Акафист преподобному Никифору Прокаженному

Акафист преподобному Никифору Прокаженному, чудотворцу 

Служба

Акафист word

Акафист pdf

Кондак 1

Избрáннаго воина Владыки Небéснаго, адаманта терпения, небосвéтлую стáмну Святáго Духа, сшéдшеся, вéрнии, да восхвалим. Ты, же премúрный отче, яко óбщник страдáний нашего Искупителя, дерзновéнно молися о нас, прокажéнных страстьмú, да зовем ти:

Радуйся, многотерпелúвне отче Никúфоре, недужным скорый помóщниче.

Икос 1

Ангельскую души чистоту и к вышним стремлéние издéтска явил еси, преподобне, тéмже мира Зиждитель лишéньми тя в часть Себе отделú и в чадо возлюбленное восприя. Ты же, детище благоугóдливое быв, от земных родителей сирóтное, обáче Бога отцем неразлучно имéвшее, ныне от нас приимú славословия сицевáя:

Радуйся, úмже утéшатся скорбная сердца,
радуйся, úмже стрáждущии прославят Творца;

Радуйся, кротостию от юности преудобрéнный,
радуйся, послушанием преукрашéнный;

Радуйся, к житию крестному от юности предызбрáнный,
радуйся, к подвигу доблемýдренному призвáнный;

Радуйся, тúхостное и незлобивое отрочá,
радуйся, на пáжитех смиренномýдрия упасéнное овчá;

Радуйся, яко в скорбех и болезнех руце о нас воздевáеши,
радуйся, яко крестоношению верныя научáеши;

Радуйся, крúтяном теплое заступлéние,
радуйся, малодушным нам в бедáх укреплéние.

Радуйся, многотерпелúвне отче Никúфоре, недужным скорый помощниче.

Кондак 2

Видя тя Бог человека úстинна, непорочна, праведна, велие испытание тебе посылает, аки злато в горнúле тя искушая, яко да Иовле крепкодушие во образ всем верным явúши, úмже и стал еси протúву уныния волн, находящих на тя, егда язя прокáзы на теле твоем узрéся. Тем, сию потаúти хотя, на чужедáльний корабль восхóдиши и града Александрии достизáеши. Мы же, упование твое на Единаго Благоутрóбнаго зряще, вопием Тому: Аллилуия.

Икос 2

Рáзумом любомудрым службы Божия во граде велúцем воспевáеши, отонýдуже и во Святую Землю во исполнение желания твоего тéплаго преплывáеши, тáмо пред Крестом Христовым и Гробом Его живоносным молитвы сердéчныя вознося и глубину печали своея обнажáя. Тéмже, в Александрúю обратúвся, единому от архиереев тýгу свою исповéдаеши и на Хиóс ко святому Анфúму áбие отсылáешися. Мы же, премудрому Промыслу о тебе дивящеся, воспевáем:

Радуйся, в скорби велицей надеждою на Отца Небеснаго себе ограждáяй,
радуйся, в печали деннонóщно молитву сердéчную проливáяй;

Радуйся, сладкопéснивый Церкве Христовы слáвие,
радуйся, рук воздеянием низпосылáяй разслáбленным здрáвие;

Радуйся, лéпотою песнопéний свящéнных измлáда пленéнный,
радуйся, ангелоглáсным многими наречéнный;

Радуйся, недугом приявый Божие всыновлéние,
радуйся, в немощи явúвый Евангельских добродетелей прозябéния;

Радуйся, яко бысть Весéлие сéрдца тебе Иисус Сладчáйший,
радуйся, пéрвее быв отрéбие миру, ныне же ему — дар высочáйший;

Радуйся, егóже побéдами Хиóс величáется,
радуйся, егóже жительством козни врáжия обличáются.

Радуйся, многотерпелúвне отче Никúфоре, недýжным скорый помóщниче.

Кондак 3

Силою Вышняго укрепляемь, во отóце Хиóсстем на многая лета водворяешися, и зде, яко Ангела Божия, тя преподобный Анфúм сретáет, в нарóчитую прокажéнных врачéбницу тя поселяя, раны твоя телéсныя обязýя и духóвное попечение взéмля о крестонóсней душú твоей. Ты же, таковыя милости от волею Распятаго и Его угóдника приéмля, благодáрственная восписýеши: Аллилуия.


Икос 3

Имея велие к храму Божию усéрдие, в цéрквице святáго Лазаря, друга Господня, у лечéбницы на всяк день в молéниих и пéниих привитáеши, пред иконою дивною Богородицы от сéрдца, скорбию теснúмаго, вопия. Ея же чудесы не токмо на хáртии, но и в души напечатлéв и благоутрóбия бéздны от Всемúлостивыя восприят, не престáй и ныне руце к Ней простирáти о спасении нас, возносящих ти сицевáя:

Радуйся, Цéрковию Бóжиею воспитáнный,
радуйся, мáнною словес Евангельских препитáнный;

Радуйся, яко целúши печали лютое неможéние,
радуйся, яко ходáтайствы врачýеши уныния смертное болéние;

Радуйся, яко душéвныя наши стрýпы молитвою за ны умягчáеши,
радуйся, яко разслáбленныя телом и нерадúвыя бодростию своею духовною возставляеши;

Радуйся, удаляяйся от всякия лукáвыя вещи,
радуйся, изведéнный от мысленнаго Египта железныя пéщи;

Радуйся, Богородице светлое гласовáние,
радуйся, ум оградúвый Священным Писанием;

Радуйся, óбразе и правило Божиих песнопéвцев,
радуйся, сопричáстниче страстотéрпцев.

Радуйся, многотерпелúвне отче Никúфоре, недýжным скорый помóщниче.

Кондак 4

Бурю смятений и попечений мирских на пристанище тихое пременúл еси, и, гнушáемь от человек, маргарúт драгоцéнный Всетворцý показáся. Тем, ничесóже стяжáв, сокрóвищем мудрых советов от богопросвещéннаго стáрца и писаний святоотéческих обогащáешися, непрестáнно хваля тáко к пользе душéвней Устрóившаго: Аллилуия.

Икос 4

Слыша Христос Многомúлостивый молúтвы твоя и зря сердца твоего сокрушéние, руку к тебе простирает: приидú ко Мне, чадо труждáющееся и обременéнное, и Аз упокою тя. Ты же, от отца духóвнаго пострижéние восприúм, взем иго Господне благое на рáмо, крóтости и смирéнию по вся дни от Него научáшеся и благодáрственная возношáше. Мы же, таковым щедротам Спаса дивящеся, похвальная ти воспевáем:

Радуйся, в новаго человека богосотворéннаго облечéнный,
радуйся, во одежду веселия оболчéнный;

Радуйся, целомудрия дивное благоухáние,
радуйся, помощи Божия приявый обетовáние;

Радуйся, горьковóдная мiра Крестом Христовым усладúвый,
радуйся, себе укорéние в краеугóльный камень терпения положúвый;

Радуйся, жития сýетнаго печалей Промыслом отсечéнный,
радуйся, не ктомý себе жúти, но Умершему за ны и Воскрéсшему посвящéнный;

Радуйся, в рýце Создáтеля всецело себе предáвый,
радуйся, воли своея отвержения возжелáвый;

Радуйся, яко тобою монáшеский лик украшáется,
радуйся, яко тобою сýщии в лютых нéмощех укрепляются.

Радуйся, многотерпелúвне отче Никифоре, недýжным скорый помóщниче.

Кондак 5

Боготéчно твое житие и предúвно явúся, к разсуждéнию бо послушанием устремúлся еси, преподóбне, в лечéбней калúбице, яко в пустыни, со страстьмú, яко зверьми дóблественне боряся, побеждая и побеждáяся, падая и возставая, молитвы никáкоже отступая и простирая длани своя Простéршему длани Божéственнеи на Пречúстем и Живонóснем Кресте, яко да в будущем Царстве Его пéти возмóжеши немóлчное: Аллилуия.

Икос 5

Видим тя, преподóбне отче, вертогрáдаря, цвéты прекрáсныя и древá благовúдная изращáюща, Вышнему же Вертогрáдарю добродетелей сад преиспещрéнный, посредé терний скорбей и напастей процветший. Темже, угодниче Божий и дивный отче, припáдающе к стопам твоим, просим: Троице Пресвятéй благосéрдствуй о нас, яко да согрешения своя ýзрим и, покаянием умудрéннии, не престáнем, благодаряще, возсылáти тебе таковáя:

Радуйся, яко от кóрене повиновéния смирение проращáеши,
радуйся, яко на ветви духóвней якоже новый крин прозябáеши;

Радуйся, бдения и трезвéния дивное благоухáние,
радуйся, терпеливодýшию веру вменúвый во основáние;

Радуйся, розгó, отреблéнная Вышним, тéмже и многоплóдная,
радуйся, грехмú иссушéнным рекó многовóдная;

Радуйся, умом зловрéднаго целомудренно отбегáяй,
радуйся, Священным Писанием прúсно внимáяй;

Радуйся, якоже кипарúс, посредé хлада мук благодушием зеленéеши,
радуйся, якоже медунúца мироухáнная, пред Зиждúтелем благоговéеши;

Радуйся, от егоже устен Господня хвала возсылáется,
радуйся, úмже строптúвии и ропотлúвии славослóвию научáются.

Радуйся, многотерпелúвне отче Никúфоре, недужных скорый помóщниче.

Кондак 6

Проповéдник святоотеческих монашеских дéланий является ти богогласный Анфим, ко трезвéнию, страху Божию, памяти смéртней и молчанию тя управляя, и тáко зáповедьми Евáнгельскими устрояет душéвныя струны твоя, яко да мусикúйская Духу Святому цевнúца содéлаешися, и о тебе воспевáет Троице Пресвятей: Аллилуия.

Икос 6

Возсия в тебе разум истинный, úмже всячески к послушанию устремился еси, богонóсе, откровение бо стяжал еси, отче, úскреннее, помыслы истязýя, кормчему своему кормило вручив и тем основание духóвнаго восхождения полагáя; в таковéм предúвнем смирении помянý Тя Господь и украсú добродéтельми душу твою. Тéмже от нас приимú таковая:

Радуйся, высокомýдрие мира в буйство вменúвый,
радуйся, Иисýсову память в сердце своем водрузúвый;

Радуйся, Христý подражáтелю, нас ради обнищáвшему,
радуйся, óбщниче прежде бывшим Отцéм, дóльний покой попрáвшим;

Радуйся, Божиих ради хотéний своя потребúвый хотéния,
радуйся, в простотé повинýяся, дóбре прéйде течéние;

Радуйся, паче кéдра ливáнскаго в úстиннем дéлании укоренúвыйся,
радуйся, Послушлúвому даже до смерти крéстныя во след устремúвыйся;

Радуйся, яко псалтúрь яснозвýчная, стезю к покаянию воспевáяй,
радуйся, яко труба богоглáсная, нерадúвыя к деланию пробуждáяй;

Радуйся, иноком новоначáльным звездó путевóдная,
радуйся, путем истомлéнным древо высóкое и сладкоплóдное.

Радуйся, многотерпелúвне отче Никúфоре, недýжным скорый помóщниче.

Кондак 7

Хотящу ти заповедь Евангельскую испóлнити, во озлоблéнии болéзненном всячески незлóбием и благодýшествием сияше, многострадáльне отче Никúфоре, кадило Христу благовóнное и приношение святóе. Тéмже блáгости и братолюбия достúгл еси высоты, Духом Святым исполняяся, иным прокажéнным, úнокиням обители Пренепорóчныя Помóщницы и нам, немощным, образ быв, кáко подобает любóвию к Богу и ближнему преспевáти, с нúмиже вкýпе восписýем о тебе Вышнему: Аллилуия.

Икос 7

Новый явúся Иов, дóблестию в страдáниих и пóдвигом великодýшия вся болящия укрепляяй и наставляяй, Богом возлюбленный трýдниче, мужемýдренный ратобóрче, тихости и покóрности воле Божии óбразе. Тéмже, сам быв оструплéн, наша раны благосéрдными заступлéнии обязýеши, по достоянию воздающих ти таковая:

Радуйся, душевнаго мира гýсле согласная,
радуйся, молитвы сердéчныя песне прекрасная;

Радуйся, душú своея ризу слезáми радостотворными очищáяй,
радуйся, плачем Вседержителя к милости приклоняяй;

Радуйся, всеусéрдно устремúвыйся к богоугождéнию,
радуйся, пред очами Владыки обретый благоволéние;

Радуйся, уязвленным самолюбием целéбнейший плáстырю,
радуйся, блуждáющим в пóхотех плоти добрый путевождю и пáстырю;

Радуйся, яко Христос твоя присно содéлася Радость,
радуйся, яко имя Его бысть тебе вышняя сладость;

Радуйся, úмже саможалéние и малодýшие исправляются,
радуйся, úмже премудрость Промысла Божия познавáется.

Радуйся, многотерпелúвне отче Никúфоре, недýжных скорый помóщниче.

Кондак 8

Странен, премирне, ты показáся миру, нечистотé его не прикасáяся, тéмже и церковь содéлася Богу Живу, Дух бо Святый приúде и вселúся в тя, дóбляя мужества главúзно, и очисти тя от всякия скверны. Ты же, молитвою священнодéйствуя и присно грéшника себе мня, во удивлéнии зовяше: Аллилуия.

Икос 8

Весь бе урáнен, и в ребрó прободéн, и ослеплéн, благодарною же душею паче солнца сияя; злый же недуг, яко мучитель, нещадно тя истязаше. Обаче удом твоим отсекаемым, ты немолчно пояше: да будет, Господи, жертва моя душевная благоприятна пред Тобою. Не остави, отче, предстательством нас, таковей твоей доблести ужасающихся, оструплéнных грехми, похотьмú ослепленных, любовию Ти вопиющих:

Радуйся, Вышнему всесожжение словесное,
радуйся, сущим дóлу дарование Небесное;

Радуйся, пакостника плоти смирением попаливый;
радуйся, телесному крестоношению мысленное распятие совокупивый;

Радуйся, славословия Всещедраго кимвале богокрасный,
радуйся, трезвения органе златогласный;

Радуйся, яко крепкостоянием твоим в скорбех научаемся,
радуйся, яко худостию риз твоих вразумляемся;

Радуйся, яко терпение нищаго Лазаря показал еси,
радуйся, яко Моисееву кротость явил еси,

Радуйся, унынием истязуемым духовная отрадо,
радуйся, гневом жегомым Небесная прохладо.

Радуйся, многотерпеливне отче Никифоре, недужным скорый помощниче.

Кондак 9

Всякое благодарéние поощряет Дающаго éже умнóжити даровáния; твоя же душа в славословии отнюд не преставáше, сего ради свыше великия дары приял еси, Духа Святаго сосуде избранный. Испросú нам в терпении обстояний понé мало ти подражáти, и в болéзнех благодáрственная присно от сердца сокрушеннаго Богови возносити: Аллилуия.

Икос 9

Ветия лжемудрствующия умолкáют, недоумéюще крéстнаго жития силы: елúцы бо Крест приемлют желанием, душевное исцеление взéмлют. Ты же, премúрный отче, от претерпéния скорби плотскúя к видению и славе Креста возшел еси и велию благодать притяжáл еси болезни целúти к тебе приходящих любóвию и воспевáющих таковая:

Радуйся, благословляяй Господа на всякое время,
радуйся, безропотно пронесый тягчайшее бремя;

Радуйся, возненавúдевый славу мимотекýщую,
радуйся, отвергúй суету многословýщую;

Радуйся, паче богатства тленнаго Христово поношение вменúвый,
радуйся, тесный путь благословúвый;

Радуйся, купéле Силоáмская разслáбленным грехми,
радуйся, цельбó ослепленным похотьмú;

Радуйся, ломóтныя и опýхольныя болезни отгоняяй,
радуйся, моры губúтельныя уставляяй;

Радуйся, яко в прокажéнней плоти Ангельскою чистотóю сияше,
радуйся, яко во озлоблéниих благость являше.

Радуйся, многотерпелúвне отче Никифоре, недужным скорый помощниче.

Кондак 10

Спасти хотя люди Афúнския, душевными и телесными болéзньми стрáждущия, Промыслúтель Премудрый тя, кротчайший Никифоре, яко ангела утешителя к ним посылает, наставник же твой словесы таковыми свящéннику при лечéбнице Евмéнию тя предваряет: сей маргарит прекрáснейший, сокровище Божие и совершенна монаха рáдостию вси приимите, воздающе Богу по достоянию: Аллилуия.

Икос 10

Стена содéлался еси прокаженным и страждущим во граде Афúнстем, тúхостию и благоволением Апостолу подражая, во всяцем внимании жительствуя, к согласию, миру, святыне и благоговéнию вся наставляя. Тéмже и образ нам показался еси, еже кáко подобает сердечным служением во псалмéх, и пениих, и песнех духовных преспевáти, сего ради яко едúнеми усты возносим ти сицевáя:

Радуйся, благодарения радостию блистáяй,
радуйся, сострадания светлостию вся увеселяяй;

Радуйся, Давúдовою простотою отгнавый врáжия злоковáрствия,
радуйся, нищетою духа блаженство стяжáвый Вечнаго Царствия;

Радуйся, суесловие попалúвый молчанием,
радуйся, малодушие потребúвый Вышняго величанием;

Радуйся, яко Евангелие достояние ума своего сотворúся,
радуйся, яко любы неотпáдающая в тебе воцарúся;

радуйся, яко к молению непрестанному верныя наставляеши,
радуйся, яко к духовному разуму страждущия управляеши;

Радуйся, в пещи безмерных болезней палúмыя оросúвый,
радуйся, мнóзи во глубине немощи сýщия исцелúвый.

Радуйся, многотерпелúвне отче Никифоре, недужным скорый помóщниче.

Кондак 11

Пение всеумилéнное подобает ти, молúтвенниче неусыпный: служителю бо Евмéнию в кéллию к тебе тайно вшéдшу, узрé тя на воздýсе молящася, и, разслаблéние членов твоих, зрения и ног лишéние ведая, ужáсся той, возопив: Аллилуия.

Икос 11

Светосияет нам образ твой, именем и дéлы победонóсче, к познанию немощи своея нас, малодушных и ропотливых, управляя и вразумляя. Темже недоумéюще, како смертней плоти твоей истлевающей, по вся дни обновляшеся, яко духодвúжная арфа, выну богослáвная бряцáя, дивúмся и приносим ти таковáя:

Радуйся, любóвию Христовою прободéнный,
радуйся, живоносным Крестом Его оживотворéнный;

Радуйся, якоже Даниил во рву на Единаго уповáяй,
радуйся, якоже óтроцы в пещи Благоутрóбнаго восхваляяй;

Радуйся, Церкве златоковáнный светúльниче,
радуйся, рачения еже к Богу таúнниче;

Радуйся, яко огнем боления вéчнаго пламене избéгл еси,
радуйся, яко силою Духа немощь плоти препрéл еси;

Радуйся, сладкопéвче, Ангелом собесéдниче,
радуйся, гýсле молитвы, благодáтныя жизни снаслéдниче.

Радуйся, многотерпелúвне отче Никифоре, недужным скорый помощниче.

Кондак 12

Благодати чудотворений ковчег явился еси, богатодáрный отче, и по блажéнней кончине нас благоутрóбием и помощию не оставляеши. Всем же в скорби к мощéм твоим и образу притекающим, подаéши ослáбу душевную и телесную, с ними Всемилостивому возсылáя теплое: Аллилуия.

Икос 12

Пение всеумилéнное не престаем приносúти тебе, благоувéтливый отче, ты же сие приими от недостойных устен и к Богу рýце твоя воздевáти о нас не престáй, вопиющих ти таковая:

Радуйся, печáльми болезненными обретый безпечáльное упокоение,
радуйся, до конца претерпев, райская улучúвый Селения;

Радуйся, грóздие, в точиле скорбей вино источúвшее,
радуйся, миро, благоуханием добродетелей вся ны увеселúвшее;

Радуйся, токи чудес изливáяй,
радуйся, мúлостию к болящим не оскудевáяй;

Радуйся, мучений пучину окормлéнием Слова преплывый,
радуйся, вóи лукáваго крепкодýшием погубúвый;

Радуйся, трясáвицею и огнéвицею стрáждущия уврачевáвый,
радуйся, мнóгия беды от почитающих тя отгнáвый;

Радуйся, мúлостиве, блаженства Небéснаго ныне наслаждáяяйся,
радуйся, нищий духом, благодати богатно присно причащаяйся.

Радуйся, многотерпеливне отче Никифоре, недужным скорый помощниче.

Кондак 13

О богомудре Никифоре Прокаженный! Ты болéзньми ссекáем, недýгами стрýжемь, житие на одре болезни лютыя препровождáя, волю Божию о Христе всяко испóлнил еси, еже есть всегда рáдоватися, непрестáнно молúтися, о всем благодарúти. Ныне же, светоявлéнне, нашу печаль утоли и ухо твое к прошéнием нашим мúлостивно приклони, и к рáдованию, молитве и благодарéнию упрáви о тебе вопиющия: Аллилуия.

Молитва

О, благодарный страдáльче, молитвы таúнниче, милостивый чудотвóрче, преподобне отче Никифоре!

Кто убо терпению, смирению, трезвéнию, благоувéтливости, доблести и крóтостной премýдрости твоим не подивúтся?

Веруем, яко по преселéнии твоем ко Господу вéлию мзду улучúл еси и многою благодáтию облéклся еси, многоболéзненныя бо, стрáждущия, ничáщия нúзу, разслáбленныя, нúщия и убóгия заступлéнием и попечением своим не оставляеши и многая и дивная чудеса на них изливáеши.

Тéмже, сам искушен быв, помозú и нам, страстьмú, и похотьмú, и своеволием искушáемым. Вéмы, яко вся находящая на ны грех ради наших восприяхом. Обáче дерзновенным заступлéнием твоим пред Человеколюбцем воздвúгни ны, в пучине нéмощей обдержúмыя, возстáви на одре озлобления сýщия, облегчú недуги, здравия испросú, болéзни укротú, утешение божественное даруй.

Припадú в Небесных Чертогах к подножию ногу нашего Искупúтеля, не престáй воздевáти рýце твои о нас, недостойных и окаянных, по вся дни падающих и возстающих, обáче надежды на Его милосердие не оставляющих, яко да твоими ходáтайствы укрепляеми и исцеления душ восприéмше, грехов прощение улучúм и Царство Его вечное наслéдим и с тобою кýпно да воспоéм благодáрственная в Троице славимому Богу нашему, Отцу, и Сыну, и Святому Духу, ныне, и присно, и во веки веков. Аминь.