Песнь 1
Ирмос: Воду прошéд, яко сушу,/ и егúпетскаго зла избежав,/ израильтянин вопияше:// Избавителю и Богу нашему поим. Пресвятая Богородице, спаси нас.
Многими мýчими злыми,/ и, к Тебе приходяще,/ избавление сих обретаем/ святою Твоею иконою,// Дева Мáти Христа Бога нашего.
Дево Неискусомýжная, Твоими мольбáми/ прощение даждь грехов моих,/ úмиже Зиждителя всех и Бога моего,// Твоего Сына прогневах, Непорочная.
Помилуй, Пречúстая Марúе,/ прибегáющия к иконе свящéнней Твоéй,/ еяже ради Ти велúчия сотворю,// Бога Всесúльнаго Рóждшей.
Виждь мое озлоблéние, Благая,/ виждь печаль мою и в радость преложú./ К Тебе бо ныне притекая, Дево,// разрешéния обрести лютых чáю.
Песнь 3
Ирмос: Нéбеснаго круга Верхотвóрче, Господи,/ и Цéркве Зиждителю,/ Ты мене утверди в любви Твоей,/ желаний краю, верных утверждение,// Едúне Человеколюбче.
Покров Тя знаю и Стену/ христиáном, Пречистая,/ яко Зиждителя всех и Господа Родúтельницу./ Мáтерними Твоими предстáтельствы Того умоли// о мне, Его прогнéвавшем и согрешúвшем.
Божие дело исполняем,/ Святых Отцéв веление, Богоневéсто,/ любéзно иконе покланяющеся Твоей, Всепéтая./ Честь бо сия к Первообразу восходит,// яко великий учит Василий.
Тя молю, Госпожé Безмерносúльная,/ иконы ради Твоея Кúккския,/ éюже богáтную благодать излияла еси,/ помилуй вся Тя верно призывáющия,// Мúлующая дéлы сýщи.
Кúккоса Хранúтельнице, радуйся,/ от иконы Твоея благодать точащая,/ всякаго мúлующая/ и обители Кúккския сущи Утверждение./ Величие бо Свое и Бога показала еси, Мáти,// взывающим Ти всегда.
Песнь 4
Ирмос: Услышах, Господи,/ смотрения Твоего таинство,/ разумéх дела Твоя// и прослáвих Твое Божество.
Помыслóв моих помрачéние/ и лукáваго ухищрéния, Всецарúце,/ расточú Твоею сúлою// и тишину даждь сердцу моему.
Великая сотворила еси/ чрез икону Твою, Мати Дево,/ от сухоты и обстояний// избавляющи Тя глашáющия.
Спаса рóждшая, даруй спасение/ с верою Ти притекающим, Всенепорóчная,// призывающим имя Твое.
Упование и Помощь отчаянным/ Ты еси, Госпожé,/ тéмже Тя молим:// спаси, ущéдри заступлéнии Твоими.
Песнь 5
Ирмос: Просвети нас повелении Твоими, Господи,/ и мышцею Твоею высокою// Твой мир подáждь нам, Человеколюбче.
Исполни радости сердца, Пречúстая,/ исполняющая прошéния// благоговéйно молящихся Ти.
Прегрешéния наша потреби, молимся,/ Сына Твоего прогнéвавших, Мати Божия,// Яже Ангелов Превысшая.
Избави, Чистая,/ обдержáщих злых и обстояний// к покрову Твоему благоговéйно ныне тщáщияся.
Спаси ны туне,/ Спаса Родительнице,/ любóвию приступáющия Ти// и честному Твоему ныне образу покланяющияся.
Песнь 6
Ирмос: Очисти мя, Спасе,/ мнóга бо беззакония моя,/ и из глубины зол возведи, молюся,/ к Тебе бо возопúх, и услыши мя,// Боже спасения моего.
Избавляемся искушéний/ чрез Твою, Всенепорóчная,/ икону чудотворную,/ éюже совершила еси// многая и великая, о Всецарúце, чудеса.
Яко на мори и на суше удивила еси,/ преслáвная совершáющи,/ вéрно взывáющия Ти,/ тако ныне удиви на мне, Дéво,// чудное имя Твое.
Спаси мя, Богомáти, Кúккоса Заступнице,/ благодать богатотвóрную/ от Бога богáтно приúмшая/ дéяти дивная// на благодеяние вéрно Ти вопиющим.
Облагодатú мой ум/ и сердце очúсти от лукавых помыслóв,/ Богоневéсто Владычице,/ печалей избави, Обрадованная,// Надéждо и Предстáтельство мое.
Песнь 7
Ирмос: От Иудеи дошéдше, óтроцы, в Вавилоне иногда верою Трóйческою пламень пещный попрáша, поюще: отцéв Боже, благословен еси.
Все упование мое/ на Тя возложúх, Девице Богоблагодáтная,/ яко великосúльную,/ всесúльнаго Мáтерь Слова,// Егоже благословим со Отцéм и Духом.
Икону Твою вси лобызáем,/ Отроковице Непобедимая,/ яко чудесы безчúсленными/ на земли и на водáх прослáвленную, Всенепорóчная,// благодáтию Твоею, Святая Владычице.
Привлецы дожди и благорастворéнныя вéтры, от образа благодать искипáющая, úмже великая воúстинну показа Господь, яко Богом облагодáтствованная, молитвами Твоими.
Плоти неможéния/ и душéвныя недуги, Неисчетносúльная,/ исцелú, Дево,/ яко имýщи дерзновение к Сыну Твоему,// Чистая, едúна Благословенная.
Песнь 8
Ирмос: Царя Небéснаго,/ Егоже поют вои áнгельстии,// хвалите и превозносите во вся веки.
Матерь всех Царя/ воспеваем вси и славослóвим,// аки Благодатную.
Добродеяния точащую/ яже в Кúккосе икону Девы/ ныне да почтúм вси,// яко в чудесéх мнóзех возблагословéнную.
Ущéдри люди Твоя,/ к покрову Твоему приступáющия, Отроковúце,// яко да умнóжиши велúчие Твое.
Песнь 9
Ирмос: Воúстинну Богородицу/ Тя исповéдуем,/ спасéннии Тобою, Дево чистая,// с безплóтными лики Тя величáюще.
Помилуй грешную мою душу,/ юже окаянну сотворúх, Чистая,// и избави мя óгненнаго мучéния.
Богоневéсто Всесвятáя,/ спаси мя молитвами Твоими,/ Спаса мира в мир Приведшая,// яко да воспою Твою непобедимую силу.
У иконы Кúккския, Обрáдованная,/ Яже верных мольбам внимáющи,/ вонмú ныне и мне,// благодáтию орошающая.
Дéво Богородице, приимú благоприятне/ éже по силе дар, Всенепорочная,// и ослáби, остáви ми, Владычице, прегрешéния.
Перевод выполнен по изданию: ᾿Εφραμ ὁ ᾿Αθηναῖος, ἀρχιμ. ῾Η Περιγραφὴ τῆς σεβασμίας καὶ βασιλικῆς Μονῆς τοῦ Κύκκου. ῾Ενετία, 1751.
При редактуре убраны некоторые повторы.
Смотрите также: Сказание об обретении иконы Пресвятой Богородицы Киккской