Святых мучениц Веры, Надежды, Любве и матери их Софии

word

Святые мученицы Вера, Надежда, Любы и матерь их София:
бденная служба

Дополнения к службе святым мученицам Вере, Надежде, Любви и матери их Софии составлены в 1875 году учителем музыки и протопсалтом Леонидом Филлипиду. Утверждены Синодом Элладской Церкви в 1955 году и с этого времени включены в состав греческой минеи за сентябрь.

Издание, по которому
выполнен перевод

Работа над переводом завершена.

НА МАЛЕЙ ВЕЧЕРНИ
На Господи, воззвах поставим стиха 4
и поем стихиры, глас 4.
Подобен: Дал еси знамение:
Поем стихиры из Минеи.

Слава, глас 2:
Возсия днесь священное дев торжествó,/ сóлнца светлéйшее,/ души верных озаряя/и неверующих мрак со усердием[1] отгоняя./ Приидите убо, празднолюбцы,/ пéсненными цвéты сих главы увенчáим,/ вопиюще к ним:/ не остáвите молящеся непрестáнно ко Господу, страстонóсицы,/ с мáтерию вашею святóю/ о иже верою совершáющих// присночестнýю память вашу.

На стиховне стихиры, глас 2.
Подобен: Доме Евфрафов:

Приидите, земнорóднии,/ состáвим лик,/ в лéтней пáмяти/ Христóвых дев,// и сия да восхвáлим.

Стих: Дивен Бог во святых Своих, Бог Израилев.

Юницы честныя,/ страстнóсцев хвалó,/ слáво дев,/ Христа молúте// спастися душам нашим.

Стих: Святым, иже суть на земли Его,// удиви Господи вся хотения Своя в них.

Тресвéтлый светúльник,/ селение Троицы,/ Вера, Надежда, Любы,/ честныя Софúины ветви,// светло да восхвáлятся.

Слава, глас тойже:

Божественным прободéны/ рачением любвé ко Христу,/ три честныя сестры/ Вéра, Надéжда, Любы,/ ядовитых гонителя утешений отбегóша/ и болéзненныя муки/ мужемýдренно претерпéша,/ мученическими же украсившеся венцы,/ молятся непрестанно о нас,/ верою воспевающих// священное их страдание.


НА ВЕЛИЦЕЙ ВЕЧЕРНИ
На Гóсподи, воззвáх постáвим стихов 6
стихиры Кресту 3 и святым, глас 1.
Подобен: О, дивное чудо:

Днесь, вéрнии, ликовствýим,/ во псалмéх и пéснех Гóсподеви поюще,/ чтýще Того мýчениц и дев:/ Веру, яже Христа на пóприще/ мýжески проповéда,/ Надéжду дúвную,/ сúлою Божéственною невéрныя обличúвшую,/ и с Любóвию вси/ псалóмски да возопúем:/ Тебе, Женишé, любим,// и за Тя умерщвляемся.

Оле чудес Твоих, Христе!/ Яко и жены на пóприще явúшася,/ мýкам же себе мужемýдренно/ усéрдно предáша,/ нáфтою и огнем дóбле брáвшеся,/во главý усечéнныя/ мýченическим ликóм причтóшася/ и победныя венцы/ от Тебе прияша,// воздаяние подвигóв от рук Твоих улучúвше.

Твое преставление, Софие,/ призвáнная, от Бога восприяла еси,/ желáющи обúтелей,/ идéже твоих óтраслей/ души свеселяхуся:/ Веры честныя,/ вкупе и Надéжды, и Любвé, чад твоих,/ и благодáть от Бога исцелéний/ прияла еси, воспевáемая./ Святых бо всех,/ иже суть на земли,/ Господь удиви воúстинну[2],// славу возсылáем держáве Его.

Ины, глас 4.
Подобен: Яко добля в мученицех:

Огнéм опаляема и невреждéнна пребывши/
Божéственною сúлою,/ Вéро многострадáльная,/ обличúла еси прéлесть безýмнаго,/ мáтере поучéньми,/ претерпéвши мýжески и сосцéв отсечéние,/ Господь же мýчения венцéм/ с Небесé увенчá главу твою,// мечéм усечéнную, слáвная.

Биéния претерпела еси и вметáема в пещь,/ невредима же пребывши Бóжиею благодáтию,/ в котéл[3] горящий ввéржена,/ на дрéво воздвúжена,/ железными же ноготьмú/ многострадáльное тело твое стрýжемо,/ мечем же главе усéченной,/
к Чертогом Небесным,// Надеждо честнáя, прешлá еси.

Мýдростию словéс твоих/ нечестúвых уста заградúла еси,/ сих злочéстие обличúвши,/ сего ради на древо бе повéшена,/ волóвыми же жилами биéма/ и во огнь, якоже злато в горнúло, ввéржена, всеслáвная[4],/ и свердлами в тело провертéся[5],/ и во главу усечéся,// мýченице Любы многострадáльная.

Слава, глас 6:

Возсия днесь/ честнáя память мудрéйших дев,/ вéрных веселящи/ и к всепрáзднственному торжеству/ правослáвных мнóжества приводящи./ Приидите убо, празднолюбцы,/ пéсньми похвальными/ Христовых страстотéрпиц воспоúм, глаголюще:/ радуйся, Веро многострадáльная,/ яже сосцéв отсечéние/ и члéнов отъятие/ мýжески претерпéвшая/ и мучителя дерзость низложúвшая,/ радуйся, Надéждо всепéтая,/яже яда нечестúваго ласкáтельства избéгшая,/ и себé жертву благоприятну/ Богу привéдшая;/ радуйся, Любы всехвáльная,/яже нечестúвых словесы удивúвшая/ и мýкам лютым себé предáвшая,/ любвé ради Избáвителя твоего./ Рáдуйтеся, сестéр трóице,/ Пресвéтлыя Троицы побóрницы/ и правослáвных догмáт ясныя проповéдницы./ Не престáйте, молимся,/ предстáтельствовати о нас/ вкýпе с Софиею,/ мáтерию богомýдрою,/ еже избáвитися напáстей/ вéрою совершáющим// присночестнýю пáмять вашу.

И ныне, праздника[6], глас тóйже:

*Пророков гласи/ Древо святое предвозвестúша,/ úмже дрéвния свободúся клятвы смéртныя Адам,/ тварь же, днесь возносúму тому, совозвышает глас,/ от Бога просящи богатыя милости;/ но, Единый в благоутрóбии безмерный, Владыко,/ очищение буди нам// и спасú души наша.

Вход. Прокимен дне, и чтения три.

Пророка Исаии чтение: Тако глаголет Господь: Премудрости Соломони чтение: Праведных души в руце Божии, и не прикоснется им мука: Зри страницу 562. Премудрости Соломони чтение: Праведницы во веки живут и в Господе мзда их: зри страницу 272.

На литиú стихиры самогласны:

Глас 1: Земныя пищи слáдость презрéвше,/ богатство и славу возненавúдевше,/ Небéснаго Жениха возлюбúсте,/ Вéро, Надéждо и Любы,/ свящéнныя вéтви Софии честныя./ Приведéни бо пред мучителя нечестúваго/ и немощнóе естествá отрúнувше,/ мýжески прелесть того обличúсте,/ кумира его уничижúвше,/ якоже слуха лишéнна[7]/ и словесé не имýща;/ Христа же со дерзновéнием проповéдавше,/ болéзненным мукам немúлостивно вдáстеся,/ и, мечем во главы усéчены,/ к Небесному Жениху Христу/ с мýдрыми девами внидóсте,/ Ангелом сликовствýюще,/ и верных болезни/ дéйством Божия Духа исцеляюще,// предстáтельствуйте непрестáно о душах наших.

Глас тóйже: Имя твое истинно жúтельством, богомýдрая, украсúся,/ к мýдрости бо рачéнием/ все житиé твое навершúвши,/ слáвная Софúе,/ Бóжиею просияла еси благодáтию./ Тéмже и у гроба триéх твоих возлюбленнейших чад,/ триднéвно пребывши,/ душу, якоже вожделéла[8] еси, Гóсподу предадé,/ в Нéбесныя Чертоги с нúми вшéдши./ Дерзновéние ýбо имýщи к Богу,// непрестáнно моли о душах наших.

Глас 2: Трóице Честнéй дéвы равночúсленныя,/ Вéра, Любы и Надéжда,/ божéственною распалáемы рéвностию,/ на пóприще стрáждуще, глагóлаху:/ люта ýбо, о судиé,/ настоящая мучéния,/ не предпочтéм же всяко/ Небéсным земнáя:/ сегó рáди тéло сецы,/ураняй плóти нáша/ и огню предавáй ны./ Рáдующеся, отыдем к Женихý Христý./ Егóже молúте, мóлимся, преслáвныя,// низпослáти нам вéлию мúлость.

Глас 3: Благочéстия светом дýши осиявше,/ в жéнстем естествé и вóзрасте мáле/ мысленнаго Голиáфа посрамúсте,/ úже прамáтерь стяжá сосуд ко греху./ Непрелóжно бо и несмéсно/ от Девы воплощéнное Слово Отчее,/ якоже весть Сам,/ Адамову и Евину разрешú клятву/ Владыка всяческих Христóс,/ Иже венцéм нетлéнным увенчáв достóйно/ равночúсленных Трóице дев,/Вéру, Надéжду и Любóвь,/ прекрáсных Софúиных чад,/ úмиже дáруя миру// мир и вéлию мúлость.

Глас 4: Дéвства добрóтою сияюще/ и мýченическою диадúмою удобрéны,/ сугýбыми венцы достóйно от Христа украсúшася/ добропобéдныя мýченицы/ Вера, Любы и Надéжда,/ честныя Софúины доброплóдная чáда./ Сих молúтвами, Христé Бóже,/ даруй мúрови мир// и душáм нáшим вéлию мúлость.

Слава, глас 5:

Приидите, преслáвную память/ страстотéрпиц Христовых/ Веры, Надежды и Любвé/ во псалмéх, и пениих,/ и песнех духовных да восхвáлим./ Сия бо, девúческое естество/ ни во что же вменúвше,/ мучúтелеву судúщу дéрзостно предстáша,/ и взéмше всеорýжие Крестá,/ протúву нечестúваго ополчáхуся,/ и вольныя жертвы Богу/ принесéны быша,/ дóбле за веру пострадавше./ Тéмже, и главáм их усекáемым, взывáху:/ да будет, Гóсподи, жéртва душ нáших/ благоприятна пред Тобóю,/ яко, Тебе возлюбúвше,/ нерадúхом о врéменней жúзни./ Молúтвами их, Преблагúй,/ Христé Боже наш,/ побéды на враги/ христолюбúвому вóинству дáруй// и душáм нáшим вéлию мúлость.

И ныне[9], глас тойже:

*Приидúте, людие,/ преслáвное чудо вúдяще,/ Креста силе поклонúмся:/ яко дрéво в раú смерть прозябé,/ сие же жизнь процветé,/ безгрéшнаго имýщее пригвождéнна Господа,/ от Негóже, вси язьщы,/ нетлéние взéмлюще, зовéм:/ Иже Крестом смерть упразднúвый// и нас свободúвый, слава Тебе.

На стиховне стихиры, глас 4.
Подобен: Свыше зван быв:

Мудрости светом озарúвшеся,/ всехвáльныя мýченицы, добродетелей троице,/ Софúины óтрасли,/ дев же и страстотерпец удобрéние,/ Троицы побóрницы в вóзрасте млáде,/ беззакóнника посрамúсте,/ и со дерзновением посмеястеся./ Темже мукам предáстеся лютым,/ о честныя юницы три,// главáм же вашим усéченным,// свыше венцем увязóстеся.

Стих: Дивен Бог во святых Своих, Бог Израилев.

Христа всем возлюбúвше сердцем,/ и к Тому рачéнием урáнены, всечестныя,/ земных наслаждéние/ яко приврéменное и тлéнное, презрéсте,/ всеслáвныя мученицы,/ Любы, Надéждо, Вéро,/ и мудрым поревновáсте дéвам пятú,/ лúку их сопричтóстеся,/ темже со Ангелы сликовствуете,// мученическими венцы украшéнны,// и Христа мóлите спастúся душам нашим.

Стих: Святым, иже суть на земли Его,// удиви Господи вся хотения Своя в них.

Облечéнныя Христа всеорýжием,/ добропобéдныя мученицы/Вера, Любы, Надежда,/ добродéтелей носяще имена,/ на поприще, якоже иному страждущу, взывáху:/ ни меч, ни нож, ни членов отъятие,/ нижé плáмене сúла/ разлучúти ны Божéственныя любвé отнюд не могут, / éюже всячески укрепúхомся./ Темже венцы улучúша нетлéнныя,// от Тебе, Бога нашего,// подающаго всем верным вéлию милость.

Слава, глас 6:

Свящéннейшее днесь торжество/ совокупúм, вéрнии,/ лéтней пáмяти страстотéрпиц Христовых,/ Надежды, Веры и Любвé,/ Софúиных óтраслей./ Червленúцами бо кровей себе самех украсúвше,/ трú соимéнныя добродéтелем сестры / красной доброте Христовой нетленно совокупúшася/ Ему же и молятся непрестáнно о нас,/ верою и любóвию// память их совершающих.

И ныне, глас тойже:

*Четвероконечный мир/ днесь освящается,/ четверочастному воздвизаему Твоему Кресту,/ Христе Боже наш,/ и рог верных христиан совознóсится;/ тем врагов сокрушаем рóги./ Велий еси, Господи,/ и дивен в дéлех Твоих,// слава Тебе.

Тропарь, глас 4:

Торжествýет Церковь перворóдных/ и свеселúтся,/ приéмлющи матерь о чáдех веселящуюся,/ яже яко мудрости тезоименúтая,/ тройственным богослóвским добродéтелем/ равночúсленныя породú./ Тыя с мудрыми дéвами зрит/ уневéстившияся Женихý Богу Слову./ С нею и мы/ духóвне в пáмяти их свеселúмся, глагóлюще:/ Троицы побóрницы,/ Вéро, Любы и Надéждо,// в вере, любви и надéжде утверждáйте нас.

Ин, глас 1.
Подобен: Каменю запечатану:

Три слáвныя девы, Софúины óтрасли,/ Вéру, Надéжду, Любóвь/ пéсньми богодухновéнными почтúм,/ укрéпльшеся бо сúлою Крестá,/ претерпéша муки лютыя,/ и, мечéм усечéнныя во главы,/ мýченическими венцы увязóшася./ Слáва Укрéпльшему их,/ слáва сих Прослáвльшему,// слáва Дéйствующему ими всем исцелéния.


НА УТРЕНИ
По 1-м стихослóвии седáлен, глас 1.
Подобен: Гроб Твой, Спасе:

Прилепúстеся Христý, прекрáсному Женихý, юницы честныя, слáво дев,/ многоразлúчными муки себé украсúвше,/ и Безначáльную ныне воспевáете Трóицу,/ лампáдо тресвéтлая,/ Вéро, Надéждо, Любы, Софиино удобрение.

По 2-м стихослóвии седáлен, глас 4.
Подобен: Вознесыйся на Крест:

Страстотéрпиц Христовых божéственную пáмять совершáюще, вéрнии,/ стецéмся и к ним молéние возслéм:/ молúтеся ко Господу, да избáвит геéнны грéшных нас, претыкáющихся,/ Вéро, Надéждо, Любы, честныя Софúины вéтви, мýченик блистáние.

По полиелéи седáлен, глас 4.
Подобен: Явúлся еси днéсь:

Софúины чáда,/ Вéро, Надéждо, Любы,/ добродéтелем соимéнныя светлéйшим воúстинну,/ Престóлу Бóжию предстояще,// о нас молúтеся, мóлимся.

Прокимен, глас 4: Дивен Бог во святых Своих,/ Бог Изрáилев. Стих: В цéрквах благословúте Господа: Евáнгелие десяти дев: Мф. 25, 1—13.

По 50-м псалме стихира, глас 6:

Днесь верных полкú сошедшеся,/ духовно да торжествуем,/ приúде бо нам лéтняя память/ страстотéрпиц Христовых/ Веры, Надежды и Любвé,/ богáтныя мúлости нам приносящи./ Темже во глáсе рáдования/ и в чúстой сóвести/ да возопиúм, глаголюще:/ не остáвите молúтися непрестáнно о нас,/ иже верою совершающих// присночестнýю пáмять вашу.

Кондак, глас 1:

Софии честныя свящéннейшия вéтви,/ Вера, Надежда и Любы показáвшеся,/ мудрость обуúша éллинскую благодатию,/ и пострадáвше, и победонóсицы явúвшеся,/ венцем нетленным/ от всех Владыки Христа// увязóшася.

Икос:

Егда во вся концы/ беззаконное повеление изыде/ идолом жертвы приносити,/ демонския алтари и храмы воздвигати/ к человеков погублению,/ тогда всехвальныя девы и прекрасныя,

яко звезды возсияша,/ мрак безбожия и неведения отгоняюща,/

и сияние благочестия в сердцах верных возжигающа,/ ясно вопияху:/ Бог Величайший есть Распныйся волею и Воскресый тридневно,/ о Немже и хвалимся.// Сего ради достойно венец Небесный от Христа прияша.

Светилен, глас 4:

Подобен: Явúлся еси днéсь:

К Трóице отроковúцы горяще Божéственною ревностию,/ добродетелей троице соименных, надежде, вере и любве, прилепившеся,/ нерадúша о мýках.

На Хвалитех стихиры, глас 1.
Подобен: Небесных чинов:

Софúе, рáдуйся и играй,/ от тебé бо процветóша,/ яко от пáжити божéственныя,/ благоухáннейшии крúни:/ Вера, Любы и Надежда,/ Троицы поборницы,/ Сея бо ради усéчены во главы,// Небéсным венцéм увязóшася.

Адриáновых мук не устрашúвшеся отнюд,/ богáтство и славу/ ни во что же вменúвше,/ претерпéша истязáния всяческая/ добропобéдныя мýченицы/ Вéра, Надéжда и Любы,// добродéтелей именá носящия юницы.

Веры, любвé, надéжды / во броня облéкшеся твéрдо,/ мýдрость от Бога Спаса почéрпше,/ устá Адриáновы заградúша,/ нечестúваго и несмысленнаго,/ три по плóти сестры:// Вéра, Надéжда и Любы всеслáвнейшая.

Слава, глас 6:

Приидúте, соглáсно, вéрнии,/ благодáрственную песнь/ Благодéтелю всех Бóгу воздадúм,/ в жéнстем бо естествé/ Вера, Надéжда и Любы,/ добропобéдных мýчениц трóица/ невúдимую держáву/ сопротúвныя сúлы одолéша./ Сих молúтвами, Христе,/ подай мир людем Твоúм// и душáм нáшим вéлию мúлость.



На Литургии

От канона святым песни 3 и 6. Прокимен, глас 4. Дивен Бог во святых Своих: Стих: В цéрквах благословите Господа.

---

[1] 22 янв., к. 4 п., тр. 2. В службе РХ., в ирмосе 2 канона – спротяженно.

[2] Пс. 15, 3.

[3] У свт. Димитрия: коноб.

[4] См. службу свт. Николаю 6 декабря.

[5] Так у святителя Димитрия. Но если покажется сложным, можно еще так: острием в тело прободеся.

[6] Стихира с 15 сентября, на ГВ. Все отмеченные звездочкой стихиры перенесены из Минеи.

[7] Ср.: Октоих, вторник 5 гласа, 7 песнь.

[8] Служба св. Ап. Андрею Первозванному.

[9] Стихира на поклонение Кресту, Минея, 14 сентября, с. 425.