Тропари и кондаки святым преподобномученицам Бутовским

Память святыя мученицы Аполлинарии

Бутовския

(Тупицыной), 30 сентября 1937 г. ст. ст./ 13 октября н. ст.

Тропарь, глас 2:

Слово Евангельское сердцем объéмши,/ болящим служению/ всерáдостно себе предала еси,/ благолюбúвая Аполлинáрие,/ тéмже зря Христос/ истинное твое пред ближним смирение/ и зáповедем Своим послушание,/ даровá ти еже о Нем пострадáти./ Сего ради, милостивая,/ немúлостивно ятая и убиенная,/ грехóвныя наша язвы уврачуй// всемóщными молитвами твоими.

Кондак, глас 7:

Фиваиды сéверныя óтрасле,/ Цéркве Рýсския дивное процветéние,/ приимú от нас песнопений цветы,/ Аполлинáрие, Божия угоднице,/ мúлостию бо и долготерпением многим/ немощи и болезни ближних понесла еси,/тáко закон Христов испóлньши./ Тéмже, на земли Явúвыйся за милосéрдие/ и благоутрóбия Пучúна/ да подáст любóвию тя чтýщим/ исправление, и покаяние,/ и душевных стрýпов исцеление,// и спасéние душ наших.

Память святыя преподобномýченицы Евдокúи

Марфо-Мариúнския, Бýтовския

(Кузьминовой), +23 января 1938 г. ст. ст./ 5 февраля н. ст.

Тропарь, глас 3:

Марфы и Марúи дéлании/ Господу Воскрéсшему угодúвши,/ богомýдрая Евдокúе,/ мучúтелей отнюд не устрашúся/ и себé служúтельницу Спáсову исповéдала еси./ Тéмже, яко о úмени Его заклáнная,/ ныне в Церкви Тожествýющей/ вкýпе с преподобномýченицею Елисавéтою/ и сéстры обители твоея/ Ему предстоящи,/ не престáй молящися/ нам грехóв прощению даровáтися// и спастúся душам нáшим.

Кондак, глас 2:

Милосéрдия, и служéния стрáждущим,/ и болящих утешéния/ дóбрый óбраз нам являеши,/ áгнице словéсная,/ преподобномýченице Евдокúе,/ Марфо-Мариúнския обúтели многоплóдная óтрасле,/ тéмже, в Цáрствии Небéснем увенчáнная,/ испросú нам покаяния,/ и в служéнии блúжним укреплéния,// и спасéния душ наших.

Память святыя преподобномýченицы

Рафаилы Бýтовския

(Вишняковой), память 4 февраля ст. ст./ 17 февраля н. ст.

Тропарь, глас 6:

Стрáнническим шéствоваши путем,/ к Странствию Владычню ýмне восходящи,/ добродетели Евангельския/ крóтость, незлóбие, смирéние и чистотý,/ дивная Рафаúло, нам явúла еси/ и безбóжных посрамúла еси лютая стремлéния./ Темже, Вышния благодати приятелище,/ крепкодýшия сокрóвище,/ умолú нам покаяния достúгнути// и спастися душам нашим.

Кондак, глас 2:

Тя, безмóлвия дéлательницу,/ покаяния в молчáнии уст/ úстинную рачúтельницу,/ доблемýдренная Рафаúло,/ беззакóнницы лютии/ беззакóнну показáти всýе тщáхуся,/ и, хотяще возвестú тя к заколéнию,/ ко Отéчествию Небéсному возведóша./ Тéмже ныне нам сияеши/ на церковней тверди,/ путевóдною звездóю./ Моли Христа, Егоже возлюбила еси\ о почитающих тя.

Память святыя преподобномýченицы

Мстислáвы Бýтовския

(Фокиной), память +25 февраля ст. ст./ 10 марта н. ст.

Тропарь, глас 5:

Пóстническаго жития и молитвы/ úстинная рачúтельница явилася еси,/ благолюбúвая Мстислáво,/ дерзновéнно пред мучúтели рекýщи:/ в Бóга Триипостáснаго вéрую,/ и Томý Едúному послужúти желáю,/ прещéния же и гонéния вáша/ уповáния моего низложúти отнюд не возмóгут!/ Сему дерзновению Твоему дивящимся,/ и в Бýтове мощéм твоим покланяющимся/ молú в христиáнстем жúтельстве утвердúтися// и спастúся душáм нáшим.

Кондак, глас 3:

Стрáнствие во юдóли земнéй/ яко сон вменúла еси,/ всежелáнно себе Богу предáвши,/ благохвáльная Мстислáво,/ тéмже о нас умолú,/ понé мало в добродéтелех тебе подражáти,/ и богоугóдно путь жития совершúти,// и спастúся душáм нáшим.

Память святыя преподобномученицы

Анны Бутовския, яже во обители Алексеевстей

(Макандиной), память 1 марта ст. ст./ 14 марта н. ст.

Тропарь, глас 3:

Сéстрам в повáрне усéрдно служáщи,/ смирéнием и молчáнием добродéтели крыющи,/ Богу вельмú угодúла еси,/ во óбразе блúжних Ему послужúвшая/ и за Него мучения вéлия восприúмшая,/ тéмже и чáшу едúну воды/ благодеяние Себе Вменяющий/ увенчá тя венцы нетлéнными./ Егоже моли о нас,/ чтýщих труды и страдáния твоя,// во еже спастúся душáм нашим.

Память святыя преподобномýченицы

Екатерины Бýтовския,

яже во обители Всех скорбящих Радосте

(Константиновой), память 7 марта ст. ст./ 20 марта н. ст.

На Господи, воззвах стихиры, глас 4:

Подобен: Яко добля:

Страдáльчеством запечатлéла еси/ úноческия твоя пóдвиги,/ измлáда храм Божий возлюбльшая,/ и всякаго мятéжа мирскáго уклóньшаяся,/ и послушáнием, и покаянием/ дух мúрен стяжáла еси,/ егóже, премúрная мати, и нам испросú/ у Женихá Христá\ и Спáса душ нáших.

Мудре уразумéла еси/ словесá отéческая/ и сокрушéния сердечнаго бúсер/ притяжáла еси на селе покаяния,/ сим купýющи во искушéниих/ крéпость./ Тем моли, Екатерúно,/ вся Претерпéвшаго нашего ради спасéния,/ крéпость веры нам даровáти\ и спастú души наша.

Ко стопáма Спáса твоегó/молúтвою сердéчною/ непрестáнно припáдающи,/ посрамúла еси мучúтелей жестокосéрдие и злóбу,/ и в пóдвизе крéстнем/ диáвола низпровéргла еси,/ о úмени Иисýсове убиéнная./ Того о нас немóлчно моли,\ спастú и просветúти души нáша.

Слава, глас 6:

Послушлúвому даже до смерти Крéстныя/ послушáнием угодúла еси/ и на Крест возшлá еси/ поношéний, мук и заколéния,/ и венцéм сугýбым ныне украшáешися:/ преподóбия и страдáльчества./ Темже, мати Екатерúно,/ úстинная послýшнице Христóва,/ ныне услыши нас,/ грéшных срóдник твоих,/ память твою любóвию почитáющих,/ и моли даровáти нам душ очищéние,/ воли Бóжия взыскáние и исполнéние\ и вéлию и богáтую мúлость.

Тропарь, глас 3:

Яко крин посредé тéрний/ тако посредé нечéстия процвелá еси/ благосéрдием и чúстым житиéм,/ преподобномýченице Екатерúно./ Ты бо, зрящи обúтели разорéние,/ идéже в послушáнии и молитве подвизáшеся,/ душу свою во обитель Троице Пресвятей сотворúла еси,/ вéрность Женихý Небéсному являющи,/ и мучителей злобу неистовую посрамила еси/ смирением Христовым./ Егоже, любоблагáя, и нам испросú// у Бога мольбами твоими.

Кондак, глас 8.

Учéнии златоýстаго Игнáтия напаяема,/ покаяние и зрéние прегрешéний своих/ во основáние жития úноческаго, Евáнгельскаго,/ положила еси, Екатерúно премýдрая,/ в молчáнии же и смирéнии мнóзе,/ рáзумом во Христе и вéрою управляема,/ прошлá еси поношéний и мук/ тéсный и крéстный путь к Богу./ Темже взывáем ти:// рáдуйся, óбразе необорúмаго мýжества.

Память святыя преподобномýченицы

Натáлии Бýтовския, яже во обители Новодевичей

(Ульяновой), память 9 марта ст. ст./ 22 марта н. ст.

Тропарь, глас 4:

Пóтам трýдническим/ бóдренное сердце и трезвомыслие совокупúла еси,/ богослáвная преподобномýченице Натáлие,/ к Иисусу Сладчáйшему/ в скóрбех тяжких и гóрьких напáстех/ непрестáнно очи душéвнеи возводящи./ Тéмже и чтýщим тя помозú/ блúжнему якоже Христу слýжити,/ и Сему во исполнéнии заповедей Его слéдовати,// и от Него улучúти спасéние.

Кондак, глас 6:

Ни гонúтелей суровствó,/ ни обители Новодевичия разорение,/ исповедания твоего угасити не возмогоша,/ богомудрая Наталие,/ посреде бо злочестия/ храму Господню вседушно прилепляшеся,/ вопиющи псаломски:/ пою Богу моему, дондеже есмь./ Тем, о Нем заколенная,/ испроси и нам/ в заповедех Ему последовати// и спасение улучити.

Служба святым новомученикам Бутовским

Составитель монахиня Макария