среда, 3 марта 2021 г.

Прп. Вихиану Кипрскому канон молебный

Преподобному Вихиáну Кúпрскому

Канон молебный

word

Тропарь, глас 4-й

Подобен: Вознесыйся на Крест:

Не умолчúм никогда, богонóсе,/ велúчествия твоя глагóлати, недостóйнии,/ Вихиáне, преподобных удобрéние,/ всех прибéжище,/ немощных здравие,/ печáльных избавлéние и утешéние,/ сего ради вопиéм вси вéрнии:/ тя почитáющия// прúсно, блажéнне, хранú. 

Канон, глас 8-й
Песнь 1

Ирмос: Воду прошед:

Мнóгими недýгуя пóмыслы/ к тебе припáдаю, богонóсе Вихиáне,/ преподобных верхóвниче,/ не прéзри окаяннаго твоего молúтвенника мольбы[1].

Преподобне отче  Вихиáне, моли Бога о нас.

Святых отóк священный/ срáдуется сущим в Вышних наслéдником Небéсным,/ егóже ты стяжáл еси дрéвле в жилúще,/ богохранúмый Кипр славный.

Молéние приимú наше, богочéстне,/ отцев навéршие честнóе,/ и испóлни всем по прошéнием/ теплéйшим, мудре, заступлéнием твоим.

Богородичен: Аще по беззакóнием Сын Твой соблюдáти úмать люди,/ потребúтся всяка плоть человéча, Всенепорóчная,/ но обáче ходáтайством Твоим вси жúвы есмы.

Песнь 3

Ирмос: Небеснаго круга:

Витúйствующий язык, Вихиáне слáвне,/ нижé стяжах, всеблаженне, к воспоминанию о тебе,/ обáче от сердца моего/ твоя чудесы, отче, величаю, вопия:/ радуйся, всехвáльне.

Якоже на зде[2], блажéнне, птúца,/ в Вышних вселéние обретáя,/ житиé препровождáше,/ ко Всецарю молéбно возсылáя, отче, прошéния/ приступáющих ти.

Ныне прибегаем вéрою,/ молúтвенно вопиюще:/ покрый молитвами твоими вся благохвáлящия тя,/ и многим людем даруй исцелéния,/ врач бо рабом твоим сый, слáвящим тя.

Богородичен: Приснодéво Отроковице,/ Ты верных еси Утверждение,/ Ты ненадéжных Едино еси Избавлéние,/ веры Утверждение/ и спасения úстинное непрелóжное/ Упование, Всепéтая.

 

Спаси от всяких лютых тя почитающия,/ яко всех еси, Вихиане, прибежище,/ яко нерушимая стена и предстательство.

Призри благосердием, Всепетая Богородице,/ на мое лютое телесé озлоблéние/ и исцелú души моея болезнь.

Песнь 4

Ирмос: Услышах, Господи:

Озлоблéньми и страстьмú/ тело и душа ми очернúшася,/ от нúхже всех мя возведú,/ твоими ко Господу мольбáми.

Скверн и помышлéний сердце мое, преподóбне, испóлнися,/ и припадаю к иконе твоей, вопия ти:/ ускорú очúстити мя.

Спас мой и Господь/ имеет тя молéбника/ и, твоя словесы о всех приéмля,/ подаéт спасение и избавлéние.

Богородичен: Чистую Богоматерь вси восхвáлим,/ Гору Божию тучнéйшую[3],/ якоже прорóцы Сию предпроповéдаша.

Песнь 5

Ирмос: Мрак души моея разжени:

Отвéрзл еси нам врата Небéсная днесь,/ молитвами твоими ко Гóсподу,/и рáдования Божéственнаго содéлался еси причáстник.

Покрый нас от всякия напáсти/ и немощи лютыя изведú,/ от Бога дáруя здрáвие стрáждущим.

Рáдуется с нами кúпрский отóк,/ торжествýя и воспевáя твоя борéния,/ преподóбне отче Вихиáне преблажéнне.

Богородичен: Нетлéнную, Чистую/ Тя вéмы, Пренепорóчная,/ и Богоматерь Приснодéвственную./ Спаси, Дево, вся Тя величáющия.

Песнь 6

Ирмос: Молитву пролию:

Изрядно úже от болезней гортáни и кáшлицы стрáждущии/ притекáют, отче,/ и лютых избегáют всех,/ по вере, юже úмет всяк,/ и вопиют благодáрныя пéсни, Вихиáне, сúле твоей.

Лéгце ты раздáеши здрáвие,/ верою к тебе приступающим, преблажéнне,/ и ныне мою малую мольбу, Вихиане, не  прéзри/ и даруй исцелéние душú моéй,/ Рая же Бóжия причастие.

Во мнóжестве прегрешéний преидóх житиé,/ во всех окаянно согрешая,/ сего ради ныне мрáчнейшаго сна/ тягчайшаго лютаго неразýмия/ помозú ми свободúтися,/ к тебе прибегáю и молюся, преподóбне.

Богородичен: О, всех творéний и Ангелов, Дево Госпоже, превышшая,/ и сущих на земли Крéпкая Предстáтельнице,/ ко спасéнию вéрная Застýпнице,/ Всеслáвная Мати Божия,/ радуйся, Невéсто Неневéстная, Владычице.

 

Спаси от всяких лютых тя почитающия,/ яко всех еси, Вихиане, прибежище,/ яко нерушимая стена и предстательство.

Призри благосердием, Всепетая Богородице,/ на мое лютое телесе озлобление/ и исцелú души моея болезнь.

Кондак, глас 2-й
Подобен: Предстательство христиан:

Предстáтельство в нéмощех, всехвáльне,/недугов же исцелéние/ храм и честнáя икона твоя суть, отче,/ но избавляй, яко благ/ во многих искушéниих стрáждущия,/ ускорú, возсылáя,/ яко вси молим ти ся,/ в нуждах, Вихиáне,// к Богу мольбы твоя.

Прокимен, глас 4: Честна пред Господем смерть преподобных Его.

Стих: Терпя потерпéх Господа, и внят ми:

От Матфея святаго Евангелия чтение.

Речé Господь Своим учеником: вся Мне преданá суть Отцем Моим: и никтóже знает Сын, токмо Отец: ни Отца кто знает, тóкмо Сын, и емýже аще вóлит Сын открыти. Приидите ко Мне, вси труждáющиися и обременéннии, и Аз упокóю вы: возмúте иго мое на себé и научúтеся от Менé, яко кроток есмь и смирéн сердцем, и обрящете покой душáм вашим, иго бо Мое благо и брéмя Мое легкó есть.

Слава Отцу и Сыну и Святому Духу.

Молитвами преподобнаго Вихиáна,/ Мúлостиве, очисти/ множество согрешений наших.

И ныне, и присно, и во веки веков. Аминь.

Молитвами Богородицы,/ Мúлостиве, очисти/ множество согрешений наших.

Помилуй мя, Боже,/ по велицей милости Твоей и по множеству щедрот Твоих/ очисти беззаконие мое.

Стихира, глас 6-й
Подобен: Все отлóжше:

Все отложúв мирскóе весéлие,/ в пещéре горней/ и во мнóзех пóдвизех, отче, пребыл еси,/ все житие твое Богу порабóтив,/ и въяве стяжал еси воздаяние,/ борений твоих преестéственных дéйство,/ в нéмже пожив, всякаго благословéния сопричáстие/ улучúл еси, богонóсе,/ избавлéние болéзней гортáни,/ моего не отвéргни моления,// полéзно сотворú.    

Никтóже притекáяй храму твоему,/ болéзнуя от него отхóдит,/ Вихиáне преподобне всеблажéнне,/ но, вéрою припáдая,/ целúтся скоро/ и восхваляет тя, о всепéтый.

Преложéние немощствýющих,/пременéние болящих еси,/ всехвальне, богоносе,/ упрáви ко спасéнию/ вся к тебе ныне приходящия,/ подаждь всем здрáвие и мир,/ в болéзнех осóбый врачý.

Песнь 7

Ирмос: От Иудеи:

Величáю, вопия благодарно хвалý,/ и чудеса твоя пою и возвещáю,/ восклицáю же и слáвлю:/ припáдающия вся, Вихиане чудовóрче,/ мúлостивно не прéзри. 

От землú Владыце, Вседержúтелю Слóву/ молéние мое и всех в нýждах и печáлех  изнемогáющих,/ богонóсе, вознесú,/ верою ти молюся.

Кúпрскаго отóка сый божéственная óтрасль, óтче,/ Богу послужúл еси,/ тéмже и прослáвился еси,/ и вскóре возведéн еси/ к небéсному сопричáстию, Вихиáне,/ чудотвóрец показýяся всем.

Богородичен: Противурéчия суеслóвная мирскúх мудрецéв/ Божéственное Рождествó Твоé разрушúло есть, Дево,/ сохранúлася еси в Рождествé и прежде Рождествá непорóчна,/ и по Рождестве пребывáеши выну/ Дéва Богорóдица.

Песнь 8

Ирмос: Царя Небéснаго:

Осквернéн мирскúми дéлы,/ притекаю ко храму твоему, преблаженне,/ и призываю сúльный твой покров.

Врачевствó целéбное от кáшлицы тя нарицáюще,/ вси имеем злых губúтеля,/ печалей отгонúтеля,/ сотворúтеля мира.

Троичен: Рыдаю зельне за немощь мысли моея, како не хотя стражду невольное воистинну изменение? Сего ради зову: Живоначальная Троице святая, добрых в стоянии мя учини.

Богородичен: Радость велúчий Твоих, Отроковúце,/  окаянный, вéдый, всегда вопию:/ не забýди мя, Дéво Богорóдице.     

Песнь 9

Ирмос: Воистинну Богородицу:

Яко ястреб высокопарящий небохóдный/ явúлся еси, богонóсе,/ боговúдче всечýдный Вихиáне,/ преподобных похвалó.

Восходяше богозрéнием, пóдвиги и труды,/ на Божественную, всехвальне, лествицу добродéтелей,/ и Богу угодúл еси.

Храм твой, о всеблажéнне,/ показáся врачéбница всякаго озлоблéния, Вихиáне,/  и надéжда поющих тя.

Богородичен: Посетú песньми любовию Тя почитáющих,/ и нам милости твоя даруй,/ Вихиáне, с Чúстою Богомáтерию.

Величание

Ублажаем тя,/ преподóбне отче Вихиáне,/ и чтим святую пáмять твою,/ настáвниче монáхов/ и собесéдниче Ангелом.

Стихира, глас 2-й
Подобен: Всем предстательствуеши:

Всем предстáтельствуеши, блáже,/ приступающим ти верою/ и прошéния возсылáющим выну./ Свободú недуг и всем явúся подáтель/ душ спасéния и обстояний разрешéния,/ печáлей и болезней, отче, отгнáния/ и Божéственнаго вéчнаго/ бýдущаго живота сопричáстия,// о Вихиáне Богоблажéнне.

[1] Прем. 36:18.

[2] Пс. 101:8.

[3] Пс. 67, 15 (в греч. 16).


На Кипре есть предание, что преподобный помогает в болезнях верхних дыхательных путей и горла.

Комментариев нет:

Отправить комментарий