среда, 30 августа 2017 г.

Святому преподобномученику Игнатию (Лебедеву) канон



КАНОН
святому преподобномученику Игнатию (Лебедеву), глас 1


pdf

Песнь 1

Ирмос: П
еснь победную поим вси Богу,/ сотворшему дивная чудеса мышцею высокою,/ и спасшему Израиля,// яко прославися.

Святый преподобномучениче Игнатие, моли Бога о нас!

Сподоби, Господи, грешных нас Твоего угодника, в преподобных изряднаго и в мученицех твéрдаго днесь восхвалúти, и вложú в сердцá наша понé мáло тому поревновáти желание.

Ты, угóдниче Божий Игнатие, от младéнства Христа возлюбúв, пóты пóстническими и мучений терпением землю Русскую удобрúл еси, и к Небесным Чертогом возшéл еси. Отонýду ныне молúся о нас, тя любовию почитающих.

Укрепú Христос во страдáниих преподóбнаго Своего Игнатия, сего ради в темнúце славослóвия Тому воспевáше, и Того небоязненно исповéдаше.

Богородичен: Яко Дева и Чистая, приклоняеши ухо мольбам святых, иже девство и чистоту возлюбúша. Не остáви пóмощию Твоею и нас, погружáемых в море страстéй, и ущéдри, и помозú до конца не погúбнути. 



Песнь 3

Ирмос: Да утвердится сердце мое/ в воли Твоей, Христе Боже,/ Иже над водами/ небо утверждей второе,// и основáвый на водах землю, Всесильне.

Сéмя Слова Божия в землю добрую сердца твоего приúм, Пустыни Зосимовы достúже, идéже наставлéнии отéческими напояемь, клас прозябл еси жизни вéчныя.

Преподобнаго Германа, аки некоего Моисея обрéт, óтче премúрне Игнáтие, море влáющееся страстéй прелетéл еси.

Зрим тя, Игнатие дúвне, делателя послушания рачúтельна, яко тщáлся еси не токмо еже дéяти, но и еже помышляти открывáти отцéм, тем на гору разсуждения восшéд, ныне нам указýеши, кáко пут душевнаго вéдения совлещúся.

Богородичен: Дево Пресвятáя, Отроковице, мóлим Тя, чада Твоя: путь спасения по Бóзе устрояй нам, во обстояниих нас управляющи.


Седален, глас 8:
Подобен: Премудрости:
Пéрвее воздержанием, и болéзньми, и молитвами душу твою украсúв боголéпно, был еси сопричастник мýчеником, блаженне, пóслежде же и венец их, радуяся, приял еси. Темже, крестом сугубым диавольскую гордыню поправ, подаеши помощь человéком благодáтию, Игнатие богомудре. Моли Христа Бога грехов оставление подати прáзднующим верою память твою.


Песнь 4

Ирмос: Духом провидя, пророче Аввакуме,/ Словесé воплощение,/ проповéдал еси, вопия:/ внегдá приближитися летом, познаешися,/ внегда приити времени, покажешися,// слава силе Твоей, Господи.

Седя едúн на месте безмóлвне, помышляше в себе, Игнáтие богомýдре, о житии сýетныя печали, и поучáшеся, кáко тóе сению прехóдит, и аки конь мимотечéт, и аки цвéт в тéрнии увядáет.

Житиé úноческое, незримое, в Бóзе сокровéнное, иже Отцами Святыми основáнное и в Пустыни Матере Божия Одигитрии просиявшее, даже до кончины бысть духу твоему утверждéние и сердцу тáйное поучение.


Днесь ликует обитель пустынная, преподобнаго Зосимы преславный дом, святии Алексий и Герман в лéтней памяти твоей радуются и Небеснии Лúкове воспевают подвиги твоя и страдания. С ними и нас, недостойных, хвалу приимú, и не остави нас попечéнием, отче Игнатие.

Богородичен: Мати Божия, Одигúтрие, Путеводительнице, даже до дне послéдяго, лютаго, не остáви рабов Твоих.


Песнь 5

Ирмос: Светлый нам возсияй свет присносущный,/ утренюющим о судьбах заповедей Твоих,// Владыко Человеколюбче, Христе Боже наш.

Град Москва тя священнодéйственника, отче, прият, в немже скорбьмú и болезньми отребú тя Садоделатель Преблагий, и явился еси посредé тогó красéн и благоцветýщ, приносящь Церкви Христове преизобúльный плод.

Кроток явился еси, кýпно и смирен и сим вся к себе привлечé. Любовию и добрыми дéлы вся укротúл еси и сердцá возвеселúл еси укрепляемых дивными словесы твоими.

Поминáя речéния в преподобных велúкаго Исаака, еже люто есть предáти новоначáльным высóкая, ты духовная чада твоя мýдре упáсл еси, óвогда мúлуя и утешáя, óвогда обличáя, óвогда же поучая, всем быв вся, и во всéм являя высочáйшее разсуждéние.

Богородичен: Иже из Тебе, Владычице, миру Рождейся, Крепость, Пение и Спасение бысть погибающим, от адовых врат избавляя верою Тя блажащия.


Песнь 6

Ирмос: Пророка Иону подражая, вопию:/живот мой, Блаже, свободи из тли,/ и спаси мя, Спасе мира,// зовуща: слава Тебе.

Преподобными Алексием и Германом окормлéнный, и святителем Тихоном рукоположéнный, во обители святаго Петра ты процвел еси добродéтельми яко шúпок, бодрым словом и твéрдым в душáх верных рáдование водворяя.

На одре болéзненнем, притрýдном возмогáя, поношения и гонения вкупе с Цéрковию Русскою терпя, непрестанно пояше: спаси мя, Спасе мира, зовýща: слава Тебе.

Словесем святителя Игнатия, Златоуста Российскаго последуя и Богоносцу великому, ти соименному, подражая, водрузúл еси Иисусово имя в сéрдце твоем, еже в клети душевней выну священнодéйствовати.

Богородичен: Емуже предстоят с трéпетом Небеснии Чини, Того родила еси, Чистая, вóлею соединúвшагося человéком за благость. Моли прилежно, во еже ущедрити рабы Твоя.


Кондак, глас 2:

Вéру Христову измлáда возлюбив,/ и в пустыню вселúвся,/ отче Игнатие преподобне,/ отец чадом многим содéлался еси,/ таже Христа исповéдав,/ за веру живот свой/ в темнице положил еси,/ в нейже чада твоя управляя,/ исповедниче и мучениче Христов,/ вещал еси:// мир дальним, мир ближним.


Икос:
В путех заповедей Христовых и отеческих преданиих жизнь истинную обрел еси, отче Игнатие, преподобномучениче Христов, еще же многим полагал еси путь ко спасению. Пóзде же исповедание веры Христовы принося, узы горькия темницы, таже злострадания и болезни многи понесл еси, Христа Бога всем сердцем исповедал еси, люблению Его Единаго научая, отче преподобне. Еще же из темницы твоим другóм заповéдуя, с трудом велиим писаше: мир дальним, мир ближним.


Песнь 7

Ирмос: Отроцы благочестию совоспитани,/ злочестиваго веления небрегше,/ огненнаго прещения не убояшася, но посреде пламене стояще, пояху:// отцев Боже, благословен еси.

Ты, святый угодниче Христов, любовию возгорелся еси сомлетися руками гонителей, якоже челюстьми зверей. Таковóму себе отвержению твоему дивящеся, вопием: помозú нам унылым и немощным, отче Игнатие.

Якоже иногда Богоносец Игнатий, связан зверьмú словесными, ты к темнице течáше, отче кротчайший, но не престал еси и во узах сый, утверждáя чада, посылáя во вся слово, благодáтию осолéнное.

Добро есть с Господем быти на Фаворе же, и Голгофе, и всяком месте владычествия Его, тáко взывáше, отче во узах темничных. Тем и нам помози, святче Божий, во обстояниих в ту же мысль вооружúтися.

Богородичен: Единей Богоблаженней, во объятиих носящей Сына Своего, лúцы новомученик Российских вопиют: Благословенна Ты в женах, и благословен Плод чрева Твоего.


Песнь 8

Ирмос: Егоже ужасаются Ангели и вся воинства,/ яко Творца и Господа,/ пойте священницы,/ прославите отроцы,/ благословите людие,// и превозносите во вся веки.

Поругания многая, и раны, и мирския чади пхáние и уничижéние не возмогоша тя от любве Божия разлучúти, Игнатие досточудне. Тем страданий Христовых общник быв, ныне молися, сыновом Российским спастися.

Удивляется ум человечь, крепкодýшне Игнатие, о твоем еже в скóрбех терпéнии: кáко, отче, пшенúце Божия, сокрушáешися безбóжными, принося Христу клас красéн добродетелей?

Троичен: Троицу Пресвятую, Отца, Сына и Духа Святаго, православно исповедаше выну, еретических мудрований всячески уклоняяся, богомудре отче.

Богородичен: Скорби премнóгия, еже паче слова и разума, в житии претерпевши, всем страждущим о Господе Бозе Помощница скорая, Ты, Мати Дево, явúся.


Песнь 9

Ирмос: Светоносный Облак,/ воньже всех Владыка/ яко дождь на с небесе на руно сниде,/ и воплотися нас ради,/ быв Человек, безначальный,// величаем вси яко Матерь Бога нашего Чистую.

Мiра суетнаго удалився, отче благий, еже паче ума мир стяжал еси и той всем завещá, отходя ко Премирным. Тамо ныне в радости Христу предстоя, буди ходатай о нас, тя воспевающих.

Славу во испытаниих единому Богу воздавáше, приснопамятне отче, сего ради Господь вкупе с братиями, преподобномученики обители Петровския Варлаамом, Макарием, Германом, таже Космóю с Феóдором, тя прослáви и в лик новомýчеников и исповедников русских вчинú.

Ныне в Скиниих Вышних Ангелом сликовствуя, не престай о Церкви Русстей моляся, отче, ныне тя воспевающей.

Богородичен: Мир вселенней всей даруй, Пресвятая, новыя мученики и исповедники стяжавши в Церкви Сына и Бога Твоего, Пренепорочная.


Светилен

Зашед страданием, отче, к жизни нестареемей и Свету Невечернему, паки возсиял еси, темже Господа умоляя о стаде твоем, в радости святых пребываеши.

Богородичен: Тебе, Пречистая, Помощницу крепку по Бозе имуще, людие Твои надежды да не отпадут.

Комментариев нет:

Отправить комментарий