, духовно утвердú,/ в Божественней Твоей славе// венцéв славы сподоби.
Чéстен сосуд благодати Господни, Лазарю, явился еси и благоугоден Богови, нас ради вочеловéчшемуся и спасающему Его послýшающих.
Предстáл еси Богу воплóщшемуся, мýдре, вéрою прáвою; отстáл еси, гнушáяся, сонмищ еврéйских. Того ради и друг соделася вкýпе со срóдницами Творцу своему.
Жизни врéменныя отрешúвся и во гробе стрáшнем заключéн, единем вóзгласом Христа ты поспешú ко оживлéнию, вспять обратився, Лазарю, невозбрáнно чудом.
Богородичен: Радуйся, Двéре едина, Еюже Слово прóйде едúно, вереú и врата áдова, Владычице, Рождеством Твоим сокрушúвшая; радуйся, Божественный входе спасаемым, Богоневéсто.
О втором житии и пренесении мощей:
Ирмос: Утверждей в начале Небеса разумом/ и землю на водáх основавый./ на камен имя, Христе, заповедей Твоих утверди,/ яко несть свят,// паче Тебе, Едине Человеколюбче.
Света светильник быв Лазарь жития непорóчнаго рáди; премýдро святитель поставлен собрáтиями, самéми Апостолы Христовы, и просвещáет люди дéлы, и словесы, и чудесы.
К пáстве Киттúйстей рукоположéн от Апóстол, тех восприял еси добродéтели, треблажéнне: явúся бо иерáрхом образ и правило, Божéственными даровáньми твоúми.
Свéтлыя твоя добродетели Пресвятая возлюбивши, облачением священным тя воспоминает, на Кипре, якоже и подобает, ти пребывающу, Лазарю, и Бога воспевающу, яко святителю сущу богоприятну.
Богородичен: Спасительнаго нас ради Слова строения светлая Ты, Мати Дево, дверь познáлася еси воистинну: Ты бо нам ввелá еси умную лучý Пребожéственнаго Божества.
Седален, глас 4:
Подобен: Вознесыйся на Крест:
Яко Христова тя ближáйшаго друга, яко из мéртвых Им воскрешéннаго и священноначáльника Китú святéйшаго, вéрнии раби твои благохвáлим тя, блаженне Лазарю, свыше посланный, и верно вопием: яже к Богу мольбами твоими нас от всяких бед и печалей спаси.
Слава, глас и подобен тойже:
Возвратúвыйся к животу яко ото сна, и пресельник быв из отечества, священноначáльствовав в Китú, почú, святости исполнен сый, иудéйския бо прелести изглаголав поношение и себе врага тоя вéлия зело, верным же преподóбен показáвся и Богочеловека явúвся друг искренний.
И ныне, глас тойже:
Не умолчим никогда, Богородице, силы Твоя глаголати, недостойнии. Аще бо Ты не бы предстояла, молящи, кто бы нас избавил от толиких бед? Кто же бы сохранил до ныне свободны? Не отступим, Владычице, от Тебе, Твоя бо рабы спасаеши присно от всяких лютых.
Песнь 4
О первом житии:
Ирмос: Неизслéдный Божий Совет,/ еже от Девы воплощения/ Тебе, Вышняго,/ пророк Аввакум усмотряя, зовяше:// слава силе Твоей, Господи.
Жизнодáвца, зовуща тя, из адовых глубин услышав, потщался еси паки к животу возвратитися, яко воистину, и злаго мучителя, Лазарю, препобедил еси.
Желая Воскресение общее Создатель мúрови провозвестúти, умéрша тя и погребéнна воскрешает, гряди вон, Лазарю, повелевает, велеглáсно возглашáя ти.
Мúлостива соделай Владыку и Господа, яко дерзновением к Тому обогатился еси, к нам, твою память в песнех воспевающих благочéстно.
Богородичен: Радуйся, приосенéнная Горó Божия, юже виде Аввакум, радуйся, Божественный Ковчéже и разумный, егóже Ной прообразú. Радуйся, Богородице Всепетая.
О втором житии и пренесении мощей:
Ирмос: Ты моя крепость, Господи,/ Ты моя и сила,/ Ты мой, Ты мое радование,/ не оставль недра Отча/ и нашу нищету посетив./ Тем с пророком Аввакумом зову Ти:// силе Твоей слава, Человеколюбче.
Ты Церковь Христову упáсл еси, ты поношения от еврей и фарисей еретиков отбегл еси, Лазарю богомýдре. Верных сладосте. Ты еси Кипра небесное укрепление, Вифáнии покровитель, Божéственнаго храма твоего благолепие.
Рúторская художества нижé возмогут по достоянию ангельское твое житие воспéти: Богочеловек бо, от мира Апостолы призвáвый, Той, блаженне, ктомý тя избрá, яко тринадесятаго Апостола.
Днесь богатúт самодéржец Царьград по мановению Божию мощьми и храмом твоими. Мы же память, яко и первую, совершаем твою. Темже, яко священноначальник, яко равноапостольный и друг Владыки Христа, нас ущéдри.
Богородичен: Новоцвéтный безсмертия Рай и красéн воистинну показáлася еси, Древо Жизни, в Тебе насажденное Богоначальнейше, чревоносящи и раждáющи, всем искáпающее спасúтельныя надежды, верно Богородицу мýдрствующим Тя.
Песнь 5
О первом житии:
Ирмос: Ужасóшася всяческая/ о Божéственней славе Твоей,/ Ты бо, Неискусобрачная Дево,/ имела еси во утробе над всеми Бога/ и родила еси Безлéтнаго Сына,/ всем воспевáющим Тя// мир подавáюща.
Украшáется гробом твоим Вифáния вся, в нéйже четвероднéвна смердяща Жизнодавец влáстию Своею усóпша воскресú мертвеца, тя, друга, Лазарю, и к животу упрáви.
В памяти Лазареве Кипр веселится весь, и град Константинов о мощех, почивающих в нем и о дивнем храме, егоже создá мудрый в царéх.
Блажéн во блаженных ты содéлася, Лазарю: Егóже бо прорóцы не вúдеху во плоти пришéдша, ты зряше, и с Тем возлегáше, и Сей тя воздвúже, умéрша, от гроба.
Богородичен: Радуйся, прорастúвшая Насадúтеля твари, радуйся, рóждшая и млекóм питáвшая Питáтеля всего мира, радуйся, свящéнных Ризо и верных, Вéнче царей и Похвалó.
Ин, о втором житии и пренесении мощей:
Ирмос: Вскую мя отринул еси/ от лица Твоего, Свете Незаходимый,/ и покрыла ся есть чуждая тьма, окаяннаго,/ но обрати мя и к свету заповедей Твоих// пути моя направи, молюся.
Храм твой сéмо и во инéх мéстех, боголепне Лазарю, преисполнен чудес, с Небесé благодáть приемля, и удобряет в нем к тебе приступáющия и совершающия память твою, преподобне.
Стрáнное чудо узрéся, егда мощей твоих рáку премудрый Лев из Кипра в Царственный град пренесé, тогда сия недуги и демонская приражения от человек многих отгнá.
Ты одолúтель победонóсен лукаваго, Лазарю, быв, сего ради, блаженне, и тело твое врачевания тóчит, ныне же и храм твой, и образ твоего зрака, и призывание тя наипаче, преславне.
Богородичен: Верных Предстательнице, Стенó нерушимая благохвáлящих Тя, яко всему роду человеческому явльшееся спасение, Бога рождши телесне явльшася, душу мою спаси, Пресвятая.
Песнь 6
О первом житии:
Ирмос: Божественное сие и всечестное/ совершающе прáзднество,/ богомудрии, Богоматере,/ приидите, руками восплещим,// от Нея рождшагося Бога славим.
Якоже восхотé победúти смерть/ и человéком явúти тáинственная,/ тако и содевáет Жизнодáвец Господь/ твоúми, Лáзарю,// смéртию и воскрешéнием.
Дúвно есть всякому человéческому уму/ éже о Лáзаре чудо:/ мéртв лежáй/ и четвероднéвен смердяй// востá едúным словом Владычним.
Прéжде безвéстный Лáзарь/ ныне преслáвен/ зрúтся и познавáется,/ и еже во ум человéческий/ не вхождáше отнюд,/ ныне во всех концéх землú// восхваляется.
Богородичен: Радуйся, Клеще Божественнаго Угля, Кадильнице всезлатая, радуйся, Благоухание, радуйся, Кадило добровóнное, радуйся, Небеснаго мира Сосуде.
Ин, о втором житии и пренесении мощей:
Ирмос: Очисти мя, Спасе,/ многа бо беззакония моя,/ и из глубины зол возведи, молюся/ к Тебе бо возопих, и услыша мя,// Боже спасения моего.
Свирéпо еврéйстии людие/ на Лазаря устремляхуся,/ но той предувéдев сия,/ в Кипрский оток преселúся,/ и зде возложéнием/ Апóстольских рук// святúтель Божий содéлася.
Лáзаревым успéнием/ зáйде светúло великое Цéркве./ И мýдрый царь/ божéственнаго видéния ради// пренóсит того честнóе тéло в царúцу градóв.
Жития образ явился еси/ святúтелем и всем верным./ Вся же твоя, слáвне Лазарю,/ суть предúвна и пóлна чудес,// якоже и богоугóдное жúтельство твоé.
Богородичен: Спаса и Избавителя, Бога всех и Господа рождши, нам плотию приобщившая, спасай, Пречистая, призывающия Тя от бед, Владычице.
Кондак перенесению мощей, глас 8:
Взыде, яко звезда пресвéтлая,/ от Кипра честныя мощи твоя, Лазарю,/ Царствующий град освящающи/ и христолюбиваго царя веселящи/ и люди своя обогащающи,/ тобою благодать исцеления подающи,/ верно зовущим ти:// радуйся, Лазарю, друже Божий.
Икос:
Ангел яко иный, Лазарю, показася, на земли аки на Небесú пожив. Тем, со Ангелы представ и со святители веселяся, от нас, вопиющих, слышиши таковая:
Радуйся, слáво Востока, радуйся, цвéте Вифáнии;
Радуйся, злобных иудéй обличéние, радуйся, всех фарисéй поношéние;
Радуйся, яко друг явился еси Владыки и Бога, радуйся, яко благодать приял еси паче всех людей;
Радуйся, безсмéртие душú проповедавый, радуйся, достóинство ея показавый;
Радуйся, сыне Христова воскресения, радуйся, блистание Небеснаго просвещéния;
Радуйся, яко мощи твоя благовоние точат, радуйся, яко сладость в храме твоем подается.
Радуйся, преслáвный Лáзарю.
Песнь 7
О первом житии:
Ирмос: Не послужиша твари Богомудрии/ пáче Создáвшаго,/ но, огненное прещение мýжески попрáвше,/ радовахуся, поюще:// препéтый отцев Господь и Бог, благословен еси.
Явися слава твоя неразумным, всечéстне Лазарю. Сего ради ускоряеши к бегству, якоже ти заповéдася советом благим Спасителя твоего, Иже Отцев Господь и Бог пребывает един.
Витúйствуяй не может язык, преподобне, воспéти во плоти твое житие, угодил бо еси Богу воплóщщемуся, тя от гроба воздвигшему, Лазарю, четвероднéвна смердяща.
Срáдуются и свеселятся днесь лицы Ангелов, святителей воистинну, преподобных и праведных, вкупе же и Апостол Христовых: боголепный бо ныне от нас и от всех прославляется Лазарь.
Богородичен: Радуйся, Мосте, вéрныя вся преводяй к безконéчному и блаженному Животу, радуйся, Столпе огненный, путь управляяй к Богу взывающих: благословен, Пресвятая, Плод Твоего чрева.
Ин, о втором житии и пренесении мощей:
Ирмос: Отроцы еврействии в пещи/ попрáша пламень дерзновенно/ и на росу огнь преложиша, вопиюще:// благословен еси, Господи Боже, во веки.
Да приобщится твоея славы всех честнейший градóв, иже храмом твоим богатится и честными мощьми, якоже прежде и первомученика Стефана.
Божественныя сподобляется славы, Богу молящуся ти, Другу твоему, Богоносе, всяк обретый тя предстателя и молитвенника ко Господу, Егóже поем во веки.
Ты украсúся, Лазарю, в бытии молчанием, и чистотою, и плачем, и всяким вкупе божественным достоинством во многих лéтех вторáго жительства твоего.
Богородичен: Песньми почитаю Тя, Дево, почéтшую род человеческий, безчестием лютым пéрвее осуждéнный. Благословен, Пречистая, Плод Твоего чрева.
Песнь 8
О первом житии:
Ирмос: Отроки благочестивыя в пещи:/ Рождество Богорóдичо спасло есть;/ тогда убо образуемое,/ ныне же действуемое,/ вселенную всю воздвизает пети Тебе:/ Господа пойте, дела,// и превозносите во вся веки.
Уязвúся народ иудейский, зáвистию одержúм, злохúтрый, сей бо, не терпя твоея славы, юже стяжал еси от Христа, умышляет новая и сýетная на Жизнодавца сотворúти, Лазарю Богоразумне, и на тя, воскрéсшаго.
Пéньми и пéсньми твою венчает память Вифáния и весь Царский град, Кипр и вся благочестивых собрания, Богопросвещенне Лазарю. Тем твое радостное воскрешéние вси поем во вся веки.
Свет ты зряшеся посредé иудей и фарисей, премудре: Бога бо, предвозвещеннаго от всех пророк, плотию явльшагося, не познáша, аки суетная еврейская чада, яко ты Сего познал еси, Господа воплóщшагося.
Богородичен: Радуйся, Небес превышшая, и всех честнейшая Божественных чинóв; радуйся, Купино неопалимая, Высотó непостúжимая; радуйся, Солнца Колеснице и Жилище; Славо и Сокровище, радуйся, песнословящих Ти, Отроковице, во веки.
Ин, о втором житии и пренесении мощей:
Ирмос: Царя Небеснаго,/ Егоже поют вои Ангельстии,// хвалите и превозносúте во вся веки.
Дýхом горяй, якоже Павел, ты показáся, достойный паствы словесных овец, Лазарю божественный, и священноначальник Христов.
О божественнем мощей твоих положении радуется царь с Кипрским народом вкупе, и рукоплещет твоему празднеству, и воспевает Господни песни.
Славослóвится и сия твоя память, божественне Лазарю, в нейже твое явúся тело, исполненное святыни и славы.
Богородичен: Напастей Ты прилóги отгоняеши, и страстей находы, Дево, темже Тя поем во вся веки.
Песнь 9
О первом житии:
Ирмос: Всяк земнородный/ да взыграется, Духом просвещаемь,/ да торжествует же Безплотрных умов естество,/ почитающее священное торжество Богоматере,/ и да вопиет:/ радуйся, Всеблаженная Богородице,// Чистая Приснодево.
Радуется и ликует, святче Лазарю, земля вся, чудо торжествýющи, еже о тебе Владыка сотворú в Вифáнии, отéчествии твоем. Наипаче веселятся, наслаждáющеся, иже у гроба твоего питомцы.
Поéт и рукоплещет прáзднственная днесь, мýдре Лазарю, паства твоя о преставлéнии твоéм, и его память совершáющи, пéрваго не оставляет поминовения, и прославляет славы, и жизни, и смерти сýща Господа.
О дарóв паче постижения, ихже сподобился еси, Лазарю Боголепный! Бога друга бо зде стяжал еси; и Егоже тварь вся вместити не может, Того приял еси, яко гостя, во своем си, мудре, доме.
Богородичен: Радуйся, златая Свещé и Трапéзо, верных питающая; радуйся, невозделанная Землé, живоносный прозябшая Клас; радуйся, земнородных Спасение и Божественная Хвало, вопиющих: радуйся, Преблаженная Богородице, Чистая Приснодево.
О втором житии и пренесении мощей:
Ирмос: Ужасéся о сем Небо,/ и земли удивишася концы,/ яко Бог явися человеком плотски/ и чрево Твое бысть пространнейшее Небес./ Тем Тя, Богородицу,// Ангелов и человек чиноначалия величают.
Вкусив смерти тлетвóрныя, не истлел еси всеобрáзно, Лазарю, но возставлен от всех Творца, ты от Апостол поставися, весь благоугоден сый, иже в Кипре паствы божественный пастырь, идéже Богородица твое достоинство воспомянý.
Царский град гробом твоим обогатився, радуется зело, якоже иногда о первомýченице возвеселúся: сим Многомилостивый щедроты Своя с Небесе низпослá богáтно, яко таúнником Своим и слугам.
Да познáеши уст наших песнь, любóвию ти ю приносящих приимú, и Христу, Лазарю, не престай, яко Другу твоему, моляся, даровати всем мир и умилостивлению пребыти, и да подаст всем спасение, яко Благ и Всесилен.
Богородичен: Явилася еси, о Дево Мати Божия, паче естества рождши плотию Бога Слова, Егóже Отец отрыгну от сердца Своего прежде всех век, яко Благ, Егóже ныне и телес превышша разумеем, аще и в тело облечéся.

Светилен, глас 4.
Подобен: Учеником сошедшимся:
Ученикóм сорáдовашеся, взирая ко Владыце, с сими возлежащу в домý отеческом, с нúмиже и ты по смерти пирýяй узрéся, всех уверяя воистинну, яко от мертвых востал еси, по четырех днех во гробе, богомудре Лазаре, верных слáдосте.
Богородичен: От Троицы родила еси, Отроковице, Единаго неизречéнно, во двою естеству суща, и сугуба действом и единаго ипостасию. Того убо моли присно о иже верою покланяющихся, от всякаго навета вражия избавитися, яко вси Тебе ныне прибегаем, Владычице Богородице.

На Хвалитех стихиры, глас 4.
Подобен: Званный свыше:
Прéжде óбщаго Воскресéния,/ сиé Творец увéрити хотя,/ вéру имýщим/ Божéственному Апóстолов проповéданию,/ сиé и дéлом утвердú Господь/ твоим, Лазаре богомудре, воскрешéнием./ Тéмже показался еси/ сын перворóден сея прóповеди/ и сопротúвник хотящим/ éресию устáвити беззакóнная,// прáвым же сéрдцем// предстáтель и защитник.
Свящéнствуя в Китú, великий Лазарь/ Божественною благодатию обогатú/ и всякими добродéтельми оросú/ человéков души,/ иссóхшия от знóя безбóжия и тщеты,/сам же, яко достойный Божий сосуд,/ весь свидéтельствуяй о Бозе содéлася,/ тем яко блúжний друг Христов/ Сего и Девы, Мáтере Его,// таúнник явúвся,// о всех ходáтайствуеши.
Свящéнствуя в Китú, блажéнный Лазарь/ по мнóгих лéтех, ýспе,/ во гробе погребáется,/многая пóприща прéжде совершúв./ Тогда, Господним чудом/ от мýдраго самодéржца пренóсится/ божественная рáка/ из Кипра во Цáрственный град./ И полагáется во осóбем храме/ яко сокрóвище многоцéнное,/ с пéсньми, и пéнии,// и псалмы, и восклицáнии.
Преслáвных ради óбраза и храма твоих/ и éже ко Господу молéний,/ тя почитáюще, рáдуемся,/ предстáтеля тя обрéтше/ и Божéственное пристáнище,/ и столп непоколебúмый;/ тéмже, яко равноáнгельный,/ яко равноапóстольный,/ и друг Владыки яко ближний и Богородицы,/ Лазаре блажéнне,/ многое улучúл еси дерзновéние,/ сего ради просú душам нашим/ свыше утешéния, и мира,// и всякаго прегрешéнием нашим// Божéственнаго оставлéния.
Слава, глас 5:
Подобаше царúце градóв/ и божественных мощей твоих/ насладúтися святости,/ Лáзарю боговúдче/ и Господом свидетельствованный преподобне;/ Вифáния бо яко отечество твое,/ величается гробом твоим,/ с нею же и Кипрский отóк,/ град же цáрственный, не мéньший сих,/ теми же мощьми обогатúся,/ úхже ради и людие вси/ во всяцем грáде и стране/ память твою чтут, святúтелю,/ яко равноáнгельна,/ и равноапóстольна,/ и друга úскренняго Христóва,/ и яко четвероднéвна/ возстáвлена из гроба/ от Спáса Самáго,// спасáющаго тобóю души наша.
И ныне, глас тойже:
Блажим Тя, Богородице Дево,/ и славим Тя, вернии, по долгу,/ Град непоколебимый,/ Стену необоримую,/ твердую Предстáтельницу// и Прибежище душ наших.

На Литургии
Блаженны от канона святителя, песни 3-я и 6-я.
Прокимен, глас 3: Господь просвещение мое и Спаситель мой, кого убоюся? Стих: Господь Защúтитель живота моего, от кого устрашуся? Апостол ко евреем, зачало 333 от полу. Аллилуия, глас 2: Уста праведнаго поучатся премудрости, и язык его возглаголет суд. Стих: Закон Бога его в сердце его, и не запнутся стопы его. Евангелие от Иоанна, зачало 36. Причастен: В память вечную будет праведник:










Перевод выполнен по тексту Кипрской Минеи, том 2, октябрь, изданной в Левкосии (Никосия, Кипр) в 1995 году ( С. 201 — 219), которая ссылается на следующие источники: а) рукопись Афонского монастыря Ксенофонт, содержащую рукописную службу и составленную соименным святому монахом; б) рукопись библиотеки Афонского монастыря святого Пантелеимона, содержащую «службу святому и праведному четверодневному другу Христову Лазарю, на пренесение святых его мощей, с акафистом по алфавиту и молебным каноном, составленную неким иеромонахом, по просьбе и иждивением преподобнейшего во иеромонасех кафигумена священной русской киновии святого Пантелеимона господина Андрея на святой Афонской Горе в 1891 году»; в) четыре греческих печатных издания 1960-го, 1977-го, 1980-го и 1990-го годов.







Комментариев нет:

Отправить комментарий