Канон молебный святым новомученикам Бутовским

 Канон молебный 

святым новомучеником Бутовским,

глас 8

Песнь 1

Ирмос: Преславный в мори устроивый людем путь,/ Небесное нам шествие проходимо сотвори,\ да новую песнь поим Тебе, Господи.

Святии новомученицы Бутовстии, молите Бога о нас!

Даждь нам слово, Слове Божий,/ новыя Твоя угодники воспети,/ и восполни немощь крайнюю\ неисчетною Твоею силою.

Святии новомученицы Бутовстии, молите Бога о нас!

Христова страдания общницы,/ о имени Его крови давшии,/ Того прилежно молите,/ помыслы нам лукавыя отвергше,\ Его Единаго ведети распята.

Слава Отцу и Сыну и Святому Духу.

Троичен: Благоутробию и Промыслу Твоим,/ Триипостасный Боже, дивимся:/ Сам бо низпослал еси нам новомученики/ яко печальники и заступники,\ яко да их молитвами нас помилуеши. 

И ныне и присно и во веки веков. Аминь.

Богородичен: Не остави ны, Дево, погибающия,/ и к Тебе плачевно стенящия,/ но взыщи благоутробием,/ из темницы страстей изведи\ новомученик Бутовских предстательствы.

Песнь 3

Ирмос: Утверждей, Слове, небеса словом,/ утверди наш ум и сердце,/ во еже славити Тя, Спаса душ наших. 

Святии новомученицы Бутовстии, молите Бога о нас!

Солнце Правды пред лукавыми исповедасте/ и никакоже истины отступисте,/ темже испросите и нам/ в словеса лукавствия не уклонятися\ и самооправдания отбегати.

Святии новомученицы Бутовстии, молите Бога о нас!

Зряще храмы Божия разоряемы/ и святыни поругаемы,/ не сокрысте огня веры своея,/ но не обинующеся рекосте:/ Христос есть истинный Бог наш,\ и Тому единому покланяемся.  

Слава Отцу и Сыну и Святому Духу.

Несть свят, яко Господь/ и несть праведен, яко Бог наш,/ тако в работах горьких и скорбех лютых/ от смиреннаго сердца взывасте, страстотерпцы./ Темже помозите и нам/ к непрестанному благодарению устремлятися.

И ныне и присно и во веки веков. Аминь.

Богородичен: Множицею согрешающе,/ многия требуем милости,/ и к кому прибегнем,/ страстьми истязаемии,\ аще не к тебе, Мати Милостивая? 

Ватопедским святым

Исходные тексты с указанием авторства

Собору святых Ватопедских

Тропарь, Глас 1. Кaмени запечaтану:

Оби́тели Ватопéдския пито́мцы и цели́телие,/ и вселéнныя свети́ла, богоно́снии, яви́стеся,/ отцы́ всечестни́и нáши,/ в по́двизех до́бре пострáдавше,/ сего́ рáди по достоя́нию пáмять вáшу всечестнýю совершáем,/ слáву вознося́ще Христу:/ слáва Освяти́вшему вы,// слáва в бедáх нам вы предстáтели Показáвшему.

Кондак, глас 8. Подобен: Взбранной:

Преесте́ственная ва́ша боре́ния/ и труды́ до́брых по́двигов ва́ших восхваля́ем, дивя́щеся, богоно́снии./ В по́стничестве бо и страда́нии просия́вше,/ венцы́ украси́стеся ве́ры. Те́мже зове́м: ра́дуйтеся,// отцы́ преподо́бнии.

Святому новому преподобномученику

Афанасию Лимносскому, иже в Репаниди (†1846)

Тропарь, глас 4. Подобен: Яко столп непоколебим:

Крест якоже броню восприим/ к брани устремился еси на нечестивых мужески,/ благомощне Афанасие,/ сего ради и уничижив безчестных владычество,/ победный приял еси венец нетления,/ моляся во еже избавитися нам/ от многоплетенных лютых.

Святому Герасиму Палладе, патриарху Александрийскому

(молитвословия из молебного канона, составленного митрополитом Родосским Кириллом):

Тропарь, глас 4. Под.: Вознесыйся на Крест:

Яко истинный иерей богоглаголив,/ и благочестия дивный таинник,/ и Церкве пастырь, Герасиме, добрый,/ славы общник соделася неизреченныя достоин,/ и причастник радости святых,/
сего ради, отче, с ними моли о нас// Человеколюбца Господа.

Кондак, глас 2. Подобен: Кровей твоих:

Церкве новый учителю/ и православных изрядный заступниче,/блаженне отче Герасиме,/ печалей мя житейских свободи,//
яко имеяй неизреченную милость.

Новомученику Дионисию монаху Ватопедскому, иже в Крите († 1822).

Тропарь, глас 5. Подобен: Собезначальное Слово:

Страстоте́рпцев и преподобных удобре́ние,/ Ватопе́дския обители све́точа,/ в после́дняя времена́ на Кри́те/ неве́рия тьму расточи́вшаго,/ восхва́лим све́тло Диони́сия сла́внаго,/ Пояса Богоматере мужественнаго храни́теля// и моли́твенника те́плаго о нас к Богу.

Кондак, глас 8. Подобен: Взбранной:

Подви́жнически предочи́стив себе́ на горе Афонстей,/ преподобный мучениче, к истяза́нию потече́,/ попра́в Ага́рянских сынов пре́лесть,/ те́мже ра́дуется о твоих труде́х/ обитель Ватопе́дская,/ и твоими страда́нии Кри́тский ото́к препросла́вленный,/ вку́пе вопиют:// ра́дуйся, о Дионисие.

Преподобному Евдокиму Ватопедскому

Тропарь, глас 4: Подобен: Скоро предвари:

Сокровен сый,/ подвижнически пожил еси/ и славы сподобился еси/ на Небесех от Бога,/ Евдокиме преподобне./ Сего ради обитель Ватопедская/ яко богатящаяся, отче,/ мощьми твоими,/ воспевает тя достойно/ и любовию величает// тобою Творящаго чудесы.

Святителю Филофею Коккину
Тропарь, глас 1. Подобен: Пустынный житель:

Дýха благодáть я́ве наслéдовав,/ Богосло́вия показáлся еси истолковáтель богомýдрый,/ и божéственный святи́тель Христо́в,/ я́ко сосýд Небéсных добродéтелей,/ сего́ рáди тя Филофéе свящéнне,/ почитáем, вопию́ще:/ слáва Прослáвльшему тя Христý,/ слáва Венчáвшему тя,// слáва Подаю́щему тобо́ю нам прегрешéний оставлéние.

Ин Тропарь свт. Филофею Коккину, глас 4. Скоро предвари:

Розга́ святе́йшая Фесаллони́ки явле́йся,/ Христо́вы Це́ркве боже́ственный па́стырь, Филофе́е, показа́лся еси́;/ ты бо Правосла́вия де́лы просвеща́яй,/ разоря́еши ерети́чествующих кре́пость слове́сную,// моля́ся о всех нас, хва́лящих тя.

Кондак, глас 4. Явился еси днесь:

Доброде́тельными дея́нии укра́шен сы́й, / иера́рх преподо́бен Христо́вы Це́ркве / показа́лся еси́, всеблаже́нне Филофе́е, / правосла́вия // явля́я осия́ние.

Ин кондак, глас 2. Кровей твоих:

Яко иера́рх и таи́нник благода́ти / и Це́ркве предста́тель и забра́ло, / непреста́нно моли́, Филофе́е,/ от вся́кия нýжды и ско́рби // изба́вити прибега́ющих, о́тче, к покро́ву твоемý.

Величание:

Ра́дуйся, о Филофе́е свяще́нне,/ Фесаллони́ки боже́ственное прозябе́ние и честно́е,/ ра́дуйся, Виза́нтия ве́лий пастыренача́льниче/ и ве́рных всех предста́тель ко Го́споду.

Священномученик Владимир Четверин: полиелейная служба

Святой священномученик Владимир Четверин

МЕСЯЦА АВГУСТА В 20-Й ДЕНЬ
Память святаго священномученика
Владимира Четверина,
пресвитера Саранскаго

НА ВЕЧЕРНИ
Блажен муж: Первый антифон:
На Господи, воззвах, стихиры на 8, Успения 3 и святаго 5, глас 4.
Подобен: Званный свыше:

Священному званию своему/ верен до смерти быв,/ егда безбожия тьма/ многим помрачи разумнеи очи,/ тогда Небесный свет явил еси,/ кротостныя мудрости, отче Владимире,/ веры живыя открывая красоту./ Темже тобою познаваем/ Невечерняго Света, расточающаго тьму,/ Христа Бога нашего,\ Егоже моли,\ спасти и просветити души наша.

Видя твоея любве горение,/ от учительскаго поприща/ и детей путеводительства/ возведе тя Первопастырь/ пасти овцы Своя, пасти агнцы Своя,/ проповедати покаяние,/ и о имени Своем закланну быти./ Темже нас, чтущих тя,/ путеводи богоприятными молитвами/ к покаянию истинному,\ и грехов исповеданию,\ и спасению душ наших.

Отнюд не убоялся еси/ мучительскаго стремления безбожных,/ паству свою заступая и храня,/ и за люди душу свою полагая,/ и о имене Господнем кровь дая,/ темже тя, укрепление Церкве Божия,/ и Небеснаго печальника, и заступника/ чтит земля Русская,\ отче Владимире преславне,\ ейже моли в Православии утвердитися.

Не престани заступати ны,/ у мощей твоих стоящих и молящихся,/ отче Владимире богоносне,/ общниче страданий Спасовых,/ ты бо подвигом твоим крестным/ очи душевнеи наша возводиши,/ к подвигу Искупителя нашего,/ имже и даруется нам\ очищение грехов, и спасение,\ и велия и богатая милость.


Аще во антиминсе мощи святаго,
Слава, глас 6:
Благоговейно совершая/ Таинства Божия любве/ у Престола Господня,/ яко Ангелов превысший/ священным служением твоим,/ отче Владимире,/ сподобися и венца страдальческаго/ от Ведущаго сердца человеческая./ И ныне мощи твоя/ во храме нашем пребывают[1],/ во антиминсы влагаемы,/ на нихже Велие и Преславное/ Таинство Евхаристии совершается/ схождением Всесвятаго Духа,/ нам же даруется освящение\ и миру всему утверждение.

И ныне, Праздника.
Вход. Прокимен дне. И чтения три.

На стиховне стихиры святаго, глас 5.
Подобен: Радуйся, Живоносный Кресте:

Радуйся, вземый на рамо крест,/ благочестия непобедимую победу,/ иже отвори ти райская врата/ и сотвори печальника земли Мордовстей/ и светило новосиянное Святыя Руси,/ и заступника людем христоименитым./ Темже тебе, отче Владимире,/ радостию взываем:/ моли в щедротах Неизреченнаго/ в скорбех терпение и благодарение даровати нам\ и спасти души наша.

Стих: Священницы Твои облекутся в правду/ и преподобнии Твои возрадуются.

Биении, терзании и ранами/ восхотевшии убити тело твое,/ храмину души твоея/ поколебати отнюд не возмогоша,/ основана бо бе на камени заповедей,/ просвещена Божественным Духом,/ сего ради и пренесеся к Спасу своему/ в Селения возлюбленная и желаемая./ В них же пребывая,/ отче премирне Владимире,/ непрестанно ныне моли\ просветитися и спастися душам нашим.

Стих: Честна пред Господем/ смерть преподобных Его.

Не ктому престанет слава мученик/ в Церкви воинствующей и торжествующей,/ихже сонм исполнися ныне/ новыми страдальцы земли Русския,/ в нихже ты сияеши по достоянию,/ отче Владимире,/ яко мордовских мученик/начаток и благовонный фимиам,/ озаряя наши смыслы/ светом познания таинства Крестнаго,\ и ко спасению наставляя нас.

Слава, глас 6:
Видя Всеблагий Господь/ велию веру твою/ от дел показуемую, Владимире,/ и мучении свидетельствуемую,/ соблюде и по смерти/ невредимо тело твое./ Темже, многолетно покровенное в земли/ нетленно ныне яви,/ яко да заступлением твоим/ дарует велию милость/ покланяющимся и молящимся ти/ и вопиющим верно:/ дивный во святых Своих,/ Боже наш, слава Тебе!

И ныне, глас тойже:
Издетска к Тебе прибегая Владимир святый,/ колена у иконы Твоея приклоняше,/ послежде во храме Знамения/ яко песнопевец восхваляше Тя,/ и у Престола во имя Казанскаго образа/ седмилетное служение иерейкое прошед,/ во дни пресветлаго Успения Твоего,/ Мати Живота,/ от смерти к Животу преминул есть./ Таковому водительству Твоему, Богородице,/ дивящеся, взываем:/ заступление Твое и над нами простри,/ ныне Успение Твое воспевающими/ и вопиющими верно:\ спаси ны, Владычице.


Тропарь глас 1:
Царство Небесное/ паче земных красот возжелев,/ добрым подвигом Христу подвизался еси./ И безбожное веление мужественне отринув,/ сугубую благодать от Господа Сил приял еси./ Сего ради усердно тебе вопием:/ моли о нас Христа Бога,\ отче Владимире, священномучениче.

Ин, глас 4:
Уподобился еси купцу,/ ищущу добраго бисера,/ священнострадальче Владимире,/ на высоте став свидетельства о Христе/ и еже по Нем страдания./ Истязуем же и умерщвляем,/ исповедаше велию веру свою,/и обрел еси безценный бисер вечнаго Царствия./ Темже празднуем твое успение,/ сродницы твои суще:/ моли спастися державы Российския начальником\ и множеству владомых.


НА УТРЕНИ
По 1-й стихологии седален, глас 4.
Под.: Удивися Иосиф:

От духовнаго наставника Твоего/ любовь к Божественным книгам восприял еси,/ в нихже заповеди Господни обрет,/ на скрижалех сердца твоего сия начертал еси,/ отче богомудре Владимире.


Слава и ныне, Праздника:
Ширшая небес явльшися на земли, рождшая плотию всех Содетеля,/ ныне в самая Небесная от земли преставилася еси./ Праведных убо души смотряюще Тя, ангельстии же лицы зряще,/ яко Царице хвалу достойно всегда Тебе приносят./ Темже молящи не престай о воспевающих Тя.


По 2-й стихологии седален, глас 5.
Под.: Собезначальное Слово:

Яко паче всех земных молитву возлюбивый,/ буди непрестанный нам молитвенник,/ у мощей твоих молящимся/ и просящим твоея помощи/ еже познавати и творити волю Божию.

И ныне, Праздника:
Ангел множества славословят Тя, и человеческий род верно поет Тя,/ яко преставилася еси от земли к Рождшемуся из Тебе, Богородице Чистая./ И ныне молишися прилежно, избавитися от бед/ верою празднующим Твое, Дево, преставление.

Величание:
Величаем тя,/ священномучениче Владимире,/ и чтим честная страдания твоя,/ яже за Христа во утверждение на Руси Православия\ претерпел еси.

1. Бог нам Прибежище и Сила. 2. Господи, воздвигни силу Твою и прииди, во еже спасти ны. 1. Глаголах о свидениих Твоих пред цари, и не стыдяхся. 2. Вси языцы обыдоша мя, и именем Господним противляхся им. 1. Тебе ради умещвляемся весь день, вменихомся яко овцы заколения. 2. Крепость моя и пение мое Господь, и бысть мне во спасение.


По полиелеи седален, глас глас 4.
Под.: Удивися Иосиф.

Гладом гибнущая чада твоя/ дерзновенно заступил еси,/ душу же твою за овцы положил еси,/ темже и ны, молящияся ти,/ гладом добродетелей гибнущия/ заступи, и избави наветов лукаваго,\ и моли спастися душам нашим.

И ныне, Праздника:
Зряще воистинну ангельская воинства преставление Твое,/ Пресвятая Владычице Чистая, Благословенная Всепетая Богородице,/ имущи волею рожденна из Тебе,/ лик ученик собравшеся,/ с веселием ношаху честное в рай тело Твое,/ Христа поюще, Животодавца суща во веки.

Степенна, 1-ый антифон 4-го гласа. Прокимен: Проидохом сквозе огнь и воду,/ и извел еси ны в покой. Стих: Разжегл ны еси, якоже разжизается сребро. Всякое дыхание:
Евангелие от Матфея, зачало 36.

По 50-м псалме стихира, глас 6:
Егда погребение страдальческаго твоего тела готовляшеся,/ тогда вернии, обстояще гроб,/ со слезами и трепетом провожаху тя,/ ныне же, мощи твоя нетленныя обретше,/ благодарностию и радостию вопиют:/ о Владимире отче,/ зрим тя заступника нашего/ и Промыслу Божию удивляемся,/ к будущей жизни путеводителя показавшему тя,/ темже о нас прилежно Христа Бога моли,/ спастися стаду твоему невредиму.



Канон, глас 1.
Песнь 1.

Ирмос: Поим Господеви песнь новую,/ непроходимое бо оземленив Чермное,/ пешешествовати сотвори сыном Израилевым,/и сопротивныя враги покры море.

Кую ти достойную песнь, Владимире,/ наше принесет неможение?/ Но помози воспети тя,/ Богу в белых ризах ныне предстоящий.

У храма Христорождественскаго/ рожденный и воспитанный,/ со вниманием Писанию Божественному внимаше,/ источник всех благих обретая.

Издетска Божию дому прилепивыйся,/ мужеумно уяснив заповеди Христовы,/ помози и нам во уме содержати присно/ спасительная словеса Евангельская, богомудре.

Богородичен: Отроковице Дево, радуйся,/ яко дивно сотворилася еси/ Своему Содетелю Родительница, во спасение наше./ О чудо Рождества преславное!


Песнь 3.

Ирмос: Не мудростию и богатством да хвалится смертный своим,/ но верою Господнею,/ православно взывая Христу Богу и поя присно:/ на камени Твоих заповедей утверди мя, Владыко.

Пастыря овец Своих тя предуведев,/ от учения усерднаго/ Первопастырь тя возводит/ наставляти отроков Божественней Премудрости,/ к нейже нас молитвами твоими приведи.

Идеже чтутся книги Святаго Евангелия,/ оттуду отгоними бывают/ замыслы и коварство губящаго,/ вернии же в добродетели возрастают;/ тако ученики твоя поучаше, отче.

Отроков наставниче,/ отче богомудрый Владимире,/ научи нас, поминающих тя,/ выну поучатися полезным/ и ум хранити, злая отвергающе.

Богородичен: Сосуде Духа премудрости и разума,/ Богородице, просвети наши смыслы,/ и даруй нам Единаго Христа ведети/ и к Тому устремлятися.

Седален, глас 3:
Якоже птица безкрылая, тако ум, не чтущий Писаний Божественных./ Сие уразумев от юности,/ и даже до смерти Евангельски подвизаяся,/делом в летах зрелых показал еси сугубое благоплодие/ священства и страдальчества./ И ныне настави нас в словесех Господних присно поучатися/ и умудри во спасение.

И ныне, Праздника.


Песнь 4.

Ирмос: Гору Тя, благодатию Божиею приосененную,/ прозорливыма Аввакум усмотрив очима,/ из Тебе изыти Израилеву провозглашаше Святому/ во спасение наше и обновление.

Восхотел еси пети на всякий день Господеви,/ сего ради к храму Знамения Пречистыя Богородицы[2]/ от архиерея яко псаломщик управлен бе, Владимире,/ в страсе Божии, усердии и радости служа.

Телом убо пение совершая,/ обреташеся во внимании,/ ум храня и сердце блюдя./ О таковом устроении тщатися/ песнопевцем, отче Владимире, всегда помогай.

Тя, песнословца Божия, и иерея, и мученика,/ ныне песнословим,/ в памяти твоей торжествующе и молящеся:/ в бедах и скорбех нас, немощных, заступи.

Богородичен: Восхваляет тя выну Владимир святый/ Гору святую приосененную,/ и Ковчег, и Трапезу,/ и Заступницу нам непостыдную./ С нимже моли, Чистая, присно о всех нас.


Песнь 5.

Ирмос: Свет Твой незаходимый возсияй, Христе,/ в сердца верно поющих Тя,/ мир подаваяй нам паче ума,/ тем, от нощи неведения ко дню Светом Твоим текуще,/ славословим Тя, Человеколюбче.

Свет Христов незаходимый осия сердце твое, Владимире,/ егда в праздник Преображения/ во диакона и послежде во священника ты поставлен бе,/ Светодателю воспевая:/ слава Тебе, Человеколюбче!

Цвет от цветов прекрасных,/ всех камений драгоценнейший бисер,/ Божественную Литургию радостию и страхом совершати возлюбил еси,/ ныне же, мощьми на престолех пребывая,/ не престай воздевая руце о совершающих ю и предстоящих людех.

Приидите, почерпем премудрости глубину в памяти усерднаго служителя Премудрости Владимира/ и Промыслу премудрому подивимся,/ како прославися прославлявший Господа,/ славословя Человеколюбца.

Богородичен: Пред иконою Твоею Казанскою, Богородице,/ от младенства к Тебе взывавый,/ к храму сего образа/ во священника рукоположен бе священномученик Владимир./ О милости Твоея неизреченныя, Чистая!


Песнь 6.

Ирмос: Отвергл мя еси во глубины сердца морскаго,/ и спасл еси мя, Спасе, от работы смертныя,/ и разрешил еси узы беззаконий моих.

Во смирении мнозе и простоте/ священства путь твой совершашеся,/ не своея бо, но ближняго пользы поискал еси, отче,/ обретая Царствие Небесное.

В храме Христорождественстем/ в праздник Преображения, в оньже и рукоположен бе,/ осмерицу лет служения священническаго совершил еси/ и к мучению душею уготовился еси, отче боголюбивый Владимире.

Богородичен: К Тебе, Госпоже, прибегаше Владимир святый,/ прося великия милости/ и приемля неоскудно в недузех исцеление и в печалех утешение./ Источи и нам, Владычице, каплю душеспасительную, яко да воспоим Твое величие.


Кондак, глас 3:

Безбожному велению не повинулся еси / и мирския вся соблазны отринув / даже до лютых страданий и смерти/ Христу верен пребыл еси / и лику мученическому сочетался, отче Владимире! / И ныне паствы твоея пение прими: / испроси нам у Христа Бога грехов оставление \ и велию милость.


Икос:

Яко Писаний истинный рачитель, ты, богомудре Владимире,/ прочте и позна в послании Павла божественнаго,/ яже к галатом пишет, глаголя:/ мне хвалитися да не будет, токмо о едином Кресте Господни,/ на немже страдав, уби страсти./ Сей убо Крест и ты в муках усердно держа, яко победу на супостата духовнаго, тако хвалу возсылаше:/ есть мне оружие сие спасительное Древо, мира непобедимая победа.


Песнь 7.

Ирмос: Проидоша, яко чертог, пещный пламень нестерпимый/ иже за благочестие иногда/ отроцы святии, показавше яве,/ и согласно воспевающе, песнь пояху:/ отцев Боже, благословен еси.

Приступиша тати и разбойницы,/ да живот овец твоих предаши им,/ обаче преткнушася о веру твою/ и о Камень краеугольный, Христа,/ на Негоже уповаяй, никогдаже постыдится.

Людие злочестивии влачаху и терзаху тело твое, Владимире,/ змием древним подущаемии,/ обаче ты, Христоподражательне,/ кротостию вся претерпеваше, взывая:/ отцев Боже, благословен еси.

Клевету, и поношение,/ и в темницу заточение/ в радости и мире восприял еси, Владимире,/ вопия Христу возлюбленному:/ о Кресте Твоем веселюся и надеюся,/ недостойный раб Твой.

Богородичен: В попразнство Успения Твоего, Богородице,/ приведен бысть на заколение Владимир святый,/ темже и смертию к животу преминул есть под покровом Твоим,/ Мати Живота, Всенепорочная.


Песнь 8.

Ирмос: Песнопевцы пещь древле/ отроки приемши, неопальны сохрани,/ посреде же пламене стоящия согласно пети научи:/ благословите, вся дела Господня, Господа.

Неопальна бысть душа твоя/ посреде пламене мук стоящи,/ телу же убиваему,/ яко белая голубица прелете в руце Спаса своего,/ Егоже ныне о нас моли, о Владимире.

С Небесе взираху земли Мордовския заступницы, Феодор и Филарет преподобнии,/ на твое заклание, приснопамятне Владимире,/ и веселием и радостию сретаху тя,/ в славе мученичестей восходящаго.

Троичен: Ходатайствам угодника Твоего, священнаго Владимира внимающи,/ преобрази злохудожную душу мою и к доброделанию управи,/ о Троице Пречестная, Живоначальная.

Богородичен: Новомучеником велия Похвала сотворилася еси, Владычице/ и Оружие на враги,/ и Стена неодолимая,/ темже с ними ныне моли об Отечестве нашем,/ попаляющи козни сопротивных, Препетая.


Песнь 9.

Ирмос: Тя, в рясны златыя одеянную,/ украшенную Богородицу, голубицу посребренную/ и позлащенную блещанием злата, величаем.

Яко пресветлая луча Солнца Правды Христа/ добродетельми облиставаеши землю Русскую, богоносе,/ веселя православных собрания, тя величающия.

Мудростию преукрашен, разумом просвещен/ и смирением к восхождениям Крестным преуготовлен,/ ныне во Дворех Премудрости Божия пребываеши, идеже нас поминай, о Владимире.

Образ еси нам терпения и мужества, благоверия же и незлобия, кротости и всякия правды,/ темже и нам моли сих поне мало приобщитися/ и в Чертог преудобренный ко Господу внити.

Богородичен: Буди нам, немощствующим, Милостивая Наставница, Ангелы воспеваемая!/ Не презри и малаго моления нашего,/ от души сквернавыя воспеваемаго, и спаси ны, Пречистая!


Светилен, глас 2:
Свету Трисолнечному ныне предстоя,/ с Небесе призирати нас не престай, святче Божий Владимире,/ и моли просветитися нам светом заповедей Светодавца,/ и к Тому, Невечернему Свету и нам преселитися.

И ныне, Успения.

На хвалитех стихиры праздника 3.
И святому 3, глас 8-ый.
Подобен: О преславного чудесе:

Дело Промышления Вышняго/ дивно о тебе сотворися./ От веси бо малыя взяв Господь,/ на свещник святости тя поставляет,/ яко да озаряеши Православную Русь./ Мы же, Бога прославляюще,/ благодарно взываем:/ не забуди в молитвах своих\ тя поминающих, священномучениче.

Отче чадолюбивый Владимире,/ яко на нерадивых чад своих/ призирая на грешных нас,/ помози на страсти взяти одоление,/ и исполнити наши смыслы/ глаголы Евангелия живоносными,/ и любве ко Господу и ближнему научитися,/ юже жизнию своею проповедаеши нам,/ человече Божий.

Буди отроком учащимся помощник,/ чтущим тя заступник,/ странствующим во юдоли земней/ ко Христу наставник добрый,/ скорби претерпевающим отрада,/ немощным и стужаемым просвещение,/ и Отечеству твоему земному/ печальник и ходатай к Богу,\ многомилостиве отче.

Слава, глас и подобен тойже:
О, премудрых судеб Твоих, Христе!/ Мощи угодника Твоего Владимира/ в лихолетье крыемыя/ дивно нетленны обретошася,/ к нимже ныне питомцы церковнии/ в надежде на помощь и заступление/ верю и любовию притекающе,/ того молитвами\ улучают велию и богатую милость.

И ныне, глас и подобен тойже:
О преславнаго чудесе!/ Небесе и земли Царица,/ от святых сродников наших умоляемая,/ до ныне землю Русскую покрывает/ и лика Своего изображении милостивно обогащает./ О, Владычице Державная!/ Не престани и на будущее время/ во утверждение на Руси Православия\ милости и чудеса изливати до века. Аминь.


НА ЛИТУРГИИ

Блаженна на 8, от канона Праздника песнь 6-я и святаго песнь 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Римляном, зачало 99. Аллилуиа, глас 2: Священницы Твои облекутся в правду, и преподобнии Твои возрадуются. Стих: Бог нам Прибежище и Сила, Помощник в скорбех, обретших ны зело. Евангелие от Луки, зачало 106. Конец: В терпении вашем стяжите души ваша. Причастен: В память вечную:

Приведенный текст имеет статус рукописи. 

Составитель: монахиня Макария, 2024 — 2025


[1] Аще же не у мощей святаго, рцы: «во храмех Божиих пребывают».
[2] «Учитель церковно-приходской школы Владимир Четверин допущен к исп. обяз. псаломщ. при ц. с. Юлова, Карсунского уезда». // Симбирские епархиальные ведомости. Симбирск, 1903, выпуск № 3. — С, 15. В храме села Юрлова — храм Знамения Пресвятыя Богородицы.

Акафист святому праведному Лазарю Четверодневному, епископу Киттийскому

АКАФИСТ

святому Лазарю Четверодневному,
епископу Киттийскому

Переложение с акафиста монаха Герасима Микраяннита

Кондак 1

Избранный друже Христов/ и общаго воскресения уверителю,/ из мертвых  возставленный/ повелением Господа живоносным!/ Ныне, подножию ногу Его предстоя,/ моли, да избавит от смерти вечныя/ и всякия скорби/ любовию ти вопиющия:/ радуйся, святый Лазарю// праведный друже Божий.

Икос 1

Ангельское непорочное жительство в Слове Божии проводя, Слову Божию друг соделася,/ и, дарования богатная от Него восприим,/ ими светиши всем, вопиющим ти сице:

Радуйся, Иисуса Кротчайшаго Богодухновенный любимче;
радуйся, благоговения и боголюбия светило.
Радуйся, яко по закону Завета Ветхаго жизнь управил еси;
радуйся, яко благодать по Завету Новому восприял еси.
Радуйся, чистых деяний высоту нам показавый;
радуйся, богоразумия глубине нас научивый.
Радуйся, яко по закону достойно прославляешися;
радуйся, яко благодать Спасову нам являеши.
Радуйся, звездо превосходнейшия любве;
радуйся, противоборче фарисейския прелести.
Радуйся, жития добродетельнаго зерцало;
радуйся, нравов Небесных вертограде.

Радуйся, святый Лазарю, праведный друже Божий.

Кондак 2

Видя и познавая Христово плоское пришествие и на земли яко Бога Превечна Его познавая, всесовершенно Тому уверовал еси, Лазарю всеблаженне. Той же твоего сердца рачение яко угодное прием, присна друга тя показа, Ему же ты радостию вопияше: Аллилуиа.

Икос 2

Разумом правым ко Источнику разума, плотию нас ради Пришедшу, присно взирая священныя любве очима,/ последовал еси Ему и верою Тому соединился еси./ Тем твоей мудрости дивящеся, взываем:

Радуйся, таинниче Божия Слова;
радуйся, проповедниче Его снизхождения.
Радуйся, законных повелений усердный хранителю;
радуйся, заповедей Евангельских рачительный исполнителю.
Радуйся, древо, благодатныя плоды износящее;
радуйся, водо Небесная, в скорбех нас орошающая.
Радуйся, яко Господеви всецело себе возложил еси;
радуйся, яко земных богомудро удалился еси.
Радуйся, ко Всемилостивому любве нас научаяй;
радуйся, к Того доброте неизреченней наши умы возводяй.
Радуйся, дольних страстей отбегавый;
радуйся, вышнее просвещение стяжавый.

Радуйся, святый Лазарю, праведный друже Божий.

Кондак 3

Сильный, крепостию, Господь Сердцеведец, зря жития твоего чистоту, втораго наперсника тя показует, Лазарю преблаженне, ты же, в неизреченное таинство воплощения посвящен, любовию и страхом возглашаше Тому: Аллилуия.

Икос 3

Имея веру живую и делы Божественныя, богоугодно управил еси житие твое, Лазарю дивный, и Евангельскою проповедию просиял еси, приводя Всецарю благоговением зовущия ти таковая:

Радуйся, таинниче благовестия;
радуйся, рабе Животодавца.
Радуйся, лучу благостыни, нас осиявающая;
радуйся, обоняние чистоты, нам благоухающее.
Радуйся, апостолом равночестный;
радуйся, Ангелом единонравный.
Радуйся, даров Духа сокровище неоскудеваемое;
радуйся, благодати обиталище и пажите неувядаемая.
Радуйся, яко исполнился еси Божия озарения невещественнаго;
радуйся, яко превыше явился еси пристрастия по естеству.
Радуйся, яко вины страстей отсекати нам помогаеши;
радуйся, яко сущим в печалех радование ниспосылаеши.

Радуйся, святый Лазарю, праведный друже Божий.

Кондак 4

Буря болезни смертныя егда найде на тя, крепкодушне, тогда Христос Всеведец глаголаше на пути: Лазарь, друг Наш, успе. Но идем и возставим Нас любящаго, да воскреснет от смертнаго сна и возопиет: Аллилуия.

Икос 4

Слыша моления нас, немощствующих, к тебе, благосерде Лазарю, болезнь и смерть претерпевшему, не престай молитвы покров простирати над нами и избавляти скобей и болезней возглашающих ти таковая:

Радуйся, о немощных печальниче;
радуйся, о нас, грешных, пред Богом заступниче.
Радуйся, всем цельбы источаяй;
радуйся, козней тьмы избавляяй.
Радуйся, нетления приемый диадиму;
радуйся, чадцам церковным ходатайствуяй дарования.
Радуйся, славы и светлости жизни вечныя;
радуйся, Божественныя благостыни к нам низводителю.
Радуйся, яко непорочно на земли подвизался еси;
радуйся, яко по достоянию от Бога честь восприял еси.
Радуйся, от печали многия соблюдаяй;
радуйся, добродеянии наша сердца озаряй.
Радуйся, святый Лазарю, праведный друже Божий.

Кондак 5

Бога Господа Иисуса познав, Марфа с Мариею, сестры твоя, Лазарю, Тому вопияху: аще бы в Вифании был еси, Учителю, не бы умерл брат наш. Темже ко гробу приближися Жизнодавец, да воздвигнет четверодневна тя мертвеца, взывающа: Аллилуия.

Тропари и кондаки святым преподобномученицам Бутовским

Память святыя мученицы Аполлинарии

Бутовския

(Тупицыной), 30 сентября 1937 г. ст. ст./ 13 октября н. ст.

Тропарь, глас 2:

Слово Евангельское сердцем объéмши,/ болящим служению/ всерáдостно себе предала еси,/ благолюбúвая Аполлинáрие,/ тéмже зря Христос/ истинное твое пред ближним смирение/ и зáповедем Своим послушание,/ даровá ти еже о Нем пострадáти./ Сего ради, милостивая,/ немúлостивно ятая и убиенная,/ грехóвныя наша язвы уврачуй// всемóщными молитвами твоими.

Кондак, глас 7:

Фиваиды сéверныя óтрасле,/ Цéркве Рýсския дивное процветéние,/ приимú от нас песнопений цветы,/ Аполлинáрие, Божия угоднице,/ мúлостию бо и долготерпением многим/ немощи и болезни ближних понесла еси,/тáко закон Христов испóлньши./ Тéмже, на земли Явúвыйся за милосéрдие/ и благоутрóбия Пучúна/ да подáст любóвию тя чтýщим/ исправление, и покаяние,/ и душевных стрýпов исцеление,// и спасéние душ наших.

Память святыя преподобномýченицы Евдокúи

Марфо-Мариúнския, Бýтовския

(Кузьминовой), +23 января 1938 г. ст. ст./ 5 февраля н. ст.

Тропарь, глас 3:

Марфы и Марúи дéлании/ Господу Воскрéсшему угодúвши,/ богомýдрая Евдокúе,/ мучúтелей отнюд не устрашúся/ и себé служúтельницу Спáсову исповéдала еси./ Тéмже, яко о úмени Его заклáнная,/ ныне в Церкви Тожествýющей/ вкýпе с преподобномýченицею Елисавéтою/ и сéстры обители твоея/ Ему предстоящи,/ не престáй молящися/ нам грехóв прощению даровáтися// и спастúся душам нáшим.

Кондак, глас 2:

Милосéрдия, и служéния стрáждущим,/ и болящих утешéния/ дóбрый óбраз нам являеши,/ áгнице словéсная,/ преподобномýченице Евдокúе,/ Марфо-Мариúнския обúтели многоплóдная óтрасле,/ тéмже, в Цáрствии Небéснем увенчáнная,/ испросú нам покаяния,/ и в служéнии блúжним укреплéния,// и спасéния душ наших.

Память святыя преподобномýченицы

Рафаилы Бýтовския

(Вишняковой), память 4 февраля ст. ст./ 17 февраля н. ст.

Тропарь, глас 6:

Стрáнническим шéствоваши путем,/ к Странствию Владычню ýмне восходящи,/ добродетели Евангельския/ крóтость, незлóбие, смирéние и чистотý,/ дивная Рафаúло, нам явúла еси/ и безбóжных посрамúла еси лютая стремлéния./ Темже, Вышния благодати приятелище,/ крепкодýшия сокрóвище,/ умолú нам покаяния достúгнути// и спастися душам нашим.

Кондак, глас 2:

Тя, безмóлвия дéлательницу,/ покаяния в молчáнии уст/ úстинную рачúтельницу,/ доблемýдренная Рафаúло,/ беззакóнницы лютии/ беззакóнну показáти всýе тщáхуся,/ и, хотяще возвестú тя к заколéнию,/ ко Отéчествию Небéсному возведóша./ Тéмже ныне нам сияеши/ на церковней тверди,/ путевóдною звездóю./ Моли Христа, Егоже возлюбила еси\ о почитающих тя.

Ин канон Сретения Господня

Ин канон Сретения Господня, глас 1,
егоже краестрóчие: Христа старец рукáма взя;
в восьмой же и девятой пéснех: Иосиф.

Творение преподобнаго Иосифа Песнописца

В формате word

Песнь 1

Ирмос: Христос раждается, славите:

Христос плóтию явися,/ Христóс во храм ныне ведéтся,/ Христóс старцу даéтся,/ поúм Ему вси песнь новую/ и в веселии воспоúм Его, яко прослáвися.

Да каплют нам свыше óблацы весéлие вечное;/ горы, cладость искáпайте,/ яко из горы бо Девы Христос явúся,/ якоже на облаце держúм,/ в храм Младенец принóсится.

Да обожúт человека,/ Бог Предвечный нов человек паче слова бысть,/ дáры же принóсит Иосиф,/ яко супруг горличищ, от обоúх из народа избрáннаго.

Взыгрáим, людие, днесь,/ с Симеóном, и Áнною же, и Иóсифом,/ чтýще любóвию Богорóдицу и Сына Ея воспевáюще,/ Егóже на руку Симеóн объéмлет.

Песнь 3

Ирмос: Прежде век:

Прежде век Сýща, из чрева Рождéнна,/ изрáстшаго от Дéвы в послéдняя, Младéнствующа несказáнно/ рукáма стáрчима приéмлет Симеóн, весéлием вопия:/ Свят еси, Господи!

Иже всех сýщих Творец и Владыка всяческих,/ кáко пришéл еси подлéтен,/ в рáбием ныне зрáце, Бог сый Предвечный?/ Дивлюся, вопиéт Симеóн, Твоему крáйнему снизхождéнию!

Закон и пророки испóлнити Христос пришед,/ и сего ради плотонóсен во храм ныне внúде,/ яко да страстéй человéческoе свободúт/ и благодáть земнорóдным даст воз благодáть.

Стáрче богомýдрый, рáдостне ныне Божéственнаго подымú Царя и Владыку,/ якоже Младéнца зрúма, Мáтернима рукáма держúма,/ во éже спастú род наш и живóт нам даровáти.

Песнь 4

Ирмос: Жезл из корене:

Жéзл из кóрене Иессéова произрастúти/ Тя Исáия преднаписá, Иисýсе Спáсе,/ ныне же ясно зря Симеóн всех речéнных сбытиé, вопиéт Ти:/ отпустú мя, раба Твоего, Владыко Господи.

Премýдрость и Слово Отчее Истиннейшее сый,/ не восхищéнием же непщевáвый быти рáвен Богу,/ но Себé умáлил,/ даже и до в рáбием зрáце дати Себе в Симеóновы рýце./ Слáва силе Твоей, Господи!

Глубинý судóв Твоих, Христе, никтóже исповесть:/ паче бо слова Твое зачáтие, рождество паче ума, неизречéнна вся;/ тем Симеóн Младéнца видя Тя,/ вносима в храм, рáдуяся, рукáма прия.

От Божия Духа о грядýщих яве предизвестúся Симеóн/ не вúдети смéрти, прежде даже ýзрит Тя, Христе,/ ныне же отвéтов конéц видя свéдомь,/ Спáсу мира обрáдованно вопияше:/ слáва силе Твоей, Господи.

Песнь 5

Ирмос: Бог сый мира:

Воплощéния велие таинство ныне разумом зря духовным,/ яко приúде спасение Изрáилю новому, Семеóне Богоприúмче,/ тéмже тецы,/ нося Адаму и всем сýщим во аде благовéстие.

Сия стáрец Божéственный ясно, яко слухом младым, прия,/ благодáтию просвещáемь носúмаго им Христа, речé:/ ныне отпущáеши Твоего, Владыко, рабá,/ Твоé бо спасéние óчи мои вúдеста днесь.

Людей Израиля Божественную славу,/ зря Симеон Христа/ и Свет безлéтный языком во откровéние,/ вопияше в рáдости:/ о рýце разслáбленнеи, колене преутруждéнне,/ скоро грядúте утéшити прáотцы.

Показáшеся весь света Божéственнаго испóлнь,/ Свет внéдривый мира,/ Богоглагóливый и старец Симеóн,/ от Него же приúм благодáть, предузнá грядýщее,/ тéмже прорицáше Богорóдице, провещавáя.

Храм одушевлéн сýщи Бога,/ Христа во утробе Твоей носила еси,/ яко престол, Богоневéсто Пречúстая, Херувúмский,/ но се, лежит Сей на падение многим Един,/ и áбие на востáние,/ во Израили се, сýщих сýдеб.


Песнь 6

Ирмос: Из утробы Иону:

Сын Твой, о Честнáя Мати Дево,/ написáся прежде камень претыкáния и соблáзна,/ камень Дýхом Бóжиим предречéся,/ úмже пáдшии преткнýтся и безýмнии,/ дýши же разýмных утвердятся,/ благочéстия светом озаряеми.

Ты ми яве недоумéние разрешил еси, старче мудрый, богоносúм,/ но рцы ми, прорóчествуя к сýщим в Дусе,/ что убо будет, яже рекл еси, достохвáльне:/ вéлие пребывает неизреченное воплощения сие таинство?

Речé иногдá прорóк величáйший,/ яко даст земнорóдным знамение Господь,/ éже родúти Тебé, Богорóдице, безсéменно, Егóже узрéх,/ и ношý, якоже дрéвле бых извещéн./ Сей в пререкáемое выну будет знáмение концéм.

Слава людей твоих, Изрáилю, ныне рéкл еси,/ и свет языком во откровение/ уготóвится Сына Моего Сего спасение:/ кáко ýбо, рцы ми, знáмение, о стáрче, будет и пререкáемое?/ Иже к славе, и свет мира происходит.

Песнь 7

Ирмос: Отроцы благочéстию совоспитáни:

Стрáнну и неизречéнну тáинству Богорождéния Моегó сýщу,/ божéственне Симеóне,/ стрáнну и несказáнну сему пребыти подобáет,/ темже яве приобщúся рáдости,/ юже прежде Аз едина улучúх.

Свыше Ти благодáть сицевáя дадéся, Богомáти,/ преспéющия ради чистоты души и телесé,/ тéмже подобáет Ти выну/ éже рáдуйся, Пренепорóчная,/ всемúрныя бо рáдости Ты еси винá.

Дух Мой возвеселúся о Бóзе Спáсе и Бóзе Сыне Моем,/ яко бо Едúный Сúльный велúчие Мне сотворú,/ тем Того со Мною, старче, прослáви, взывáя:/ Боже, благословéн еси.

Поистине подобает Ти, Дево, величáти/ мнóгая величúя Ти Сотвóршаго,/ и Херувúм и Серафúм честнéйшую Показáвшаго,/ но подобáет же и ми ныне прослáвити Его,/ яко Сподóбльшаго мя Его понестú.

Песнь 8

Ирмос: Чýдо преестéственное:

О твоего, о Симеóне, воúстинну благослáвия!/ Яко бо престол херувимский явúся,/ Христа во объятия твоя преестéственно приúм./ С Мáтерию ýбо Иосиф же взыгрáя, ликуй, вопия благодáрственно Ему выну:/ благословúте всех Творца и Господа, и превозносúте во вся вéки.

Славу хвалéбную возсылáю/ неизречéнно Благоволúвшему плóтию родúтися/ и Извóлившему во объятиих ныне моих почивáти милости ради неисповедúмыя./ Тя же благословлю, Всеблагословéнне;/ обáче Дух предглагóлати ми повелевает паки/ о Тебе и Рождестве Твоем.

Всетворцóм яснéйше благоволúся открыти ти сокровéнная,/ тем обещано тебе бысть не вúдети убо смерти, прежде даже Сего во объятиих не понесéши яко Младенца;/ ныне же в церкви узрéся ти проречéннаго сбытиé ясно/ тéмже прорóчествуй, пáче бо Моисéя воúстинну возвелúчен еси.

Се от дéвственных Христос кровéй/ воплощáемый явúся несказáнно,/ и яко Младéнец совершен принесéн бысть в храм,/ закóнное исполняя, закона сый Творец,/ Симеóн же старец на объятия восприя,/ пойте Сего, вопия, людие,/ и превозносúте во вся веки.

Песнь 9

Ирмос: Тáинство стрáнное:

Никúйже разум силен постúгнути, Непорочная, страшное таинство Божéственнаго Твоего Рождества, яко стрáнно,/ но понéже благоволúт, якоже Сам весть, земнорóдныя спастú Стрáстию Крéстною,/ подобает Ти орýжие скóрби восприяти.

Симеóне стáрче, в Божéственных просвещéн,/ Дýхом рцы Ми, речé Мариáм,/ не умéдли, возвестú же Ми ясно,/ о сем страшном и паче разума тáинстве,/ чесó рáди сие совершúтися úмать?

Приúде во éже спастú род человéческий Владыка, Пречистая, Стрáстию Крéстною,/ яко да от многих сердец открыв помышлéния, прослáвится плотонóсец Бог,/ божéствен весь проречé Симеóн.

Носяй мя, Дéвою ввóдится в храм яко Младéнец,/ Слово Отчее неслиянно:/ ликýй, тварь, глáсы благодáрно величáющи,/ милости ради Того всесвятóе снизхождéние.

Рабочий файл со сносками

Стихиры на Обрезание Господне

Обрезание Господне

На литиú праздника, самогласны

Глас 1

Еже в законе служéния* уставляя сéнь,* Христос Истина,* яко свет прииде:* и, законное исполняя,* плóтию обрéзуется* и духовное обрéзание* Церкви привóдит,* знáмение и óбраз ко спасéнию нам оставль .* Сего ради стопáм Его последующе,* духовное обрéзание приемлем,* яко да вéчныя жизни достúгнем** Того блáгостию.

Глас 2

Господи, от Девы произшéд,* наше прияв смешéние,* яко Младéнец Ею принесéся* обрéзатися плóтию,* да не мечтáние вменúтся* Твое смотрéние.* Сего ради áнгели ужасóшася,* зряще смирéния Твоего велúчествие,* и воспевáху Твое снизхождéние,* зовýще и глагóлюще:* слава мнóжеству щедрóт Твоих,* непостижúме Господи,** Иже спасл еси человека.

И ныне, праздника. Глас 4.

Твоего смотрéния* вéлие тáинство слáвяще, Господи,* éже на земли житиé Твое воспевáем,* úмже нас к Небесéм возвéл еси,* Иже естеством мúлостивый* яко человек бо вся претерпéл еси * и яко Бог содевáеши яже ко спасéнию нáшему.* Темже Рождествóм Твоим возродúвшеся* и обрéзанием Твоим всякий избыток отвéргше,* ко Твоей любвú возвóдимся,* чáюще от Тебе велия и богáтыя мúлости.

Перевод выполнен по тексту из греческой Минеи, находящейся в Болгарии:

Ἰδιόμελα λιτῆς τῆς ἑορτῆς.

Ἦχος α΄.

Τῆς ἐν νόμῳ λατρείας * καταπαύων τὴν σκιὰν * Χριστὸς ἡ ἀλήθεια * ὡς φῶς ἐπεδήμησε· καὶ τὰ τοῦ νόμου ἐκπληρῶν * τὴν σάρκα περιτέμνεται * καὶ τὴν πνευματικὴν περιτομὴν * τῇ Ἐκκλησίᾳ ἀντεισάγει, * τύπον καὶ ὑπόδειγμα πρὸς σωτηρίαν * ἡμῖν ὑπολιμπάνων. Ὅθεν οἱ τοῖς ἴχνεσιν αὐτοῦ ἀκολουθοῦντες * τὴν πνευματικὴν περιτομὴν ἐνστερνισώμεθα, * ἵνα τῆς αἰωνίου ζωῆς ἐπιτύχωμεν * τῇ αὐτοῦ ἀγαθότητι.

Ἦχος β΄.

Κύριε, * ἐκ Παρθένου προελθών, * τὸ ἡμέτερον προσλαβόμενος φύραμα, * ὡς βρέφος παρ᾿ αὐτῆς προσηνέχθης * περιτμηθῆναι σαρκί, * ἵνα μὴ φαντασία νομισθῇ * ἡ σὴ οἰκονομία. * Ὅθεν ἄγγελοι ἐξέστησαν * ὁρῶντες τὸ τῆς ταπεινώσεώς σου μέγεθος * καὶ ὕμνουν τὴν σὴν συγκατάβασιν * βοῶντες καὶ λέγοντες· * Δόξα τῷ πλήθει τῶν οἰκτιρμῶν σου, * ἀκατάληπτε Κύριε, * ὁ σώσας τὸν ἄνθρωπον.

Καὶ νῦν. Τῆς ἑορτῆς. Ἦχος δ΄.

Τῆς σῆς οἰκονομίας * τὸ μέγα μυστήριον * δοξάζοντες, Κύριε, * τὴν ἐπὶ γῆς πολιτείαν σου ὑμνοῦμεν, * δι᾿ ἧς ἡμᾶς εἰς οὐρανοὺς ἀνήγαγες * ὁ φύσει ἐλεήμων· * ὅτι ὡς ἄνθρωπος πάντα ἠνέσχου * καὶ ὡς Θεὸς ἐνήργεις * τὰ τῆς ἡμῶν σωτηρίας. * Διὸ τῇ γεννήσει σου ἀναγεννηθέντες * καὶ τῇ περιτομῇ πᾶν περιττὸν ἀποβαλόντες, * πρὸς τὴν σὴν ἀγάπην ἀναγόμεθα, ἀπεκδεχόμενοι παρὰ σοῦ * τὸ μέγα καὶ πλούσιον ἔλεος.