Канон молебный преподобному Никифору Прокаженному

Канон молебный pdf >>

Тропарь, кондак, житие >>

Служба

Канон молебный
преподобному и богоносному
отцу нашему

НИКИФОРУ ПРОКАЖЕННОМУ, ЧУДОТВОРЦУ

Творение монахини Исидоры

Благословúвшу иерéю, нáчнем псалом 142:

Гóсподи, услыши молúтву мою, внушú молéние мое во úстине Твоей, услыши мя в прáвде Твоей. И не внúди в суд с рабóм Твоим, яко не оправдúтся пред Тобою всяк живый. Яко погнá враг дýшу мою, смирúл есть в землю живот мой; посадúл мя есть в тéмных, яко мéртвыя века. И уны во мне дух мой, во мне смятéся сердце мое. Помянýх дни дрéвния; поучихся во всех дéлех Твоих, в творéниих рукý Твоею поучáхся. Воздéх к Тебе рýце мои, душа моя яко земля безводная Тебе. Скóро услыши мя, Господи, исчезé дух мой; не отврати лица Твоегó от менé, и уподóблюся низходящим в ров. Слышану сотворú мне заýтра милость Твою, яко на Тя уповах; скажú мне, Господи, путь, воньже пойдý, яко к Тебе взях дýшу мою. Изми мя от враг моих, Господи, к Тебе прибегох. Научи мя творúти вóлю Твою, яко Ты еси Бог мой; Дух Твой Благúй настáвит мя на зéмлю праву. Имене Твоего ради, Господи, живúши мя; прáвдою Твоéю изведéши от печáли дýшу мою. И мúлостию Твоéю потребиши враги моя, и погубúши вся стужáющия душú моéй: яко аз раб Твой есмь.

Тáже: Бог Господь и явися нам:

Тропарь, глас 4:
Подобен: Вознесыйся на Крест:

Плóти твоея прокажéние/ мужемýдренно, яко Иов,/ претерпел еси Никúфоре,/ ризу же души твоея/ светле очúстил еси,/ совершéнне же на лéствицу добродéтелей восшéд,/ подвиги твоими/ жúтельства Ангельскаго достúже,/ непрестáнно Богу поя:/ Тебе слава подобáет,\ Трóице Единосýщная.

Слава Отцу и Сыну и Святому Духу: тóйже.

И ныне и присно и во веки веков. Аминь:

Не умолчúм никогдá, Богорóдице,/ силы Твоя глагóлати, недостóйнии:/ aще бо Ты не бы предстояла молящи,/ кто бы нас избaвил от толúких бед,/ кто же бы сохранúл до ныне свободны?/ Не отстýпим, Владычице, от Тебе:\ Твоя бо рабы спасaеши прúсно от всяких лютых.

Псалом 50: Помилуй мя, Боже:
И начинáем канон, глас 1, егоже краегранéсие:
Радуйся, Никифоре, прокажéнных новая слáва.

Песнь 1

Ирмос: Воду прошéд, яко сýшу,/ и егúпетскаго зла избежáв,/ израильтянин вопияше:/ Избáвителю и Богу нашему поúм.

Преподобне отче Никифоре, моли Бога о нас!

Благодáти чистый сосýд,/ паче снега убелéнна душéю,/ прокажéннаго Никúфора/ приидúте вси чистéйшими пéсньми да возвелúчим.

Преподобне отче Никифоре, моли Бога о нас!

Любвé напечатлéние свящéннейшее,/ вéры путь скончáвшаго мýжески,/ надéждею вышняго Цáрствия,/ ныне Никúфора прокажéннаго да ублажúм.

Слава Отцу и Сыну и Святому Духу.

Пóты преподóбнаго твоего борéния/ дýшу божéственну, Никифоре, úстинно сотворúв,/ злáта светлéйшу,/ к Богу рýце воздевáл еси.

И ныне и присно и во веки веков. Аминь.

Глагóлы неизречéнныя Гавриúловы слышавши,/ Отроковúце Пресвятáя,/ благопослýшно мúрови Бога родила еси,/ клятву же Евину упразднúла еси.

Песнь 3

Ирмос: Небеснаго круга Верхотвóрче, Господи,/ и Цéркве Зиждúтелю,/ Ты менé утверди в любви Твоей,/ желаний Крáю, верных Утверждéние,/ Едине Человеколюбче.

Преподобне отче Никифоре, моли Бога о нас!

От Крита возшéл еси,/ якоже новосиянное солнце,/ всю же землю зарями жительства твоего/ благолéпно обновúл еси,/ сыне свéта, Никúфоре,/ и помрачéния стрáстнаго всякаго разрешáеши.

Преподобне отче Никифоре, моли Бога о нас!

Смысленно монáшескую стезю ýзкую совершил еси,/ во всяческом воздержáнии жúтельствуя, всеблажéнне,/ и бесплóтных ликóв/ во плоти достúг, Никúфоре,/ воúстинну возвеличил есú/ схиму, образ равноáнгельный.

Слава Отцу и Сыну и Святому Духу.

Исцелéний Имеяй безмéрную бéздну,/ и в недýзе Наказуяй ихже яко непорóчная чáда приемлет,/ Христóс плоти твоея прокажéние, Никúфоре,/ даровá любвé во утверждéние.

И ныне и присно и во веки веков. Аминь.

Господоименúтая Отроковúце,/ мира всего Владычице,/ душу мою прегрешéньми порабощéнную/ матерними Твоими мольбами/ покажú страстей превышшу,/ к пéрвой слáве моей пáки возвéдши.

Уврачýй наша страсти молитвами твоими, Никúфоре,/ понéсший мýжески/ плóти прокажéние,/ к совершéнному испытáнию терпéния.

Прúзри благосéрдием, Всепетая Богородице,/ на мое лютое телесé озлобление/ и исцелú душú моея болезнь.

Седален, глас 2:
Подобен: Моление теплое:

Муку вéлию прокажéния претерпéл еси/ великодушно и сильною волею,/ Бога прославляя, Никифоре,/ пéсне рáдованная,/ и величая устнáми непорочными,\ божественную непрестáнно чистоту.

Песнь 4

Ирмос: Услышах,Господи,/ смотрéния Твоего таинство,/ разумéх дела Твоя/ и прослáвих Твое Божество.

Преподобне отче Никифоре, моли Бога о нас!

Наслаждéния плоти,/ во всяческом воздержании жúтельствуя, умертвил еси,/ дух же Божественно оживил еси.

Преподобне отче Никифоре, моли Бога о нас!

Тезоимéн звáнию небéсному, блаженне,/ содéлався, Никúфоре,/ одолел еси полцы вси чуждáго.

Слава Отцу и Сыну и Святому Духу.

Очес ослеплéние терпя, отче Никифоре,/ внутрь себе зряше/ блистания Божия Духа,/ и сияющих лучей свет неприступный.

И ныне и присно и во веки веков. Аминь.

Речения исполняются пророческая/ на Тебе, Всепéтая,/неискусомýжно бо во чреве понеслá еси/ Егоже дрéвле сúи предвозвестúша.

Песнь 5

Ирмос: Просветú нас повелении Твоими, Господи,/ и мышцею Твоею высокою/ Твой мир подáждь нам, Человеколюбче.

Преподобне отче Никифоре, моли Бога о нас!

Утвердúл еси ум/ на кáмени Господа твоего, Никúфоре,/ тем пребыл еси тверд, якоже адамáнт,/ болéзни не ужасáяся.

Преподобне отче Никифоре, моли Бога о нас!

Прокажéние плóти яко Иов/ пренéсл еси терпелúвно,/ тем сияеши, Никúфоре, душéю/ паче злáта и сребрá многоцéннаго.

Слава Отцу и Сыну и Святому Духу.

Возложúл еси, Никúфоре,/ на Бога надéжду свою,/ сирóт и вдов Застýпника/ отеческаго ради мúлования,/ от Негоже обретáше вспоможéние.

И ныне и присно и во веки веков. Аминь.

Столп непристýпен на враги еси, Владычице,/ устремляющися на того ухищрéния,/ яко Рождшая Имущаго силу неисчéтную.

Песнь 6

Ирмос: Молитву пролию ко Господу/ и Тому возвещý печáли моя,/ яко зол душа моя испóлнися/ и живот мой аду приблúжися,/и молюся, яко Иона:/ от тли, Боже, возведи мя.

Преподобне отче Никифоре, моли Бога о нас!

Укрепúвся Божиею благодáтию/ на стрáсти дóльния, Никифоре,/ нéмощь плоти твоея приял еси,/ яко дарование милости от Господа,/Иже человеком жáждет спасения/ ради щедрóт неизчéтных.

Преподобне отче Никифоре, моли Бога о нас!

Яко светúльника тя Троицы познáхом, Никúфоре,/ на горе утверждéнна,/ и всем рáдостно разливáюща,/ сияние и блещáние Духа,/ мглу страстéй расточáющее,/ и веселящее землú вси концы.

Слава Отцу и Сыну и Святому Духу.

Победил еси врáжия возношéния, Никúфоре,/ смирéнием твоим Божéственным,/ яко душéю благоразýмие прял еси,/ тéлом же мýки и язвы,/ и содéлался еси всеúстинно/ снега безмéрно белéе.

И ныне и присно и во веки веков. Аминь.

Утроба твоя святая/ содéлася, Марие, небес шúрши,/ яко Бог в ню вселúся,/ Егоже небесная не вместúша предéлы,/ Сего мáтерски моли / стрáстныя мя разрешúти печáли.

Уврачýй наша страсти молитвами твоими, Никúфоре,/ понéсший мýжески/ плóти прокажéние,/ к совершéнному испытáнию терпéния.

Прúзри благосéрдием, Всепетая Богородице,/ на мое лютое телесé озлобление/ и исцелú душú моея болезнь.

И поминает иерей.

Кондак, глас 2:
Подобен: Предстательство христиан:

Недýга узкий путь прошéл еси, Никúфоре,/и всячески последовал еси Владыце,/ яко послушлúвый и достойный сын,/ úго же Того благóе и бремя лéгкое/ на рáмех понéсл еси,/ тéмже ликýя возшéл еси/ к славы вéчныя покою красному,\ радостно веселяся.    

Прокимен, глас 4: Честна пред Господем смерть преподобных Его.

Стих: Терпя потерпех Господ и внят ми:

От Матфея святаго Евангелия чтение.

Речé Господь Своим учеником: вся Мне преданá суть Отцем Моим: и никтóже знает Сын, токмо Отец: ни Отца кто знает, тóкмо Сын, и емýже аще вóлит Сын открыти. Приидите ко Мне, вси труждáющиися и обременéннии, и Аз упокóю вы: возмúте иго мое на себé и научúтеся от Менé, яко кроток есмь и смирéн сердцем, и обрящете покой душáм вашим, иго бо Мое благо и брéмя Мое легкó есть.

Слава Отцу и Сыну и Святому Духу.

Молитвами преподобнаго Твоего Никифора,/ Мúлостиве, очисти/ множество согрешений наших.

И ныне и присно и во веки веков. Аминь.

Молитвами Богородицы,/ Мúлостиве, очисти/ множество согрешений наших.

Помилуй мя, Боже,/ по велицей милости Твоей и по множеству щедрот Твоих/ очисти беззаконие мое.

Стихира, глас 6:

На лéствицу небесную добродéтелей, Никúфоре,/ пóмыслом богомýдрым/ и душéвною твéрдостию возшéл еси,/ яко Иов бо ношáше/ плоти прокажéние и очес слепоту,/ язвы и стрýпы, и всякаго ýда озлоблéние,/ к Вышним же вознесен,/ вся Небесных узрéл еси,/ добрóту и слáву,/ юже Господь угóтова Бог/ сотворяющим выну Его заповéдания.

Тáже иерей: Спаси, Боже, люди Твоя:
Лик: Господи, помилуй: 12 раз.

Песнь 7

Ирмос: От Иудеи дошéдше, óтроцы/ в Вавилоне иногдá/ верою Трóическою пламень пéщный попрáша, поюще:/ отцев Боже, благословен еси.

Преподобне отче Никифоре, моли Бога о нас!

Непрестáнную стяжал еси молитву,/ яко делание в житии превосхóднейшее,/ éюже с Богом бесéдуеши,/ ангельскому жительству подражáя,/ отцев Боже, вопия,  благословен еси.

Преподобне отче Никифоре, моли Бога о нас!

Упрáвлен, блаженне, от святáго Анфúма,/ прекрáсно на Хиóсе совершúл еси подвúжнический путь,/ и тогó победы вéлия, Никúфоре, описáл еси,/ тем венцы от живонóсныя деснúцы восприял еси.

Слава Отцу и Сыну и Святому Духу.

Возсылая Божéственныя/ молитвы твоя, Никúфоре, ко Гóсподу,/ полýнощи на воздýх возшéл еси,/ изумлéния ученикá испóлнив,/ тя узрéвшаго Евмéния,/ с нúмже пéние Богу принóсиши во вéки.

И ныне и присно и во веки веков. Аминь.

Мáнны тя стáмна воúстинну предъявляше,/ Дево Мати Чистая,/ во чрéве бо Твоем сохранúла еси Хлеб жизни Небесный, Христа,/ души верных препитáющий неизречéнно.

Песнь 8

Ирмос: Царя Небеснаго,/ Егоже поют вóи Ангельстии,/ хвалите и превозносúте во вся веки.

Преподобне отче Никифоре, моли Бога о нас!

Словесы твоими Божéственными/ и поучéнии мýдрыми/ душáм скорбящих сладкое утешéние/ предлагáеши, Никифоре.

Преподобне отче Никифоре, моли Бога о нас!

Нестяжáния тя сокрóвище, Никифоре,/ вéрное и велие стяжáхом,/ яко сердцем нищ содéлался еси, блажéнне.

Слава Отцу и Сыну и Святому Духу.

Далéче сущая/ аки блúжняя зряше,/ душéвныма очúма, Никифоре,/ яко Божественным прозрением украсúлся еси.

И ныне и присно и во веки веков. Аминь.

Преиспещрéна Божéственню слáвою, Дéво,/ Царю Небéсному одеснýю предстáла еси/ яко Владычица мира.

Песнь 9

Ирмос: Воистинну Богородицу,/ Тя исповéдуем,/ спасеннии Тобою, Дево Чúстая,/ с Безплотными лики Тя величающе.

Преподобне отче Никифоре, моли Бога о нас!

Легце úго прокажéния тягчáйшаго/ о Никифоре, понéс,/ во град Божий иже свобóдь есть, прешéл еси,/ лéгце воскриляемь. 

Преподобне отче Никифоре, моли Бога о нас!

Сéмя, Никифоре, евáнгельское,/ в добраго и благаго сердца твоего земле воздéланное,/ многоплóден клáс сотворú.

Преподобне отче Никифоре, моли Бога о нас!

Светúльнику души твоея испóлнену, Никифоре,/ терпения елéем,/ Жених Христос, тя лúку мудрых дев сопричтé.

Слава Отцу и Сыну и Святому Духу.

Рáка мощéй твоих точит, Никúфоре,/ Утéшителя благодáть и благоухáние жизни/ благоговéйно приходящим к ней всегда.

И ныне и присно и во веки веков. Аминь.

Яко луна, Богородице, ярчáйшая/ прозябáеши мúрови свящéнный свет,/ яко рóждшая славы велúкое Солнце.

Тáже: Достойно есть:

Величания:

Яко да тя блаженства на Небесéх/ причастника тя сотворит,/ Владыка раны и печали прокажéния/ в земнéй юдóли ти дадé, Никúфоре,/ яко Отец благоутрóбный.

Прáвило тя лучшее смиренномýдрия познáли есмы,/ терпения зерцáло,/ бдения столп, терпения дéлателя,/ молитвы же, Никифоре, велúкаго учителя.

Укрепився пéрвее, яко Иов,/ в терпении, Никифоре, болезней,/ сего ради ныне с ним веселúшися вечно/ неизречéнным богозрéнием, величаемый.

Всюду христолюбцев божественное множество,/ Христова любúмца Никúфора ныне прокажéннаго,/ пéсньми хвалебными да украсúм достойно,/ яко небéснаго терпения борца превосхóднейшаго.

Яко спелая виноградная гроздь,/ в точúле прокажéния, Никифоре,/ исцежáеши вино добродéтелей божéственное,/ веселящее сердцá восхваляющих тя. 

Жезл силы Божия, Никифоре, имея, яко посох крéпок,/ мимоходяше твердо тесноту житейскую/ грядый к Божественных Чертóгов широтé прострáнней.

Яко наковальня пребывая терпéния,/ непреклóнен показался еси, Никифоре, во озлоблéниих,/ и в кýзнице испытан болéзней,/ злата блистáеши всячески светлее.    

 

Днесь силы Ангельстии/ радуются зрéти/ Никифора Божéственную душу,/ Престолу Владычню с ними предстоящую/ и слáвою осиянную чистоты.

Ублажаем тя,/ преподобне отче Никифоре прокажéнный,/ и чтим святую память твою,/ настáвниче монахов/ и собесéдниче Ангелов.

Тáже: Величание святому храма.
Трисвятое: по Отче наш:

Тропарь, глас 1:
Подобен: Пустынный жúтель:

Никúфора преподóбнаго прокажéнаго борéнием/ и éже в пóдвизех мýжеству/ удивúшася Ангели,/ яко другúй бо Иов/ болéзнная претерпé, славя Бога,/ ныне же слáвою увенчавáется от Него,/ чудес раздаянием./ Радуйся, монахов настáвниче,/ радуйся, человéком укреплéние,/ радуйся, благоухания обрáдование\ изливáяй от мощей твоих.

Тáже сия:
Стихира, глас 2:
Подобен: Егда от древа:

Рáдуйся, терпéния страстотéрпче,/ утешéния светúльниче,/ надежды божественный образе,/ веры напечатлéние,/ любвé исполнéние,/ молитвы учúтелю,/ прáвило воздержания,/ богатство многолюбéзное чистоты./ Прокажéния пéщию испытан,/ сияеши, Никифоре, мúрови\ злáта предúвно светлéе.

Владычице, прими молúтвы раб Твоих/ и избави нас\ от всякия нужды и печали.

Все уповáние мое на Тя возлагаю,/ Мати Божия,/ сохрани мя под кровом Твоим.

Молитвами, Господи, всех святых Твоих и Богородицы/ Твой мир даждь нам/ и помилуй нас,\ яко Един милосерд.

От всяких бед рабы Твоя сохрани,/ благословенная Богородице,/ яко да Тя славословим,\ Надежду душ наших.

Молитва

О святый угóдниче Божий, преподóбне отче наш Никифоре прокажéнный! Подвигом добрым подвизáвся на земли, восприял еси на Небесéх венец правды, егóже уготовал есть Господь всем любящим Его. Тéмже, взирáюще на твой святый образ, рáдуемся о преслáвнем скончании жительства твоего и чтéм святую память твою. Ты же, предстоя Престолу Божию, приимú моления наша и ко Всемилостивому Богу принеси, о еже простúти нам всякое прегрешение и помощú нам стати протúву кóзнем диáвольским, да избáвльшеся от скорбей, болезней, бед и напастей и всякаго зла, благочéстно и праведно поживем в нынешнем вéце и сподобимся предстáтельством твоим, аще и недостóйни есмы, вúдети благая на земли живых, слáвяще Едúнаго во святых Своих слáвимаго Бога, Отца, и Сына, и Святаго Духа, ныне и во веки веков. Аминь.

Ина молитва

О священная главó, преподóбне отче, преблажéнне Никúфоре прокаженный! Не забýди убогих твоих до конца, но поминай нас всегда во святых твоих и благоприятных молитвах к Богу. Моли за ны, долготерпелúвый отче, яко имéяй дерзновение к Небесному Царю: не премолчú за ны ко Господу, и не презри нас, верою и любóвию чтущих тя. Поминай нас, недостойных, у Престола Вседержúтелева, и не престáй моляся о нас ко Христу Богу, ибо дана тебе бысть благодать за ны молúтися. Не мним бо тя сýща мéртва: аще бо телом и преставился еси от нас, но и по смерти жив сый пребывáеши. Не отступай от нас духом, сохраняя нас от стрел врáжиих и всякия прéлести бесóвския и козней диáвольских, отче наш добрый. Аще бо и мощей твоих рака пред очúма нáшима видима есть всегда, но святая твоя душа со Ангельскими вóинствы, со безплóтными лики, с Небесными силами, у Престола Вседержúтелева предстоящи, достойно веселится. Вéдуще убо тя воúстинну и по смерти жúва сýща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, да невозбранно прéйдем от земли на Небо, от мытарств же горьких, бесов воздушных князей и от вéчныя муки да избавимся, и Небéснаго Царствия наследницы да будем со всеми праведными, от века угодившими Господу нашему Иисусу Христу: Емýже подобает всякая слава, честь и поклонение, со безначальным Его Отцем, и с Пресвятым и благим и животворящим Его Духом, ныне и присно и во веки веков. Аминь.