Акафист святому праведному Лазарю Четверодневному, епископу Киттийскому

АКАФИСТ

святому Лазарю Четверодневному,
епископу Киттийскому

Переложение с акафиста монаха Герасима Микраяннита

Кондак 1

Избранный друже Христов/ и общаго воскресения уверителю,/ из мертвых  возставленный/ повелением Господа живоносным!/ Ныне, подножию ногу Его предстоя,/ моли, да избавит от смерти вечныя/ и всякия скорби/ любовию ти вопиющия:/ радуйся, святый Лазарю// праведный друже Божий.

Икос 1

Ангельское непорочное жительство в Слове Божии проводя, Слову Божию друг соделася,/ и, дарования богатная от Него восприим,/ ими светиши всем, вопиющим ти сице:

Радуйся, Иисуса Кротчайшаго Богодухновенный любимче;
радуйся, благоговения и боголюбия светило.
Радуйся, яко по закону Завета Ветхаго жизнь управил еси;
радуйся, яко благодать по Завету Новому восприял еси.
Радуйся, чистых деяний высоту нам показавый;
радуйся, богоразумия глубине нас научивый.
Радуйся, яко по закону достойно прославляешися;
радуйся, яко благодать Спасову нам являеши.
Радуйся, звездо превосходнейшия любве;
радуйся, противоборче фарисейския прелести.
Радуйся, жития добродетельнаго зерцало;
радуйся, нравов Небесных вертограде.

Радуйся, святый Лазарю, праведный друже Божий.

Кондак 2

Видя и познавая Христово плоское пришествие и на земли яко Бога Превечна Его познавая, всесовершенно Тому уверовал еси, Лазарю всеблаженне. Той же твоего сердца рачение яко угодное прием, присна друга тя показа, Ему же ты радостию вопияше: Аллилуиа.

Икос 2

Разумом правым ко Источнику разума, плотию нас ради Пришедшу, присно взирая священныя любве очима,/ последовал еси Ему и верою Тому соединился еси./ Тем твоей мудрости дивящеся, взываем:

Радуйся, таинниче Божия Слова;
радуйся, проповедниче Его снизхождения.
Радуйся, законных повелений усердный хранителю;
радуйся, заповедей Евангельских рачительный исполнителю.
Радуйся, древо, благодатныя плоды износящее;
радуйся, водо Небесная, в скорбех нас орошающая.
Радуйся, яко Господеви всецело себе возложил еси;
радуйся, яко земных богомудро удалился еси.
Радуйся, ко Всемилостивому любве нас научаяй;
радуйся, к Того доброте неизреченней наши умы возводяй.
Радуйся, дольних страстей отбегавый;
радуйся, вышнее просвещение стяжавый.

Радуйся, святый Лазарю, праведный друже Божий.

Кондак 3

Сильный, крепостию, Господь Сердцеведец, зря жития твоего чистоту, втораго наперсника тя показует, Лазарю преблаженне, ты же, в неизреченное таинство воплощения посвящен, любовию и страхом возглашаше Тому: Аллилуия.

Икос 3

Имея веру живую и делы Божественныя, богоугодно управил еси житие твое, Лазарю дивный, и Евангельскою проповедию просиял еси, приводя Всецарю благоговением зовущия ти таковая:

Радуйся, таинниче благовестия;
радуйся, рабе Животодавца.
Радуйся, лучу благостыни, нас осиявающая;
радуйся, обоняние чистоты, нам благоухающее.
Радуйся, апостолом равночестный;
радуйся, Ангелом единонравный.
Радуйся, даров Духа сокровище неоскудеваемое;
радуйся, благодати обиталище и пажите неувядаемая.
Радуйся, яко исполнился еси Божия озарения невещественнаго;
радуйся, яко превыше явился еси пристрастия по естеству.
Радуйся, яко вины страстей отсекати нам помогаеши;
радуйся, яко сущим в печалех радование ниспосылаеши.

Радуйся, святый Лазарю, праведный друже Божий.

Кондак 4

Буря болезни смертныя егда найде на тя, крепкодушне, тогда Христос Всеведец глаголаше на пути: Лазарь, друг Наш, успе. Но идем и возставим Нас любящаго, да воскреснет от смертнаго сна и возопиет: Аллилуия.

Икос 4

Слыша моления нас, немощствующих, к тебе, благосерде Лазарю, болезнь и смерть претерпевшему, не престай молитвы покров простирати над нами и избавляти скобей и болезней возглашающих ти таковая:

Радуйся, о немощных печальниче;
радуйся, о нас, грешных, пред Богом заступниче.
Радуйся, всем цельбы источаяй;
радуйся, козней тьмы избавляяй.
Радуйся, нетления приемый диадиму;
радуйся, чадцам церковным ходатайствуяй дарования.
Радуйся, славы и светлости жизни вечныя;
радуйся, Божественныя благостыни к нам низводителю.
Радуйся, яко непорочно на земли подвизался еси;
радуйся, яко по достоянию от Бога честь восприял еси.
Радуйся, от печали многия соблюдаяй;
радуйся, добродеянии наша сердца озаряй.
Радуйся, святый Лазарю, праведный друже Божий.

Кондак 5

Бога Господа Иисуса познав, Марфа с Мариею, сестры твоя, Лазарю, Тому вопияху: аще бы в Вифании был еси, Учителю, не бы умерл брат наш. Темже ко гробу приближися Жизнодавец, да воздвигнет четверодневна тя мертвеца, взывающа: Аллилуия.

Акафист преподобному Никифору Прокаженному

Акафист преподобному Никифору Прокаженному, чудотворцу 

Служба

Акафист word

Акафист pdf

Кондак 1

Избрáннаго воина Владыки Небéснаго, адаманта терпения, небосвéтлую стáмну Святáго Духа, сшéдшеся, вéрнии, да восхвалим. Ты, же премúрный отче, яко óбщник страдáний нашего Искупителя, дерзновéнно молися о нас, прокажéнных страстьмú, да зовем ти:

Радуйся, многотерпелúвне отче Никúфоре, недужным скорый помóщниче.

Икос 1

Ангельскую души чистоту и к вышним стремлéние издéтска явил еси, преподобне, тéмже мира Зиждитель лишéньми тя в часть Себе отделú и в чадо возлюбленное восприя. Ты же, детище благоугóдливое быв, от земных родителей сирóтное, обáче Бога отцем неразлучно имéвшее, ныне от нас приимú славословия сицевáя:

Радуйся, úмже утéшатся скорбная сердца,
радуйся, úмже стрáждущии прославят Творца;

Радуйся, кротостию от юности преудобрéнный,
радуйся, послушанием преукрашéнный;

Радуйся, к житию крестному от юности предызбрáнный,
радуйся, к подвигу доблемýдренному призвáнный;

Радуйся, тúхостное и незлобивое отрочá,
радуйся, на пáжитех смиренномýдрия упасéнное овчá;

Радуйся, яко в скорбех и болезнех руце о нас воздевáеши,
радуйся, яко крестоношению верныя научáеши;

Радуйся, крúтяном теплое заступлéние,
радуйся, малодушным нам в бедáх укреплéние.

Радуйся, многотерпелúвне отче Никúфоре, недужным скорый помощниче.

Кондак 2

Видя тя Бог человека úстинна, непорочна, праведна, велие испытание тебе посылает, аки злато в горнúле тя искушая, яко да Иовле крепкодушие во образ всем верным явúши, úмже и стал еси протúву уныния волн, находящих на тя, егда язя прокáзы на теле твоем узрéся. Тем, сию потаúти хотя, на чужедáльний корабль восхóдиши и града Александрии достизáеши. Мы же, упование твое на Единаго Благоутрóбнаго зряще, вопием Тому: Аллилуия.

Икос 2

Рáзумом любомудрым службы Божия во граде велúцем воспевáеши, отонýдуже и во Святую Землю во исполнение желания твоего тéплаго преплывáеши, тáмо пред Крестом Христовым и Гробом Его живоносным молитвы сердéчныя вознося и глубину печали своея обнажáя. Тéмже, в Александрúю обратúвся, единому от архиереев тýгу свою исповéдаеши и на Хиóс ко святому Анфúму áбие отсылáешися. Мы же, премудрому Промыслу о тебе дивящеся, воспевáем:

Радуйся, в скорби велицей надеждою на Отца Небеснаго себе ограждáяй,
радуйся, в печали деннонóщно молитву сердéчную проливáяй;

Радуйся, сладкопéснивый Церкве Христовы слáвие,
радуйся, рук воздеянием низпосылáяй разслáбленным здрáвие;

Радуйся, лéпотою песнопéний свящéнных измлáда пленéнный,
радуйся, ангелоглáсным многими наречéнный;

Радуйся, недугом приявый Божие всыновлéние,
радуйся, в немощи явúвый Евангельских добродетелей прозябéния;

Радуйся, яко бысть Весéлие сéрдца тебе Иисус Сладчáйший,
радуйся, пéрвее быв отрéбие миру, ныне же ему — дар высочáйший;

Радуйся, егóже побéдами Хиóс величáется,
радуйся, егóже жительством козни врáжия обличáются.

Радуйся, многотерпелúвне отче Никúфоре, недýжным скорый помóщниче.

Кондак 3

Силою Вышняго укрепляемь, во отóце Хиóсстем на многая лета водворяешися, и зде, яко Ангела Божия, тя преподобный Анфúм сретáет, в нарóчитую прокажéнных врачéбницу тя поселяя, раны твоя телéсныя обязýя и духóвное попечение взéмля о крестонóсней душú твоей. Ты же, таковыя милости от волею Распятаго и Его угóдника приéмля, благодáрственная восписýеши: Аллилуия.


Икос 3

Имея велие к храму Божию усéрдие, в цéрквице святáго Лазаря, друга Господня, у лечéбницы на всяк день в молéниих и пéниих привитáеши, пред иконою дивною Богородицы от сéрдца, скорбию теснúмаго, вопия. Ея же чудесы не токмо на хáртии, но и в души напечатлéв и благоутрóбия бéздны от Всемúлостивыя восприят, не престáй и ныне руце к Ней простирáти о спасении нас, возносящих ти сицевáя:

Радуйся, Цéрковию Бóжиею воспитáнный,
радуйся, мáнною словес Евангельских препитáнный;

Радуйся, яко целúши печали лютое неможéние,
радуйся, яко ходáтайствы врачýеши уныния смертное болéние;

Радуйся, яко душéвныя наши стрýпы молитвою за ны умягчáеши,
радуйся, яко разслáбленныя телом и нерадúвыя бодростию своею духовною возставляеши;

Радуйся, удаляяйся от всякия лукáвыя вещи,
радуйся, изведéнный от мысленнаго Египта железныя пéщи;

Радуйся, Богородице светлое гласовáние,
радуйся, ум оградúвый Священным Писанием;

Радуйся, óбразе и правило Божиих песнопéвцев,
радуйся, сопричáстниче страстотéрпцев.

Радуйся, многотерпелúвне отче Никúфоре, недýжным скорый помóщниче.

Кондак 4

Бурю смятений и попечений мирских на пристанище тихое пременúл еси, и, гнушáемь от человек, маргарúт драгоцéнный Всетворцý показáся. Тем, ничесóже стяжáв, сокрóвищем мудрых советов от богопросвещéннаго стáрца и писаний святоотéческих обогащáешися, непрестáнно хваля тáко к пользе душéвней Устрóившаго: Аллилуия.

Икос 4

Слыша Христос Многомúлостивый молúтвы твоя и зря сердца твоего сокрушéние, руку к тебе простирает: приидú ко Мне, чадо труждáющееся и обременéнное, и Аз упокою тя. Ты же, от отца духóвнаго пострижéние восприúм, взем иго Господне благое на рáмо, крóтости и смирéнию по вся дни от Него научáшеся и благодáрственная возношáше. Мы же, таковым щедротам Спаса дивящеся, похвальная ти воспевáем:

Радуйся, в новаго человека богосотворéннаго облечéнный,
радуйся, во одежду веселия оболчéнный;

Радуйся, целомудрия дивное благоухáние,
радуйся, помощи Божия приявый обетовáние;

Радуйся, горьковóдная мiра Крестом Христовым усладúвый,
радуйся, себе укорéние в краеугóльный камень терпения положúвый;

Радуйся, жития сýетнаго печалей Промыслом отсечéнный,
радуйся, не ктомý себе жúти, но Умершему за ны и Воскрéсшему посвящéнный;

Радуйся, в рýце Создáтеля всецело себе предáвый,
радуйся, воли своея отвержения возжелáвый;

Радуйся, яко тобою монáшеский лик украшáется,
радуйся, яко тобою сýщии в лютых нéмощех укрепляются.

Радуйся, многотерпелúвне отче Никифоре, недýжным скорый помóщниче.

Кондак 5

Боготéчно твое житие и предúвно явúся, к разсуждéнию бо послушанием устремúлся еси, преподóбне, в лечéбней калúбице, яко в пустыни, со страстьмú, яко зверьми дóблественне боряся, побеждая и побеждáяся, падая и возставая, молитвы никáкоже отступая и простирая длани своя Простéршему длани Божéственнеи на Пречúстем и Живонóснем Кресте, яко да в будущем Царстве Его пéти возмóжеши немóлчное: Аллилуия.

Икос 5

Видим тя, преподóбне отче, вертогрáдаря, цвéты прекрáсныя и древá благовúдная изращáюща, Вышнему же Вертогрáдарю добродетелей сад преиспещрéнный, посредé терний скорбей и напастей процветший. Темже, угодниче Божий и дивный отче, припáдающе к стопам твоим, просим: Троице Пресвятéй благосéрдствуй о нас, яко да согрешения своя ýзрим и, покаянием умудрéннии, не престáнем, благодаряще, возсылáти тебе таковáя:

Радуйся, яко от кóрене повиновéния смирение проращáеши,
радуйся, яко на ветви духóвней якоже новый крин прозябáеши;

Радуйся, бдения и трезвéния дивное благоухáние,
радуйся, терпеливодýшию веру вменúвый во основáние;

Радуйся, розгó, отреблéнная Вышним, тéмже и многоплóдная,
радуйся, грехмú иссушéнным рекó многовóдная;

Радуйся, умом зловрéднаго целомудренно отбегáяй,
радуйся, Священным Писанием прúсно внимáяй;

Радуйся, якоже кипарúс, посредé хлада мук благодушием зеленéеши,
радуйся, якоже медунúца мироухáнная, пред Зиждúтелем благоговéеши;

Радуйся, от егоже устен Господня хвала возсылáется,
радуйся, úмже строптúвии и ропотлúвии славослóвию научáются.

Радуйся, многотерпелúвне отче Никúфоре, недужных скорый помóщниче.

Кондак 6

Проповéдник святоотеческих монашеских дéланий является ти богогласный Анфим, ко трезвéнию, страху Божию, памяти смéртней и молчанию тя управляя, и тáко зáповедьми Евáнгельскими устрояет душéвныя струны твоя, яко да мусикúйская Духу Святому цевнúца содéлаешися, и о тебе воспевáет Троице Пресвятей: Аллилуия.

Икос 6

Возсия в тебе разум истинный, úмже всячески к послушанию устремился еси, богонóсе, откровение бо стяжал еси, отче, úскреннее, помыслы истязýя, кормчему своему кормило вручив и тем основание духóвнаго восхождения полагáя; в таковéм предúвнем смирении помянý Тя Господь и украсú добродéтельми душу твою. Тéмже от нас приимú таковая:

Радуйся, высокомýдрие мира в буйство вменúвый,
радуйся, Иисýсову память в сердце своем водрузúвый;

Радуйся, Христý подражáтелю, нас ради обнищáвшему,
радуйся, óбщниче прежде бывшим Отцéм, дóльний покой попрáвшим;

Радуйся, Божиих ради хотéний своя потребúвый хотéния,
радуйся, в простотé повинýяся, дóбре прéйде течéние;

Радуйся, паче кéдра ливáнскаго в úстиннем дéлании укоренúвыйся,
радуйся, Послушлúвому даже до смерти крéстныя во след устремúвыйся;

Радуйся, яко псалтúрь яснозвýчная, стезю к покаянию воспевáяй,
радуйся, яко труба богоглáсная, нерадúвыя к деланию пробуждáяй;

Радуйся, иноком новоначáльным звездó путевóдная,
радуйся, путем истомлéнным древо высóкое и сладкоплóдное.

Радуйся, многотерпелúвне отче Никúфоре, недýжным скорый помóщниче.

Кондак 7

Хотящу ти заповедь Евангельскую испóлнити, во озлоблéнии болéзненном всячески незлóбием и благодýшествием сияше, многострадáльне отче Никúфоре, кадило Христу благовóнное и приношение святóе. Тéмже блáгости и братолюбия достúгл еси высоты, Духом Святым исполняяся, иным прокажéнным, úнокиням обители Пренепорóчныя Помóщницы и нам, немощным, образ быв, кáко подобает любóвию к Богу и ближнему преспевáти, с нúмиже вкýпе восписýем о тебе Вышнему: Аллилуия.

Икос 7

Новый явúся Иов, дóблестию в страдáниих и пóдвигом великодýшия вся болящия укрепляяй и наставляяй, Богом возлюбленный трýдниче, мужемýдренный ратобóрче, тихости и покóрности воле Божии óбразе. Тéмже, сам быв оструплéн, наша раны благосéрдными заступлéнии обязýеши, по достоянию воздающих ти таковая:

Радуйся, душевнаго мира гýсле согласная,
радуйся, молитвы сердéчныя песне прекрасная;

Радуйся, душú своея ризу слезáми радостотворными очищáяй,
радуйся, плачем Вседержителя к милости приклоняяй;

Радуйся, всеусéрдно устремúвыйся к богоугождéнию,
радуйся, пред очами Владыки обретый благоволéние;

Радуйся, уязвленным самолюбием целéбнейший плáстырю,
радуйся, блуждáющим в пóхотех плоти добрый путевождю и пáстырю;

Радуйся, яко Христос твоя присно содéлася Радость,
радуйся, яко имя Его бысть тебе вышняя сладость;

Радуйся, úмже саможалéние и малодýшие исправляются,
радуйся, úмже премудрость Промысла Божия познавáется.

Радуйся, многотерпелúвне отче Никúфоре, недýжных скорый помóщниче.

Кондак 8

Странен, премирне, ты показáся миру, нечистотé его не прикасáяся, тéмже и церковь содéлася Богу Живу, Дух бо Святый приúде и вселúся в тя, дóбляя мужества главúзно, и очисти тя от всякия скверны. Ты же, молитвою священнодéйствуя и присно грéшника себе мня, во удивлéнии зовяше: Аллилуия.

Икос 8

Весь бе урáнен, и в ребрó прободéн, и ослеплéн, благодарною же душею паче солнца сияя; злый же недуг, яко мучитель, нещадно тя истязаше. Обаче удом твоим отсекаемым, ты немолчно пояше: да будет, Господи, жертва моя душевная благоприятна пред Тобою. Не остави, отче, предстательством нас, таковей твоей доблести ужасающихся, оструплéнных грехми, похотьмú ослепленных, любовию Ти вопиющих:

Радуйся, Вышнему всесожжение словесное,
радуйся, сущим дóлу дарование Небесное;

Радуйся, пакостника плоти смирением попаливый;
радуйся, телесному крестоношению мысленное распятие совокупивый;

Радуйся, славословия Всещедраго кимвале богокрасный,
радуйся, трезвения органе златогласный;

Радуйся, яко крепкостоянием твоим в скорбех научаемся,
радуйся, яко худостию риз твоих вразумляемся;

Радуйся, яко терпение нищаго Лазаря показал еси,
радуйся, яко Моисееву кротость явил еси,

Радуйся, унынием истязуемым духовная отрадо,
радуйся, гневом жегомым Небесная прохладо.

Радуйся, многотерпеливне отче Никифоре, недужным скорый помощниче.

Кондак 9

Всякое благодарéние поощряет Дающаго éже умнóжити даровáния; твоя же душа в славословии отнюд не преставáше, сего ради свыше великия дары приял еси, Духа Святаго сосуде избранный. Испросú нам в терпении обстояний понé мало ти подражáти, и в болéзнех благодáрственная присно от сердца сокрушеннаго Богови возносити: Аллилуия.

Икос 9

Ветия лжемудрствующия умолкáют, недоумéюще крéстнаго жития силы: елúцы бо Крест приемлют желанием, душевное исцеление взéмлют. Ты же, премúрный отче, от претерпéния скорби плотскúя к видению и славе Креста возшел еси и велию благодать притяжáл еси болезни целúти к тебе приходящих любóвию и воспевáющих таковая:

Радуйся, благословляяй Господа на всякое время,
радуйся, безропотно пронесый тягчайшее бремя;

Радуйся, возненавúдевый славу мимотекýщую,
радуйся, отвергúй суету многословýщую;

Радуйся, паче богатства тленнаго Христово поношение вменúвый,
радуйся, тесный путь благословúвый;

Радуйся, купéле Силоáмская разслáбленным грехми,
радуйся, цельбó ослепленным похотьмú;

Радуйся, ломóтныя и опýхольныя болезни отгоняяй,
радуйся, моры губúтельныя уставляяй;

Радуйся, яко в прокажéнней плоти Ангельскою чистотóю сияше,
радуйся, яко во озлоблéниих благость являше.

Радуйся, многотерпелúвне отче Никифоре, недужным скорый помощниче.

Кондак 10

Спасти хотя люди Афúнския, душевными и телесными болéзньми стрáждущия, Промыслúтель Премудрый тя, кротчайший Никифоре, яко ангела утешителя к ним посылает, наставник же твой словесы таковыми свящéннику при лечéбнице Евмéнию тя предваряет: сей маргарит прекрáснейший, сокровище Божие и совершенна монаха рáдостию вси приимите, воздающе Богу по достоянию: Аллилуия.

Икос 10

Стена содéлался еси прокаженным и страждущим во граде Афúнстем, тúхостию и благоволением Апостолу подражая, во всяцем внимании жительствуя, к согласию, миру, святыне и благоговéнию вся наставляя. Тéмже и образ нам показался еси, еже кáко подобает сердечным служением во псалмéх, и пениих, и песнех духовных преспевáти, сего ради яко едúнеми усты возносим ти сицевáя:

Радуйся, благодарения радостию блистáяй,
радуйся, сострадания светлостию вся увеселяяй;

Радуйся, Давúдовою простотою отгнавый врáжия злоковáрствия,
радуйся, нищетою духа блаженство стяжáвый Вечнаго Царствия;

Радуйся, суесловие попалúвый молчанием,
радуйся, малодушие потребúвый Вышняго величанием;

Радуйся, яко Евангелие достояние ума своего сотворúся,
радуйся, яко любы неотпáдающая в тебе воцарúся;

радуйся, яко к молению непрестанному верныя наставляеши,
радуйся, яко к духовному разуму страждущия управляеши;

Радуйся, в пещи безмерных болезней палúмыя оросúвый,
радуйся, мнóзи во глубине немощи сýщия исцелúвый.

Радуйся, многотерпелúвне отче Никифоре, недужным скорый помóщниче.

Кондак 11

Пение всеумилéнное подобает ти, молúтвенниче неусыпный: служителю бо Евмéнию в кéллию к тебе тайно вшéдшу, узрé тя на воздýсе молящася, и, разслаблéние членов твоих, зрения и ног лишéние ведая, ужáсся той, возопив: Аллилуия.

Икос 11

Светосияет нам образ твой, именем и дéлы победонóсче, к познанию немощи своея нас, малодушных и ропотливых, управляя и вразумляя. Темже недоумéюще, како смертней плоти твоей истлевающей, по вся дни обновляшеся, яко духодвúжная арфа, выну богослáвная бряцáя, дивúмся и приносим ти таковáя:

Радуйся, любóвию Христовою прободéнный,
радуйся, живоносным Крестом Его оживотворéнный;

Радуйся, якоже Даниил во рву на Единаго уповáяй,
радуйся, якоже óтроцы в пещи Благоутрóбнаго восхваляяй;

Радуйся, Церкве златоковáнный светúльниче,
радуйся, рачения еже к Богу таúнниче;

Радуйся, яко огнем боления вéчнаго пламене избéгл еси,
радуйся, яко силою Духа немощь плоти препрéл еси;

Радуйся, сладкопéвче, Ангелом собесéдниче,
радуйся, гýсле молитвы, благодáтныя жизни снаслéдниче.

Радуйся, многотерпелúвне отче Никифоре, недужным скорый помощниче.

Кондак 12

Благодати чудотворений ковчег явился еси, богатодáрный отче, и по блажéнней кончине нас благоутрóбием и помощию не оставляеши. Всем же в скорби к мощéм твоим и образу притекающим, подаéши ослáбу душевную и телесную, с ними Всемилостивому возсылáя теплое: Аллилуия.

Икос 12

Пение всеумилéнное не престаем приносúти тебе, благоувéтливый отче, ты же сие приими от недостойных устен и к Богу рýце твоя воздевáти о нас не престáй, вопиющих ти таковая:

Радуйся, печáльми болезненными обретый безпечáльное упокоение,
радуйся, до конца претерпев, райская улучúвый Селения;

Радуйся, грóздие, в точиле скорбей вино источúвшее,
радуйся, миро, благоуханием добродетелей вся ны увеселúвшее;

Радуйся, токи чудес изливáяй,
радуйся, мúлостию к болящим не оскудевáяй;

Радуйся, мучений пучину окормлéнием Слова преплывый,
радуйся, вóи лукáваго крепкодýшием погубúвый;

Радуйся, трясáвицею и огнéвицею стрáждущия уврачевáвый,
радуйся, мнóгия беды от почитающих тя отгнáвый;

Радуйся, мúлостиве, блаженства Небéснаго ныне наслаждáяяйся,
радуйся, нищий духом, благодати богатно присно причащаяйся.

Радуйся, многотерпеливне отче Никифоре, недужным скорый помощниче.

Кондак 13

О богомудре Никифоре Прокаженный! Ты болéзньми ссекáем, недýгами стрýжемь, житие на одре болезни лютыя препровождáя, волю Божию о Христе всяко испóлнил еси, еже есть всегда рáдоватися, непрестáнно молúтися, о всем благодарúти. Ныне же, светоявлéнне, нашу печаль утоли и ухо твое к прошéнием нашим мúлостивно приклони, и к рáдованию, молитве и благодарéнию упрáви о тебе вопиющия: Аллилуия.

Молитва

О, благодарный страдáльче, молитвы таúнниче, милостивый чудотвóрче, преподобне отче Никифоре!

Кто убо терпению, смирению, трезвéнию, благоувéтливости, доблести и крóтостной премýдрости твоим не подивúтся?

Веруем, яко по преселéнии твоем ко Господу вéлию мзду улучúл еси и многою благодáтию облéклся еси, многоболéзненныя бо, стрáждущия, ничáщия нúзу, разслáбленныя, нúщия и убóгия заступлéнием и попечением своим не оставляеши и многая и дивная чудеса на них изливáеши.

Тéмже, сам искушен быв, помозú и нам, страстьмú, и похотьмú, и своеволием искушáемым. Вéмы, яко вся находящая на ны грех ради наших восприяхом. Обáче дерзновенным заступлéнием твоим пред Человеколюбцем воздвúгни ны, в пучине нéмощей обдержúмыя, возстáви на одре озлобления сýщия, облегчú недуги, здравия испросú, болéзни укротú, утешение божественное даруй.

Припадú в Небесных Чертогах к подножию ногу нашего Искупúтеля, не престáй воздевáти рýце твои о нас, недостойных и окаянных, по вся дни падающих и возстающих, обáче надежды на Его милосердие не оставляющих, яко да твоими ходáтайствы укрепляеми и исцеления душ восприéмше, грехов прощение улучúм и Царство Его вечное наслéдим и с тобою кýпно да воспоéм благодáрственная в Троице славимому Богу нашему, Отцу, и Сыну, и Святому Духу, ныне, и присно, и во веки веков. Аминь.

Акафист святым мученикам Лесбосским Рафаилу, Николаю и Ирине

Акафист иже в Ферми Митилúнстей святым священномучеником Рафаúлу, Николáю и деве мýченице Ирúне 

Творение монаха Герасима из скита Малой Анны (Микрояннита)

word
pdf

Кондак 1 

Рафаилу дивному священномýченику, с Николáем и Ирúне, от Господа преизобúльно прославленным, úже в Фермú яко звезды нам явúшася и светосияют выну Божественными чудесы, воспоúм, взывáюще:
радуйтеся, святúи мýченицы Христовы,/ Рафаúле, Никóлае и Ирúно.

Икос 1 

Áнгельски подвиг блаженный неустрашúмым сердцем постадáсте, троице мученик, Рафаиле с Николáем и Ирúно, гонúтелей посрамúвше. Сего ради вы восхваляюще, вопием согласно:
Радуйся, трóице борцóв непреклóнных,

радуйся, собóре Христóви угóдных; 

радуйся, богоприятне Рафаиле и богонóсне,

радуйся, богомýдре Никóлае и победонóсне;
радуйся, мученице, мúра носящая имя, светúло девства,

радуйся, сонме тричáстный, трóице стратотéрпцев;
радуйся, дружúно Господня страдальцев тресвéтлых,

радуйся, слáво чад правослáвныя Цéркве вéрных;
радуйся, соýзе Небéсный и триедúный, 

радуйся, Божественная хвалó благочестúвых; 

радуйся, лúче мýченик трисостáвный, 

радуйся, пóлче, всем святым равнослáвный.

Радуйтеся, святúи мýченицы Христовы,/ Рафаúле, Никóлае и Ирúно.

Кондак 2 

Имýще Божéственное жúтельство, невéрных стремлéнию противустáсте рáдостным сердцем; и, потаéни на мнóгая лéта, ныне преслáвно явлéни естé, о страстотéрпцы тричúсленнии, чудотворяще взывáющим: Аллилуия.

Икос 2 

Рáзумом мужемýдренным, Рафаúле, погубúл есú врагóв безýмие злóе, и разнообрáзно истязан быв, мýченическия слáвы сподóбился есú. Сего ради, терпéнию твоему дивящеся, вопиéм:
Рáдуйся, дóблести утверждéние,
радуйся, злочéстия низложéние;
радуйся, Итáки свящéннейшее прозябéние,
радуйся, мýчеником во всем уподоблéние;
радуйся, таúнниче богодухновéннейший Христóвы любвé,
радуйся, вóинства богонóснаго несокрушúмый стóлпе;
радуйся, яко Гóсподеви всецéло вручúлся есú,
радуйся, яко мирскúх красóт отложúлся есú;
радуйся, жития добродéтельнаго скрижáле,
радуйся, свéта Небéснаго сосýде.

Радуйся, Рафаиле,/ священномýчениче предúвный.

Кондак 3 

Силу Небéсную стяжáл еси в словесú твоем, яко испóлнь сый духновéния Бóжия, Евáнгелия Христóва вéлий учúтель нарéклся еси, Рафаúле преслáвне, всех воздвизáя вопúти: Аллилýия.

Икос 3 

Имéя в сéрдцы благочéстия осияние, Никóлае, рафаúловыми словесы, и Цéркви Христóве елúко мóщно послужúти предызбрáся. Сегó рáди, тя блажáще, взывáем:

Радуйся, любóвию ко Спасу прободáемь,
радуйся, яко богомýдрый всем являемь;
Радуйся, церкóвных служúтелей озарéние,
радуйся, дúвных страстонóсцев удобрéние;
радуйся, напечатлéние и нúво Рафаúла свящéннаго,
радуйся, чúстый служúтелю Христовы Цéркве;
радуйся, Солýни хвалó пребожéственная,
радуйся, благоухáнный цвéте безсмéртия;
радуйся, превышший всех тлéнных,
радуйся, лúку страдáльческому сопричтéнный;
радуйся, кадúло Христóви святéйшее,
радуйся, врáжия язя лютéйшая.

Радуйся, Никóлае,/ мýчениче непобедúмый.

Кондак 4 

Бýре ярости иноплемéнник, яко Божий слуга, добродéтельное житие противустáви, и, прáво в Фермú пострадáв, дóблественно, Никóлае, прослáвил есú тебé силу Подáвшаго, со страстотéрпцы мýченики поя: Аллилýия.

Икос 4 

В подвиг вступúла есú крепкодýшне, яко юница богонóсная, Ирúно, блажéнная дéво, и мучúтельскую небрéгши гордыню, яко жéртва приятная Гóсподеви принеслáся еси, слышащи от нас сицевáя:

Радуйся, аромáтнице чистоты,
радуйся, низпадéние злых;
радуйся, вечнаго мúра соимéннице,
радуйся, страстонóсцев совсéльнице;
радуйся, крúне благоухáнный Христовы любвé,
радуйся, мечý обоюдоóстрый на врáжию спéсь;
радуйся, юниц Бóжия пóчесте,
радуйся, дéвства добровóнный цвéте;
радуйся, прекрáсная дéво, áгнице Спáса,
радуйся, света невещéственнаго испóлнена чáше;
радуйся, Христóва невéсто, всех исцеляющая,
радуйся, верных побéдо, нагрáдами оделяющая.

Радуйся, Ирúно,/ мýченице всечестнáя.

Сщмч. Ираклидию Кипрскому акафист

АКАФИСТ

святому священномученику Ираклúдию, епископу Тамассúйскому, Кúпрскому

Кондак 1

Возбрáннаго крепкостоятеля/ и Апóстолом равночестнаго адамáнта,/ весь Кипр обышéдшаго/ и научившаго Христову Евангелию богомудро,/ яко любящаго отца да воспоúм/ Тамассúйския же обители предстáтеля,/ и да воззовéм к нему:// радуйся, отче священномýчениче Ираклúдие.

Икос 1

Áнгельскаго твоего жития, вся дивесы пети тщýся, тем и слово ми, преподобне, даждь, яко да от души песньми достойно тя возмогу почтúти, божественнаго застýпника моего, глаголя:

Радуйся, упование вéрных святое,

Радуйся, теплое ко Христу моление;

Радуйся, печальных отрáдо сладчайшая,

Радуйся, душ сокрушéнных божественное врачевание;

Радуйся, всем призывающим тя истинное прибежище,

Радуйся, всех предваряющая в напастех помоще;

Радуйся, в нýждах отечески согревáяй,

Радуйся, немощи любовию покрывáяй;

Радуйся, страстных язв исцелителю,

Радуйся, ко свету обóжения влекúй;

Радуйся, дýши ко Христу управляяй,

Радуйся, от прелести вражия изводяй.

Радуйся, отче// священномучениче Ираклúдие.

Прп. Паисию Святогорцу акафист

Акафист
преподобному и богоносному отцу нашему
Паисию Святогорцу (Эзнепидису)

Кондак 1

Избрáннаго Панагýды подвúжника/ и аромáтницу благоухáнную,/ Каппадокúйское прозябéние/ и предстáтеля неусыпнаго,/ да воспоúм соглáсно./ Áнгельскому бо житию подражáя,/ Троице Святéй благоугодú,/ тем и зовéм:/ радуйся, преподóбне Паúсие,// дúвный народа Бóжия утéшителю.

Икос 1
Ангел показáлся есú во удéле Богорóдицы избрáннем, и нам ходáтай теплéйший пред Богом, Паúсие отче, тéмже тáко тя воспевáем:
Радуйся, Каппадокúи добровóнное мúро,
радуйся, вышняго жúтельства образ явúвый,
радуйся, Асúи Мáлыя процветéние,
радуйся, святáго Арсéния похвалéние,
радуйся, в фарасиóтех приснопевáемый,
радуйся, инокýющих прáвило,
радуйся, вéлие Эллады и веры хранúло,
радуйся, Каппадокúйскаго рода светúло,
радуйся, Византúи божéственная óтрасле,
радуйся, добрóто Афона и óрле,
радуйся, земный áнгеле, вéстниче на землú,
радуйся, человéче небéсный, пребывáяй на Небесú.
Радуйся, преподобне Паисие, дúвный народа Бóжия утéшителю.

Прп. Стилиану Пафлагонскому акафист

АКАФИСТ

Преподóбному и богонóсному отцу нашему
СТИЛИАНУ Пафлагóнскому,
предстáтелю чáд и безчáдных жен

Кондак 1
Избранный чудотвóрче Христов и скóрый помóщниче, преподобне отче наш Стилиáне, прославляюще Бога, от утрóбы матерни тя освятившаго, похвáльная восписýем ти; ты же, яко теплый предстáтель и милостивый, от всяких нас бед свободи, да зовем ти:

Радуйся, преподобне Стилиáне, великий чудотвóрче.

Икос 1
Ангелов и человеков Творец избрá тя изначáла, да прослáвиши ангельским твоим житием имя Святыя Троицы, и мирскáя отринув попечéния, возблистáеши, яко Солнца правды луча светлéйшая. Мы же, зряще твоя всечестныя подвиги, смирением и радостию глаголем ти сицевая: