Святой великомученице Кетеван(е), царице Кахетинской, фрагменты службы

 

Песнопения святой великомученице Кетеване, царице Кахетинской, из грузинской Минеи

На Господи, воззвах, стихиры, глас 1.

Подобен: Небесных чинов:

Све́тла и прекра́сна есть/ дне́шняя память/ преподо́бныя и преблаже́нныя!/ Лик составим, бра́тие,/ и хвало́ю да украси́м/ цари́цу Кетева́ну./ И умо́лим заступа́ти ны/ пред Богом Всеси́льным,// яко иму́щую дерзнове́ние к Нему.

Цари́це Кетеване те́пле припаде́м,/ роди христиа́нстии,/ и просла́вим боже́ственно/ подви́жницу до́блюю сию́,/ венцы́ побе́дными украси́вшуюся,/ и святым совсе́льницу,// и моли́твенницу о душа́х наших.

В Небе́сном о́нем гра́де водворя́ющися,/ ра́дуется царица Кетева́на,/ и созерца́ет славу Христа Царя,/ и хода́таица есть о нас,/ во еже изба́вити нас от мук,/ диа́волу угото́ванных,// и мо́лит о спасении душ наших.

Тропарь, глас 4:

Уя́звлена рачением Божественным,/ раны мно́гия восприя́ла еси/ и муки разнообра́зныя/ до́бле претерпе́ла еси,/ те́мже улучила еси княже́ния в место/ Ца́рствие Небе́сное,/ треблаже́нная Кетева́но,/ моли Христа Бога// поми́ловати души наша.

Кондак, глас 4:

Царица Небесная — царицу земную,/ о Ней пострада́вшую,/ Себе усвоя́ет и восприе́млет:/ Дщерь Дави́дова, Непорочная Мариа́м —/ блаже́нную Кетева́ну от рода Дави́дова,/ де́лы яви́вшую сродство свое,/ я́же, украше́нная муче́ний венце́м,/ мо́лится Ей при́сно // о всех нас.

Перевод выполнен по грузинской праздничной Минее, том 1 (сентябрь, октябрь, ноябрь). 

Святой мученице Шушанике фрагменты службы из грузинской Минеи

Святой мученице Шуша́нике, царице Картли

Память 28 августа по ст. ст. / 10 сентября по н. ст.

Тропарь, глас 7:

Мучений диадиму прияла еси от супруга своего,/ царице святая Шушáнико,/ и преходящим цáрствием/ стяжала еси Цáрствие Нескончаемое,/ и ныне предстáтельница еси о нас/ пред Женихом твоим Безсмéртным, Христом;// тéмже и восхваляем тя, блаженная.

Канон, глас 3 (отрывки)

Песнь 1

Дароприношение тебе приими песненное, святая,/ и к сложению словес похвальных заступление твое подаждь ми,/ якоже помощница непобедимая, и запечатлей пение мое.

Огнь, иже воспламени сердце твое,/ подвизаше тя к единению со Христом, Шушанико,/ и на Небесный Жертвенник тя приношаше.

Кондак, глас 3:

Днесь рáдующеся людие иверúйстии в пáмяти твоей,/ 

царúце святая Шушáнико,/  и подвиг твоих множество похваляюще,/ просим у Христа ходáтайствы твоими/ мирови мира// и душáм нашим вéлией мúлости.

Перевод выполнен по тексту Праздничной Минеи на древнегрузинском языке.

Публикацию надеюсь потихоньку пополнять.

Помещаю первую страницу службы (оригинала, с которого сделан перевод)

Прп. Олимпиаде бденная служба

Месяца иулия двадцать пятаго дня
память преподобныя матери нашея, девы и диакониссы
ОЛИМПИАДЫ

Утвержденные тропарь и кондак на сайте Патриархии

Файл бденной службы

Греческий оригинал

Святых мучениц Веры, Надежды, Любве и матери их Софии

word

Святые мученицы Вера, Надежда, Любы и матерь их София:
бденная служба

Дополнения к службе святым мученицам Вере, Надежде, Любви и матери их Софии составлены в 1875 году учителем музыки и протопсалтом Леонидом Филлипиду. Утверждены Синодом Элладской Церкви в 1955 году и с этого времени включены в состав греческой минеи за сентябрь.

Издание, по которому
выполнен перевод

Работа над переводом завершена.

НА МАЛЕЙ ВЕЧЕРНИ
На Господи, воззвах поставим стиха 4
и поем стихиры, глас 4.
Подобен: Дал еси знамение:
Поем стихиры из Минеи.

Слава, глас 2:
Возсия днесь священное дев торжествó,/ сóлнца светлéйшее,/ души верных озаряя/и неверующих мрак со усердием[1] отгоняя./ Приидите убо, празднолюбцы,/ пéсненными цвéты сих главы увенчáим,/ вопиюще к ним:/ не остáвите молящеся непрестáнно ко Господу, страстонóсицы,/ с мáтерию вашею святóю/ о иже верою совершáющих// присночестнýю память вашу.

На стиховне стихиры, глас 2.
Подобен: Доме Евфрафов:

Приидите, земнорóднии,/ состáвим лик,/ в лéтней пáмяти/ Христóвых дев,// и сия да восхвáлим.

Стих: Дивен Бог во святых Своих, Бог Израилев.

Юницы честныя,/ страстнóсцев хвалó,/ слáво дев,/ Христа молúте// спастися душам нашим.

Стих: Святым, иже суть на земли Его,// удиви Господи вся хотения Своя в них.

Тресвéтлый светúльник,/ селение Троицы,/ Вера, Надежда, Любы,/ честныя Софúины ветви,// светло да восхвáлятся.

Слава, глас тойже:

Божественным прободéны/ рачением любвé ко Христу,/ три честныя сестры/ Вéра, Надéжда, Любы,/ ядовитых гонителя утешений отбегóша/ и болéзненныя муки/ мужемýдренно претерпéша,/ мученическими же украсившеся венцы,/ молятся непрестанно о нас,/ верою воспевающих// священное их страдание.


НА ВЕЛИЦЕЙ ВЕЧЕРНИ
На Гóсподи, воззвáх постáвим стихов 6
стихиры Кресту 3 и святым, глас 1.
Подобен: О, дивное чудо:

Днесь, вéрнии, ликовствýим,/ во псалмéх и пéснех Гóсподеви поюще,/ чтýще Того мýчениц и дев:/ Веру, яже Христа на пóприще/ мýжески проповéда,/ Надéжду дúвную,/ сúлою Божéственною невéрныя обличúвшую,/ и с Любóвию вси/ псалóмски да возопúем:/ Тебе, Женишé, любим,// и за Тя умерщвляемся.

Оле чудес Твоих, Христе!/ Яко и жены на пóприще явúшася,/ мýкам же себе мужемýдренно/ усéрдно предáша,/ нáфтою и огнем дóбле брáвшеся,/во главý усечéнныя/ мýченическим ликóм причтóшася/ и победныя венцы/ от Тебе прияша,// воздаяние подвигóв от рук Твоих улучúвше.

Твое преставление, Софие,/ призвáнная, от Бога восприяла еси,/ желáющи обúтелей,/ идéже твоих óтраслей/ души свеселяхуся:/ Веры честныя,/ вкупе и Надéжды, и Любвé, чад твоих,/ и благодáть от Бога исцелéний/ прияла еси, воспевáемая./ Святых бо всех,/ иже суть на земли,/ Господь удиви воúстинну[2],// славу возсылáем держáве Его.

Ины, глас 4.
Подобен: Яко добля в мученицех:

Огнéм опаляема и невреждéнна пребывши/
Божéственною сúлою,/ Вéро многострадáльная,/ обличúла еси прéлесть безýмнаго,/ мáтере поучéньми,/ претерпéвши мýжески и сосцéв отсечéние,/ Господь же мýчения венцéм/ с Небесé увенчá главу твою,// мечéм усечéнную, слáвная.

Биéния претерпела еси и вметáема в пещь,/ невредима же пребывши Бóжиею благодáтию,/ в котéл[3] горящий ввéржена,/ на дрéво воздвúжена,/ железными же ноготьмú/ многострадáльное тело твое стрýжемо,/ мечем же главе усéченной,/
к Чертогом Небесным,// Надеждо честнáя, прешлá еси.

Мýдростию словéс твоих/ нечестúвых уста заградúла еси,/ сих злочéстие обличúвши,/ сего ради на древо бе повéшена,/ волóвыми же жилами биéма/ и во огнь, якоже злато в горнúло, ввéржена, всеслáвная[4],/ и свердлами в тело провертéся[5],/ и во главу усечéся,// мýченице Любы многострадáльная.

Слава, глас 6:

Возсия днесь/ честнáя память мудрéйших дев,/ вéрных веселящи/ и к всепрáзднственному торжеству/ правослáвных мнóжества приводящи./ Приидите убо, празднолюбцы,/ пéсньми похвальными/ Христовых страстотéрпиц воспоúм, глаголюще:/ радуйся, Веро многострадáльная,/ яже сосцéв отсечéние/ и члéнов отъятие/ мýжески претерпéвшая/ и мучителя дерзость низложúвшая,/ радуйся, Надéждо всепéтая,/яже яда нечестúваго ласкáтельства избéгшая,/ и себé жертву благоприятну/ Богу привéдшая;/ радуйся, Любы всехвáльная,/яже нечестúвых словесы удивúвшая/ и мýкам лютым себé предáвшая,/ любвé ради Избáвителя твоего./ Рáдуйтеся, сестéр трóице,/ Пресвéтлыя Троицы побóрницы/ и правослáвных догмáт ясныя проповéдницы./ Не престáйте, молимся,/ предстáтельствовати о нас/ вкýпе с Софиею,/ мáтерию богомýдрою,/ еже избáвитися напáстей/ вéрою совершáющим// присночестнýю пáмять вашу.

И ныне, праздника[6], глас тóйже:

*Пророков гласи/ Древо святое предвозвестúша,/ úмже дрéвния свободúся клятвы смéртныя Адам,/ тварь же, днесь возносúму тому, совозвышает глас,/ от Бога просящи богатыя милости;/ но, Единый в благоутрóбии безмерный, Владыко,/ очищение буди нам// и спасú души наша.

Святая преподобномученица Рафаила Бутовская (Вишнякова)

Память святыя преподобномýченицы

Рафаилы Бýтовския

(Вишняковой), память 4 февраля ст. ст./ 17 февраля н. ст.

Тропарь, глас 6:

Стрáнническим шéствоваши путем,/ к Странствию Владычню ýмне восходящи,/ добродетели Евангельския/ крóтость, незлóбие, смирéние и чистотý,/ дивная Рафаúло, нам явúла еси/ и безбóжных посрамúла еси лютая стремлéния./ Темже, вышния благодати приятелище,/ крепкодýшия сокрóвище,/ умолú нам покаяния достúгнути// и спастися душам нашим. 

Кондак, глас 2:

Тя, безмóлвия дéлательницу,/ покаяния в молчáнии уст/ úстинную рачúтельницу,/ доблемýдренная Рафаúло,/ беззакóнницы лютии/ беззакóнну показáти всýе тщáхуся,/ и, хотяще возвестú тя к заколéнию,/ ко Отéчествию Небéсному возведóша./ Тéмже ныне нам сияеши/ на церковней тверди,/ путевóдною звездóю./ Моли Христа, Егоже возлюбила еси// о почитающих тя.

Вечер

На «Гóсподи воззвáх» стихúры, глас 4:
Под.: Яко добля в мученицех:

Тáинственным молúтвы в сéрдцы хранéнием/ и Христу сораспятием/ глад, и жáжду, и скитáния/ благодáрно от деснúцы Вышняго прияла еси./ Тéмже, чадо Света, Рафаúло,/ пребывáющаго зде грáда не имéвшая,/ но грядýщаго взыскáвшая,/ к зáповедем Христóвым нас упрáви// и моли о воспевáющих тя.

Посредé скúмнов сýщи душá твоя,/ сих терпящи неúстовство,/ крóтостною мýдростию/ и Христóвым молчáнием их попалú,/ и смирéнием сих обличú возношéние,/ и молúтвою прияла есть заколéние./ Сего рáди память твою свéтлую/ благоговéнием и любóвию чтим,// Рафаúло богослáвная.

Простоты сокровище тя вéмы,/ веры твéрдыя и уповáния,/ и терпéния адамáнт,/ и о гонимых мúлостивую попечúтельницу./ Всю бо себе Богу и блúжнему/ Христу внимáющи, вдалá еси,/ тем тя, любосмирéнная и крепкодýшная/ мати Рафаило блажéнная,// гласы хвалéбными ублажáем.

Слава, глас 6:

Измлáда любóвию ко Христу прободéнная,/ во цвете юности Ему посвящéнная,/пóдвиг пóстнический/ стрáнствием и страдáнием совершúла еси,/ и от мрáка мук и печáлей/ возшлá еси к Невечéрнему Свéту,/ рáдостию зовýщи:/ слава Господи, милосéрдию Твоему!// Слава смотрéнию Твоему!

Служба святым новомученикам Бутовским

Редакция к празднованию 2023.

word

В субботу 4-ю по Пáсце

ПАМЯТЬ СОБОРА НОВОМУЧЕНИКОВ,

в Бутове пострадавших

На велицей вечерни

На «Господи воззвах» стихиры, глас 5:

Под.: Радуйся:

Солнце Правды Христос,/ Божéственными лучáми нас освещáя,/ созывáет прáздновати/ слáвному Своему Воскресéнию,/ вкупе и Своим угóдником,/ страстотéрпцем Бутовским,/ за Правослáвие души своя положúвшим./ К нúмже, о мучениколюбцы, да воспоúм:/ радуйтеся, мучеников красотó,/ úмиже стольный град украшáется!/ Сей храните от бед невредúм,/ нам же язвы душéвныя и телéсныя исцелúте,/ и отбежáти нам помозúте страстéй,/ и Бога к нам умúлостивите// вáшими богоприятными молúтвами.

Рáдуйтеся, велúции страстотéрпцы Бутовстии,/ утверждéние Цéркве Русския:/архиерéев дивное соглáсие,/богобóрцев руками/Христа ради заклáннии,/ и свящéнников всеоружный полче,/душу за óвцы положúвшии,/ и монáшеское духóвное вóинство!/ Яко áгнцы незлóбивии/ немúлостивно убиéннии,/ ныне Престолу Божию предстояще,/ молúтеся в вéре укрепúтися нам// и спастúся душам нашим.

Христом Единем живуще,/ к Тому очúма душéвныма взирáюще,/ áгнцы Его пасуще,/ дéлы и словесы Ему служáще,/ святителей Бутовских дúвная шестерúце[1],/ всеоружием благодáти Его/ язв болéзни претерпéли естé,/ люте ураняеми и в темнúце томúми,/ яко óбщницы страстей и Цáрствия Владыки своего,/ к вам притекáющих/ и в вéси Бутовстей/ мощем вашим покланяющихся//в молитвах к Нему не остáвите.

Рáдуйтеся, дóбрии пáстырие,/ в Бутове пострадáвшии,/ дéлателие нивы Божия/и Евангелия проповéдателие!/ Ни озлоблéния, ни прещéния,/ ниже узы темнúчныя и работы гóрькия/ яже ко Господу любве/ разлучúти не возмогóша вы,/ но паче в вере утвердúша./ Не остáвите ны пóмощию вáшею,/ покаяния и смирéния испрóсите нам,/ и во éже Христу в зáповедех Его слéдовати,/ вы бо угóдники Его явúлися естé// и о нас ходáтаи.

Подвиг пóстнический/ крóвию воúстинну напечатлéсте,/ Богу себе покорúстеся/ даже до смéрти крéстныя/ и Ему всежелáнно себé предáсте,/ преподобномученик Бутовских всесоглáсный лúче./ Тéмже молúте,/ венцы сугубыми увенчáннии,/ гордость нам житейскую отрúнувше,/ к покаянию и смирéнию устремúтися,// и спастúся душáм нашим.

Слава, глас 8:

Чáдца Небéсная/ слáвнаго грáда Москвы,/ от восток и запад притéкшии,/ и в Бутовстей веси/ крóви своя пролиявшии,/и, Христу послéдующе,/ руки воздевáвшии о убивáющих вы,/ ныне, вéнцем страдáния увенчáннии,/ молúте грехóв прощéние улучúти/ память вашу свéтлую// любóвию совершáющим.

На стиховне, глас 4.

Подобен: Яко дóбля в мученицех:

Якоже и дрéвле, Церковь Бóжия/ утверждáема и удобряема кровьмú мученик,/ нас созывáет к свéтлому торжеству,/ тáинственно любовь Христóву являющи/ и дáрующи нóвых заступников,/ нам, вопиющим прилéжно:/ узы греховныя разрешúте,/ о страстотéрпцы святúи,// и к жúзни вéчней упрáвите нас.

Моисейски[3] Крест Господень воздвизáете,/ о страстотéрпцы непобедúмии,/ мы же к нему взирáюще,/ змием древним угрызáемии, оживáем,/ и на враги невúдимыя ополчáемся,/ и сим крéстным знáмением их одолевáем,/ вопиюще к вам:/ о, Христу спострадáвшии,// молите даровáти нам вéлию милость.

Ангельским ликóм сопричтóстеся,/ в áнгельский óбраз оболчéнныя,/ Михаúло, Алексáндро и Рафаúло[5]/ со иными преподобномученицами,/ Жениху Небесному угодúвше/ в поношéниих вéрностию и к блúжним любóвию./ Темже молúтеся и нам/ мúлости елéй собрáвше,// с мудрыми дéвами в Чертóг Его внúти.

Слава, глас 8:

Господи, аще не быхом имели молúтвенники/ святыя Твоя страстотéрпцы Бутовския/ и благостыню Твою, мúлующую нас,/ кáко смели быхом/ предстояти Ти,/ мнóгими грехмú и страстьмú обременéннии?/ Но услыши о нас молúтвы их,/ на невúдимыя и вúдимыя враги/ одоление дáруй,/ покаяние приими// и по мúлости Твоей не остáви нас.

Тропарь, глас 4.

Нивы церкóвныя/ клáси безчúсленнии,/ плод сторúчный принóсите в Бутове/ за Христá страдáнием даже до смéрти/ и сéете вéры утверждéние/ и надéжды укреплéние,/ яко добропобéднии свидéтелие Истины и Любвé./ Дерзновéнно молúте Христа// во éже спастúся нам.

На утрени

Стилиану преподобному служба

 

 Служба преподобному Стилиану Пафлагонскому

Служба прп. Никифору Прокаженному

Обложка издания,
по которому выполнен перевод

pdf

word

Служба преподобному Никифору Прокаженному составлена монахиней (кафигуменией) Исидорой на древнегреческом языке. Утверждена священным Синодом Элладской Церкви 7/21 октября 2013 года.

Перевод выполнен по изданию:  Ακολουθία του Οσίου και Θεοφόρου Πατρός ημών Νικηφόρου του Λεπρού και Θαυματουργού: Μετά Παρακλητικού Κανόνος, Χαιρετισμών και Αγιασμού. Σσ. 128.  ISBN 9788835369523.

Прп. Фотинии Кипрской служба

Память преподобной Фотинии (Фоту) Кипрской — 2 августа по нов стилю в Греции и на Кипре, 2 августа ст. ст./ 15 августа н. ст. —  в России

Стихиры и тропарь опубликованы: "Жития Кипрских святых/ Сборник. Сост. Л. А. Чуткова. — М., 2017. — 962 [4]. — ИС 11-110-1009. C. 391 — 393.

Тропари и кондак св. мч. Фотине

Служба преподобной Фотинии Кипрской word


Месяца августа втораго дня память преподобныя матери нашея
ФОТИНИИ КИПРСКИЯ, КАРПАССИЙСКИЯ
Творение монаха Акакия

На «Господи, воззвах», глас 4.
Подобен: Яко добля в мученицех:
 
Фотúнию пóстницу,/ свéту соимéнную,/пéсньми восхвáлим немóлчными,/ Божия благодáти пучúну,/ скúнию свéтлую Утéшителя Честнáго,/ Карпассúйское удобрéние,/ и благоухáние миротóчное Кúпра,/ слáвяще сея неспрестáнная борéния// во стезé избрáнней.

Служба преподобному Порфирию Кавсокаливиту

Обложка издания, по которому
выполнен перевод

pdf
word

Перевод выполнен по изданию: Служба преподобному и Богоносному отцу нашему Порфирию Кавсокаливиту с молебным каноном и музыкальным приложением. Издание священного монастыря Хрисопиги, Ханья, 2014 г. Составлена иереем Евангелисом Г. Пахияннакисом, протопресвитером Вселенского Престола. Утверждена епархиальным Синодом Крита 27 февраля 2014 года.

МЕСЯЦА НОЯБРЯ В 19-Й ДЕНЬ

Преподóбнаго и Богонóснаго отцá нáшего
Порфúрия Кавсокаливúйскаго

НА МАЛОЙ ВЕЧЕРНИ

На Гóсподи, воззвáх: стихúры на 4, глас 1.
Подобен: Небесных чинов:

Празднолюбцев лúкове, приидúте, воспоúм/ в преподóбных нóваго/ и Христóва Божественнаго друга, вопиюще:/ Порфúрие, твоими молитвами/ проси о нас, совершáющих боголепно// пáмяти твоея торжествó.

Словес твоих, отче, мрéжею/ явúлся еси душ ловец/ и, от пагубы к пути спасения взем/ бездною искушений и зол потопляемых,/ мир ума, блаженне, подаеши,// о Порфúрие предúвный.

Зря незаходúмый свет очесы ýмными/ безстрáстия высотою,/ исцелений приял еси благодáть:/ темже, óтче, тя врачá недýжным свемы/ и изнемогáющим ходáтая, и помóщника,// и утешителя скорейшаго.

Зерцáло Божественное Слова,/ мýдре Порфúрие,/ и добродетелей сосуд Небесных пребывáя,/ словесы Господни и ученьми/ верныя в простоте наказýеши и услаждáеши,// яко истолковáтель Его повелений, преподóбне.

Слава, глас 2:

Преподóбне отче Порфúрие,/ духовными твоими бореньми/ взем победу на естество,/ воúстинну превыше естествá пребыл еси,/ тем приял еси свыше обожения свет,/ имже сияеши концем/ богодухновенными советы твоими,/ полн пребывая небесныя светлости,/ и нас сподóби/ твоими молитвами сотворúтися// причáстники Божия благодати.

И ныне, глас тойже:

Все упование мое на Тя возлагаю,/ Мати Божия,// сохранú мя под кровом Твоим.

На стиховне стихиры, глас 2.
Подобен: Дóме Ефрафов:

Верных собрáния,/ веселящеся, приидите,/ Порфúрия Божественнаго/ воспоúм любодрýжно// сияющаго áки сóлнце.

Стих: Блажен муж, бояйся Господа/ в зáповедех Его восхóщет зелó.

Дом добродетелей/ Порфúрие, явúся,/подвизáвся паче естества,/ тем и показáлся еси// сосуд Божия благодáти.

Стих: Честна пред Господем/ смерть преподобных Его.

Рачением Божественным/ угобзúл еси душу свою,/ Порфúрие Богомýдре,/ всякия бо слáсти мiрския // небрегл еси.

Слава, глас и подобен тойже.

Троичен: Свете трисиянный,/ Трóице во Едúнице,/ лучезáрнейшее Богоначáлие,/ Порфúрия молúтвами// всех нас помúлуй.

И ныне, глас и подобен тойже.

Владычице Марие,/ Уповáние всего мира,/рачением урáненный/ Порфúрий Божественный/ Тя любóвию величáше.

 

НА ВЕЛИЦЕЙ ВЕЧЕРНИ

На Гóсподи, воззвáх: стихиры, глас 4.
Подобен: Яко добля в мученицех:

Священник богодухновеннейший,/ избрáн сосуд честный,/ утешитель велий наречеся,/ совершая превысокая и Божественная/любве Божия Таинства,/ яко Ангелов превысший/ послужил еси всех Владыце по достоянию;/ сего ради вси тя чтим,// возлюбленне Порфúрие.

Уязвлен рачением ко Господу, всеблаженне,/ яже в мiре вещи презрел еси,/ богоугодно жúтельство твое/ прóйде, рáдуяся,/ Божественных же заповедей/ делатель усерднейший наречеся,/ любя всякаго человека в мiре,/ сего ради во Пристáнищи Небеснем// веселúшися ныне.

Преподобным единонрáвный,/ добродетели всяцей научúлся еси,/ издетска, святе,/ Божественным стопам последовáв,/ бысть яко столп неподвúжим/ и благодатей Троицы содержúтель Порфирие:/ темже днесь/ святую твою память славослóвяще,// Бога в радости благодаряще, славим.

Слава, глас 6:

Днесь честнáя и благонарóчитая настá память/ богонóснаго отца./ Приидúте, убо, празднолюбцы,/ Порфирия величáйшаго в добродетелех/ радостно да восхвалим, глагóлюще:/ радуйся, Спаса Христа издетска возлюбúвый,/ и, рачения Божия исполненный,/ монашескому жительству поревновáвый,/ радуйся, в Кавсокалúвех подвизáвыйся/ и изобильно осиянный Пресвятыя Троицы ясными светолúтии;/ радуйся, на пажити трезвения порабóтав,/ к молитве же усердней/ сýщия во грáде Афинейстем/ и во всей вселенней немощствýющия и печáльныя призвáвый,/  радуйся, древним преподобным единонрáвный,/ правило радения,/  целомýдрия образе,/ священников слáво,/ инокýющих величáние./ Яко убо неизреченных Таин Христовых служúтель и верный смотритель,/ всеблаженне Порфúрие,/ молися о нас,// верно совершáющих память твою.

На литии стихиры
Глас 1

Рáдуйся о Господе, Евбейский отóче,/ и Афинейский граде ликовствýй,/ пустыне же веселúся Кавсокаливúйская/ и всех монáхов мнóжество/ в памяти преподóбнаго и богонóснаго отца нашего Порфúрия./ Сей бо от младенства Христа возлюбив,/ крепко сокрушú стрелы велиáровы/ и вся плотская желания изсушú:/ тем и Жених Христос/ светоч многосветлый любве его/ всемúрно утверди./ Мы же любóвию/ праздничными песньми сего восхваляем,/ Спаса моляще:/ просвети его молитвами/ и наша ум и сердце, Человеколюбче!

Глас 2

Еже во Афúнех служение твое/ кто поведает, преподобне отче?/ Посреде молвы и искушений/ и многоразличных лукавых деяний/ ты стезею чистою ко Господу шествоваше,/ мира кроме пребывáя,/ áще и телом в мире,/  сего ради милости исполнен,/ в меру совершенства достúгнув,/ чудесы многими/ от Христа прослáвлен еси./ Тем и мы зовем:/ приидú ко иже в мире/ многоразличными недуги томимым,/яко молитвами твоими/ сугубое здрáвие да улучáт.

Глас 3

Подвигом добрым позвизáся,/ отче Порфирие, во Афúнех и Кавсокалúвех;/ во многомятежном убо грáде/ безмолвие препровождая пустынное,/ в пустыни же  о многосмятенном мире/ деннонощно молитвами твоими попечение не остáвил еси,/ яко да благодáть Духа/ вдохнеши в сердца человеческая.

Глас 4

Приял еси с Небесе благодать,/ богоносе Порфирие,/ целити человеков недуги,/ в сих бо úскус имяше,/ телом бо и ты претерпевáше/ во мнозех болезнех./ Сия же вся пренесл еси твердо,/ жúтельствуя сим Павловым:/ кто изнемогает, и не изнемогаю?/ кто соблазняется, и аз не разжизаюся?/ Ныне же, яко ангел-утешитель/ и братолюбия образ,/ не остави пущáти лучú врачевáний// всем, любовию просящим цельбы.

Слава, глас 8

Приидите, вернии, сшедшеся богодухновенно/ духовный лик составим/ в славном торжестве преподобнаго отца,/ Порфирия богомудраго,/ и в песнех и пениих божественных,/ якоже неувядáемыми цветы,/ того увенчáим:/ житие бо возлюбив равноáнгельное,/ и житейских наслаждений возгнушáвся,/ силою Креста невúдимаго врага/ мýжески победú./ Сего ради благодáтию божественною/ Христос его облече/ и сосуд Святыя Трóицы/ Дýхом Бóжиим явú,/ тáинства же естества и сердец сокровенная/ ясно ведати умныма очима/ сему преподá./ Тому убо вопием:/ Богонóсе óтче наш,/ яко светоч Небесных дарований,/ и наша души озарú// ко Господу мольбами твоими.

На стиховне стихиры, глас 5.
Подобен: Радуйся постников:

Весь освятив ум,/ прияв священное течение, преподобне,/восшел еси к восхождением Таинств Божиих/ и священнотаúнник нареклся еси,/ небесный человече и земный áнгеле,/ светоче миру любодрýжный и человеколюбный,/ кротчайший и чистый разумом,/ море Божия благодати,/ Порфúрие преподобне,/ тáинственнаго винограда возделатель поистине достойный,/ Христа моли душáм нашим даровáти// велию милость.

Стих: Честна пред Господем/ смерть преподобных Его.

Радуйся, иже златозáрными дуновении/ вселенную светло украсúл еси,/ и струями богозрения/ к пристáнищу Божию/ верных сердца пренесл еси,/ темже молим тя, чудес пучúну,/ Божественнаго предуведения благовóнный фимиáм/ и мироухáнное добродетелей приношение:/ приидú и ныне, Богодухновенне,/ и печаль в веселие преложú,/ и вся твоими молитвами оградú,/ подавая исцелений небесныя токи// и велию милость.   

Стих: Блажен муж, бояйся Господа/ в заповедех Его восхощет зело.

Радуйся, Евбеи óтрасле,/на путь Христов от юности вступúвый,/ и в Кавсокалúвех пожúвый терпелúвно,/ иго подъявый пóстничества,/ сего ради к лýчшим Христос тя возведе,/ таинств зрети сокровенная/ и благодáти тайноучúтеля тя вчинú:/ темже ны, Порфúрие, верою почитáющия тя,/ Небесных Чертогов и вышния слáвы сподóби,/ твоими бо предстáтельствы// прóсим, преподобне, Бóжия милости.

Слава, глас 8:

Чистое сердце твое,/ преблаженне Порфúрие,/ дом соделася Всесвятыя Троицы,/ Премудрость бо Божия,/ оскудевáющая восполняющая,/ буйством проповеди/ премудра тя утверди,/ тем и богодухновен священник нарекся,/ и чудотворец человеком,/ ихже привлекáше/ и Божиим глагóлом наставляше/ и добродетели прилежáнию;/ кроток же явúвся, смирен и незлóбив,/ искушения выну претерпевая рáдуяся:/ тем и нас смирению научú/ молитвами твоими/ и миру помыслóв/ яко да улучúм милость// и спасение душ наших.

Тропарь, глас 4.
Подобен: Скоро предвари:

Подвигом освятúл еси/ священную твою душу,/ юже в дар принесл еси Жениху Христу,/ Порфúрие преподóбне:/ сего ради и врачевáний благодать/ приял еси, блаженне,/ болезни отгоняти и цельбы подавáти/ верою приступающим//к иконе твоей, всехвáльне.

Ин, глас 3.
Подобен: Божественныя веры:

Сосуд благодати Утешителевы/ тя восприяхом/и Троицы даротóчное изволение, óтче:/ ты бо, прилежно взрастúв даровáние,/ якоже светонóсец просиял еси в мiре,/ сего ради молúся Христу Богу, Порфúрие,// даровáтися нам велией милости.

УТРО

По 1-м стихословии седален, глас 1-й.
Подобен: Гроб Твой, Спасе:

Преподóбнически претворив твое житие,/ преподобных общник паче всех показáлся еси,/ преблаженне Порфирие,/ сего ради благодать небесная тя сотворú/ ведуща сердца человеков,/ и хотящая быти яко настоящая зряща,// сего ради тя восхваляем.

Слава, и ныне, глас и подобен тойже:

Чертог разумный показалася еси, Дево,/ Седалище тáинственное Владыки всех,/ преславный Престол,/ небесная Скиния, Творца всех вместившая,/ сего ради вси человеков рóди// велемудро Тя прославляют.

По 2-м стихословии седален, глас 4-й.
Подобен: Скоро предвари:

Преподобно священствовав Царю и Богу,/ всеблаженне Порфúрие,/ тем приял еси светлый благодáти венец,/ незлóбив явúвся/ и радости небесныя вся испóлнив,/ сию всем подаеши,/ юже дáруй, богомýдре и ныне//  всем, верою чтущим тя.

Слава, и ныне, глас и подобен тойже:

Дево Всенепорóчная, ненадеемых Надеждо,/ Радосте же и Утверждение сущих нуждах верных,/ плачущим Утешение,/ избави одержúмыя искушеньми нечáянными,/ исцелú недýжныя,/ и люте печáльми обстоúмыя,/ к Тебе бо притекáем выну,// всех Помощнице.

По полиелее седален, глас 3-й.
Подобен: Красоте девства:

Многочудесное, преблаженне, жúтельство твое,/ пóдвиги воúстинну/ сияющее священства одеянием,/ с благоговением почтим./ Тем, предстояще божественному образу твоему,/ сей лобызáюще,/ от него себе улучаем/ благодать, и мúлость, и мир,/ Порфирие, воли Христовы возвестúтелю.

Слава, и ныне, глас и подобен тойже.

Красотý добрóты Твоея, Непорочная,/ помышляя, окаянный, вельмú изумляюся,/ и исхода моего время/ зрю пред очúма моúма,/ яко имеюща осуждение претерпети пред Ангелы,/ избави мя злыя муки,/ сего ради в покаянии Ти зову:/ радуйся, всех Спасение.

Степенна, 1-й антифон 4-го гласа. Прокимен, глас 4: Честнá пред Гóсподем/ смерть преподóбных Его. Стих: Что воздáм Гóсподеви о всех, яже воздаде ми. Всякое дыхание: Евангелие от Лукú, зачало 24.

По 50-м псалме стихира, глас 6:

Иоанна Кýщника житие возлюбив/ и вышнее любомýдрие,/ вне мúра был еси, священне./ Обáче Христос,/ Егоже ты издетска возлюбил еси,/ первее тя возлюбú,/ тем и избрá Себе послужúти/ в лице немощствýющих брáтий твоих:/ сего ради в мúре,/ аще и в теле, аки невеществен пребывая,/ светлое одеяние Христово незапятнанно и бело соблюл еси./ Молúся убо, преподобне,// о нас, почитающих тя.

Канон, глас 1
Песнь 1

Ирмос: Христос раждается, славите:/ Христос с небес, срящите:/ Христос на земли, возноситеся:/ пойте Господеви вся земля,/  и веселием воспойте людие,// яко прославися.

Христова друга úскренняго,/ Христова священнодейственника теплейшаго,/ Христова честнáго послушника,/ вси Порфирия, вернии, Кавсокаливúйскаго/ радующеся, в песнех да восхвалим.

Играют мiрстúи концы,/ людие вселенныя радуются,/ ликовствýют небесная,/ сонмы священников и инокýющих/ воспевают соглáсно/ в памяти Порфирия богомýдраго.

О чудесе! Како от юности/ ты претерпе с родúтельми разлучение,/ не побежден естественною любóвию?/ Возгореся сердце твое рачением еже к Богу/ и яко свет сияше уму твоему/ Кýщника образ.

Божия испросú благодати/ нам, взыскýющим помощи,/ и любовию к тебе притекающим,/ Божественным осенением и заступлением,/ таúнниче неизреченный, о Порфирие мудре,/ яко да воспеваем тя.

Богородичен: Сосуд благодати сýщи,/ сердце мое радования исполни,/ óблаки страстей расточú,/ Господу и Сыну Твоему усердно, Обрадованная,/ о всех верных выну молися.

Песнь 3

Ирмос: Прежде век от Отца рожденному нетленно Сыну/ и в последняя от Девы/ воплощенному безсеменно,/ Христу Богу возопиим:/ вознесый рог наш,// Свят еси, Господи.

Твое сердце, блаженне,/ еже ко Христу любве огнь воспламенú,/ тем во дни и в нощú же/препитáяся радостно/ Божественными писáнии и псалмы,/ яко слáвий сладкопояше Бóгови,/ преподобне Порфирие.

Всего небесна тя/ богоданная благодать пресветла сотворú,/ юже приял еси паче слова,/ в храме святем зря пустынника преподобнаго,/ измененна в молении ко всяческих Господу.

Оболченна тя во одеяние Божества, пóлна света,/ и на Афоне потаенна,/ Христос ныне мiрови показýет/ и не хотящу ти,/ яко да жáждущия оросúт/ сладкою водою Духа.

Все житие мое/ из лютых совокупúх и всяческих злых,/ к твоему заступлению с прошением прибегаю, Богомудре: Порфирие, избави скоро/ к тебе молитвами вопиюща тепле: согрешúх, помилуй.

Богородичен: Благоутрóбная Дево,/ Спаса рождшая, Христа Бога,/ ко пристанищу спасения/ сущих в прелести призывающая,/ помозú нам скоро,/ яко да предстáтельствы Твоими/ в радости приúмем избавление.

Седален, глас 8-й.
Подобен: Премудрость и Слово:

От Евбеи яко древо неувядáемое/ прозябл еси, отче,/ и добродетели в Горе Афóнстей/ яко плоды показал еси,/ воздержáния, пощения,/ сообрáзно подвигу твóему,/ ум же к высоте úстово восперúл еси,/ непрестаннаго причащáяся веселия,/ чудес лиеши токи/ и раздаеши исцеления,/ верно вопиющим ти:/ молúся Христу Богу/ прегрешений оставление даровáти// прáзднующим любóвию святую память твою.

Слава, глас 3-й.
Подобен: Божественныя веры:

Ревностию божественною оболченный,/ отче преподобне,/волею Христу последовал еси духом/ и прославився паче ума, сияеши ныне,/ со Христом, Женихом твоим пребываеши,/ сего ради молится/ даровати лучшая нам,//  верою твое совершáющим торжество. 

И ныне, глас и подобен тойже.

Неискусобрачная Дево Мáти,/ стужáемую душу мою мою утвердú/ и от глубины зол мя исхитú,/греховным бо бременем потопляем,/ душегýбца врага мя избáви,/ яко да выну пою смиренно Рождество Твое,// присно яко Богородицу величая Тя.   

 

Песнь 4

Ирмос: Жезл из корене Иессеова / и цвет от негó, Христе, / от Девы прозябл есú, / из горы, Хвáльный, / приосененныя чáщи/ пришел есú, воплóщся / от Неискусомýжныя, Невещественный и Бóже.// Слáва сúле Твоей, Гóсподи.

Цвет Евбеи Божественный,/ из кóрене благочестúва, мудре,/ в последних прозябл еси,/ и летами отрочá сый,/ ко Афону взыде, идеже постничества стезю прóйде ангельски/ Божиим мановением, Порфирие.

Всем притекающим ти показался еси/ чистый источник радости,/ надежды и исцелений присноструйный поток,/ благодати крин,/ росóю животóчных вод окропляяй душу,/ дух же веселяй, преподобне.

Свет, живот, мир и радость/ яко благовествуяй приступающим тебе, Порфирие,/ любовь же Божию пламенно изъясни,/ словесную сеть простирая,/ яко искусный рыбарь, многия уловил еси.

Одушевленный храм световúдный сый Божия Духа,/ вселенную озарил еси мудрыми словесы твоими/ в последняя временá,/ показуя ясно сущим во мрáце/ пресиянную небесную славу/ и светлое радование.

Богородичен: Землю Небеси совокупила еси,/ зане совершенно исполнила еси волю Господню;/ ныне чудоточный просия Порфирий, себе самáго верою Богу возложив.

Песнь 5

Ирмос: Бог сый мира, Отец щедрóт,/ Велúкаго Совета Твоегó Áнгела,/ мир подавáюща, послáл есú нам;/ тем, Богоразýмия к свету настáвльшеся,/ от нóщи ýтренююще,/ славослóвим Тя, Человеколюбче.

Препоясався силою,/ прошением крепким Божия духновения и благодати,/ соделася нóво селение Троицы Пречестныя,/ сего ради, боговедением испóлнився неизреченныя славы,/ воли Божия возвестúтель бе/ и откровений истолковáтель.

Печальным пристанище,/ радости раздаятель,/ монахом светильник предобрый,/ родителем мудрый советник,/ пастырь и путевóждь всем заблýждшим,/ Порфирие, ты пребывая,/ и нас от печалей твоими мольбáми избави.

Не видя очúма телесныма, в глубúны души взирáше/ и тайная всяко познавáше,/ чудес действо расточáше яве,/ недуги отгоняя и демоны уязвляя,/ Христовою же силою чудотворя, отче богоприятне.

Благúй рáбе Господень, верный и добрый,/ Христос тя призывает, отче преподóбне, пастыря овцáм,/ испóлнь Божественныя светлости;/ вводяше тыя внутрь церковныя ограды/ и мýдре сохраняше отеческими поучении твоими.

 Богородичен: Стена еси девствующим, Дево Чистая,/ немощствýющим скорое Заступление,/ мира приснотекущая и Божественная Река,/ сего ради прошу Тя,/ подай ми капли к душевному покою и к вечныя радости сопричáстию.

Песнь 6

Ирмос: Из утробы Иону младенца изблевá морскúй зверь,/ яковá прият; / в Деву же всельшееся Слóво/ и плоть при ем шее прóйде, сохрáншее нетленну:/ Егóже бо не по стра дá истления,/ Рóждшую сохранú неврежденну.

Разреши от страстей, преподобне Порфирие,/ пресильною Божественною молитвою твоею,/ тя бо úмамы заступление истинное и твердый покров,/ яко стяжавшаго Троицы благоволение,/ егоже и предстательствы о нас твоими/ безмездно подаеши страждущим.

Колесница Божия показался еси, Порфирие,/ воскрилúл бо еси себе зарею Духа,/ наставляше и верных лики к познанию Вышняго,/ поучая любви совершенней, в нейже истово поживе/ и во мнóзей простоте, преподобне.

Весь срастворен любовию к Зиждителю твоему,/ вся яже Его/ яко изображения помышляше,/ провозвещающая добрóту и славу Божию/ и кропящая любовь неизреченную,/ еяже плоды вкусив,/ в Селениих Небесных ныне радуешися.

Слава Тебе, Христе, Премудрым Промыслом Твоим/ показавшему яве чрез раба Твоего,/ яко мощно есть в последняя времена/ непорочно хранити заповеди Евангелия Твоего,/ úмиже упраздняется мудрование мiра немудраго.

Богородичен: Виждь мое, Владычице, обстояние/ и потщúся скоро,/ даждь ми помощь, поющему Ти, разве бо Тебе инáго покрóва не úмам воистинну,/ тем ускори, якоже и прежде, всегда мя избавляти.

Кондак, глас 8.
Подобен: Взбранной:

В последняя времена богодухновенно пожúвша/ и испóлненна даровáний Божия Духа,/ да воспоúм Порфирия достойно,/ яко по премнóгу утешителен показýется,/ и потребная к целению нам подает,// к нему же взываем: радуйся, отче премiрне.

Икос.

А нгел явился еси на земли плотонóсен,/ естество превозшел еси ýмно,/ и, Бога чтя образом Ангельским,/ возжегл еси сокровенный сердечный огнь,/ нетварною тáинственною благодáтию./ Тем тя блажим, зовýще верю таковая: Радуйся, цвете Церкве, радуйся, шúпок Царствия; радуйся, пáстырю добрый Христова стада, радуйся, сотворивый в нем и научивый; радуйся, Евбеи Небесная розгó, радуйся, Афин прекрасное удобрение; радуйся, провозвестниче и к неизреченным наставниче, радуйся, велиих откровений явúтелю; радуйся, монахов светильниче многосиянный, радуйся, постников вождю многочестный; радуйся, крепкий о немощных ходáтаю, рáдуйся, сúльный о нúщих предстáтелю. Радуйся, óтче премiрне.

Песнь 7

Ирмос: Отроцы, благочестию совоспитáни, / злочестúваго веления небрегше, / óгненнаго прещения не убояшася,/ но, посредú плáмене стояще, пояху: / отцев Бóже, благословен есú.

Мудростию вышнею/ очистив телесная и душевная чувства, премудре,/ возжег сердце Божественным рачением,/ со Ангелы Богу усердно поеши ныне:/ Отцев Боже, благословен еси.

В болезнех горьких взывáше, радуяся, Порфирие,/мне еже жити Христос/ и еже умрети приобретение многое,/ не престáну, воспевая милость Его и вопия: Боже, благословен еси.

Радость небесную даруй и сладкое орошение,/ славне Порфирие,/ свыше бо приял еси благодать/ еже по естеству выну изобличáти/ и прозревая имýщая свершитися.

Слово твое, мудростию срастворенное/ и Божиею благодатию преудобренное,/ радостию насыщает и веселием верных сердца,/ иже поют любовию:/ Отцев Боже, благословен еси.

Богородичен: Сердце мое, Дево Мати,/ в безместных деяниих яко окалях,/ надежды твердыя разве Тебе не познáх./ Темже скоро мя страстей тления исхитú/ и даруй ми ныне время на покаяние.

Песнь 8

Ирмос: Чýда преестественнаго / росодáтельная изобразú пещь óбраз:/ не бо, яже прият, палúт юныя, / яко ниже огнь Божествá Девы, / в Нюже внúде утрóбу./ Тем, воспевáюще, воспоем:/ да благословúт тварь вся Гóспода / и превознóсит во вся веки.

Направил еси человеков разум/ к пáжитем благодати святым,/ не забыл бо еси поющия ти,/ но преселúвся, в бранех помогáеши одолевáти враги./ Сего ради тя воспеваем, Порфирие,/ неизреченных хранителю, сосýде даров,/ и вкупе песнослóвим Христа во веки.

Пламенеющей Божиею любовию души твоея,/ неизглаголанных соделался еси таинник:/ Егоже бо издетска возлюбил еси,/ Тому присно прилепился еси, священнейше,/ твердо плоть порабóтив духу, и воспевáше:/ да благословит тварь вся Господа/ и превозносит во вся веки.

Вси, учения Порфирия приемше,/ приидúте с любовию,/ ныне время настá делания, празднования час,/ зане той ны созывает:/ поработаем убо, яко безсмертнии,/ нерадение и коснение прочь отметáюще,/ и яко умрети имýщии/ в мiре паки да поживем.

 Притяжáл еси Богом окормляемое сердце,/  зане художество обрел еси святое,/ егдá искушения зело обыдóша,/ обращая ум и помышления ко Господу любовию теплою,/ мудре преобúдел еси всякую кознь, вопия:/ да благословит тварь Господа/ и превозносит во вся веки.

Богородичен: Явилася еси чистейший Сосуд, Дево,/ всех Зиждителя приемши разумение,/ сего ради и Чертог показáлася еси всех Творца/ и огнеобрáзный Божий Престол;/ тем Твоя рабы управи, вопиющия:/ да благословит тварь вся Господа/ и превозносит во вся веки.

Песнь 9

Ирмос: Таинство странное вижду: Тáинство стрáнное вúжу и преслáвное:/ Небо – вертеп, Престóл Херувúмский – Деву,/ ясли – вместúлище,/ в нúхже возлеже Невместúмый – Христóс Бог,/ Егóже, воспевáюще, величáем.

Воспоúм вси честными Божественными песньми/ Порфирия слáвнаго,/ иже в Бозе знáмении испóлнь,/ в мiре жúтельствуя,/ мiра кроме пребысть яко безплóтен,/ премнóга воúстинну Божия знáмения явú.

Таинство странное вúжду и преславное:/ яко лучáми свет испущáяй/ лик твой сияяй/ и всего тя во славе,/ носящаго ризу светлу, Порфирие, и венец златый,/ имже тя Христос преукрасú.

Удобрú, отче, и испросú умиление,/ сокрушение и милость,/ бдение же и ко благúм взирáние,/ и просвещение Божественное,/ úмже богоугóден да соделаюся// Христу и Богу со Отцем же и Духом.

Людие, радостно да стецемся днесь,/ единомýдренно вси воспевáюще/ Порфирия память,/ иже совершенно во славе/ Престолу Божию ныне предстоит,/ Сего и молит о всех, да будут едино.

Богородичен: Спаса рóждши неизреченно Гóспода,/ небо сотворила еси вся сýщия на земли, Богородице:/ темже молим Тя,/ вкупе с Порфúрием богомудрым/жизнь мою Божественными молитвами онебесúте.

Светилен, глас 3.
Подобен: Свет неизменный, Слове:

В Кавсокаливы Свет несозданный приúде,/ в сердцы вселився Порфирия Божественнаго,/ сына света сего показа,/ им и мир осветил есть.

Слава, глас и подобен тойже.

Троичен: Превысший Свете миру,/ Сыне Отца нерожденна,/ Душе, сияяй в мире,/ Троице Единице, Боже мой,/ молитвами честнаго Порфирия поющия Тя спасай.

И ныне, глас и подобен тойже.

Богородичен: Радуйся, Светило миру,/ чистая и предобрая Невесто Творца и Бога моего,/ Еюже мир свобождается,/ божественнаго же Порфирия Радосте и Славо.

На Хвалитех: стихиры, глас 8.
Подобен: О преславнаго чудесе:

Отче Порфúрие преподóбне,/ память твою слáвную/ благоговейно славослóвяще,/ из глубины возсылáем/ Трóице поклонение/ и воспевáем тя Прослáвльшаго,/ и во святых Почивáющаго:/ молúся, святе,/ и нам даровáтися освящению/ и прегрешений оставлению// благохвáлящим тя.

Отче Порфúрие священне,/ яко жáждущая серна,/ возжадá душа твоя воды Духа,/ всеусердно претече/ во Святую гору Афóнскую/ идеже сотворúся послушáния сын:/ темже дар ти прозрения/ Троица низпослá, блаженне,// подвижника старца Дúмаса ради.

Отче богомýдре Порфúрие,/ пóстническими борении/ душу очúстив и просветúв,/ Божию благодать притяжáл еси,/ священства дар приял еси/ и со Ангелы вкупе послужúл еси,/ ныне же веселяся, святе,/ в Чертóзех Господня Света,// и нас поминай, воспевающих тя.

Отче богомýдре Порфúрие,/ чúстая твоя душа/ крил не имýщи,/ небесе и землú стяжевает постижение,/ еже зрети хотящая быти/ и сердец помышления выну открывáти известнейше:/ темже яко приял еси/ благодать небесную от Бога,// и нас помяни, богорáдованне.

Слава, глас 5:

Приидите, празднолюбцев собóри,/ рáдостно да торжествýим/ память богонóснаго отца,/ Порфирия Кавсокаливúйскаго:/ сей бо от юности Христа возлюбив/ и мiра красная оставив,/ удалúся бегая/в святоименное Афона жúтельство:/ идеже преподобных отцев усердию подражáя,/ пóдвигом украсúся/ и даровáний Духа испóлнися./ Повинýяся же Божественным знáмением,/ в мир обратúся,/ послужúв же Христу/ в лúце братий скорбящих,/ множество чудес сотворú,/и на путь покаяния и света/ мнóги  от тьмы преведе./Пóслежде, времени приспевшу,/ к безмолвия     поприщу возвратúся/ и дух предаде Гóсподеви/в месте святем,/ идеже и благодать улучú./ Сему убо да возопием:/ преподóбнейший отче Порфúрие,/ не остáви и о нашем просвещении просити,// почитающих тя.   

НА ЛИТУРГИИ

Блаженны от канона преподобнаго, песни 3-я и 6-я. Прокимен, глас 7: Честнá пред Гóсподем/ смерть преподобных Его. Стих: Что воздáм Господеви о всех, яже воздаде ми? Апостол к Галáтом, зачало 213. Аллилуия, глас 8: Блажен муж, бояйся Господа: Стих: Сильно на землú будет семя его. Евангелие от Матфея, зачало 43. Причастен: В пáмять вечную бýдет прáведник:

 

Перевод выполнен по изданию: Служба преподобному и Богоносному отцу нашему Порфирию Кавсокаливиту с молебным каноном и музыкальным приложением. Издание священного монастыря Хрисопиги, Ханья, 2014 г. Составлена последнейшим во иереях Евангелисом Г. Пахияннакисом, протопресвитером Вселенского Престола. Утверждена епархиальным Синодом Критской Церкви 27 февраля 2014 года.