Стихиры и тропарь опубликованы: "Жития Кипрских святых/ Сборник. Сост. Л. А. Чуткова. — М., 2017. — 962 [4]. — ИС 11-110-1009. C. 391 — 393.
Тропари и кондак св. мч. Фотине
Месяца августа втораго дня память преподобныя матери нашея
ФОТИНИИ КИПРСКИЯ, КАРПАССИЙСКИЯ
Творение монаха Акакия
На «Господи, воззвах», глас 4.
Подобен: Яко добля в мученицех:
Фотúнию пóстницу,/ свéту соимéнную,/пéсньми восхвáлим немóлчными,/ Божия благодáти пучúну,/ скúнию свéтлую Утéшителя Честнáго,/ Карпассúйское удобрéние,/ и благоухáние миротóчное Кúпра,/ слáвяще сея неспрестáнная борéния// во стезé избрáнней.
Очéс врачевáние/ вéрнии, да восхвáлим,/ Фотúнию божéственную и чудотóчную,/ и покланяющеся пещéре подвигóв ея,/ и грóбу честнóму,/ в вéси богомудраго Андронúка пребывáющу,/ уповáнием возопиúм:/ помрачéния грехóвнаго// нас молúтвами твоими избáви.
Оргáн безстрáстия, трубý воздержáния/ и любвé свирéль всесоглáсную,/ сладкозвýчную áрфу трезвéния/ и молúтвы псалтúрь,/гусль поста сладкопéснивую,/ да почтúм, празднолюбцы, Фотúнию,/ лúру Дýха,/ яже безмóлвия труды// Кúпрский отóк веселит.
На стихóвне слава, глас 8:
Тáинственных благоухáний мирополóжницу,/ дéвства сияние,/ равноáнгельнаго жúтельства óбраз,/ Фотúнию пóстницу,/ песньми да прослáвим,/ сия бо не имýщи зде пребывáющаго града,/ грядýщаго взыскá,/ к семý же и мýжественная борéния приложú,/ плóти своея дебельствó истощáющи/ всенóщными стоянии:/ тем и áнгельскаго доброслáвия/ мнóжайши достúгши,/ непрестáнно мóлит/ мúра подáтеля Бóга/ мир нерушúмь даровáти вселéнней// и душáм нашим вéлию мúлость.
Тропарь, глас 1:
Карпассúи похвалó и Кúпра облистáние,/ немощных укреплéние/ и слепых прозрéние,/ вéрно притекáющим/ ко хрáму твоему, слáвная,/ выну подавáй цельбы рабóм твоим,/ да восписýем благодáрственная,/ Фотиние преподóбная,/ невéсто Христóва,/ дево прекрáсная:/ слáва Прослáвльшему тя,/ слáва Венчáвшему тя,// слáва Действующему тобою всем исцелéния.
Ин, глас тойже. Подобен: Собора Перваго:
|
К |
арпассúан
похвалó,/ киприóтов облистáние,/ немощных укреплéние/ и слепых прозрение,/
верою притекáющих тебе тéплою,/ богодухновéнная Фотúние преподобная:/ в пещéре
бо бдéнии и молúтвами/ Гóспода к мúлости приклонúла еси./ Слава Прослáвльшему
тя Христу,/ слава Давшему ти чудéс благодáть,\ слава Действующему тобою всем
исцелéния.
Канон, глас 8,
егоже краестрочие: Световидную подвижницу Фотинию пою. Х.М.М[1].
Песнь 1
Ирмос: Воду прошéд яко сýшу,/ и егúпетскаго
зла избежáв,/ изрáильтянин вопияше:/ Избáвителю и Бóгу нáшему поúм.
Светосиятельную вси Фотúнию
воспоúм любóвию,/ Карпасúи зарю, светúло и славу преподóбных,/ яко úстового жúтельства
óтсвет.
Удобрéние божéственное пóстниц,/
украшéние Кипра, Цéркве и жен,/ всечестное сокрóвище боголюбцев,/ тя вéрнии,
Фотúние, величаем.
Мира возненавúдевши крáсная,/
возлюбúла еси вéчная, мáти Фотúние,/ и красý юности презрéла еси,/ да Едéмскую
восприúмеши светлость.
Богородичен: Настáви рабы Твоя смирéнныя/
к Вышнему Граду и безконéчному блаженству,/ всепéтая Мати Вышняго,/ Фотúнии
прошéньми, мóлимся.
Песнь 3
Ирмос: Небеснаго крýга/ Верхотвóрче,
Господи,/ и Цéркве Зиждúтелю,/ Ты менé утвердú в любвú Твоей,/ желáний крáю,
верных Утверждéние,/ Едúне Человеколюбче.
В пещéре безвóдней/ подвúжнических
трудов воздвигла еси ристáлище,/ богомудрая мáти светоимéнная,/ слáвная Фотúние,/
презрéвши мýдро плоти нéмощь/ и юность свою.
Целúши болéзни очéс,
всечестнáя,/ к тебе приходящих вéрою/ и пóмощи взыскýющих тéпле,/ знаменонóсная
преподóбная,/ Фотúние всепéтая, Кúпрское удобрéние.
Яко свещý преднóсиши
всех Зиждúтеля,/ пóстнических болéзней
твоих, Фотúние,/ огненóсными мóлнии,/ жéстока жития и нестяжáния рáнами,/ тéмже
расточúла еси мрак, мати богоугóдная.
Богородичен: Солнцеобрáзная Дево,/ Мáти
Бога непорóчная,/ Обрáдованная Марúе,/ спасú рабы Твоя от мрáчных бед/ и искушéний
дéмонских,/ Фотúнии зелó целомýдренныя молéньми.
Седален, глас 3:
Подобен: Божественныя веры:
Подвизáвшуюся в Карпассúи,/
селения прослáвленнаго, Святый Андронúк нарицáемаго,/ похвалý и величáние отóка
Кúпрскаго,/ празднолюбцы вси, всеблагоговéйно Фотúнию/ да увенчáем пéнии, вопиюще:/
нам очи отвéрзи, во еже вúдети и возлюбúти лучшая.
Слава и ныне, глас и подобен тойже:
Преблагословéнная Дéво
Мати,/ éже свыше Укреплéние и Жéзле недýгующих,/ рабы Твоя утвердú/ и от душетлéннаго
падéния возстáви/ взыскýющих непрестанно благодати Твоея,/ да, притяжáвше сердцá
нáша к Рождествý Твоему божéственному,/ обращéнныя, Тя прославим.
Песнь 4
Ирмос: Услышах,Господи,/ смотрéния
Твоего тáинство,/ разумéх дела Твоя/ и прослáвих Твое Божествó.
Подвизáющихся жен прáвило/
и похвала богослáвная Карпасúи показáлася еси,/ Фотиние, преподóбных удобрéние.
Столпописáние одушевлéнное
добродéтели/ и трезвéния велелéпота, Фотúние,/ тебе мóлимся:/ злодеяний наших óблаки
расточú.
Карпасúан собрáние/ память
чтит твою присночестнýю, Фотúние,/ и ко твоей благодáти поспешáет/ в лютых сýще
житéйских печáлех.
Богородичен: Зиждúтеля и Господа,/ в длáнех
творéние все имýща/ Зачéншая пáче умá,/ от уныния избáви поющия Тя.
Песнь 5
Ирмос: Просвети нас повелéнии
Твоими, Гóсподи,/ и мышцею Твоею высóкою/ Твой мир подаждь нам, Человеколюбче.
Стáмна священная любве ко
твоему Жениху / и богописанный постничества суроваго хранúло,/ явилася еси,
Фотиние достойночýдная.
Лéторасле прекрáсная
воздержáния и разсуждения,/ сохраняющи, Фотиние, священный Кипрский отóк,/ той возвеселила
еси Божиею благодáтию.
Напрáвила еси дóбре,
Фотиние,/ стопы твоя на путь тесный и узкий,/ в селения Божия славы вводящий.
Богородичен: Вéчныя жизни, Богородице,/
всех сподóби Твоих рабов,/ мольбами Фотинии,/ Кипра подвижницы богомýдрыя.
Песнь 6
Ирмос: Молитву пролию ко Господу/
и Тому возвещý печали моя,/ яко зол душа моя испóлнися/ и живот мой áду приблúжися,/
и молюся, яко Иóна:/ от тли, Боже, возведú мя.
Победúвши льстúвнаго врага,/
воздержания деннонóщнаго твоего тяготáми,/ в Карпасúйстей пещере влáжней и
глубочáйшей,/ венцы восприяла еси от Господа, Фотиние,/ внýтренняя сердец человéческих
вéдущаго.
Освящáющи нашу безлунную нощь,
Фотúние,/ неизсякáющих молений твоих зарями,/ не престáй являющися, преподобная,/
яко свет Христов незаходúмый в сердце приúмшая/ и источник светонóсен благостыни.
Яко бурный поток чудес
воспевáюще тя,/ преподобная Фотúние,/ лобызаем гроб твой во умилении/ и
почерпаем воду исцелений,/ искипáющую от источника пещеры твоея,/ мáти боголюбúвая.
Богородичен: Моление о нас принеси/ Сыну Твоему и Спасу мира,/ благословенная Марúе/ и Покрове благоговейно скоротекущих к благодати Твоей:/ перстных бо Защúтельница/ и у Зиждителя Ходáтаица еси.
Кондак, глас 8. Под.: Взбранной Воеводе:
|
К |
арпассúи
светозáрную пóстницу/ и отóка Кúпрскаго/ неистощúмую сокрóвищницу,/ Фотúнию, свéтом
невещéственным озарéнную,/ яко преподобных жен блистáние/ и чудес покров концем
явльшую/ почтим, взывáюще:\ рáдуйся, светоимéнная мáти.
Песнь 7
Ирмос: От Иудеи дошедше отроцы,/ в
Вавилоне иногда/ верою Троическою пламень пéщный попрáша, поюще:/ отцев Боже,
благословен еси.
Воздержáния скрижáле,Фотúние
богонóсная,/ чистоты палáто, подвига гýсле и стóлпе девства,/ пóдвиги твоя почитáюще,/ совершáем радостно
всесвéтлую память твою.
Врачýеши недуги очéс, Фотúние,/ вкупе с единовсéльницею
твоéю Параскéвою Божéственною/ и блистáющею Лукúею, исцеляющими болезни глазныя,/
и Христа о нас умоляеши.
Ныне верных лúкове,/ Фотúние
блажéнная, к тебе прибегáем,/ святаго Андроника пещере покланяемся,/ терпеливному
твоему подвигу/ и гробу твоему священному, цельбы точáщему.
Богородичен: Кротость рабом твоим даруй,
Богомати,/ Фотинии, в Карпассии подвизáвшейся, молитвами/ и стрелы иже от врага
на ны пущáемыя/ потребú, Дево.
Песнь 8
Ирмос: Царя Небеснаго,/ Егоже поют
вóи Áнгельстии,/ хвалúте и превозносúте во вся вéки.
Храм Господень световúдный
целомудрия/ явúвшися, Фотúние преподобная,/ освящáеши вся, к тебе приходящия.
Презревши вся наслаждения
житейская,/ мати Фотúние,/ подвиги, молитвою и алчбóю/ плоть изсушúла есú.
Токмо Вышняя возлюбивши в
житии,/ Ангелом срáдоватися изшлá еси, Фотúние преподобная,/ сим подобноревнúтельная.
Богородичен: Призри молитвами на рабов
Твоих,/ Дево Марие,/ утоляя бурю душевную/ и всякия плоти нашея двизáния.
Песнь 9
Ирмос: Воистинну Богородицу/ Тя
исповéдуем,/ спасéннии Тобóю, Дéво Чúстая,/ с Безплóтными лúки Тя величáюще.
Яко светонóсную луну,/ в
Карпассúи просиявшую,/ Фотиние, тя почитаем/ и озарившую Кипр лучами благодеяний
твоих.
Радости присносýщныя сподóбльшуюся
наслаждáтися/ поем, веселящеся, Фотúнию,/ преподóбных жен ограждение.
Великих даровáний сподóбльшися,/
воспевáющия твоя исправления ныне, Фотúние,/ нестарéемаго живота сподóби.
Богородичен: С Богоносною Фотúниею, Дéво,/
непрестанно Христа молите,/ даровáтися рабом вашим крéпости и сúле.
Преподобная Фотиния, отшельница и дева, родилась и подвизалась на кипрском полуострове Карпас. Сказания, дошедшие до нас, утверждают, что святая Фотиния родилась в городке Ризокарпасо, ее родители не имели большого достатка, но были благочестивыми христианами и добрыми воспитателями своей дочери.
С самого раннего детства Фотиния отличалась от других детей готовностью от всего сердца послужить ближним. Затем она подвизалась в уединенном месте, близ селения Агиос Андроникус.
Святая — скорая помощница и чудотворица, и имеет особую благодать исцелять болезни глаз, почему и в тропаре именуется "прозрением слепых".
День памяти святой на Кипре отмечается торжественно, с крестными ходами.
После аккупации турками северной части острова, мощи святой были перенесены в селение Колосси близ Лимассола, где почивают в храме святого Апостола Андрея Первозванного.
Комментариев нет:
Отправить комментарий