Прп. Гавриилу (Ургебадзе) канон молебный

pdf

Канон молебный
преподобному и богоносному
отцу нашему

ГАВРИИЛУ САМТАВРИЙСКОМУ,
ИВЕРСКОМУ ЧУДОТВОРЦУ

Благословúвшу иерéю, нáчнем псалом 142:

Гóсподи, услыши молúтву мою, внушú молéние мое во úстине Твоей, услыши мя в прáвде Твоей. И не внúди в суд с рабóм Твоим, яко не оправдúтся пред Тобою всяк живый. Яко погнá враг дýшу мою, смирúл есть в землю живот мой; посадúл мя есть в тéмных, яко мéртвыя века. И уны во мне дух мой, во мне смятéся сердце мое. Помянýх дни дрéвния; поучихся во всех дéлех Твоих, в творéниих рукý Твоею поучáхся. Воздéх к Тебе рýце мои, душа моя яко земля безводная Тебе. Скóро услыши мя, Господи, исчезé дух мой; не отврати лица Твоегó от менé, и уподóблюся низходящим в ров. Слышану сотворú мне заýтра милость Твою, яко на Тя уповах; скажú мне, Господи, путь, воньже пойдý, яко к Тебе взях дýшу мою. Изми мя от враг моих, Господи, к Тебе прибегох. Научи мя творúти вóлю Твою, яко Ты еси Бог мой; Дух Твой Благúй настáвит мя на зéмлю праву. Имене Твоего ради, Господи, живúши мя; прáвдою Твоéю изведéши от печáли дýшу мою. И мúлостию Твоéю потребиши враги моя, и погубúши вся стужáющия душú моéй: яко аз раб Твой есмь.

Тáже: Бог Господь и явися нам:

Тропарь, глас 4:
Подобен: Вознесыйся на Крест:

Не остáви нас заступлением и помощию,/ преблаженне старче Гаврииле,/ ты бо смирением/ стяжал еси вышнюю благодать/ недуги отгоняти,/ к покаянию управляти./ Умоли Милостиваго Человеколюбца/ да простит нам многая согрешения/ и спасет души наша.

Слава Отцу и Сыну и Святому Духу: тóйже.

И ныне и присно и во веки веков. Аминь:

Не умолчúм никогдá, Богорóдице,/ силы Твоя глагóлати, недостóйнии:/ aще бо Ты не бы предстояла молящи,/ кто бы нас избaвил от толúких бед,/ кто же бы сохранúл до ныне свободны?/ Не отстýпим, Владычице, от Тебе:/ Твоя бо рабы спасaеши прúсно от всяких лютых.

Псалом 50: Помилуй мя, Боже:
И начинáем канон, глас 8

Песнь 1

Ирмос: Море огустúл еси,/ Погрузúвый со оружием гордаго фараона,/ и люди спасл еси немóкренно, Господи,/ и ввел еси я в Гору святыни, вопиющия:/ поим Тебе, Богу нашему, песнь победную/ яко прослáвися.

Преподобне отче Гаврииле, моли Бога о нас!

Мысленным Амалúком гонúмии/ и, Владыку преогорчúвше,/ дерзновением оскудéхом./ Но тецéм к твоему заступлéнию,/ и, тебе преподóбнеи рýце воздéвшу,/ на враги укрепляемся, отче.

Преподобне отче Гаврииле, моли Бога о нас!

Издéтска Евангелие всем сердцем возлюбльшаго/ и повеления его сотвóршаго,/ человека Божия Гавриила/ да почтим, из глубины взывáюще:/ помози нам, отче, ум и сердце/ на камени заповедей Христовых утвердúти.

Слава Отцу и Сыну и Святому Духу.

Слава Тебе, Трисóлнечный Царю,/ яко даровал еси нам таковáго спорýчника,/ во мрáце страстей звезду путеводную,/ в знóи печалей живительную отрáду,/ приснорáдостнаго Гавриила.

И ныне и присно и во веки веков. Аминь.

Нощестрáнствующим во юдоли земнéй/ Ты Луна еси высочáйшая, Дево,/ изливáющая тихий и ясный свет/ целомудрия и смирения,/ Сыну Твоему и Богу крóткаго послушания./ Путевóдствуй нас к сияющим Чертóгом Небесным.

Песнь 3

Ирмос: Утверждение мое, Спасе, еси,/ прибежище мое и сила,/ поколебавшееся сердце мое утверди в стрáсе Твоем,/ яко несть свят/ якоже Ты, Бог наш.

Преподобне отче Гаврииле, моли Бога о нас!

Испроси нам веру и разум úстинный,/ богомýдре отче Гаврииле,/ к тебе смирения ради твоего/ ухо Свое приклоняет/ Иже, рýце пригвоздив на Кресте/ весь разори страстный человéков разум.

Преподобне отче Гаврииле, моли Бога о нас!

Иисуса Сладчáшаго имя/ бысть тебе пища неоскудевáемая,/ темже нас, блаженне Гаврииле,/ в нерадéнии теплохлáднем почивáющия,/ к ревности о молитве непрестáнней пробуди.

Слава Отцу и Сыну и Святому Духу.

Рекл еси, богопросвещéнне подвúжниче:/ без Христа ничтоже есмы,/ тем Его не отлучáйтеся,/ храму Божию прилепляйтеся,/ яко да обрящете спасение.

И ныне и присно и во веки веков. Аминь.

Оле крúна благоухáннаго, дúвнаго,/ Гавриила богорáдованнаго,/ егоже в вертограде удела Твоего/ возрастила еси, Чúстая,/ яко да богомéрзкое страстей злосмрáдие/ от душ наших отгоняется.

 

Моли Бога о нас, преподобне отче Гаврииле, яко мы усердно к тебе притекаем, скорому помощнику и молитвеннику о душах наших.

Прúзри благосéрдием, Всепетая Богородице,/ на мое лютое телесé озлобление/ и исцелú душú моея болезнь.

Седален, глас 2:
 Подобен: Моление теплое:

Образ нам еси úстиннаго Божия слуги,/ преподóбне Гаврииле,/ житие бо твое в терепении мнóзе,/ в скóрбех, бедáх, теснотáх/ апостольски препровождáше,/ яко скорбя, присно рáдовашеся,/ яко нищ бе, а многия богатяше,/ яко ничтоже имея, а вся содержáше./Мы же, к сим взирáюще,/ недоумéем и поучáемся,/ и, немощь свою познавáюще,/ воспеваем тя и величаем.

Песнь 4

Ирмос: Богоносный Духом Святым/ просветúвся пророк Аввакум,/ в послéдняя Твое пришествие провидев, вопияше:/ внегдá приблúжитися летом, познáешися,/ внегдá приитú времени, явúшися./ Слава силе Твоей, Господи.

Преподобне отче Гаврииле, моли Бога о нас!

Недýжныя наша исцелú,/ немощныя от одра воздвигни,/ печáльныя утéши, труждáющияся укрепú/ ходáтайствы твоими,/ ты бо, святе, долготерпéния ради/ велие дерзновéние úмаши/ и благодать от Бога наипáче.

Преподобне отче Гаврииле, моли Бога о нас!

Приидúте ко Христу, велúции грéшницы,/ яко молитвами, постами и покаянием/ и Таин святых Причащéнием/ мóщно есть не тóкмо спасение,/ но и святость улучúти:/ тако взывáше, отче Гаврииле.

Слава Отцу и Сыну и Святому Духу.

Горы и холми гордости моея/ преложú в долину смирения,/ в нéйже да красуются цвéти/ воли своея отложения,/ себé блúжняго ради отвержения/ и любвé, юже нам заповедал еси,/ приснопамятный отче.

И ныне и присно и во веки веков. Аминь.

Ангелу внезáпу предстáвшу Ти,/ се, раба Господня, крóтостию реклá еси, Госпоже,/ тем и ны научи/ воли Божия взыскáти,/ и сей выю свою подклоняти,/ и к сей сердцем сокрушéнным выну устремлятися.

Песнь 5

Ирмос: Мрак души моея разженú,/ Светодáвче Христе Боже,/ началорóдную тьму изгнав бездны,/ и даруй ми свет повелений Твоих, Слове,/ да, ýтренюя, славлю Тя.

Преподобне отче Гаврииле, моли Бога о нас!

Златострýйная река смирéния твоего/ вся концы богомýдрыми помыслы напояше,/ ты же, святче, вся привлекая, взывáше:/ аще грешника себе мнúши,/ брат мой воúстинну нарицáешися.

Преподобне отче Гаврииле, моли Бога о нас!

Дóлу во гнои злонрáвия ми лежáщу,/ приклонúся, любосвéтле Гаврииле,/ и заступлéнием ранам обязáние даждь,/ и фимиамом твоих молитв/ ускорú умúлостивити Господа.

Слава Отцу и Сыну и Святому Духу.

Яко чада твоя, боголюбче,/ припáдающая ти приимú,/ и, яко над страстьмú воцарúвыйся,/ ныне во Свете зря Всецаря,/ не престáй припáдати подножию ногу Его,/ поминая тя поминáющия.

И ныне и присно и во веки веков. Аминь.

К часу страшному, последнему, взирая, ужасáюся./ Но предстáни ми тогда, Владычице,/ буди Мост над рóвом обстояния/ и Стезя непреткновéнна восхождéния,/ и молю: спасú мя, Пречистая.

Песнь 6

Ирмос: Превзыдóша главу мою беззакония моя,/ яко тяжкое бремя, на мя обременúвшаяся,/ во отчаяния глубины низвлачáт мя,/ но прежде даже погрязнути ми,/ Господи, спаси мя.

Преподобне отче Гаврииле, моли Бога о нас!

Молитва Ионе пророку/ кита дом сотворú,/ ты же в скорби яко той, вопияше,/ непрестанно моляся в нощú и во дни,/ и плачем блажéнство улучил еси,/ богозрúтельне отче.

Преподобне отче Гаврииле, моли Бога о нас!

Православие проповéдуя,/ дерзновения испóлнився/ богомерзкое поклонение попалúти,/ того ради муки тяжкия приял еси,/ темже нас, маловерных,/ на камени веры утверди.

Слава Отцу и Сыну и Святому Духу.

Похвала твоя терпение с любóвию,/ воздержáние от всех житéйских вещей,/ и смиренномýдрие, и сердца простотá:/ ты бо нам зерцáло сотворился еси, отче,/ еже кáко подобает/ Бога и блúжняго возлюбúти.

И ныне и присно и во веки веков. Аминь.

Аще и на всякий час претыкáющихся,/ обáче к самоукорéнию скоро текýщих,/ матерним благоволением объéмлеши,/ сего ради взыщи нас, погибáющих,/ и к покаянию непрестáнному обрати,/ Мати Бога Вышняго.

 

Моли Бога о нас, преподобне отче Гаврииле, яко мы усердно к тебе притекаем, скорому помощнику и молитвеннику о душах наших.

Прúзри благосéрдием, Всепетая Богородице,/ на мое лютое телесé озлобление/ и исцелú душú моея болезнь.

И поминает иерей.

Кондак, глас 3:

Явился еси в стране Иверстей/ яко древо благосеннолúственное,/ отче премúрне Гаврииле,/ под сéнию бо молитв твоих/ вéрнии радостию привитáют,/ и, напáстьми обуревáемии, крыются,/ варом же страстей палúмии/ прохлаждéние улучáют,/ благодáрно взывающе:/ дивен еси во святых Твоих/ Препрослáвленный Боже.

Прокимен, глас 4: Честна пред Господем смерть преподобных Его.

Стих: Терпя потерпех Господ и внят ми:

От Матфея святаго Евангелия чтение.

Речé Господь Своим учеником: вся Мне преданá суть Отцем Моим: и никтóже знает Сына, токмо Отец: ни Отца кто знает, тóкмо Сын, и емýже аще вóлит Сын открыти. Приидите ко Мне, вси труждáющиися и обременéннии, и Аз упокóю вы: возмúте иго мое на себé и научúтеся от Менé, яко кроток есмь и смирéн сердцем, и обрящете покой душáм вашим, иго бо Мое благо и брéмя Мое легкó есть.

Слава Отцу и Сыну и Святому Духу.

Молитвами преподобнаго Гавриила,/ Мúлостиве, очисти/ множество согрешений наших.

И ныне и присно и во веки веков. Аминь.

Молитвами Богородицы,/ Мúлостиве, очисти/ множество согрешений наших.

Помилуй мя, Боже,/ по велицей милости Твоей и по множеству щедрот Твоих/ очисти беззаконие мое.

Стихира, глас 6:

Ко всечестному твоему óбразу,/ скоропослýшниче, отче Гаврииле,/  грéшнии, притекáюще,/ многоразлúчныя дáры приемлем,/ ты бо присно тóчиши/ недужным здрáвие,/ печальным рáдование,/ обуреваемым страстьмú укреплéние,/ и всякое полезное исполняеши прошение,/ моли Христа Бога,/ да спасет души наша.    

Тáже иерей: Спаси, Боже, люди Твоя:
Лик: Господи, помилуй: 12 раз.

Песнь 7

Ирмос: От Иудеи дошéдше, óтроцы/ в Вавилоне иногдá/ верою Трóическою пламень пéщный попрáша, поюще:/ отцев Боже, благословен еси.

Преподобне отче Гаврииле, моли Бога о нас!

Бедáми и искушéньми погружáемся/ аки в пучúну птица безкрылая,/ но ты, скоропослýшне отче,/ быстрообрáзно руку помощи простри/ и буди нам в напáстех ходатай/ у Человеколюбца Владыки.

Преподобне отче Гаврииле, моли Бога о нас!

Осуждéние есть рóждие глупости/ и тягчáйшая язя душевная,/ тако учáше, богоглáсе,/ да сего греха великаго/ яко огня отбежúм,/ повеление Христово поминáюще.

Слава Отцу и Сыну и Святому Духу.

Малодушных нас в недýзех и озлоблéниих/ укрепи, адамáнте терпения, Гавриúле,/ и настáви в покаянии úстиннем/ тéпле взывати:/ праведен еси во всех, яже сотворил еси нам,/ препéтый и препрославленный Боже.

И ныне и присно и во веки веков. Аминь.

Рождество Твое, Пренепорóчная,/ в нéмже Дева пребылá еси,/ воспевáют выну Ангели./ Темже дéвам Ты Покров и Рáдование,/ и Стена, и Утверждéние/ руце к Тебе простирающим.

Песнь 8

Ирмос: Победители мучителя и плáмене/ благодатию Твоею бывше,/ заповедем Твоим зело прилежáще,/ отроцы вопияху:/ благословите, вся дела Господня Господа.

Преподобне отче Гаврииле, моли Бога о нас!

Яко священник и раб Господень/ выну благословляше Господа,/ настáвниче непрелéстный ко спасению./ Помози нам ропота огребáтися,/ благодарению же выну прилежáти.

Преподобне отче Гаврииле, моли Бога о нас!

Аще и едúнаго человека прéзриши,/ Царствия Небеснаго далéче еси;/ тако ты глагóлаше верным, преслáвне,/ матери добродéтелей научая,/ ейже и поющия тя настави.

Слава Отцу и Сыну и Святому Духу.

Нищ и убог есмь аз,/ и во гресéх от юности моея./ Ты же, о Троице Святая,/ Отче щедрот, Искупителю Сыне и Дýше Благий,/ молитвами угодника Твоего Гавриила помилуй мя!

И ныне и присно и во веки веков. Аминь.

Иоаким и Анна ныне радуются,/ еже радуйся от Ангела Приúмшую рождше,/ Яже мúрови Радость прозябé/ в потребление клятвы дрéвния/ и всем от смерти вéчныя во избавление.

Песнь 9

Ирмос: Таин еси, Богородице, рай,/ невоздéланно возрастúвший Христа,/ Имже Крестное Живоносное на земли насадúся древо,/ тем, ныне возносúму,/ покланяющеся Ему, Тя величаем.

Преподобне отче Гаврииле, моли Бога о нас!

Мудрость сердце твое просвещáше,/ éюже безбожия мрак расточáше,/ на богоборцы мýжески дерзая,/ тем и нам правило веры содéлася,/ исповéдниче приснопáмятне. 

Преподобне отче Гаврииле, моли Бога о нас!

Якоже Апостол любвé и Богослов,/ при кончине, отче Гаврииле, поучáше:/ Бога и блúжняго всем сердцем возлюбите,/ да не безплóдно житие ваше явится./ Ныне свыше нам помозú/ об исполнении сих глаголов потщáтися.

Слава Отцу и Сыну и Святому Духу.

Не престáй молением нáшим внимая,/ руце за ны ко Господу воздевáя,/ о благосéрде отче,/ испрошáя нам оставления грехов и покаяния,/ яко да Христу прилепúмся.

И ныне и присно и во веки веков. Аминь.

Яко Матерь Милостивая,/ Иверскую и Русскую страны/ иконами Своими ущедряеши,/ благодáть от них обильно точáщи./ Мы же, сия любезно лобызáюще,/ из глубины немóлчно вопием:/ спаси ны, Пречистая.

Тáже: Достойно есть:

Молитва

О преподóбне и богонóсне отче наш Гаврииле! Ты, любвé ради Божия лжеимéнный разум мiра сего отложúв, мудрость небесную притяжáл еси и многим путевóждь ко спасению сотворился еси, Щедродáвцу милостию последуя и к помощи немощствýющим простирáяся. Ныне же, в Чертóзех Небесных ликовствýя, тя призывающих не оставляеши, но скоро чудеса и исцеления подаéши. Вонми ныне нам, на заступлéние твое уповáющим и помощи твоея просящим. Умоли Мúлостиваго Господа даровати нам грехóвнаго жития исправление, в вере утверждение, мир, единомыслие и братолюбие, к молитве и зáповедем Христовым тщание. Наипаче же кончины благúя, непостыдныя и мúрныя да сподобит Он нас, во еже с тобою и всеми святыми восхваляти Его, в Троице слáвимаго Бога, Отца и Сына и Святаго Духа, ныне и присно и во веки веков. Аминь.

Ина, о тяжце болящем

О угодниче Божий, óбразе кротости и милосéрдия, преподобне отче Гаврииле! Руце твои сущим в болезни лютей послужúша и сих стрýпия гнойная обязáше и исцелúше. Тем, таковою твоею любóвию к ближнему назидáеми, молим тя усердно: болящему нашему (имярек) в скорби его велúцей ослáбу, отрáду и духовное утешение даждь, наипаче же в терпении и благодарении укрепи, яко да недуг его к пользе душевней, спасению и будущей несказáнней радости обратится. Нам же, ему служащим, испроси у Всещéдраго Бога в трудéх радéния, воли своея отложения и благосéрдия, яко да Богу угодны содéлаемся и милование стяжем, грехов же многих прощение да улучúм, и вкупе с тобою о сем благодарственная да воспоúм Единому Богу нашему, Отцу и Сыну и Святому Духу во веки веков. Аминь.

Величание:

Ублажаем тя,/ преподобне отче Гаврииле,/ и чтим святую память твою,/  наставниче монахов/ и собеседниче Ангелов.