В субботу 4-ю по Пáсце
ПАМЯТЬ СОБОРА НОВОМУЧЕНИКОВ,
в Бутове пострадавших
На велицей вечерни
На «Господи воззвах» стихиры, глас 5:
Под.: Радуйся:
Солнце Правды Христос,/ Божéственными лучáми нас освещáя,/ созывáет прáздновати/ слáвному Своему Воскресéнию,/ вкупе и Своим угóдником,/ страстотéрпцем Бутовским,/ за Правослáвие души своя положúвшим./ К нúмже, о мучениколюбцы, да воспоúм:/ радуйтеся, мучеников красотó,/ úмиже стольный град украшáется!/ Сей храните от бед невредúм,/ нам же язвы душéвныя и телéсныя исцелúте,/ и отбежáти нам помозúте страстéй,/ и Бога к нам умúлостивите// вáшими богоприятными молúтвами.
Рáдуйтеся, велúции страстотéрпцы Бутовстии,/ утверждéние Цéркве Русския:/архиерéев дивное соглáсие,/богобóрцев руками/Христа ради заклáннии,/ и свящéнников всеоружный полче,/душу за óвцы положúвшии,/ и монáшеское духóвное вóинство!/ Яко áгнцы незлóбивии/ немúлостивно убиéннии,/ ныне Престолу Божию предстояще,/ молúтеся в вéре укрепúтися нам// и спастúся душам нашим.
Христом Единем живуще,/ к Тому очúма душéвныма взирáюще,/ áгнцы Его пасуще,/ дéлы и словесы Ему служáще,/ святителей Бутовских дúвная шестерúце[1],/ всеоружием благодáти Его/ язв болéзни претерпéли естé,/ люте ураняеми и в темнúце томúми,/ яко óбщницы страстей и Цáрствия Владыки своего,/ к вам притекáющих/ и в вéси Бутовстей/ мощем вашим покланяющихся//в молитвах к Нему не остáвите.
Рáдуйтеся, дóбрии пáстырие,/ в Бутове пострадáвшии,/ дéлателие нивы Божия/и Евангелия проповéдателие!/ Ни озлоблéния, ни прещéния,/ ниже узы темнúчныя и работы гóрькия/ яже ко Господу любве/ разлучúти не возмогóша вы,/ но паче в вере утвердúша./ Не остáвите ны пóмощию вáшею,/ покаяния и смирéния испрóсите нам,/ и во éже Христу в зáповедех Его слéдовати,/ вы бо угóдники Его явúлися естé// и о нас ходáтаи.
Подвиг пóстнический/ крóвию воúстинну напечатлéсте,/ Богу себе покорúстеся/ даже до смéрти крéстныя/ и Ему всежелáнно себé предáсте,/ преподобномученик Бутовских всесоглáсный лúче./ Тéмже молúте,/ венцы сугубыми увенчáннии,/ гордость нам житейскую отрúнувше,/ к покаянию и смирéнию устремúтися,// и спастúся душáм нашим.
Слава, глас 8:
Чáдца Небéсная/ слáвнаго грáда Москвы,/ от восток и запад притéкшии,/ и в Бутовстей веси/ крóви своя пролиявшии,/и, Христу послéдующе,/ руки воздевáвшии о убивáющих вы,/ ныне, вéнцем страдáния увенчáннии,/ молúте грехóв прощéние улучúти/ память вашу свéтлую// любóвию совершáющим.
На стиховне, глас 4.
Подобен: Яко дóбля в мученицех:
Якоже и дрéвле, Церковь Бóжия/ утверждáема и удобряема кровьмú мученик,/ нас созывáет к свéтлому торжеству,/ тáинственно любовь Христóву являющи/ и дáрующи нóвых заступников,/ нам, вопиющим прилéжно:/ узы греховныя разрешúте,/ о страстотéрпцы святúи,// и к жúзни вéчней упрáвите нас.
Моисейски[3] Крест Господень воздвизáете,/ о страстотéрпцы непобедúмии,/ мы же к нему взирáюще,/ змием древним угрызáемии, оживáем,/ и на враги невúдимыя ополчáемся,/ и сим крéстным знáмением их одолевáем,/ вопиюще к вам:/ о, Христу спострадáвшии,// молите даровáти нам вéлию милость.
Ангельским ликóм сопричтóстеся,/ в áнгельский óбраз оболчéнныя,/ Михаúло, Алексáндро и Рафаúло[5]/ со иными преподобномученицами,/ Жениху Небесному угодúвше/ в поношéниих вéрностию и к блúжним любóвию./ Темже молúтеся и нам/ мúлости елéй собрáвше,// с мудрыми дéвами в Чертóг Его внúти.
Слава, глас 8:
Господи, аще не быхом имели молúтвенники/ святыя Твоя страстотéрпцы Бутовския/ и благостыню Твою, мúлующую нас,/ кáко смели быхом/ предстояти Ти,/ мнóгими грехмú и страстьмú обременéннии?/ Но услыши о нас молúтвы их,/ на невúдимыя и вúдимыя враги/ одоление дáруй,/ покаяние приими// и по мúлости Твоей не остáви нас.
Тропарь, глас 4.
Нивы церкóвныя/ клáси безчúсленнии,/ плод сторúчный принóсите в Бутове/ за Христá страдáнием даже до смéрти/ и сéете вéры утверждéние/ и надéжды укреплéние,/ яко добропобéднии свидéтелие Истины и Любвé./ Дерзновéнно молúте Христа// во éже спастúся нам.
На утрени
По 1-м стихословии седален, гл.4:
Свящéнства úстиннаго высоту прообразуя,/ пророк Захáрия сúце вопияше:/ сúи предстоят Гóсподеви всея землú[6]./ В пáмяти сегó прорóка пострадáвшии[7],/ златовенчáннии свящéнством и мучéнием,/ Андрéе, Симеóне, Сéргие и Пéтре[8],/ о нас Началопáстыря молúте.
Слава и ныне: Преполовения:
По 2-м стихословии седален, гл. 4:
Столпú явистеся неколебúмии терпéния и мужества,/ восьмерице добрых пастырей[9] с преподобномучеником Тúхоном[10],/ в памяти великаго Алúпия стóлпника жéстоко убиéннии,/ темже нам колебáющимся[11]/ будите непреклóнное утверждéние/ и молúте Христа Бога спастúся душáм нашим.
Слава и ныне: Преполовения:
Величание:
Величаем вас,/ святúи новомученицы Бутовстии,/ и чтим честнáя страдáния вáша,/ яже за Христá/ претерпéли естé.
По полиелеи седален, гл. 8:
Кто изречéт, о мученицы Бутовстии,/ ваша труды и болéзни,/ яко и посредé гонéний лютых/ храмы Божия созидáсте,/ люди к житию во Христе привлекáюще,/ и тяжкия скóрби и смерть претерпевáсте за Христá./ Сего ради ныне в рúзах белых/ воспевáете Богу на Небесú побéдный глас// и руки о нас воздевающе.
По 50-м псалме, глас 6:
Божественная благодáть осеняет/ землю Бутовскую,/ яко всечестную рáку мощей ваших,/ о страстотéрпцы слáвнии,/ к нéйже вéрою притекáющим,/ и любóвию покланяющимся,/ и во всяком мéсте память вашу/ молитвенно совершáющим/ будите печáльницы и помóщницы// во спасéние душ наших.
Канон, глас 1
Песнь 1
Ирмос: Поим Господеви песнь нóвую,/ непроходúмое бо оземленúв Чермнóе,/ пешешéствовати сотворú сынóм Изрáилевым,// и сопротúвныя врагú покры море.
Страданий за Христа да не убоúмся!/ Тáко, священномучениче Аркáдие[12], пáстырски чáдцам церкóвным возвещáше,/ словесы сих апóстольски в вéре утверждáя,/ дéлы же óбраз терпéния в муках показуя.
Паству твою зломудрия и обычаев века сего/ удалятися наставлял еси,/ богомудре священномучениче Никúто[13],/ на Христа же всю надежду полагáти,/ сего ради, Того благодáтию укрепляемь,/ крестный путь непреткновéнно прóйде,/ во уповании ко Обúтелем Гóрним востек/ от веси Бутовския.
Неúстовствующе нóвии отступницы,/ святúтеля Бóжия Иова éмлют и истязуют,/ якоже дрéвле Иова[14] лютый./ Но обои прáведницы/ упованием на Всесильнаго/ адамáнты терпéния показуются.
Муки вéлия за Цéрковь Христóву претерпéсте, архиепископе доблий Димитрие[15],/ со архимандрúтом Амврóсием игумене Пахóмие/ и диаконе рéвностный Иоанне,/ тáже инокине Татиано/ с Николаем, Мариею и Надеждою,/ сего ради молите утвердúтися ей незыблемей и непоколебúмей/ до скончáния вéка.
Троичен: Многочáстне и многообрáзне/ дивный во святых Своих Бог,/ тя прославляет, Серафúме[16] митрополúте,/ и мы Тому серафимскую песнь вопием: Свят еси и Пресвят,/ новомученик молитвами помилуй нас.
Богородичен: Милование Твое, Владычице, вéдуще,/ в праздник Знáмения Твоего,/ у темнúчнаго рва руки возношáху на молúтву/ дивный епископ Николáй[17]/ со иереи Борисом, Василием и Феодором[18]/ и Алексúами[19] трема/ и иными доблими страдальцы[20]:/ виждь наше озлобление, глагóлюще,/ и подáждь нам помощь в терпéнии,/ и велию благодáть Твою.
Песнь 3
Ирмос: Не мудростию и богáтством да хвалится смертный своим,/ но верою Господнею,/ православно взывая Христу Богу и поя присно:/ на камени Твоих зáповедей// утверди мя, Владыко.
Принесем, вéрнии, похвалу/ преподобномученику Кронúду[21],/ úже, яко искусный кóрмчий,/ братию обители Сергиевы/ мудре упрáвил есть/ и страдáньми за Христа/ житие свое увенчал есть.
Во обители Трóицтей/ преподобномученику Кронúду сыновне послужил еси,/ святе Ксенофонте[22],/ тáже многая испытания и темничная заключения претерпéв,/ вкупе с ним пострадáти за Христа сподóбился еси./ Ныне же во Обúтелех Небесных/ радостно сликовствуете.
Мнóзи благочестúвии,/ именúтии и прóстии,/ чáюще утешéния и укреплéния во дни гонéний,/ под покров преподóбнаго Сергия собрáшася/ и сподóбишася с братиею пострадáти,/ яко вернии ученицы его.
Троичен: Лик преподобномученик Рáдонежских ублажáюще,/ прослáвим Троицу Живоначáльную,/ Еяже обúтель в памяти чад своих ныне свéтло красуется,/ и с любóвию Богу возопиúм:/ силе Твоей слава, Человеколюбче.
Богородичен: Христовым скúптром/ ограждáеми Тобою, о Держáвная,/ век скончавáем,/ мученицы взывáху,/ несть бо паче Тебе во святых,/ Чудная Дево Мати!
Седален, гл.6:
Дúвно прослáвися иерéев чин/ исповéданием Правослáвия в Бутове,/ úхже спасúтельными словесы/ и кровéй свящéнных тóки/ ныне Цéрковь созидáется./ Мы же к ним вопиéм:/ святúи срóдницы наши и ходáтаи/ испросúте душам нáшим/ Божéственное просвещéние и вéлию милость.
Слава и ныне: Преполовению.
Песнь 4
Ирмос: Услышах, Господи, слух Твой и убояхся,/ яко Крестом Твоим мир просветил еси// и нам даровал еси Твоé Воскресение.
Днесь да почтúтся пресвитер Сергий[23],/ службы Божия усéрдный рачúтель,/ на путь свящéнства Патриархом Тихоном благословлéнный,/ иже, красотою словес церковных окриляемь,/ посредé гонения лютаго/ добре шéствова/ и, мученичества достигнув,/ благодарственно Христу воззвá:/ Избавителю Боже, благословен еси.
Любомудрию отцéв Синáйских поучáяся,/ пóдвигом дóбрым подвизáлся еси,/ священномучениче Иоáнне[24],/ рáзум же истине Христóвой покорив,/ пáстве образ чистоты и благочестия явил еси/ и крóвию мученическою/ житие твое запечатлéл еси.
Благодерзновéнно безбóжником противоречé,/ священномучениче Матфéе[25],/ тем хотящим храмы Божии упразднúти,/ юноши богохульными словесы от Христа отвратúти,/ за Него же и живот твой положúл еси,/ землю Бутовскую мощмú своими освящáя.
Рáдуйся, Крéсте, красотó Цéркве,/ нам же нелóжное утверждéние! Тако святúи священномученицы Иоáнн и Николай[26] над гробом стояще, взывáху,/ в день Воздвúжения Честнáго Креста беззакóнных рукáми закалáемии.
Троичен: Промыслив прежде,/ мудре вчинил еси во священнический лик,/ служительный Твоея благости,/ Николая[27] доброразсуднаго, и Петра[28] учúтельнаго,/ и Александра[29] милостиваго,/ и инéх изрядное множество,/ Триипостáсная Едúнице, с нúмиже приимú и нашу хвалу.
Богородичен: Не остáви ны, Дево, погибáющия,/ и к Тебе плачéвно стенящия,/ но взыщú благоутрóбием,/ из темнúцы страстéй изведú// новомученик Бутовских предстáтельствы.
Песнь 5
Ирмос: Свет Твой, Господи, и истину Твою низпосли,/ еже наставити нас на повеления Твоя,// и даруй нам мир Твой, Человеколюбче.
Напаяемо древо слезáми явúлся еси,/ отче Мефóдие[30],/ внимáнием умным и сердéчным трезвéнием удобряемо,/ и плоды Божéственными к мученичеству направляемо,/ сего ради в день велúцей двóицы Пúменов/ к Богу страдáнием дóблим возшéл еси.
Ни гонéния, ни глад/ отлучúти православных от любвé Божия не возмóгут./ Сей глагол твой, преподобномучениче Петре[31],/ вьяве испóлнися,/ от безбóжников бо ятый,/ крепкостоянием вся удивúл еси,/ сего ради вкупе с сослужúтелем твоим Иоасáфом[32]/ ныне свéтло воспевáешися.
Троичен: Очищéние грехов подáждь нам,/ Трóице Единосущная,/ к Тебе бо úмамы заступники,/ преподобномученики Бутовския:/ Василия[33] старца,/Гавриила[34], Алексия[35], и Евтúхия[36],/ и иныя многия,/ в монáшестем чине изрядно Ти послужúвшия.
Богородичен: Кия дары благодарéния/ принесéм Ти, Богородице?/ Тако святогóрцев пяточúсленное соцветие[37]/ в Бутовстей веси вопияху,/ преподобномученицы Иóна со Илариóном,/ Гавриúлом, и Данáктом, и Антúпою,/ от Удела Благодáтныя пришéдшии,/ землю Русскую кровéй святых тóки оросúвшии,/ ныне же в Раи благоухáющии.
Песнь 6
Ирмос: Яко Иону пророка,/ возведи, Христе Боже, живот мой от тли,/ вопию Ти, Человеколюбче,/ яко жизнь у Тебе есть,// и нетление, и сила.
Схúмою великою преукрашéнныя,/ молúтвы непрестанныя сокрóвищницы,/ мироотрéчнаго жительства крúны,/ братолюбия, безмолвия и молчáния светúла/ вас нарицáем, Рафаúло, Михаúло и Алексáндро[38] преподобномученицы.
Якоже Ангелом/ сéстрам в повáрне всеусéрдно служáщи,/ добропобедная úнокине Анно[39],/ в крóтости и смирéнии преуспéла еси,/ тем и нам испросú служéнием блúжним/ к сим добродéтелем восходити.
О, постницы честныя,/ Дáрие, Евдокúе,/ Ольго, Алексáндро и Матрóно[40]!/ Вы во дни Поста Великаго/ богоборцы ятыя и истязуемыя,/ крéпко тем противостáли есте,/ Спасу восписующе:/ к Тебе крестом восходящих,/ в Вышних Крóвех/ Воскресения Твоего сподóби насладúтися!
Лютыя студени, и мучúтелей суровствó, и телес истязание/ в немощнем естестве мужемудренно претерпéсте,/ Евдокúе, Екатерúно и Милúце[41] доброплóдныя,/ ко Христу любовию пламенеюще./ Темже огнем молитв ваших/ страсти наша попалúте, благохвáльныя.
Блáгости и мúлования светúла,/ Марúе и Матрóно[42], в Дусе и по плоти честныя сестры,/ хрáму Божию нам, якоже вы, прилежáти испросúте, доблемудренныя.
Христовы послушницы[43] пéсньми ныне да восхвáлятся,/ послушáнием бо страсти умертвивше/ и себе всесовершенно вдавше/ Послушлúвому дáже до смерти Крéстныя,/ ныне Воскресéние Его празднуют, веселящеся.
Богородичен: Безсмéртным успéнием Божия Мáтере/ Антонúна и Марúя[44] подвúжницы рáдуются,/ во Успéнстей обители изрядно Ей послужúвшия./ И сия убиéнныя/ беззакóнных рукáми окровавлéнными,/ к весéлию Небéсному Благодáтная приимáет,/ в Божéственную рáдость и весéлие вéчное.
Кондак, гл.6:
Бутово Русская Голгофа показáся,/ яко древо спасéния/ воздвигнув Соловéцкий крест,/ яко гроб святый/ явúв безмóлвныя рвы,/ громоглáсныя проповéдателие// страстéй и Воскресéния.
Икос:
Ангели днесь воспевáют многоразличныя пóдвиги и добродетели ваша, о Христовы служителие дóблии, ихже в гонéниих, муках и прещéниих яко фимиам благоухáнный Богу принесóсте. С нúмиже и мы, дивящеся, от недостóйных устéн, хвалéние малое принóсим, тако вас ублажáюще:
Радуйся, Александре[45], полка сего святáго свещенóсче и первострадáльче; радуйся, Созонте[46], ревностный благовéстниче.
Радуйся, Космо[47], яко покаяние и веру даже до кончúны проповéдаше; радуйся, Ярослáве[48], яко паству добросéрдием осиявáше.
Радуйся, Елисéе[49], ко служéнию церковному любóвию пламенéяй; радуйся, Иннокентие[50], мучúтельских прещéний отнюд не убоявыйся.
Радуйся, Симеóне[52], о храме Царицы Небесныя ревностный попечúтелю; радуйся, Никóлае[53], в юных лéтех разсуждéния сокрóвище.
Радуйтеся, святии новомученицы Бутовстии,// громогласнии проповедателие Страстéй и Воскресéния.
Песнь 7
Ирмос: В гремящую пещь сниде Ангел Господень/ к сущим о Азарии отроком,/ и не прикоснуся их отнюд огнь./ Тогда трие, воспевающе, глаголаху:// благословен еси, Боже отец наших.
Верою твоею живóю,/ Василие[54], воине Иисусов,/ заграждáются уста зломысленных львов[55]/ и святых цáрственных страстотéрпец почитание/ тя к терпению креста возвóдит,/ úмже ко всыновлéнию возвысился еси.
Сострадания исполнен, о странноприúмче Иоáнне[56],/ схимонáхине Алексáндре помощь подая,/ Гóспода возжадáвшаго напоúл еси,/ Того стрáнна ввел еси[57]./ Ныне Его, боголюбче, умоли/ нашим злым сердцáм умягчúтися.
Аще и храмы земли Русския поругáнию предавáхуся,/ вернии же в темницах содержáхуся,/ ты, святый Стефане[58],/ песнопéвцев лúком управляя,/ небоязненно прúсно взывал еси:/ Тя воúстинну исповéдую и хвалю,/ Трисóлнечный Господи!
Богородичен: Твоя псалмопéвцы, Богорóдице, Димитрий, Феодор, Алексий и Матфей[59],/ отбéгше яже в мире похóтныя тли,/ в терпéнии крепце дáша благочéстие,/ причáстницы сотворúшася Божéственнаго естествá[60].
Песнь 8
Ирмос: Трисвéтлое Существó и Трисолнечная слава/ сниде отроком посреде огня,/ сия невредимы соблюдающи/ и Воскресение нам предвозвещающи/ Христа Бога нашего,/ Егоже поют Ангели и множества,// яко Победителя смерти во веки.
Мироносицы взéмши чин,/ всечестнáя страдáлице Татиáно[61],/ Христу, нас ради волею обнищáвшему,/ усéрдно послужúла еси,/ егдá, вместо мира, елéем милосердия/ стрáждущих и недужных умáстила еси./ Ныне же, Господа зрящи, поéши:/ Боже, благословен еси.
Болящим служéние/ тя возведé к высоте любвé/ и Православия небоязненному исповéданию,/ мученице Аполлинáрие[62],/ тéмже гордыню безбóжных попрáвши,/ в муках Зиждителя всяческих/ богодвúжно прослáвила еси.
Благоговейно святыя почитáющая,/ душею преудобрéнная Áнно[63],/ пред мучúтели исповéдала еси:/ Бога и Его угóдника прославляю,/ аще и в юзы темнúчныя заключáете мя./ Тéмже и наше пéсненное приношéние приимú/ и ко спасúтельным путéм/ заступлéнии твоими упрáви.
Троичен: Да почтутся и Аннины светослóвнии сподвúжницы:/ Алексúй, в монáсех изрядный[64], Пантелеúмона, úнокиням Божéственный образ[65],/ Иоáнн страннопрúимец[66] и Матрóна, молитвы сокрóвище[67]./ Ихже предстáтельствы, о Владыко Триипостáсный,/ просим согрешений прощéния.
Богородичен: Образы и хрáмы Твоúми, Нетленная Дево,/ землю Русскую угобзила еси,/ темже мучениц Бутовских Варвару[68] и Елисавету[69],/ в сих усердно Тебе поработавших,/ дары спасительными обогатила еси,/ úхже и нас не лиши, Благословенная.
Песнь 9
Ирмос: Радуйся, Пресвятая Богоприемная Марúе,/ радуйся, Пречистая, падших основание:/ в Тебе боя вися днесь Владыка,/ о чудесе! Обновляяй истлевшия// и к Свету возводя невечернему, Отроковице.
От рязáнских предéл к Бутову/ свящéнных вóинов притечé дивная седмерúца:/ во иерéех Алексий со Андрéем,/ Иоáнн, Нáзарий и Сергий,/ тáже Димúтрий и Михаил[70]./ Сим да вопием непрестáнно:/ веры крéпкия испросúте нам, малодушным,/ и грехов оставление.
Вяземских крúнов да возвелúчится слáвная двóица:/Вячеслав[71] иерей бессребрéнник, милостыни раздаятель,/ тáже úнокиня Александра[72], Спасо-Бородинския обúтели изрядная трудница,/ úхже добродéтелем, вéрнии, да поревнуим.
Вам, предúвный пóлче, в дéнь святáго Исúдора Пелусиóтскаго пострадáвый[73],/ сегó речéнием вопиéм:/ яко чáда Церкóвная, бысте воюемы и неодолевáемы,/ и вконéц над нападáвшими восторжествовáсте./ Ныне же побéда Ваша препрослáвлена!
От Шатурскаго града притекосте в стольный град, во еже пострадати, доблии страстотерпцы, святым Арсением[74] предводимии, и ваше исповедание пред беззаконными приимая Христос, мученическими венцы украшает в Царствии Своем и славою вечною.
Троичен: О, Троице Честнáя,/ приимú, яже земля Бутовская принóсит ти,/ яко начáтки и яко фимиам избрáнный,/ вся от нея страдáльчески к Тебе возшéдшия,/ именуемыя и неименуемыя,/ и молитвами их/ от всякаго врéда нас сохраняй.
Богородичен: Егда слáвнии Новомученицы воздохнут о нас к Богорóдице,/ уповáем Тою спасение улучúти/ и возопúти Благословéнней:/ Яже о всех Благая Мати, слава Тебе!
На хвалитех стихиры, глас 8.
Подобен: О, преславнаго чудесе!
Дом темнúчный, Хрúстовы пáстырие,/ фимиáмом молитв освятúсте,/ и поле Бутовское/ кровьми вáшими окропúсте,/ и свящéнный ваш богодáнный сан/ яко драгоцéнными кáменьми/ за веру страдáньми украсúсте,/ и ныне молúте о нас,// недостóйных срóдницех вáших.
О, преславнаго чудесе!/ Како óтрасли Земли Русския/ в Вышний дар ей ниспосылáются/ и заступники являются?/ Кáко úноцы, себе умаляющии,/ и в клети душевней духовныя дары таящии,/ и в темнúце мучúтельми крыемии/ днесь всему миру сияют// и в концéх прославляются?
Многоразлúчных добродéтелей цвéты/ принесóсте Царю Небéсному,/ славнии мученицы Бутовстии,/ úмже Ангелы удивляются,/ мы же вас воспевáем/и хвáлим Дúвнаго во святых,/ согласно вызвáюще:// Владыко Трисиянный, слава Тебе.
Сноски:
[1] Шестерица архиереев, священномучеников Бутовских: сщмч. Серафим (Чичагов), митр. Ленинградский (+ 1937, память 28 ноября), Сщмч. Димитрий (Добросердов), архиеп. Можайский (+ 1937, память 8 октября), Сщмч. Николай (Добронравов), архиеп. Владимирский и Cуздальский (+ 1937, память 27 ноября по ст. ст.), сщмч. Аркадий (Остальский), еп. Бежецкий (+ 1937, память 16 декабря), сщмч. Иона (Лазарев), еп. Велижский (+ 1937, память 8 октября), сщмч. Никита (Делекторский), еп. Нижне-Тагильский (+ 1937, память 6 ноября).
[2] Сщмч. Иоанн Смирнов, прот. (+ 1937, память 27 августа по ст. ст.), настоятель храма на Лазаревском кладбище
[3] Числ. 21, 9.
[4] В Библии именно глагол «угрызати». Но можно заменить на «уязвляемии».
[5] Прмц. Михаила (Иванова), схимонахиня (+ 1937, память 28 сентября), прмц. Александра (Червякова), схимонахиня (+ 1937, память 30 сентября), прмц. Рафаила (Вишнякова), схимонахиня (+ 1938, память 4 февраля).
[6] Зах. 4, 14.
[7] Четыре упоминаемые в седальне священномученика пострадали в день памяти пророка Захарии Серповидца, 7 февраля по ст. ст.
[8] Священномученики: Симеон Кульгавец, Андрей Добрынин, Сергий Любомудров и Петр Марков, пресвитеры.
[9] Восемь священномучеников, пострадавших в Бутово 26 ноября 1937 года, в день памяти прп. Алипия Столпника: сщмч. Василий Агафонников, прот., сщмч. Василий Колосов, иерей, сщмч. Василий Студницин, прот., сщмч. Георгий Колоколов, прот., сщмч. Даниил Мещанинов, иерей, сщмч. Илия Зачатейский, иерей, сщмч. Иоанн Виноградов, прот., сщмч. Николай Постников, прот., сщмч. Назарий Грибков, прот.
[10] Прмч. Тихон (Бузов), архим. ( +1937, память 26 ноября).
[11] См. Служба прп. Алипию, ин тропарь.
[12] Сщмч. Аркадий (Остальский), еп. Бежецкий (+1937, память 16 декабря).т
[13] Сщмч. Никита (Делекторский), еп. Нижне-Тагильский (+ 1937, память 6 ноября).
[14] Сщмч. Иона (Лазарев), еп. Велижский (+ 1937, память 8 октября).
[15] Сщмч. Димитрий (Добросердов), архиеп. Можайский, прмч. Амвросий (Астахов), архим., прмч. Пахомий (Туркевич), игум., сщмч. Иоанн Хренов, диак., прмц. Татиана (Бесфамильная), монахиня, мч. Николай Рейн, мц. Мария Волнухина, мц. Надежда Ажгеревич пострадали 8 октября 1937 года.
[16] Сщмч. Серафим (Чичагов), митр. Ленинградский (+ 1937, память 28 ноября).
[17] Сщмч. Николай (Добронравов), архиеп. Владимирский и Cуздальский (+ 1937, память 27 ноября по ст. ст.).
[18] Сщмч. Борис Ивановский, прот., сщмч. Василий Соколов, прот., сщмч. Феодор Дорофеев, иерей расстреляны в Бутово 27 ноября 1937 года по ст. ст.
[19] Сщмч. Алексий Веселовский, иерей, сщмч. Алексий Сперанский, иерей, прмч. Алексий (Гаврин), монах расстреляны в Бутово 27 ноября 1937 года по ст. ст.
[20] В тот же день (праздник Знамения Пресвятой Богородицы, 27 ноября 1937 года по ст. ст.) расстреляны: прмч. Аполлос (Федосеев), иером., сщмч. Иоанн Хрусталев, прот. сщмч. Николай Андреев, прот., сщмч. Николай Покровский, прот. сщмч. Владимир Смирнов, иерей, мч. Иоанн Емельянов, прмч. Иоасаф (Боев), архим., прмч. Николай (Салтыков), игум., прмч. Никон (Беляев), архим., прмч. Серафим (Крестьянинов), иером.
[21] Прмч. Кронид (Любимов), архим. (+ 1937, память 27 ноября). Также в Соборе свв. Радонежских новомучеников.
[22] Прмч. Ксенофонт (Бондаренко), игум. (+ 1937, память 19 ноября). Также в Соборе свв. Радонежских новомучеников.
[23] Сщмч. Сергий Голощапов, прот. (+ 1937, память 7 декабря по ст. ст.), участник Поместного собора.
[24]Сщмч. Иоанн Смирнов, прот. (+ 1937, память 27 августа по ст. ст.), настоятель храма на Лазаревском кладбище.
[25] Сщмч. Матфей Алоин, иерей (+ 1937, память 12 ноября) Успенский храм.
[26] Сщмч. Иоанн Бороздин, прот. (+ 1937, память 15 сентября) и сщмч. Николай Цветков, протодиак. (+ 1937, память 15 сентября).
[27] Сщмч. Николай Скворцов, прот. (+ 1937, память 14 сентября), арестован за обучение детей.
[28] Сщмч. Петр Никотин, прот. (+ 1937, память 8 октября), окормлял множество молодежи и несколько женских монастырей. Помощь голодающим и организация столовых для них.
[29] Сщмч. Александр Зверев, прот. (+ 1937, память 3 ноября).
[30] Прмч. Мефодий (Иванов), игум. (+ 1937, память 27 августа по ст. ст., когда празднуется память святых Пимена Великого и Пимена Постника).
[31] Прмч. Петр (Мамонтов), иером. (+ 1937, память 19 ноября).
[32] Прмч. Иоасаф (Крымзин), игум. (+ 1937, память 19 ноября).
[33] Прмч. Василий (Цветков), архим. (+ 1937, память 4 октября),
[34] Прмч. Гавриил (Яцик), архим. (+ 1937, память 10 сентября).
[35] Прмч. Алексий (Задворнов), иером. (+ 1937, память 9 ноября).
[36] Прмч. Евтихий (Качур), игум. (+ 1937, память 20 ноября).
[37] Пятеро Бутовских Святогорцев: прмч. Иларион (Громов), иером. (+ 1937, память 28 сентября), прмч. Иона (Санков), иером. (+ 1938, память 21 июня), прмч. Гавриил (Гур), иером. (+ 1937, память 6 ноября), прмч. Антипа (Кириллов), иером. (+ 1938, память 22 февраля), прмч. Данакт (Калашников), иером. (+ 1937, память 2 декабря).
[38] Прмц. Михаила (Иванова), схимонахиня (+ 1937, память 28 сентября), прмц. Александра (Червякова), схимонахиня (+ 1937, память 30 сентября), прмц. Рафаила (Вишнякова), схимонахиня (+ 1938, память 4 февраля).
[39] Прмц. Анна (Макандина), инокиня (+ 1938, память 1 марта).
[40] Пострадали в один день: прмц. Дария (Зайцева), послушница, прмц. Евдокия (Архипова), послушница, прмц. Ольга (Жильцова), послушница, прмц. Александра (Дьячкова), послушница, Матрона (Макандина). (+ 1938, память 1 марта).
[41] Пострадавшие 23 января 1938 года: прпмц. Евдокия (Кузьминова), посл., прпмц. Екатерина (Черкасова), посл., мц. Милица Кувшинова.
[42] Прмц. Мария (Грошева), монахиня, прмц. Матрона (Грошева), монахиня (+ 1938, память 7 марта).
[43] Не упомянутые ранее преподобномученицы, послушницы: Прмц. Татиана (Грибкова) (+ 1937, память 1 сентября), Антонина (Новикова) (+ 1938, память 7 марта), Евдокия (Синицына) (+ 1938, память 7 марта), Екатерина (Константинова) (+ 1938, память 7 марта), Ксения (Петрухина) (+ 1938, память 7 марта), Надежда (Круглова) (+ 1938, память 7 марта), Анна (Горохова) (+ 1938, память 7 марта), Анна (Корнеева) (+ 1938, память 13 февраля), Вера (Морозова) (+ 1938, память 13 февраля), Ирина (Хвостова) (+ 1938, память 13 февраля), Параскева (Макарова) (+ 1938, память 22 февраля), София (Селиверстова) (+ 1938, память 15 февраля), Анастасия (Бобкова) (+ 1938, память 23 марта), Наталия (Ульянова)(+ 1938, память 9 марта).
[44] Прмц. Антонина (Степанова), монахиня, прмц. Мария (Журавлёва), послушница (+ 1937, память 2 декабря), насельницы Брусенского Успенского монастыря в Коломне.
[45] Сщмч. Александр Русинов, иерей (+ 1937, память 18 января).
[46] Сщмч. Созонт Решетилов, иерей (+ 1937, память 23 октября).
[47] Сщмч. Косма Коротких, иерей (+ 1937, память 25 ноября).
[48] сщмч. Ярослав Савицкий, прот. (25 ноября)
[49] Сщмч. Елисей Штольдер, диак. (+ 1937, память 7 августа).
[50] Прмч. Иннокентий (Мазурин), иерод. (+ 1938, память 31 октября).
[51] Прмц. Мстислава (Фокина), монахиня (+ 1938, память 25 февраля). На допросе о себе сказала: «Я ушла в монастырь для спасения души, чтобы, "отказавшись от мира сего, отдать себя на служение всецело Богу, в Которого верю, и никакие убеждения и притеснения не убьют во мне веры в Бога»
[52] Мч. Семен Туркин (+ 1937, память 10 сентября), староста Успенского храма.
[53] Мч. Николай Гусев (+ 1937, память 26 сентября), благочестивый юноша 18 лет.
[54] Мч. Василий Иванов (+ 1938, память 4 февраля), староста, почтитатель свв. Царственных страстотерпцев.
[55] Евр. 11, 34.
[56] Мч. Иоанн Золотов (+ 1937, память 26 сентября).
[57] Мф. 25, 35.
[58] Мч. Стефан Франтов (+ 1938, память 22 февраля), регент, организатор хора, псаломщик.
[59] Псаломщики: мч. Федор Пальшков и мч. Димитрий Казамацкий (+ 1938, память 4 февраля), мч. Алексий Серебренников (+ 1937, память 30 сентября), мч. Матфей Соловьев (+ 1937, память 30 сентября).
[60] Петр 2, 4— 6.
[61] Мц. Татиана Гримблит (+ 1937, память 10 сентября).
[62] Мц. Аполлинария Тупицына (+ 1937, память 30 сентября).
[63] Мц. Анна Зерцалова (+ 1937, память 14 ноября).
[64] Прмч. Алексий (Гаврин), монах расстреляны в Бутово 27 ноября 1937 года по ст. ст.
[65] Прпмц. Пантелеимона (Гончарова) расстреляна и похоронена в Бутово 2 декабря 1937 г.
[66] Мч. Иоанн Емельянов расстрелян в Бутово в праздник Знамения Пресвятой Богородицы, 27 ноября 1937 года по ст. ст.
[67] Мц. Матрона Конюхова (+ 1937, память 2 декабря).
[68] Мц. Варвара Лосева (+ 1938, память 22 февраля, супруга священника храма Рождества Пресвятой Богородицы).
[69] Мц. Елисавета Крымова (+ 1937, память 18 октября, постоянная прихожанка храма Успения Пресвятой Богородицы в Серпухове).
[70] Сщмч. Алексий Аманов, прот. (+ 1937, память 20 ноября), сщмч. Андрей Ясенев, прот. (+ 1938, память 22 февраля), сщмч. Иоанн Лебедев, прот. (+ 1937, память 27 августа), сщмч. Назарий Грибков, прот. (+ 1937, память 26 ноября), сщмч. Сергий Кротков, прот. (+ 1938, память 18 июня), Сщмч. Димитрий Миловидов, иерей (+ 1937, память 7 августа), сщмч. Михаил Букринский, иерей (+ 1938, память 1 марта).
[71] Сщмч. Вячеслав Занков, иерей (+ 1937, память 30 сентября).
[72] Прмц. Александра (Самойлова), инокиня (+ 1938, память 9 марта).
[73] 4 февраля 1938 года на Бутовском полигоне были расстреляны: сщмч. Александр Минервин, иерей, сщмч. Александр Покровский, иерей, сщмч. Александр Соколов, прот., сщмч. Алексий Княжеский, иерей, сщмч. Алексий Лебедев, иерей, сщмч. Алексий Шаров, иерей, сщмч. Андрей Беднов, иерей, прмц. Анна (Ефремова), послушница, сщмч. Аркадий Лобцов, иерей, сщмч. Борис Назаров, прот., мч. Василий Иванов, мч. Димитрий Казамацкий, сщмч. Димитрий Кедроливанский, иерей, сщмч. Евстафий Сокольский, иерей, сщмч. Иоанн Алешковский, иерей, сщмч. Иоанн Артоболевский, прот., сщмч. Иоанн Тихомиров, прот., мч. Иоанн Шувалов, сщмч. Михаил Рыбин, иерей, сщмч. Николай Голышев, иерей, сщмч. Николай Кандауров, прот., сщмч. Николай Поспелов, прот., сщмч. Пётр Соколов, прот., прмц. Рафаила (Вишнякова), схимонахиня, прмц. Мария (Виноградова), послушница, сщмч. Серафим (Вавилов), архидиак.,Сщмч. Сергий Соловьев, иерей, мч. Феодор Пальшков, псаломщик, сщмч. Феодор Бобков, иерей.
[74] В соборе святых новомучеников Шатурских — новомученики Бутовские: Сщмч. Арсений Троицкий, прот. (+ 1937, память 6 ноября), сщмч. Александр Сахаров, прот. (+ 1937, память 20 ноября), сщмч. Василий Колосов, свящ. (+ 1937, память 26 ноября), сщмч. Георгий Колоколов, свящ. (+ 1937, память 26 ноября), сщмч. Иоанн Виноградов, свящ. (+ 1937, память 26 ноября), сщмч. Назарий Грибков, свящ. (+ 1937, память 26 ноября), сщмч. Николай Постников, свящ. (+ 1937, память 26 ноября), прмч. Тихон (Бузов) (+ 1937, память 26 ноября), прмч. Аполлос (Федосеев), иером. (+ 1937, память 27 ноября), сщмч. Димитрий Кедроливанский, свящ. (+ 1938, память 4 февраля), сщмч. Иоанн Тихомиров, прот. (+ 1938, память 4 февраля), прмц. Марфа (Коврова), послуш. (+ 1938, память 3 марта), прмцц. Мария и Матрона (Грошевы), мон. (+ 1938, память 7 марта).
Комментариев нет:
Отправить комментарий