понедельник, 23 ноября 2015 г.

Сщмч. Филумену Святогробцу служба


К празднованию 2018 года выкладываю песнопения, необходимые для совершения славословной службы

pdf   word    

Месяца ноября двадцать девятаго дня празднуем память 
святаго священномученника

ФИЛУМЕНА СВЯТОГРОБЦА 


Вечер
На «Господи, воззвах», глас 1.
Подобен: Небесных чинов:


Пéсненно сошéдшеся, да торжествýим/ совершáюще пáмять/ Филумéна божéственнаго,/ в нáша бо временá/ деянием очищéн,/ пóдвигом страдáльчества просия,/ от Бога достойно прияв// победы венец нетлéнный.

Паче солнца возсиявшаго Филумена/ во Орунде Кипрстей/ и озарившаго мир/ светом благочéстия, и добродéтели,/ и дóблестным подвигом страдáльчества,/ вси благоговéйно да воспоúм// яко нóваго священномученика Христова.  


Яко всеплóдие, страдáльче,/ и заклáние божéственное/ Христý Жизнодáвцу Иисýсу принесéн,/Филумéне треблажéнне,/ от Тогó и сподóбися слáвы,/ яже пáче умá,/ в небéсных скúниях,// священномучениче краснéйший. 


Остáвив кров свой,/ горы крéстныя Ставровунúйския/ с брáтом вкупе достúже,/ в нейже бе искушéн/ послушáния яко скрижаль, Филумене,/ и яко твердыня богоугóднаго нрава,// благочестия и чистоты.

Госпóдня стада áгнче новозаклáнный,/ чудно Цéркве укреплéние и нерушúмо,/ отче Филумéне треблажéнне,/ и новоздáнное утверждéние благочéстия,/ тя благоговейно да почтим,// православных собрáния.

У честнáго студенцá самаряныни,/ яростию убиéнный,/и кровопролúтно изсечéнный,/ в лéта послéдняя,/ мýчениче и свидéтелю Христóв,/ богоносе Филумéне,/ ликóм непобеждéнных/ и доброорýжных страдáлец// сопричéлся еси.


Слава, глас 4:

Во иереех новаго страстотерпца/ и в мученицех святейшаго победника,/ Филумена, новопоженный Церкве крин,/ вернии, достославно да ублажим:/ сей бо издетска/ Божественныя любве исполнен сый,/ сечивом  беззаконных/ доблественне потщася/ борение скончати/ и кровьми своими обагрúти/ ризы священныя;/ и ныне к вышнему жертвеннику текúй/ яко иерей/ и мученик красен и честен,/ всем православным просит у Господа/ оставления грехов// и жизни вечныя.

На стиховне, глас 5. 
Подобен: Радуйся:

Рáдуйся, священномучениче Христов,/ Ангелом согражданине и совсéльниче,/ Орунды, вéси Кипрския, цвéте,/ облагоухáяй ны вонями доблестных борений твоих:/ предобрый аромáте безмолвия,/ остáви отéческий кров/ во óтроческия годы, святе,/ с честным единокрóвником твоим,/ и ублажая вся священно безмóлвствующия,/ в Ставровунúйскую обитель богопокровéнную вселúся,/ в нейже послушанию и трезвению,//научéн бе, мудре Филумéне. 

Стих: Праведник яко финикс процветет,/ яко кедр, иже в Ливане, умножится.

Рáдуйся, паче всех возлюбúвый/ Жизнодáвца и Богочеловека Христа,/ Филумéне, иереев богобоязненных сияние/ и мученик новых Божественное светúло:/ яко бо агнец непорóчный/ и Божие заколéние,/ у студенцá Иáковля всесвятáго/ претерпéвый усечения язву,/ в последняя лета,/ радостно приéмля  страсть/ в подражание Распятому беззакоными руками Христу Всецарю,/ Егоже моли// спастúся благохвáлящим тя.

Стих: Насаждени в дому Господни,/ во дворех Бога нашего процветут.

Рáдуйся, благочéстия плáменю,/Церкве новый оплóте,/Православия свéтлая похвалó,/ пóстниче, священномученик удобрéние,/ Филумéне святе;/ темже, память твою почитáюще светонóсную,/ и нетлéнное тело твое лобызáюще в Сихéме, взывáем:/ овчá новозвáнное Христа,/ Того умоли в час стрáшный Суда/ тя поющих с тобою предстáти// и мирови даровáтися вéлией милости.

Слава, глас 8: 
Боголюбúвое жúтельство твое/ страдáльческими напечатлéв болéзньми,/ священномучениче Филумене всечéстне,/ благоугодив всем человеком и Владыце всех,/ победнаго венца/ от Того сподобися на небесú,/ тем  яко дерзновение имéяй к милостивому Господу,// не престáй моляся о чтущих тя.

Тропарь, глас 5:
Подобен: Собезначальное Слово: 
Всевышняго друга úскреннейшаго,/ при студенцé Иáковле ныне умерщвлéннаго/ окровавлéнными супостáт рукáми,/ Филумена, вернии, да восхвáлим,/ светло вопиюще:/ Христу не престай, священномучениче, моляся,// наших страстей отгнáти омрачéние.


Ин, глас 3: 
Демонов победúтелю,/ темныя силы разорúтелю,/ смирением унаследовавый землю,/ на Небесех цáрствуеши;/ священномучениче Филумене,/ моли Милосердаго Бога нашего// спасти души наша.
По первом стихословии седален, глас 1.
Подобен: Гроб Твой, Спасе:

Яко иерей Божествен и страстотерпец светел, Филумене мудре, испивый мучения ныне чашу, усердно Всецаря моли даровати спасения воду, текущую к Животу Нестарéемому, нам, почитающим тя.

Слава, тойже. И ныне: Богородичен:
Ж
ивоносный Истóчниче, Пресвятая Дево, Воду живóтную источúвшая миру, единаго Богочеловека, Иисуса, даждь рабом Твоим испúти нетленнейших и славы непрестающия Божественных вод, от человеколюбнаго сердца Твоего источаемых.

По втором стихословии седален, глас 4.

Подобен: Скоро предвари:

От лет юностных любвé Божéственныя огнь от прамáтере твоея благочестúвыя богатно восприял еси, Филумéне, пóслежде от беззаконных в Сихéме свящéнном мученический венец радостию восприúм, всеблажéнне: тем и молитвами твоими спасай почитáющия тя. 

Слава, тойже. И ныне: Богородичен:
Тéпле молим Тя, Дево Мáти Чистая, непрестанно моли от Тебе произшéдшаго милостиваго Господа, страсти лютыя укротити, ны борющия, и вся чувствия затворúти вéрою выну величáющих мнóжество чудес Твоих.

Канон, глас 4, 
егоже краегранесие:
Филумена, священномученника новаго пою. Х.М.


Песнь 1
Ирмос: Отверзу уста моя,/ и наполнятся Духа,/ и слово отрыгну Царице Матери,/ и явлюся светло торжествуя,// и воспою, радуяся, Тоя чудеса.

Яко священнейшее заколение, у студенцá Иáковля пожершагося, вернии, божественными песньми Филумена мученика воспоим, иже новая явúся веры слава и похвала.

Направил еси стопы твоя, священномучениче Филумене, ко обúтели Ставровунúйстей Честнáго Креста вкупе с братом твоим, от благочáдныя веси, Орунда именуемей, и уединеннаго жúтельства образ соделался еси. 

Чистейшее светúло и ярчайшее, Филумене, семейства многочáднаго питомче, от юности ты верою утвержден бе и возсиял еси всем благочестием своим.   

Богородичен: Настави, Владычице, к пажитем рáдостным благодáти, всех, воспевáющих светло Твоя чудеса и божественнаго Филумена заколение величающих славное.

Песнь 3
Ирмос: Твоя песнословцы, Богородице,/ живый и независтный Источниче,/ лик себе совокупльшия духовно утверди,/ в божественней Твоей славе// венцев славы сподоби.

От юных лет/ вперúв Христови сердце твое,/ тем и последовал еси,/ Филумене преподобнейше, рáдостне// Украсúвшему тя нетления венцем.

Мучеников ликом/ причтен быв, Филумене,/ и мученическаго доброслáвия сподобився,/ веселие и рáдование наследовал еси,// úхже и нас сподоби.

Всечестное прозябение Кúпрское,/ рачением ко Господу/ от младенства напитáнный,/ отеческий кров остáви, Филумене,/ и скоро во священнейшую/ обитель Ставровунийскую// вселился еси.

Богородичен: Умá моего темницы озарú/ и очесá душевная/ раба Твоего просветú,/ очерненная страстьмú,/ Мáти Божия,/ Яже Светодáвца Господа,// Единаго Богочеловека рождши.

Седален, глас 3.
Подобен: Божественныя веры:
Яко всесвященный áгнец пожерлся еси в Самарии, у Иáковлева студенцá, егоже воды Богочеловек испú от рук почерпшей Самаряныни, священномучение Филумене всечестне, и обагрил еси одежду священную кровей своих Божественными токи.

Песнь 4
Ирмос: Седяй в славе на престоле Божества,/ во облаце легце,/ прииде Иисус пребожественный,/ нетленною дланию и спасе зовущия:// слава, Христе, силе Твоей.

Весь божествен и богоприятен явúся, святе, ныне в Сионе местом святым послуживый и длáньми убийц святейшую кровь твою в Самарúи излúв, Филумене.

Закон Божественный возвещая неверным, святе Филумене, и посреде волков богоприятно, отче, подвизáяйся, не возмогл еси избежáти челюстей их, жаждущих растерзати тя.

Во иереех украсúтель слáвен еси, Филумене святе, студенцá Божественнаго, у негоже Фотúну Самаряныню срете иногда Мессия Христос, дáрующий нам воду жизноподáтельную.

Богородичен: От утробы Твоея, Богородице, пáче слова и пáче ума Христос произыде, мирови дáруяй бытие и спáсаяй от бед и печалей выну Твоя чудесá величáющия.

Песнь 5
Ирмос: Ужасошася всяческая/ о божественней славе Твоей:/ Ты бо, Неискусобрачная Дево,/ имела еси во утробе над всеми Бога,/ и родила еси безлетнаго Сына,/ всем воспевающим Тя// мир подавающая.

Кáплями честных кровей твоих/ ныне запечатлел еси/ кладязь священный Самаряныни,/ у него же безвестных человек рукáми/ бе убиен,/ яко непорочно овчá, Филумене,// новых подвижников веры хвало.

Избáвителя искреннейший любимче,/ Того паче всех любяй/ и Того ради любве/ во ограде студенцá Иаковля/ жестоко умерщвленный,/ моли, Филумене, Господа// о поющих тя.   

Мучеников заре новосиянных,/ веры свидетелей,/ Филумене славне,/ тяжкоумия мрак/ на тя враждующих разсеявый,/ светом Небеснаго Царствия блистающим// в вышних насладися кровех.

Богородичен: Просим себе, Владычице,/ молитв непрестанных/ к Жизнодателю Твоему Сыну,/ иже в смертней/ темнотленней сени спящии,/ яко да радости неумолкаемыя// причáстницы в небесных будем.

Песнь 6
Ирмос: Божественное сие и всечестное/ совершающе празднество,/ богомудрии, Богоматере,/ приидите руками восплещим,// от Нея рождшагося Бога славим.

Укрепляемь, Филумене,/ силою Господа,/ верным подающаго/ токи животныя,/ врагов веры, грозящих ти,/ крепкодушне отче,// не устрашился еси.

Тело твое многострадальное/ и по успении/ мягко и удобоподвижно/ Господь соблюде,/яко да во одеяния служебная/ облачат отцы его,// о Филумене.

Тебе поем, священномучениче Филумене,/ в горе Афонстей/ брату  своему явившемуся/ и мучение  священное свое// тому áбие поведавшему.

Богородичен: Сквернáвую, Богородительнице,/ и нечистоты исполненную/ рабов Твоих волю/ омый иссопом дерзновения// к Сыну Единородному Твоему и Господу. 

Кондак, глас 8. 
Под.: Взбранной Воеводе: 

Священномучеников новосиянную звезду,/ у студенцá возшедшую Самаряныни/ и облистáвшую Церковь Христову/ целомудрием и страданием,/ ныне воспоим,/  яко áгнца, за веру заклáннаго,/ любовию вопиюще:// радуйся, блаженне Филумене.

Песнь 7
Ирмос: Не послужиша твари, богомудрии,/ паче Создавшаго,/ но огненное прещение мужески поправше,/ радовахуся поюще:// препетый отцев Господь и Бог благословен еси.

От всякаго мя злоумышления вражия,/ Филумене, избáви,/ якоже спасе/ преемника в месте делания твоего,/ скоро тому предвозвестив/ еже на него убийц нашествие// безстудное и слабодушное.

Ныне тело твое,/ егоже Господь сохрани нетленно,/ слáвне Филумене,/ в Сихеме яко источник ся являет исцелений/ с верою сему приникáющим/ и ко Христу// твоих предстáтельств требующим. 

Благосострадательне Филумене,/ вся отсеченная многострадальнаго телесе твоего/ во Австрáлии, святе,/ лютый недуг рáковый  отгнá,/ всем благодать показуяй,/ юже обрел еси// на пáжити веры.

Богородичен: Пречистый Владыка/ мир от падения древле избáвивый,/ от пречистых кровей Твоих,/ Мати Божия, воплотися./ Сего ради, Владычице,/ яко Начáток спасения нашего// Тя воспеваем.

Песнь 8
Ирмос: Отроки благочестивыя в пещи,/ рождество Богородичо спасло есть:/ тогда убо образуемое,/ ныне же действуемое,/ вселенную всю воздвизает пети Тебе:/ Господа пойте, дела,// и превозносите Его во вся веки.

Новый Христов священномучениче,/ сечивом урáнен сый,/ добродетельне Филумене,/ обагрил еси рубище нищенское твое/ кровей твоих токи,/ вскрай обитáя селений веры Господни честных,// в Земли, юже стопáми Своими обыде Бог.    
Мученик и ратоборец победоносен явися/ Христа Вседержителя,/ о Филумене дивне,/ яко превозшедый доблесть всяческую/ в последняя лета;/ нетленное тело твое/ священие и источник/ Той показá, отче,// присноточáщ чудесы.

Сечиво тя уреза/ непорочно, Филумене крепкодушне,/ убиение жестоко совершáя,/ и главу твою сокруши всечестную,/ священнострадальче благородный:/ сего ради,/ чтуще память твою святую,/ благообразно взыскуем// еже пред Господем заступлений твоих.

Богородичен: Избáви напастей, Богородице,/ бед, обстояний/ и скорбей горестных/ просящих выну, Владычице,/ яже от Тебе помощи/ и сподоби достигнути нам/ славы неумолкáемыя/ и на Небесех// нескончаемыя радости. 

Песнь 9
Ирмос: Всяк земнородный/ да взыграется Духом просвещаемь,/ да торжествует же безплотных Умов естество,/ почитающее священное торжество Богоматере,/ и да вопиет:/ радуйся, Всеблаженная,// Богородице Чистая Приснодево.

Благославне Филумене,/ священномучениче честный,/ веры же и Сиона/ новозарный свещниче,/ в лице вси/ твоея кончины память празднующе, вопием:/ с небесе покрый/ и спаси от всякия нужды// к тебе притекáющия.

Яко агнец Божий пожрен быв,/ Филумене богобразне,/ и к небесному стаду вознесен/ и к присносущней радости и веселию,/ да Началопáстырю сликовствуеши/ и Ангельским чином// во веки светло свеселишися.

Радуйся, доблественниче Господень, Филумене,/ терпеливне и всечестне,/ вопиюще, молимся:/ от сетей миродержца ум наш свободи,/ и песнь сию приими,/ юже сплетаем ти,// хвáляще мученическое твое светлое свидетельство. 

Богородичен: Мати Божия,/ ум наш возвыси ко множайшей любве/ от суеты дольних страстей и скорбей,/ Яже Вышняго Рождеством/ древле пáдшее Адамово естество/ любве ради неизреченныя и велией милости// возвысившая.

Светилен.
Подобен: Жены услышите:

Священномучениче слáвне, иже в последняя времена у студенцá Иáковля пострадавый и славы причащáяйся ныне Зиждителевы, треблаженне Филумене, о нас моли, совершáющих верою присночестную память твою. 

На «Хвалитех», глас 4. 
Подобен: Званный свыше:

Слáвне Филумéне,/ Орунды кúпрския/ óтрасле цветонóсная и преблаговóнная,/ со Елпúдием, близнецом своим,/ хотя Единому Господу угодúти и Богу,/ сласти вся мудро небрегл еси,/ якоже Кущник пéрвее Иоанн,/ егоже во образ// житию своему приял еси,// Цéркве крúне новоусéченный.

Един у студенцá Иáковля/ вечерни, Филумене хвалéния/ принося Всецарю благоговейно в жертву,/ безстудно сéчивом урáнен бе/ и церкóвное облачéние/ обагрúл еси токи кровéй твоих,// вечерни же прокúмен прочестú// возшéл еси в Небéсныя Дóмы.  

Направил еси, Филумене, пéрвее/ к горе Креста/ стопы твоя издéтска,/ пóслежде отшéл еси/ ко брáтству Божественнаго/ и Всесвятáго Гроба,/ хотя благоговейно послужúти/ святыням свящéнным/ во временá последняя,/ отче богодухновéнне,// и шéствовати вослéд Иисуса Всецаря. 

Мóщи Божéственныя твоя,/ священномучениче Филумéне,/ нетлéнны содéлав Господь,/ нетлéнную слáву твою всем яви,/ юже свыше приял еси;/ сего ради благоговейно тя чтит/ Церковь Христова/ и память твою приснопéтую/ величает, вопиющи:// моли Господа даровáтися верным// вéлией милости.



О мученичестве святого 

Перевод выполняется по изданию: "Служба святому новомученику Филумену Кипрскому". Издание обители святого Николая. Орунда, Кипр, 2010 год.
Автор — кир Харлампий Бусья.

4 комментария:

  1. Два дня назад, читал житие его брата, в книге отца Иосифа Ватопедского. И тут такой подарок, ранее не встречал молитвословий, только житите.
    Благодарю за труды!

    ОтветитьУдалить
  2. Благодарю!) очень пригодилось!)

    ОтветитьУдалить