Тропари и кондаки Грузинским святым

Публикация будет пополняться

Святым мучеником Бидзине, Элисбару и Шалве

Тропарь**, гл. 2:

Победоносцы Господни,/ блажéнна земля,/ напúвшаяся крóвьми вашими,/ и святы гробы,/ приúмшии телеса ваша,/ на пóприще бо в них врага нéмощна сотворúсте,/ и Христа Бога со дерзновением проповéдасте./ Того, яко Блага, молите// помúловати души наша.

Кондак**, глас 2:

Твердый и всесвéтлый лик мученик трех,/ Трисóлнечнаго Божества исповéдницы,/ на судúщи шáховом Тому взывáху:/ кровь и души нáша с телесы/ яко непорóчную жертву/ приносим Тебе, Владыко:/ в Небéсных Перворóдных Твоих ны сопричтú,// яко Бог Милостивый.

 Преподобному Гавриúлу Иверскому, Афонскому

Тропарь*, гл. 3.

Паче знáмений вéлиих/ добродéтели и труды твоя явúшася,/ преподóбне отче Гавриúле,/ тéмже Всевéдец Бог,/ вúдя твое крáйнее смирéние,/ тя чудесы обогатú./ Сегó ради óбраз Пресвятыя Богорóдицы,/ дúвно волнáми носúмый,/ яко посýху шéствуя, приял еси,/ Юже непрестáнно молú/ нам грехóв оставлéнию даровáтися// и спастúся душáм нáшим.

Преподобному и богоносному отцу нашему

Георгию Карслидису

Тропарь****, глас 4.

Подобен: Вознесыйся на Крест:

Умиления, молитвы немóлчныя,/  умерщвлéния плоти,/ безстрáстия, простоты и трезвéния/ явúвшаго нóвую зарю,/ воспоúм Геóргия,/ обúтели Вознесéнския постника и основáтеля,/ пéсньми Божéственными,/ сего ко Господу скорых мóлений// в нýждах взыскýющии.

Ин****, глас 1.

Подобен: Пустынный житель:

Божия благодáти рéку,/ богонóснаго Геóргия,/ и истóчника чудéс мнóгих/ восхвáлим, вопиюще:/  зиждúтелю Вознесéнския обúтели/ и грáда своегó застýпниче и хранúтелю,/ не престáй молúти Возвелúчившаго тя,/ отче преподóбне./  Слава прослáвльшему тя Христу,/ слава Освятúвшему тя,// слава новосиянных подвúжников скрижáль тя Показáвшему.

Кондак****, глас 2.

Агрúполя божéственную óтрасль,/ Ивéрии же честнаго насéльника,/ úже во грáде Дрáме/ подвизáвыйся яко безплóтен/ и освятúвый обúтель Вознесéнскую,// хранúтель нам буди, Геóргие.

Святому благоверному царю

Давиду Строителю (Возобновителю) Иверскому

Память 26 января/8 февраля

Тропарь***, глас 4.

Дúво, еже сотворил еси, Гóсподи,/ во святéм благовéрном царе Давиде,/ превышше есть разума словотвóрцев,/ яко превознéсл еси его/ úмене Твоегó ради,/ побéды взéмшаго на сарацúн/ одолéньми пречýдными,/ по отгнáнии же сих/ знáменьми вéлиими прослáвил еси;/ его же ходáтайством/ подáждь душам нáшим// вéлию милость.

Кондак***, глас 8.

Взбрáнному воевóде,/ непобедúмому Давиду/ и побóрнику непостыдному благочéстия,/ яко просвещéннии,/ пáствы его люди и грáды,/ хвалáми венец да сплетéм,/ предстáтельством своим свобождáюща от страстéй,/ и с весéлием тому да рцем:// радуйся, хранúтелю наш дóблий.

Преподобному Давиду Гареджийскому

Память 7 мая по ст. ст./ 20 мая по н.ст.

28 мая по ст. ст./ 10 июня по н. ст.

Тропарь, глас 4

Подвигов потом сраствореннаго потоками слез/ 

ныне в молении предстоиши Господеви нашему,/ 

яко слезами сеял и радостию пожинаеши плоды,/ 

в пустыне возрожденные./ 

О, Давиде, сияние мира// 

и предстателю душ наших.

Кондак, глас 8

От сирийских источников возшел еси, звездо пресветлая,/ 

и пустыню Гареджийскую сиянием Духа озарил еси;/ 

яко пришествием своим иноческий рай соделал еси,/ произрастив в пустыне словесный вертоград./ 

Сего ради не оставляй хранити его,/ 

Давиде возлюбленный.

Ин кондак, глас 4

От Междуречья взошел еси, звездо всесветлая,/ и прешел в пустыню Гареджи,/ и отонуду явлением твоим,/ яко рай, от насаждений святых/ прозябают насаждения словесныя,// 

о нихже не престай молитеся, Давиде блаженне.

Святых шести тысящ преподобномученик
Давидо-Гареджийских

Тропарь, глас 6:

Воскресения Христова/ явистеся истиннии свидетелие,/ преславнии преподобномученицы,/ отцы Давидо-Гареджийстии,/ темже, смерти не убоявшеся,/ безбожных мечем подклонисте выя своя,/ о страдальцы шеститысящечисленнии,/ молите и верно чтущим вас// Пасхи вечныя причаститися.

Кондак, глас 6:

Днесь, вернии, сугубо восторжествуем/ и радованию радование приложим,/ и Воскресению певаему Христову,/ страдальцев преподобных память совокупим,/ взывающе к ним:/ радуйтеся, славнии мученицы,/ радуйтеся, прешедшии смертию от смерти в живот,/ радуйтеся, яко молитвами вашими// совоскрешаете и души наша.

Молитва

О, небесныя граждане вышняго Иерусалима, преподобнии отцы наши, светлыя звезды пустыни Гареджийской, благоухание райское, облагоухайте церковь Иверскую молитвами и покровом вашим! Приявши от рук Подвигоположника мзду трудов ваших, оградите своим покровом и словесное стадо ваше от нашествия невидимых врагов, попирающих и убивающих души верных чад Православия! Отгоните от стада вашего нашествие нечестивых ересей и, предстоя Престолу всех Царя и Господа Иисуса, молитеся, да сподобит и нас предстательством вашим стояти одесную Его и вкупе с вами славословити Пречестное и Великолепное Имя Отца и Сына и Святаго Духа, ныне и присно и во веки веков. Аминь.

Святым мученикам Давиду и Константину

Кондак**, глас 2:

Цвети прекрáснии Сада Небеснаго,/

прозябáющии благоухáние всем концем/

и исцеление источáющии/

усердно прáзднующим пáмять вáшу,/

Давиде, непобедимый венценосче/

и Константине, оружниче доблий./

Хвáлящия вы бурь искушений избáвите/

и мольбáми вáшими//

мир подáйте душам нáшим.

Преподобному Евáгрию (Авагрию)

Иверскому, Мгвúмскому,

ученику прп. Шúо

Память 4 февраля ст. ст./ 17 февраля н. ст.

Тропарь*, глас 3:

Послушáнием вóле Бóжией,/ от премýдраго Шúо ти возвещáемей,/ зéмлю сéрдца твоегó/ плодонóсну содéлал еси/

и процвéл еси, яко шúпок прекрáсный, в пустыни,/ приснопéтый Евáгрие,/ Цéрковь веселя/ благоухáнием добродéтелей твоих./

Тéмже, плéвелы лукáваго/ из умá исторгáти нас научú,/

и помозú в послушáнии и смирéнии/ понé мáло тебе подражáти,/ вóлю Божию присно творúти//

и спастúся душáм нáшим.

Святому Евфимию,

исповеднику Иверскому

Память 20 января ст. ст./ 2 февраля н. ст.

Тропарь**, глас 4.

Бисеры многоценныя/ из глубины неведения исхитил еси/ 

и гласы ангелоподобными/ церковь Иверскую паки украсил еси,/ песен Божественных изобразителю,/ святый исповедниче Евфимие,// моли Христа Бога помиловати души наша.

Преподобному Илариону Грузину, Святогорцу

Тропарь****, глас 4.

Подобен: Скоро предвари:

На столпе в скитý,/ в безмóлвии мнóзе подвизáяся,/ Божéственною горя любóвию Христóвою,/ исполняеши ум зáповедьми Госпóдними,/ преподóбне Илариóне,/ сýщим во узах мúлостивно помогáя,/ и со Ангелы Богу / ныне воспеваеши:// свят, свят, свят еси, Господи.

Кондак****, глас 8.

Подобен: Взбранной:

Ивéрии óтрасль богочестúвую/ и Афóна пустынника богосвéтлаго/ прослáвим, вéрнии, священными хвалы:/ возлюбúв бо Илариóн житиé в Бозе,/ заключúся на столпе, веселяся,/ емýже и вопиéм:/ рáдуйся,// отче равноáнгельне.

 Преподобным Иоанну, отцу св. Евфимия, и Гавриилу Святогорцам

Кондак****, глас 2.

Превыше естества человéча/

просиясте пóдвиги вашими,/

и земная испóлнисте благочестивым писанием,/

и Ангели удивисте непорóчностью вашею,/

человéцы же подóбитися вам воздвизаете,/

яко всем дивныя показасте дéлы,/

отцы Афóнстии, просветителие миру всему.

Святой великомученице Кетеване (Кетеван) Кахетинской, царице

Тропарь**, глас 4:

Уязвлена рачением Божественным,/ раны многия восприяла еси/ и муки разнообразныя/ добле претерпела еси,/ темже улучила еси княжения в место/ Царствие Небесное,/ треблаженная Кетевано,/ моли Христа Бога// помиловати души наша.

Кондак****

Царица Небесная — царицу земную,/ о Ней пострадавшую,/ Себе усвояет и восприемлет:/ Дщерь Давидова, Непорочная Мариам —/ блаженную Кетевану от рода Давидова,/ делы явившую сродство свое,/ яже, украшенная мучений венцем,/ молится Ей присно // о всех нас.

Святому равноапостольному царю Мириану

Тропарь****, гл. 3.

Веселися днесь, княжество карталинское,/
в памяти святаго князя Мириана,/
собери чада твоя/
ко усердному молению Божией Матери,/
Яже Ниною избави тя/
прелести мрачныя,/
и, овча заблуждшее, тя обрете//
и ко Свету приведе.

Святым Мириану и Нане

Тропарь****, глас 4: 

Радуется царствие Карталинское/ в празднице вашем,/ блаженнии Мириане и Нано,/ яко заблуждение тьмы возненавидесте/ и убелистеся светом Божества по истине/ Нины знаменьми,/ еюже наставляеми бысте/ и люди ваша привели есте ко Христу,// Егоже молите о всех нас. Аминь.

Преподобному Шио Мгвимскому

Тропарь**, гл. 4.

Издéтска крылáт сотворúвся,/

добродéтельми упрáвил еси/ все житиé твое, богонóсе,/

и чудесы, Бóгом дáнными,/

о нарóде Иверúйстем подвизáлся еси,/

отонýдуже, зряще в тебе/ благодáти дáры духóвныя,/

слáвим Содéтеля, преподóбне Шúо./

И ныне кóсти твоя наги/ от пещеры Мгвúмския/

крыловосхóдно воздымáются ввысь/ заступáти вéрныя//

и исцеляти души нáша.

Святой мученице Шушанúке, царице Картли

Память 28 августа по ст. ст. / 10 сентября по н. ст.

Тропарь****

Мучений диадéму

прияла еси от супруга своего,

царице святая Шушанúко,

и преходящим цáрствием

стяжала еси Цáрствие Нескончаемое,

и ныне предстáтельница еси о нас

пред Женихом твоим Безсмéртным, Христом;

тéмже и восхваляем тя, блаженная.

Кондак****, глас 3:
Днесь рáдующеся людие иверúйстии в пáмяти твоей,/ 

царúце святая Шушанúко,/ 

и подвиг твоих множество похваляюще,/ 

просим у Христа ходáтайствы твоими/

 мирови мира//

 и душáм нашим вéлией мúлости.

 Без звездочек — взяты из Минеи или из утвержденных Синодом текстов.
      * Монахиня Макария, составление.
    ** Марина Алешина, перевод с древнегрузинского, под редакцией прот. Иосифа Зетеишвили или мон. Рахили.

  *** Перевод с древнегрузинского протоиерея Иосифа Зетеишвили.

**** Монахиня Макария, перевод с древнегреческого или древнегрузинского.